Jini ñuc bʌ laj coyʌntyel
2
Jin chaꞌan yom mi lac wen acꞌ ti lac pusicꞌal jini melel bʌ tꞌan tsaꞌ bʌ la cubi ame mi lac xucꞌul cʌyeꞌ. 2 Ti ñoj oniyix, Dios tiꞌ xiqꞌui ajtroñelob i chaꞌan chꞌoyol bʌ ti panchan chaꞌan miꞌ subeꞌ i tꞌan baꞌan lac yumob ti ñoj oniyix. Ti subentiyob bajcheꞌ yom ajnic quixtyañujob yicꞌot chʌ bʌ tiqꞌuil i chaꞌleñob. Xucꞌulʌch jini tꞌan tsaꞌ bʌ i subeyob. Pero jini tsaꞌ bʌ i chaꞌleyob mulil tsaꞌ jach bʌ i ñusʌyob ili tꞌan ti aqꞌuentiyob i xotꞌeꞌ i mul jiñʌch cheꞌ bajcheꞌ an i mul.
3 ¿Bajcheꞌqui mi laꞌ pensalin, cheꞌ jini? ¿Chꞌujbi ba lac putsꞌtyan tyoj mulil maꞌ wʌl mi mucꞌ jach lac lolon ñusan jini ñoj wen bʌ laj cotyʌntyel? Mach saj chꞌujbi. Como jini tꞌan chaꞌan laj cotyʌntyel jiñʌch tsaꞌ bʌ ñaxan ajli ti lac Yum Jesucristo. Ti wiꞌil ti pʌsꞌentiyonla chaꞌan ñoj melel jini tꞌan chaꞌan ti jini tsaꞌ bʌ i yoque ubibe i tꞌan lac Yum.
4 Dios ti yʌqꞌueyonla lac ñaꞌtyan chaꞌan melelʌch i tꞌan jini tsaꞌ bʌ yubibe i tꞌan chaꞌan ti yʌqꞌueyob i pʌsꞌen señʌjlel tyac tiꞌ tyojlelob yicꞌot ti aqꞌuenti i chaꞌlen ñuc tyac bʌ i melbal yicꞌot ti aqꞌuenti ñuc tyac bʌ i cꞌʌjnibal chaꞌan ti Chꞌujul bʌ i Chꞌujlel bajcheꞌ yom i pusicꞌal Dios.
Jesucristo ti poj ajni cheꞌ bajcheꞌ quixtyañu
5 Pero Dios machꞌan ti yotsʌ tiꞌ wenta ajtroñelob i chaꞌan chꞌoyol bʌ ti panchan chaꞌan i chaꞌlen yumʌl wʌꞌ ti ili mulawil chʌncol bʌ lac tyaj ti tꞌan. Jiñʌch mulawil muꞌ bʌ quejel i tsijibtisan Dios.
6 Yaꞌ ti yambʌ tꞌan tiꞌ tꞌan Dios an baꞌ mi yʌleꞌ:
Pero jatyet c Dios, ¿chutyoquiyes quixtyañu chaꞌan maꞌ cꞌajtisañon lojon como quixtyañujon jach lojon?
¿Chutyoquiyes quixtyañu chaꞌan maꞌ pensaliñon lojon como quixtyañujon jach lojon?
7 Poj jumucꞌ jach yubil ti a wʌqꞌue quixtyañujob chaꞌan machꞌan miꞌ tyajob i pꞌisol i ñuclel ajtroñelob a chaꞌan chꞌoyol bʌ ti panchan.
Pero wale tsaꞌix a wʌcꞌʌ ti tsictiyel i ñuclel quixtyañujob. Tsaꞌix a subeyob i ñuclel.
Tsaꞌix a wʌqꞌue tiꞌ wenta quixtyañujob ti pejtyelel chʌ bʌ tyac jach ti a mele.
8 Tsaꞌix a wʌqꞌueyob tiꞌ wenta quixtyañu ti pejtyelel chʌ bʌ an tyac.
Chʌꞌʌch mi yʌleꞌ ti yambʌ tꞌan tiꞌ tꞌan Dios. Cheꞌ ñac ti yʌcꞌʌ tiꞌ wenta quixtyañu ti pejtyelel chʌ bʌ an tyac, maꞌan chʌ bʌ tiꞌ cʌyle machꞌʌ baꞌan mi quejel i yochel tiꞌ wenta. Pero max tyo baꞌan luꞌ tsꞌʌcʌl ochem tiꞌ wenta.
9 Pero cujila isujm bajcheꞌ ti ujti yicꞌot Jesús. Chaꞌan poj jumucꞌ jach Dios ti yʌqꞌue chaꞌan machꞌan tiꞌ tyajbe i ñuclel ajtroñel i chaꞌan Dios chꞌoyol bʌ ti panchan. Ti aqꞌuenti i bʌcꞌtyal Jesús cheꞌ bajcheꞌ quixtyañu jach chaꞌan i ñusan wocol ti sajtyel. Chaꞌan jach i yutslel i pusicꞌal, Dios ti yʌcꞌʌ ti sajtyel Jesús chaꞌañonla ti lac pejtyelel. Pero wale iliyi ti aqꞌuenti ti Dios i ñuclel yicꞌot mi subentyel i ñuclel chaꞌan ti caj tiꞌ ñusʌ wocol Jesús.
10 I melbalʌch Dios ti pejtyelel chʌ bʌ an tyac. Tsaꞌix luꞌ mejli chaꞌan mi tsictiyel i ñuclel Dios. Cꞌʌjnibalʌch, cheꞌ jini, chaꞌan Dios ti yʌqꞌue i ñusan wocol Jesús chaꞌan chʌncol i pʌy majlel i yonlel quixtyañu yaꞌ ti panchan. Como chaꞌan ti caj ti wen ñusʌ wocol maꞌan sajlic chʌ bʌ yambʌ yom chaꞌan chꞌujbi i wen cotyañonla.
11 Joñonla tsaꞌ bʌ sʌc isʌntiyonla ti ochiyonla ti junlajal yicꞌot i Yalobil Dios tsaꞌ bʌ tyʌli i sʌc isañonla. An jach juntiquil Dios lac Tyat. Jin chaꞌan maꞌan miꞌ quisñin Jesús i pejcañonla ti i piꞌʌlob.
12 Como yaꞌ ti yambʌ tꞌan tiꞌ tꞌan Dios tiꞌ sube Dios:
Mi quejel c suben c piꞌʌlob ti chumtyʌl chaꞌañet.
Mi quejel c cꞌʌyeꞌ a ñuclel yaꞌ tiꞌ tyojel muchꞌquibiloꞌ bʌ ochemoꞌ bʌ tiꞌ tꞌan Dios.
Cheꞌ ti subenti Dios ti Cristo.
13 Yicꞌot tiꞌ tꞌan Dios, Cristo mi yʌleꞌ jeꞌel:
Mi quejel c xucꞌchocon c pusicꞌal ti Dios.
Yicꞌot mi yʌleꞌ jeꞌel:
Wʌꞌañon quicꞌot ti pejtyelel c piꞌʌlob ti chumtyʌl tsaꞌ bʌ i yotsʌ tic wenta Dios chaꞌan mij cʌñʌtyañob.
Cheꞌ ti yʌlʌ Cristo.
14 I yalobilonla Dios. An lac bʌcꞌtyal yicꞌot lac chꞌichꞌel. Quixtyañujonla. Jin chaꞌan Cristo tiꞌ chꞌʌmʌ i bʌcꞌtyal jeꞌel cheꞌ bajcheꞌ mi quixtyañu jach jeꞌel chaꞌan i yajñel cheꞌ bajcheꞌ lac piꞌʌlob. Chʌꞌʌch tiꞌ chaꞌle chaꞌan mi mejlel ti sajtyel i bʌcꞌtyal. Pero ti chaꞌ tyejchi loqꞌuel baꞌan sajtyemoꞌ bʌ. Chaꞌan ti caj ti tyejchi loqꞌuel baꞌan sajtyemoꞌ bʌ tiꞌ jisʌbe i pꞌʌtyʌlel jini am bʌ i pꞌʌtyʌlel chaꞌan mi yʌcꞌ ti sajtyel quixtyañujob, jiñʌch jini xiba.
15 Chaꞌan ti sajti yicꞌot chaꞌan ti chaꞌ tyejchi loqꞌuel baꞌan sajtyemoꞌ bʌ, Cristo tiꞌ lajmisʌbe i bʌcꞌñan sajtyel ti pejtyelel muꞌ bʌ i chꞌujbin. Como cheꞌ ñac max tyo baꞌan miꞌ chꞌujbin, cheꞌ bajcheꞌ beleꞌ cʌchʌlob ti bʌqꞌuen yubil como maꞌan mi lajmel i bʌcꞌñan sajtyel.
16 Como melelʌch maꞌan ti tyʌli ti mulawil Cristo chaꞌan i cotyan ajtroñelob i chaꞌan Dios chꞌoyol bʌ ti panchan. Ti tyʌli chaꞌan i cotyañonla i jiñʌjlelon bʌ la Abraham.
17 Jin chaꞌan cꞌʌjnibalʌch tiꞌ chꞌʌmʌ i bʌcꞌtyal cheꞌ bajcheꞌonla. Ti ochi ti ñoj ñuc bʌ laj cura yubil como ti ochi tiꞌ tyojlel Dios chaꞌan i pejcʌbeñonla Dios. Miꞌ beleꞌ chaꞌlen bajcheꞌ mi yʌleꞌ. Miꞌ wen pꞌuntyan quixtyañujob. Ti yʌcꞌʌ i bʌ ti sajtyel chaꞌan i ñusʌben i mul quixtyañujob.
18 Cristo tiꞌ ñusʌ wocol cheꞌ ñac xiba tiꞌ lolon jopꞌo i yotsʌben i mul. Jin chaꞌan chꞌujbi i cotyañob am bʌ i pʌyol ti mulil chaꞌan maꞌan miꞌ lolon jacꞌob.