2 Quermañujob yom cꞌajacña laꞌ woj mi laꞌ wubin cheꞌ mi laꞌ niqꞌui ñusan wocol tyac bʌ.

3 Laꞌ wujilʌch isujm cheꞌ mi laꞌ ñusan wocol ti utsꞌat mi tsictiyel chʌncox laꞌ wen chꞌujbin. Cheꞌ jini, muꞌ tyo mejlel laꞌ más cucheꞌ wocol ti utsꞌat.

4 Jopꞌox laꞌ cucheꞌ wocol ti wen. Cheꞌ jini miꞌ pꞌʌtyʌliyel laꞌ pusicꞌal. Chꞌujbi laꞌ luꞌ cucheꞌ chʌ bʌ yes wocol tyac bʌ. Mi pꞌʌtyʌl laꞌ pusicꞌal maꞌix chʌ bʌ tyo yom laꞌ chaꞌan.

5 Mi an juntiquil baꞌ añetla an tyo bʌ yom i ñaꞌtyʌbal, laꞌ i cꞌajtiben Dios. Dios mi quej i yʌqꞌuen. Ti yonlel mi quej i yʌqꞌuen pejtyel quixtyañu muꞌ bʌ i cꞌajtiben Dios. Maꞌix miꞌ mimichꞌ aqꞌuen.

6 Pero yom i cꞌajtiben cheꞌ ti jumpꞌej i pusicꞌal miꞌ chꞌujbin. Mach yom chaꞌchajp i pensal. Jini chaꞌchajp bʌ i pensal cheꞌ bajcheꞌ witsꞌlaw bʌ jaꞌ muꞌ bʌ i nijcan icꞌ ti mar como machꞌan xucꞌul.

7 Jini chaꞌchajp bʌ i pensal mach yom i lolon ñaꞌtyan mi an chʌ bʌ yes mi quej i yʌqꞌuentyel ti lac Yum.

8 Mach chꞌujbi ajnic ti xucꞌul jini am bʌ chaꞌchajp i pensal.

9 Jini pꞌumpꞌun bʌ hermañu yom cꞌajacña yoj mi yubin chaꞌan mi qꞌuejlel ti ñuc ti Dios.

10 Jini am bʌ cabʌl chʌ bʌ yes an i chaꞌan yom cꞌajacña i yoj mi yubin cheꞌ mi juꞌsʌntyel. Como jini rico bʌ ñumel jach mi ñumel. Jini rico bʌ cheꞌ bajcheꞌ i nich pimel muꞌ bʌ i pꞌajtyel.

11 Cheꞌ mi pasel qꞌuin cheꞌ cʌlʌx mi ticwan, mi tyʌquin jini pimel. Mi pꞌajtyel i nich. Mi lajmel i cꞌotyajlel. Chʌꞌʌch jeꞌel jini rico bʌ. Mi sajtyel cheꞌ chʌncol tyo i bej ocꞌan chʌ bʌ an i chaꞌan.

12 Cꞌajacña yoj jini muꞌ bʌ i cucheꞌ wocol ti wen. Como cheꞌ tsaꞌix i ñusʌ ti wen mi quej i yʌqꞌuentyel i majtyan. Mi quej i qꞌuejlel ti wen ti Dios. Mi quej i yʌqꞌuentyel i cuxtyʌlel machꞌʌ yujil jilel tsaꞌ bʌ i wʌ alʌ Dios. Mi quej i yʌqꞌueñonla laj cuxtyʌlel muꞌ bʌ lac pꞌuntyan Dios.

13 Cheꞌ an majch miꞌ pensalin i niqꞌui chaꞌlen machꞌʌ wen, mach yom i lolon ñaꞌtyan mi Dios miꞌ nijcʌben i pusicꞌal chaꞌan i chaꞌlen machꞌʌ wen. Como Dios machꞌan miꞌ pensalin i chaꞌlen machꞌʌ wen. Como Dios machꞌan miꞌ nijcʌben i pusicꞌal i niqꞌui chaꞌlen quixtyañu machꞌʌ wen.

14 Xiba mi yilpusicꞌleñonla cheꞌ miꞌ nijcʌbeñonla lac pusicꞌal lac niqꞌui chaꞌlen machꞌʌ wen muꞌ bʌ lac bajñel pensalin yicꞌot la com bʌ ti lac pusicꞌal.

15 Ti caj jini machꞌʌ wen muꞌ bʌ lac mulan lac bajñel pensalin mi yʌqꞌueñonla lac yajlel ti mulil. Cheꞌ jini mi lac satjyel cheꞌ tsaꞌix lac yoque chaꞌle mulil.

16 Pꞌuntyʌbilet bʌ la quermañujob, mach laꞌ lotin laꞌ bʌ.

17 Pejtyel chʌ bʌ wen, pejtyel tsꞌʌcʌl bʌ muꞌ bʌ la cʌqꞌuentyel luꞌ tyʌlem ti Dios yaꞌ ti panchan. Jini ti yʌcꞌʌ cꞌajc tyac am bʌ ti panchan. Machꞌan mi tsꞌin qꞌuextyʌyel Dios. Mach sajlic an i yʌxñal como machꞌan mi qꞌuextyʌyel.

18 Tsaꞌix i yʌcꞌonla laj cuxtyʌlel machꞌʌ yujil jilel chaꞌan ti jini yoque melel bʌ tꞌan chaꞌan chʌꞌʌch yom Dios. Tsaꞌix i cotyʌyonla chaꞌan lajalonla cheꞌ bajcheꞌ ñaxan bʌ i wut chʌ bʌ tyac ti ñaxan bʌ ti cꞌʌnꞌʌ. Jini tsaꞌ bʌ ñaxan acꞌʌ i wut tyac ti aqꞌuenti chaꞌan i majtyan Dios ti ñoj oniyix loqꞌuem ti pejtyel jini tsaꞌ bʌ i yʌcꞌʌ Dios.

19 Jin chaꞌan pꞌuntyʌbilet bʌ la hermañujob, jujuntiquiletla yom ora mi laꞌ ñʌchꞌtyan pero mach yom mi laꞌ waꞌ jaqꞌueꞌ. Mach yom mi laꞌ waꞌ michꞌan.

20 Como jini michꞌ bʌ quixtyañu maꞌ miꞌ chaꞌlen muꞌ bʌ i mulan Dios.

21 Cʌyʌxla pejtyel machꞌʌ wen bʌ laꞌ pensal yicꞌot muꞌ bʌ laꞌ niqꞌui chaꞌlen como yonlel jini machꞌʌ wen. Chꞌujbin tiꞌ pecꞌlel laꞌ pusicꞌal jini tꞌan tsaꞌ bʌ pʌjqꞌui yubil ti laꞌ pusicꞌal. Añʌch i pꞌʌtyʌlel jini tꞌan chaꞌan i cotyañonla.

22 Chꞌujbinla jini muꞌ bʌ i subeñetla Dios tiꞌ tꞌan. Mach chaꞌanic jach mi laꞌ lolon ñʌchꞌtyan. Mucꞌ jach laꞌ loꞌlon laꞌ bʌ yubil cheꞌ mucꞌ jach laꞌ ñʌchꞌtyan.

23 Jini mucꞌ jach bʌ i yubin pero machꞌan miꞌ chꞌujbin lajalʌch bajcheꞌ quixtyañu muꞌ bʌ i qꞌuel i bʌ ti espejo.

24 Miꞌ qꞌuel i bʌ bajcheꞌ yilal. Mi majlel. Ora mi ñajayel i chaꞌan bajcheꞌ yilal i yʌxñal.

25 Mi machꞌan mi ñajayel i chaꞌan tsaꞌ bʌ yubi pero mi tiꞌ jacꞌʌ jini wen bʌ xicꞌojel muꞌ bʌ i colonla, mi chʌncol i yoque chꞌujbin, tijicña mi quej i yajñel.

26 Mi an majch mi lolon al chʌncox i wen chꞌujbin tiꞌ pusicꞌal, pero mach yujil i ticꞌol i yacꞌ chʌncol jach i lotin i bʌ. Maꞌix i cꞌʌjnibal bajcheꞌ miꞌ chꞌujbin.

27 Cheꞌ mi laj cotyan mebaꞌ alpꞌeñalob yicꞌot mebaꞌ xꞌixicob cheꞌ an i wocol jiñʌch yoque wen bʌ i chꞌujutisʌntyel Dios tiꞌ wut Dios lac Tyat. Yicꞌot cheꞌ machꞌanix mi la cotsan lac mul ti jini machꞌʌ wen tyac i chaꞌan bʌ mulawil.