JUN CHAꞌAN JINI HEBREOJOB
Dios tiꞌ chaꞌle tꞌan chaꞌan tiꞌ Yalobil
1
Ti yoque ñoj oniyix Dios tiꞌ cꞌʌñʌ i tiꞌ jini tsaꞌ bʌ i xiqꞌui yʌleꞌ chaꞌan i pejcan lac yumob ti ñoj oniyix. Cabʌl bajcheꞌ tiꞌ pejcʌyob. Maꞌan jayyajlel tiꞌ pejcʌyob.2 Dios chaꞌan tiꞌ Yalobil Jesucristo tiꞌ mele mulawil yicꞌot ti pejtyelel tsaꞌ bʌ i meleyob. Ti yotsʌ Jesús ti i yum ti pejtyelel i melbalob. Ti wiꞌil cꞌʌlʌ wale iliyi Dios miꞌ pejcañonla chaꞌan ti i Yalobil.
3 Lajal ñoj wen, ñoj ñuc i Yalobil Dios cheꞌ bajcheꞌ Dios. I tsictisʌntyelʌch Dios jini i Yalobil. Jini i Yalobil Dios ti i pꞌʌtyʌlel jach i tꞌan mi yʌcꞌ ti xucꞌtyʌl ti pejtyelel chʌ bʌ yes an ti mulawil. Cheꞌ ñac ti ujti i xotꞌeꞌ lac mul chaꞌan anic lac sʌc isʌntyel, tiꞌ buchle yaꞌ tiꞌ ñoj Dios am bʌ ti panchan chaꞌan tsiquil an i ñuclel Cristo.
Más an i ñuclel i Yalobil Dios cheꞌ bajcheꞌ ajtroñelob i chaꞌan Dios chꞌoyol bʌ ti panchan
4 Yoque i cꞌabaꞌʌch Jesucristo tsaꞌ bʌ otsʌbenti ti Dios jiñʌch i Yalobil Dios. Tsiquil más an i ñuclel Jesucristo cheꞌ bajcheꞌ ajtroñelob i chaꞌan Dios chꞌoyol bʌ ti panchan como más an i ñuclel jini i cꞌabaꞌ tsaꞌ bʌ aqꞌuenti.
5 Como maꞌan baꞌ bʌ ora tiꞌ pejcʌ Dios ajtroñelob i chaꞌan chꞌoyol bʌ ti panchan cheꞌ bajcheꞌ tiꞌ pejcʌ i Yalobil. Como Dios tiꞌ sube i Yalobil:
Calobiletyʌch. Wale ti ili bʌ qꞌuin chʌncol c tsictisan chaꞌan calobiletyʌch.
Pero maꞌan baꞌ bʌ ora tiꞌ sube mi junticlec ajtroñel i chaꞌan chꞌoyol bʌ ti panchan:
I tyatyon mi quejel cajñel.
Cristo mi quejel i yajñel ti calobil.
Cheꞌ ti tyajle ti tꞌan Cristo ti Dios.
6 Cheꞌ ñac ti cꞌoti i yorojlel cheꞌ ñac Dios tiꞌ choco tyʌlel cojach bʌ i Yalobil wʌꞌ ti mulawil, ti yʌlʌ yaꞌ ti yambʌ tꞌan:
Laꞌ i chꞌujutisañob calobil ti pejtyelel ajtroñelob c chaꞌan chꞌoyol bʌ ti panchan.
Cheꞌ ti yʌlʌ Dios.
7 Pero cheꞌ Dios miꞌ tyajeꞌ ti tꞌan ajtroñelob i chaꞌan chꞌoyol bʌ ti panchan mi yʌleꞌ:
An mi cʌqꞌuen i yajñelob cheꞌ bajcheꞌ icꞌ.
An jeꞌel mi cʌqꞌuen i yajñelob cheꞌ bajcheꞌ cꞌajc muꞌ bʌ ti lejmel.
Cheꞌ ti yʌlʌ Dios.
8 Pero cheꞌ Dios miꞌ tyajeꞌ ti tꞌan i Yalobil mi yʌleꞌ:
Dios, maꞌan baꞌ bʌ ora mi quejel i jilel a weꞌtyel.
Beleꞌ tyoj, beleꞌ wen mi quejel a chaꞌlen yumʌl.
9 Ti a mulʌ chʌ bʌ wen. Ti a tsꞌaꞌqꞌuele machꞌʌ wen.
Jin chaꞌan joñon, a Dioson, mi cʌqꞌueñet
más i tijicñʌyel a pusicꞌal cheꞌ bajcheꞌ mi yubin ti pejtyelel yañoꞌ bʌ i yalobiloꞌ bʌ Dios.
Chʌꞌʌch miꞌ tyajeꞌ ti tꞌan Cristo Dios.
10 Dios tiꞌ pejcʌ i Yalobil ti i Yum jeꞌel. Ti yʌlʌ:
C yum, jatyet ti ñoj i tyejchibal ti a mele mulawil.
Yicꞌot chan i melbalʌch a cꞌʌb.
11 Mi quejel i jilel mulawil yicꞌot chan. Pero jatyet, maꞌan baꞌ bʌ ora mi quejel a jilel.
Jini mulawil yicꞌot chan mi quejel i tsuculiyel yubil cheꞌ bajcheꞌ miꞌ tsuculiyel bujcʌl.
12 Mi quejel a bʌleꞌ mulawil yicꞌot chan cheꞌ bajcheꞌ miꞌ bʌlob tsuts.
Mi quejel ti qꞌuextyʌntyel bajcheꞌ mi qꞌuextiyel bujcʌl.
Pero jatyet mach cheꞌiqui.
Maꞌan baꞌ bʌ ora mi quejel a qꞌuextiyel. Beleꞌ junlajalet. Maꞌan baꞌ bʌ ora mi quejel i jilel a jabilel.
Cheꞌ tiꞌ tyaja ti tꞌan Cristo Dios.
13 Pero maꞌan baꞌ bʌ ora Dios tiꞌ sube juntiquil ajtroñel i chaꞌan chꞌoyol bʌ ti panchan:
Buchi wʌꞌ tic ñoj chaꞌan mi tsictiyel añʌch a ñuclel,
jintyo mi cʌqꞌueñet ti a cꞌʌb pejtyel a contrajob,
cheꞌen. Pero Cristo chʌꞌʌch ti subenti ti Dios.
14 mach cheꞌic ti subentiyob ajtroñelob i chaꞌan Dios chꞌoyol bʌ ti panchan, como ajtroñelob jach. Ti chojquiyob tyʌlel wʌꞌ ti mulawil chaꞌan i cotyañonla chaꞌan lac wenlel joñonla muꞌ bʌ lac tyajeꞌ laj cotyʌntyel ti Dios.