2 Mic tsꞌijbubeñob jeꞌel jini ochemoꞌ bʌ tiꞌ tꞌan Dios muꞌ bʌ i muchꞌquiñob i bʌ ti a wotyot yicꞌot jeꞌel la quermana Apia. Mic tsꞌijbuben jeꞌel jini Arquipo muꞌ bʌ ti wersa quicꞌot lojon.

3 Laꞌ ajniquetla ti yutslel i pusicꞌal yicꞌot i ñʌchꞌtyʌlel Dios lac Tyat yicꞌot lac Yum Jesucristo.

4 Mic chʌc suben Dios wocox i yʌlʌ cheꞌ mij cꞌajtisañet ti oración.

5 Como ti cubi bajcheꞌ maꞌ wen pꞌuntyañob i chaꞌañoꞌ bʌ Dios. Ti cubi bajcheꞌ maꞌ wen chꞌujbin lac Yum Jesús.

6 Mij cꞌajtiben Dios chaꞌan jini yañoꞌ bʌ tsaꞌ bʌ i chꞌujbiyob Dios mi quej i más chꞌʌmꞌen isujm pejtyel wen bʌ muꞌ bʌ la cʌqꞌuentyel ti Cristo Jesús. Jiñʌch tsaꞌ bʌ i chꞌujbiyob Dios chaꞌan ti caj ti a wen chꞌujbi.

7 Ñoj cꞌajacña coj. Tsaꞌix a ñuc isʌbon c pusicꞌal chaꞌan chʌncol a wen pꞌuntyañob. Como jatyet hermañu, ti a ñuc isʌbeyob i pusicꞌal ochemoꞌ bʌ tiꞌ tꞌan Dios.

8 Aunque maꞌix c bʌqꞌuen c tsʌtsʌ xiqꞌuet chʌ bʌ yom a mel como Cristo ti yajcʌyon ti ajsubtꞌañon ñumel,

9 pero mucꞌ jach j cꞌajtibeñet chaꞌan ti caj chʌncox lac pꞌuntyan lac bʌ. Pablojon. Ñoxonix. Cʌchʌlon wale iliyi chaꞌan ti caj Cristo Jesús.

10 Mij cꞌajtibeñet chaꞌan a cotyan jini Onésimo tsaꞌix bʌ ochi ti calobil yubil chaꞌan tiꞌ chꞌujbi Dios wʌꞌ ti cʌchonibʌl.

11 Ti yambʌ ora lolon ajtoñel jach bʌ a chaꞌan jini Onésimo, machꞌʌ cꞌʌjnibal a chaꞌan pero wale iliyi i cꞌʌjnibalʌch a chaꞌan. I cꞌʌjnibalʌch c chaꞌan jeꞌel.

12 Mic chaꞌ chocbeñet tyʌlel cheꞌ bajcheꞌ chʌncol c choc tyʌlel c bʌ yubil. Chaꞌ pʌyʌx.

13 Com muqꞌuic i cʌytyʌl quicꞌot jini Onésimo chaꞌan a qꞌuexolʌch miꞌ cotyañon cheꞌ cʌchʌlon chaꞌan ti caj i tꞌan Dios.

14 Pero mach com c xicꞌ cʌytyʌl cheꞌ max tyo cubi bajcheꞌ a wʌlʌ. Pero cheꞌ maꞌ cotyañon mach chaꞌanic c wersa xiqꞌuet pero jini jach bajcheꞌ yom ti a bajñel pusicꞌal.

15 Cꞌoꞌojlʌch ti poj loqꞌui Onésimo chaꞌan wale iliyi mi beleꞌ ajñel a wicꞌot.

16 Mach chʌc cheꞌiqui cheꞌ bajcheꞌ lolon ajtoñel jach bʌ pero wale iliyi más weñʌch como mi yajñel cheꞌ bajcheꞌ pꞌuntyʌbil bʌ hermañu. Mic wen pꞌuntyan, pero yom a más pꞌuntyan, jatyet. Mach cheꞌic jach bajcheꞌ winic maꞌ pꞌuntyan, pero cheꞌ bajcheꞌ hermañu bʌ ti lac Yum.

17 Mi a piꞌʌlon maꞌ wʌl, pʌyʌx cheꞌ bajcheꞌ joñoñʌch.

18 Mi an chʌ bʌ tiꞌ chaꞌle a wicꞌot, mi an i bet yicꞌotyet cꞌajtibeñon.

19 Joñon Pablojon. Mic tsꞌijbuñet iliyi jun tij cꞌʌb. Añʌch c chaꞌan c chaꞌ cꞌajtisʌbeñet chaꞌan ñoj on a bet a wicꞌotyon yubil. Jin chaꞌan mij cꞌajtisʌbeñet c chaꞌañet yubil. Pero muꞌ tyo c tyojeꞌ i bet.

20 Hermañu, chꞌujbin bajcheꞌ mic subeñet chaꞌan maꞌ tijicnisʌbeñon c pusicꞌal chaꞌan ochemet tiꞌ tꞌan lac Yum. Ñuc isʌbeñon c pusicꞌal chaꞌan hermañujet ti Cristo.

21 Mic tsꞌijbubeñet como cujil isujm mi quej a wen chꞌujbibeñon c tꞌan. Mic ñaꞌtyan más ñumen mi quej a chꞌujbin bajcheꞌ tic subet.

22 Cheꞌ jeꞌel chajpʌbeñon saj mal. Como mic pijtyan i jacꞌbeñetla laꞌ woración Dios chaꞌan aqꞌuentiquetla laꞌ chaꞌ qꞌuelon.

23 Miꞌ chocbeñet tyʌlel saludos Epafras bʌ i cꞌabaꞌ. Jiñʌch c piꞌʌl ti cʌchol chaꞌan ti caj Cristo Jesús.

24 Yicꞌot Marcos, Aristarco, Demas yicꞌot Lucas bʌ i cꞌabaꞌob muꞌ bʌ i cotyañoñob ti toñel miꞌ chocbeñetyob tyʌlel saludos jeꞌel.

25 Laꞌ ajniquetla ti yutslel i pusicꞌal lac Yum Jesucristo. Amén.