2 Tyumbin ti uts bʌ tꞌan ñejepꞌix bʌ ꞌixicob cheꞌ bajcheꞌ a ñaꞌ yicꞌot xcꞌalʌlob cheꞌ bajcheꞌ a wijtsꞌiñob ti pejtyelel i sʌclel a pusicꞌal.

3 Cotyan mebaꞌ ꞌixicob jini yoque i bajñel jach bʌ.

4 Pero mi añʌch i yalobil mi i yij, yom i ñaꞌtyañob ñaxan i wentajʌch i cotyan i ñaꞌ. Cheꞌ jini miꞌ tyojob i bet yubil ti pꞌuntyaya chaꞌan ti cosʌntiyob. Como chʌꞌʌch yom. Chʌꞌʌch wen miꞌ qꞌuel Dios.

5 Jini yoque mebaꞌ bʌ ꞌixicob tsaꞌ bʌ cʌyle ti bajñel miꞌ pijtyan i cotyʌntyel ti Dios ti chʌ bʌ yom. Miꞌ chʌc chaꞌlen oración ti qꞌuinil ti acꞌbʌlel.

6 Pero jini mebaꞌ ꞌixic muꞌ bʌ i niqꞌui chaꞌlen cheꞌ bajcheꞌ bajñel yom, cheꞌ bajcheꞌ sajtyemix.

7 Xiqꞌuiyob ti ili mandar tyac chaꞌan mi yajñel ti wen chaꞌan machꞌan bajcheꞌ mi tyajtyʌl ti tꞌan.

8 Pero mi an juntiquil machꞌʌ baꞌan miꞌ yʌqꞌuen chʌ bʌ yom i chaꞌan jini yoque i piꞌʌloꞌ bʌ mi jinic jini añoꞌ bʌ ti yotyot, lolon jach mi yʌleꞌ ochem tiꞌ tꞌan Dios. Más bibajax jini quixtyañu cheꞌ bajcheꞌ jini max tyo bʌ baꞌan miꞌ chꞌujbiñob Dios.

9 Yom jach mi laꞌ wotsan ti jun i cꞌabaꞌob mebaꞌ ꞌixicob tsaꞌix bʌ tyaja más ti sesenta i jabilel, tsaꞌ bʌ ajni yicꞌot juntiquil jach bʌ i ñoxiꞌal.

10 Yomʌch mi cʌjñel mi weñʌch tiꞌ chaꞌle. Mi tsʌꞌʌch i cosʌ yalobilob. Machicʌch i cʌñʌ pero tsʌꞌʌch i yotsʌ ti yotyot. Ti peqꞌuisʌ i bʌ tiꞌ pusicꞌal i cotyan jini ochemoꞌ bʌ tiꞌ tꞌan Dios. Mi tsʌꞌʌch i cotyʌ jini añoꞌ bʌ i wocol mi tsʌꞌʌch i yʌcꞌʌ i bʌ ti pejtyel wen bʌ i chaꞌlibal. Jiñob jach mi yochel i cꞌabaꞌ ti jun jini.

11 Pero mach yom laꞌ wotsan ti jun i cꞌabaꞌ jini max tyo bʌ tiꞌ tyaja sesenta i jabilel. Ame mi quej i chaꞌ ñajatisan Cristo tiꞌ pusicꞌal cheꞌ mi quej i chaꞌ ñaꞌtyan chʌ bʌ bajñel yom i pusicꞌal. Chaꞌ yomob i tyaj i ñoxiꞌal.

12 Cheꞌ jini miꞌ tyajob i mul como tiꞌ ñusʌyob jini tꞌan bajcheꞌ tiꞌ ñaxan subeyob Cristo chaꞌan i tsʌclen Cristo ti pejtyel i pusicꞌal.

13 Cheꞌ jeꞌel cabʌl mi ñumelob ti julaꞌ. Mi quej i tsꞌubꞌan. Mach jinic jach miꞌ tsꞌubꞌan pero mi quejelob ti jopꞌtꞌan. Mi quejel ti lot. Mi yʌleꞌ jini machꞌʌ baꞌan tiꞌ wenta i chaꞌ aleꞌ.

14 Jin chaꞌan com miꞌ chaꞌ tyaj i ñoxiꞌal jini mebaꞌ ꞌixic xcꞌalʌl tyo bʌ, chaꞌan anic i yalobilob. Com miꞌ qꞌuelob i yotyot. Cheꞌ jini mach mej i wajlentyelob jini ochemoꞌ bʌ tiꞌ tꞌan Dios ti cajob.

15 Como an jini mebaꞌ ꞌixicob tsaꞌ bʌ i ñajatisʌyob Dios. Chʌncol i chaꞌ tsʌclen Satanás.

16 Mi an juntiquil mebaꞌ ꞌixic tiꞌ tyojlelob tsaꞌix bʌ i chꞌujbi Dios, yom i cotyañob. Mach yom i cʌy tiꞌ wenta yambʌ ochemoꞌ bʌ tiꞌ tꞌan Dios chaꞌan i cotyañob. Jini ochemoꞌ bʌ chꞌujbiyʌch i cotyan jini mebaꞌoꞌ bʌ jini yoque yom bʌ i cotyʌntyelob.

17 Jini ancianojob tsaꞌ bʌ i yʌcꞌʌ i bʌ ti subtꞌan yicꞌot ti cʌntisa jeꞌel yom i qꞌuejlel ti ñuc. Chaꞌyajlel yom i tyojtyʌl yubil. Chʌꞌʌch jeꞌel pejtyel ancianojob muꞌ bʌ i chaꞌlen i toñel ti wen.

18 Como jini Tsꞌijbubil bʌ i Tꞌan Dios mi yʌleꞌ: Mach a mʌcben i tiꞌ tyat wacax cheꞌ chʌncol i pechic tyecꞌ loqꞌuel i wut trigo. Mi yʌleꞌ jeꞌel: Jini ajtoñel yom tyojlec. Cheꞌ mi yʌl ti Tsꞌijbubil bʌ i Tꞌan Dios.

19 Mach a chꞌujbin tꞌan tiꞌ contra juntiquil anciano mi machꞌan chaꞌtiquil uxtiquilob tsaꞌ bʌ i yilʌyob.

20 Pero yom a ticꞌob tiꞌ tyojlel pejtyel jini yaꞌ bʌ muchꞌquibilob jini muꞌ bʌ i chʌc chaꞌleñob mulil. Cheꞌ jini mi quejelob i bʌcꞌñan i yotsañob i mul yañoꞌ bʌ jeꞌel.

21 Mic xiqꞌuet chaꞌan a chꞌujbin ili mandar tyac como chʌncox i qꞌuelonla Dios yicꞌot lac Yum Jesucristo yicꞌot yajcʌbil bʌ ajtoñelob i chaꞌan bʌ Dios añoꞌ bʌ ti panchan. Mach yom parte maꞌ ticꞌob. Junlajalʌch yom maꞌ qꞌuelob.

22 Mach a waꞌ otsan ti saj ora jach juntiquil chaꞌan mi yochel ti yeꞌtyel chaꞌan ochemoꞌ bʌ tiꞌ tꞌan Dios. Como mi mach wen miꞌ chaꞌlen cheꞌ bajcheꞌ a mulʌch yubil. Chʌc ajñen ti wen.

23 Mach jinic jach jaꞌ yom a japeꞌ pero yom a japeꞌ tsꞌityaꞌ vino jeꞌel. Como cabʌl i chʌmel a ñʌcꞌ.

24 An quixtyañujob ñoj tsiquilʌch cheꞌ an i mul cheꞌ max tyo ti pʌjyi ti melojel. Pero yañoꞌ bʌ max tyo tsiquil mi an i mul jintyo ti wiꞌil tyo mi tsictiyel.

25 Chʌꞌʌch jeꞌel ñoj tsiquilʌch jini wen bʌ i chaꞌlibalob aunque max tyo ti ora mi tsictiyel pero machꞌan mucul mi quej i cʌytyʌl.