2 Subeñob ñoxobix bʌ chaꞌan i bajñel wen ticꞌob i pusicꞌal. Yom i meleꞌ chʌ bʌ wen chaꞌan qꞌuejlic ti ñuc. Yom ajnic ti wen bʌ i ñaꞌtyʌbal. Yom i chꞌujbin Dios ti wen. Yom i wen chaꞌlen pꞌuntyaya. Yom i cuch wocol ti utsꞌat.

3 Cheꞌ jeꞌel jini ñejepꞌobix bʌ yom ajnicob ti wen. Mach yom i chaꞌlen jopꞌtꞌan. Mach yom miꞌ qꞌuixñañob. Yom i pʌsꞌeñob bajcheꞌ yom ajnicob yañoꞌ bʌ.

4 Yom i cʌntisañob xcꞌalʌlob tyo bʌ xꞌixicob chaꞌan i pꞌuntyan i ñoxiꞌal yicꞌot i yalobilob.

5 Yom i cʌntisañob jini xcꞌalʌlob tyo bʌ xꞌixicob chaꞌan mi yajñel ti wen bʌ i ñaꞌtyʌbal. Yom ajnicob tiꞌ sʌclel i pusicꞌal. Yom i wen qꞌuelob i yotyot. Yom uts i pusicꞌal. Yom i yʌcꞌ i bʌ tiꞌ wenta i ñoxiꞌal chaꞌan mach chꞌujbi i tyajtyʌl ti tꞌan i tꞌan Dios chaꞌan tiꞌ cajob.

6 Cheꞌ jeꞌel subeñob jini alobob tyo bʌ chaꞌan ajnic ti wen bʌ i ñaꞌtyʌbal.

7 Pʌsꞌeñob pejtyel chʌ bʌ wen bʌ maꞌ chaꞌlen chaꞌan bajcheꞌ yom ajnicob. Tyoj maꞌ chaꞌlen cʌntisa ti jumpꞌej a pusicꞌal cheꞌ maꞌ cʌntisañob.

8 Chaꞌlen tꞌan ti wen chaꞌan machic chꞌujbi i tyajetyob tiꞌ tꞌan. Cheꞌ jini quisintic mi quej i yubin jini muꞌ bʌ i lolon contrajiñetla ti tꞌan como mach chꞌujbi i tyajetla ti machꞌʌ wen bʌ tꞌan.

9 Yom maꞌ subeñob pejtyel lolon yajtoñelob jach bʌ chaꞌan i wen chꞌujbiñob i xicꞌol ti i yumob. Yom i qꞌuejlel ti wen ti pejtyel i chaꞌlibal. Mach yom i letsañob i bʌ tiꞌ tꞌan.

10 Mach yom i chaꞌleñob xujchꞌ jini lolon ajtoñel jach bʌ. Pero yom i pʌsob i bʌ ti xucꞌul ti pejtyel i chaꞌlibal. Cheꞌ jini pejtyelelob chꞌujbiyʌch i yʌlob chaꞌan wen jini cʌntisa i chaꞌan bʌ Dios Ajcotyaya lac chaꞌan chaꞌan ti jini lolon ajtoñelob jach bʌ.

11 Dios tiꞌ pʌsꞌeyonla i yutslel chaꞌan mi cotyʌntyel ti pejtyelelob.

12 Ti yutslel Dios miꞌ cʌntisañonla chaꞌan yom mi laj cʌyeꞌ lac mel pejtyel machꞌʌ wen yicꞌot i mulʌntyel chʌ bʌ yes machꞌʌ wen am bʌ ti mulawil. Miꞌ cʌntisañonla la cajñel ti wen bʌ lac ñaꞌtyʌbal. Yom mi la cajñel ti tyoj. Yom mi lac chaꞌlen chʌ bʌ yom Dios.

13 Miꞌ cʌntisañonla jeꞌel chaꞌan mi lac pijtyan. Cꞌajacña la coj mi lac pijtyan i tsꞌʌctisʌntyel jini tsaꞌ bʌ i wʌ alʌ chaꞌan chaꞌ tyʌlic. Mi quej i chaꞌ tyʌlel tiꞌ ñuclel jini ñuc bʌ Dios Ajcotyaya lac chaꞌan. Jiñʌch Jesucristo.

14 Ti yʌcꞌʌ i bʌ ti sajtyel chaꞌañonla chaꞌan i cotyañonla loqꞌuel ti pejtyel machꞌʌ wen chaꞌan i wen sʌc isañonla. Ti yʌcꞌʌ i bʌ ti sajtyel chaꞌan mi la cochel ti i chaꞌañonla chaꞌan mi lac wen meleꞌ chʌ bʌ wen ti jumpꞌej lac pusicꞌal.

15 Yom a cʌntisañob ti ili tꞌan. Yom a ñuc isʌbeñob i pusicꞌal. Yom a ticꞌob como a wentajʌch a ticꞌob. Mach a wʌcꞌ a bʌ chaꞌan i michꞌqꞌueletyob mi junticlec.