2 Mi ochem tiꞌ tꞌan Dios i yum jini ajtoñel jeꞌel más yom i qꞌuel ti ñuc i yum, como hermañujʌch ti jini muꞌ bʌ lac chꞌujbin. Pero más tyo yom i cotyan chaꞌan ochem tiꞌ tꞌan Dios jeꞌel. Como lajalʌch pꞌuntyʌbil bʌ hermañu chʌncol bʌ i cotyan. Cʌntisañob ili tꞌan. Xicꞌbeñob chaꞌan luꞌ chꞌujbibentic.

3 Mi an majch miꞌ cʌntisan ti lot bʌ cʌntisa machꞌʌ lajal yicꞌot jini wen bʌ cʌntisa i chaꞌan bʌ lac Yum Jesucristo yicꞌot jini muꞌ bʌ laj cʌntisañob

4 chʌncol jach i lolon bajñel chan isan i bʌ. Machꞌan chʌ bʌ yujil. Wersa yom jach i lolon chaꞌlen tꞌan chaꞌan i sujmlel tꞌan tyac. Mucꞌ jach i tyecheꞌ cabʌl tꞌan. Como jini tꞌan tyac mucꞌ jach bʌ i tyejchben i michꞌqꞌuelol chʌ bʌ tyac i chaꞌañoꞌ bʌ yañoꞌ bʌ yicꞌot periyal. Miꞌ wajleñob i bʌ. Machꞌan miꞌ chꞌujbibeñob i bʌ i tꞌan.

5 Miꞌ tyech cabʌl periyal machꞌʌ baꞌan i yujtibal yubil. Como mach wen bajcheꞌ miꞌ ñaꞌtyañob. Mach chꞌujbi i cʌñob i sujmlel. Miꞌ lolon ñaꞌtyan i chꞌujbibentyel Dios junchajbʌch bajcheꞌ chꞌujbi i ganarin tyaqꞌuin. Loqꞌuenix baꞌañob jini muꞌ bʌ i chaꞌleñob cheꞌ bajcheꞌ jini.

6 Tsiquil ricojʌch jini muꞌ bʌ i chꞌujbin Dios pero cheꞌ jasʌlʌch am bʌ i chaꞌan mi yubin.

7 Como machꞌan chʌ bʌ ti lac chꞌʌmʌ tyʌlel wʌꞌ ti ili mulawil. Cheꞌ jeꞌel machꞌan chʌ bʌ mi quej lac chꞌʌmeꞌ majlel.

8 Pero mi añʌch la cuchꞌel, lac pislel utsꞌatyʌch añonla.

9 Pero jini yom bʌ yajñel ti más chumul mi chʌc ilpusicꞌlentyel. Mi chujquel ti yac yubil chaꞌan ti lolon mulʌntyel chʌ bʌ jach muꞌ bʌ i yʌsan. Mi yʌqꞌuen i ñusan wocol. Mi quej i más ajñel ti simaronlel. Mi quej i yʌqꞌuen i xotꞌmulil.

10 Como i mulʌntyel tyaqꞌuin mi tyech pejtyel simaronlel. An jini tsaꞌix bʌ i cʌyʌyob i chꞌujbin Dios chaꞌan yomob i tyajob cabʌl i tyaqꞌuin. Tsaꞌix i yʌcꞌʌyob i bʌ i yilan cabʌl wocol tiꞌ caj.

11 Pero jatyet i winiquet Dios, maꞌ maꞌ wotsan a bʌ ti pejtyel jini mulil tyac. Tsʌclen chʌ bʌ wen. Chaꞌlen chʌ bʌ yom Dios. Wen chꞌujbin. Chaꞌlen pꞌuntyaya. Cuchu wocol ti utsꞌat. Ajñen ti pecꞌ.

12 Chaꞌlen wersa a wen chꞌujbin. Chʌc chucu yubil jini a cuxtyʌlel machꞌʌ yujil jilel. Ti yajcʌyet Dios chaꞌan a tyaj a cuxtyʌlel machꞌʌ yujil jilel. Tsaꞌix a tsictisʌ tiꞌ tyojelob cabʌlob bajcheꞌ maꞌ wen chꞌujbin Dios.

13 Wale mic xiqꞌuet como miꞌ qꞌuelonla Dios muꞌ bʌ i yʌqꞌuen i cuxtyʌlel pejtyel chʌ bʌ yes an yicꞌot Jesucristo tsaꞌ bʌ i wen subu i bʌ ti Yalobil Dios tiꞌ wut Poncio Pilato.

14 Mic xiqꞌuet a wen chꞌujbiben cꞌʌlʌ jintyo mi chaꞌ tyʌlel lac Yum Jesucristo jini muꞌ bʌ c subeñet. Mach a qꞌuextyan ili mandar chaꞌan machꞌan bajcheꞌ chꞌujbi i tyajetyob ti tꞌan.

15 Tsaꞌix i wʌ yajcʌ i yorojlel Dios cheꞌ mi quej i tyʌlel Jesús. Como jiñʌch jini cojach bʌ jini ñoj utsꞌat bʌ Dios. Jiñʌch jini ñoj pꞌʌtyʌl bʌ Dios. Jiñʌch i Rey ti pejtyel reyob. Jiñʌch i Yum ti pejtyel yumʌlob.

16 Jin jach i bajñel Dios mach chꞌujbi sajtic. Mi yajñel tiꞌ sʌclel. Machꞌʌ baꞌan majchqui chꞌujbi i lʌcꞌben i sʌclel. Machꞌan majch chꞌʌjbi i yilan. I chaꞌañʌch pejtyel i ñuclel yicꞌot i pꞌʌtyʌlel chaꞌan ti pejtyelel ora. Amén.

17 Xiqꞌuiyob jini añoꞌ bʌ cabʌl chʌ bʌ an i chaꞌan wʌꞌ ti mulawil chaꞌan mach i chan isan i bʌ. Mach yom i lolon ñaꞌtyan utsꞌat an chaꞌan ti caj cabʌl i tyaqꞌuin. Como machꞌan mi jalejel. Pero yomʌch i ñaꞌtyañob i yajñel ti wen cheꞌ miꞌ chꞌujbin Dios. Jiñʌch jini cuxul bʌ muꞌ bʌ i yʌqꞌueñonla i yonlel pejtyel chʌ bʌ yom lac chaꞌan.

18 Xiqꞌuiyob i melob pejtyel chʌ bʌ wen. Laꞌ i tyajob yoque i ricojlel chaꞌan ti cabʌl wen bʌ i chaꞌlibal. Yom tyʌlem tiꞌ pusicꞌal i yʌqꞌueñob i majtyan. Yom i cotyañob yañoꞌ bʌ jeꞌel.

19 Cheꞌ jini añʌch cabʌl chʌ bʌ lotyol i chaꞌan yubil chaꞌan jini tyal tyo bʌ qꞌuin. Miꞌ chʌc chuqueꞌ yubil jeꞌel i cuxtyʌlel machꞌʌ yujil jilel.

20 Timoteo, cʌñʌtyan pejtyel jini tꞌan tsaꞌ bʌ otsʌnti ti a wenta. Mach a ñʌchꞌtyan cabʌl tꞌan tyac i chaꞌan jach bʌ mulawil. Machꞌan i cꞌʌjnibal. Mach a ñʌchꞌtyan jini muꞌ bʌ lolon aleꞌ wen yujil i ñaꞌtyʌntyel mi yʌl, pero mach melelic an i ñaꞌtyʌbal.

21 An jini chʌncol bʌ i chꞌujbin jini muꞌ bʌ i lolon yʌleꞌ wen yujilob. Jin chaꞌan tsaꞌix i cʌyʌ i chꞌujbin Dios. Laꞌ ajnic i yutslel Dios a wicꞌot. Amén.