2 Mic subeñob chaꞌan miꞌ ñaꞌtyañob chʌncol lac pijtyan laj cuxtyʌlel machꞌʌ yujil jilel. Dios mach bʌ yujil lot ti wʌ alʌ cheꞌ ñac max tyo baꞌan ili mulawil mi quej la cʌqꞌuentyel laj cuxtyʌlel.

3 Ti yorojlel tsaꞌ bʌ i wʌ yajcʌ Dios ti yʌqꞌueyob i cʌñob ili tꞌan. Dios Ajcotyaya lac chaꞌan tiꞌ xiqꞌuiyon c sub ili tꞌan tsaꞌ bʌ yʌqꞌueyon tic wenta.

4 Mic tsꞌijbubeñet ili jun, Tito, cheꞌ bajcheꞌ yoque calobilet yubil ti jini muꞌ bʌ lac motin chꞌujbin. Laꞌ ajniquet ti yutslel i pusicꞌal Dios, tiꞌ pꞌuntyaya yicꞌot tiꞌ ñʌchꞌtyʌlel tyʌlem bʌ ti Dios lac Tyat yicꞌot ti lac Yum Jesucristo Ajcotyaya lac chaꞌan.

5 Cheꞌ ñac tij cʌyʌyet yaꞌ ti jini lum joyol bʌ ti jaꞌ Creta bʌ i cꞌabaꞌ tij cʌyʌyet chaꞌan a wujtisan jini tsaꞌ bʌ laj quep cʌyʌ lac tyoj isan. Tij cʌyʌyet jeꞌel chaꞌan a yajcan ancianojob chaꞌan ochemoꞌ bʌ tiꞌ tꞌan Dios ti jujumpꞌej lum cheꞌ bajcheꞌ ti cʌqꞌuet ti a wenta.

6 Jini anciano yom mi yajñel ti wen chaꞌan machꞌan bajcheꞌ mi tyajtyʌl ti tꞌan. Yom juntiquil jach yijñam. Jiñʌch yom ochem bʌ tiꞌ tꞌan Dios i yalobilob jeꞌel. Jini mach yom am bʌ i tꞌʌñʌlel i yalobilob chaꞌan ti caj i tsuculel miꞌ chaꞌlen yicꞌot chaꞌan maꞌ miꞌ jacꞌ tꞌan.

7 Jini am bʌ yeꞌtyel chaꞌan i cʌñʌtyan ochemoꞌ bʌ tiꞌ tꞌan Dios añʌch tiꞌ wenta i toñel Dios. Jin chaꞌan yom ajnic ti wen. Mach yom i chan isan i bʌ. Mach yom ora mi michꞌan. Mach yom miꞌ chaꞌlen qꞌuixnijel. Mach yom i tyecheꞌ periyal. Mach yom i mulan ganar tyaqꞌuin ti machꞌʌ wen bʌ ganar.

8 Pero yom jini muꞌ bʌ i mulan i yotsan i julaꞌ ti yotyot. Yom winic mu bʌ i meleꞌ chʌ bʌ wen. Yom wen bʌ i ñaꞌtyʌbal. Yom mi yajñel ti tyoj. Yom jini tsaꞌix bʌ yʌcꞌʌ i bʌ ti Dios. Yom miꞌ wen ticꞌ i bʌ.

9 Yom i yoque wen chꞌujbin jini melel bʌ tꞌan tsaꞌ bʌ cʌntisʌnti. Cheꞌ jini chꞌujbi i ñuc isʌbeñob i pusicꞌal yañoꞌ bʌ ti jini wen bʌ cʌntisa. Chꞌujbi i sutquibeñob i pensal ti wen jini chʌncol bʌ i contrajiñob jini wen bʌ tꞌan.

10 Como an cabʌl simaroñoꞌ bʌ. Jini miꞌ chaꞌleñob lolom jach bʌ tꞌan. Miꞌ lotiñob quixtyañujob. Más ñumen miꞌ chaꞌleñob simaronlel jini loqꞌuemoꞌ bʌ baꞌan israelob.

11 Jini miꞌ cʌntisañob jini mach bʌ yom i cʌntisañob chaꞌan jach miꞌ ganarin tyaqꞌuin ti jini machꞌʌ wen. Miꞌ chꞌujbiñob i lotintyel pejtyel añoꞌ bʌ ti yan tyac bʌ otyot. Yom tijqꞌuic ti tꞌan.

12 An juntiquil winic tsaꞌ bʌ lolon yʌlʌ ti xijqꞌui ti i diosob i yʌleꞌ wʌꞌ ti ili mismo lum joyol bʌ ti jaꞌ Creta bʌ i cꞌabaꞌ. Jini ti yʌlʌ chaꞌan jini mero i piꞌʌloꞌ bʌ: Jini cretajob beleꞌ xlotyob. Ti beleꞌ ora simaroñob bajcheꞌ animal. Xwoꞌlelob. Tsꞌubob, cheꞌen.

13 Melelʌch i tꞌan jini creta. Jin chaꞌan yom maꞌ wen tsʌts ticꞌ chaꞌan weñʌch miꞌ chꞌujbiñob.

14 Yom maꞌ ticꞌob chaꞌan machꞌan miꞌ ñʌchꞌtyan jini machꞌʌ melel bʌ oñoꞌtꞌanix bʌ tꞌan i chaꞌan israelob mi jinic jini muꞌ bʌ ti xicꞌoñel machꞌʌ yom i chꞌujbiñob i sujmlel.

15 Jini sʌcoꞌ bʌ i pusicꞌal miꞌ luꞌ pensalin ti wen pejtyel chʌ bʌ tyac an. Pero jini machꞌʌ baꞌan miꞌ chꞌujbiñob, jini machꞌʌ baꞌan sʌc i pusicꞌal machꞌan chʌ bʌ miꞌ pensalin ti wen. Jinic tyo bibajax bajcheꞌ miꞌ pensalin. Bibajax bajcheꞌ mi yʌl i pusicꞌal.

16 Miꞌ lolon alob cʌñʌlix i chaꞌan Dios. Pero mach cheꞌiqui como tsiquilʌch bajcheꞌ miꞌ chaꞌleñob. Mi tsꞌaꞌlentyel. Ñuntꞌañob. Mach chꞌujbi i meleꞌ chʌ bʌ yes wen jini machꞌʌ baꞌan miꞌ chꞌujbiñob Dios.