2 Mach yom i niqꞌui aleꞌ machꞌʌ wen tiꞌ contra majchical jach. Yom ajnicob ti ñʌchꞌʌl ti uts. Yom i tsictiyel mi chʌncol i peqꞌuisan i bʌ tiꞌ tyojlel pejtyel quixtyañujob.

3 Como joñonla jeꞌel machꞌan ti lac ñaꞌtyʌ wajali. Ti lac ñusʌbe i tꞌan Dios. Ti sajtiyonla ti lac bijlel yubil. Chuculon tyo la lac lolon chꞌujbin pejtyel muꞌ bʌ i niqꞌui mulan lac bajñel pusicꞌal. Ti lac chaꞌle chʌ bʌ mach wen. Ti lac tsꞌaꞌqꞌuele chʌ bʌ an i chaꞌan yañoꞌ bʌ. Ti tsꞌaꞌlentiyonla. Ti lac tsꞌaꞌle lac bʌ jeꞌel.

4 Pero cheꞌ ñac ti tsictiyi i yutslel i pusicꞌal Dios Ajcotyaya lac chaꞌan yicꞌot i pꞌuntyaya chaꞌan quixtyañujob tiꞌ cotyʌyonla.

5 Tiꞌ cotyʌyonla mach chaꞌanic wen ti lac chaꞌle, pero chaꞌan tiꞌ pꞌuntyʌyonla. Tiꞌ cotyʌyonla cheꞌ tiꞌ pocoyonla. Jiñʌch cheꞌ ñac ti chaꞌ chꞌocʌyonla. Ti yʌcꞌonla tsijiꞌ bʌ laj cuxtyʌlel chaꞌan ti Chꞌujul bʌ i Chꞌujlel.

6 Dios tiꞌ wen acꞌonla Chꞌujul bʌ i Chꞌujlel chaꞌan ti Jesucristo Ajcotyaya lac chaꞌan.

7 Chaꞌan ti yutslel Dios miꞌ qꞌuelonla ti tyoj. Cheꞌ jini mi la cʌqꞌuentyel laj cuxtyʌlel machꞌʌ yujil jilel. Jiñʌch jini muꞌ bʌ lac pijtyan.

8 Yoque melelʌch ili tꞌan. Com maꞌ beleꞌ wen subeñob ili tꞌan chaꞌan jini chʌncol bʌ i chꞌujbin Dios miꞌ chʌc chaꞌlen chʌ bʌ wen. Weñʌch ili tꞌan. I cꞌʌjnibalʌch chaꞌan pejtyelelob.

9 Pero mach a wotsan a bʌ cheꞌ miꞌ chaꞌleñob cabʌl tꞌan machꞌʌ baꞌan i cꞌʌjnibal yicꞌot cheꞌ miꞌ chaꞌlen tꞌan chaꞌan i cꞌabaꞌ tyac i yumob ti ñoj oniyix. Mach a wotsan a bʌ ti periyal yicꞌot cheꞌ an cabʌl tꞌan tyac chaꞌan mandar tsaꞌ bʌ i yʌcꞌʌ Moisés ti ñoj oniyix. Lolom jach jini tꞌan tyac. Machꞌan i cꞌʌjnibal.

10 Mi anqui majch miꞌ lolon tyech tꞌan baꞌan ochemoꞌ bʌ tiꞌ tꞌan Dios chaꞌan i tꞌoxob i bʌ hermañujob, tiqꞌui. Suben junyajlel o mi chaꞌyajlel. Mi machꞌan miꞌ chꞌujbibeñet a tꞌan, locꞌsan tiꞌ tyojlel hermañujob cheꞌ jini.

11 Cheꞌ jini, maꞌ ñaꞌtyan machꞌan tyoj jini quixtyañu. Yujilʌch isujm chaꞌan bajñel i mulʌch tiꞌ choco i bʌ ti xotꞌ i mulil.

12 Cheꞌ mic xiqꞌueꞌ majlel yaꞌ baꞌañet mi Artemas mi Tíquico bʌ i cꞌabaꞌob yom majliquet a julaꞌañon yaꞌ ti Nicópolis mi ti mejliyet. Como tsaꞌix c ñaꞌtyʌ c ñusan yorojlel tsʌñal yaꞌi.

13 Yom maꞌ cotyan jini Zenas am bʌ yeꞌtyel ti abogado chaꞌan i cotyan quixtyañujob yicꞌot jini Apolos bʌ i cꞌabaꞌ. Cotyan ti chʌ bʌ yes chꞌujbi a cotyañob. Aqꞌueñob chʌ bʌ yom i chaꞌañob chaꞌan mi bej majlel ti xʌmbal chaꞌan machꞌan chʌ bʌ yom i chaꞌañob.

14 Yom a cotyañob chaꞌan i cʌñob lac piꞌʌlob i mel chʌ bʌ wen jeꞌel. Chaꞌan i cotyañob jini an tyo bʌ yom i chaꞌañob. Cheꞌ jini, an i cꞌʌjnibalob chaꞌan i cotyan yañoꞌ bʌ jeꞌel.

15 Pejtyel jini wʌꞌ bʌ añob quicꞌot chʌncol i chocbeñet tyʌlel saludos. Aqꞌuen saludos pꞌuntyʌbil bʌ lac piꞌʌlob chaꞌan jini muꞌ bʌ lac chꞌujbin. Laꞌ i yʌqꞌueñetla i yutslel i pusicꞌal Dios ti laꞌ pejtyelel. Amén.