Jini muꞌ bʌ quej i cʌy i chꞌujbin Dios
4
Ñoj tsiquil mi yʌleꞌ jini Chꞌujul bʌ i Chꞌujlel Dios, an jini muꞌ bʌ i yʌctyan i chꞌujbiñob cheꞌ tyalix jini yujtibalix bʌ qꞌuin tyac. Mi quej i chꞌujbiñob jini muꞌ bʌ i quej i lotiñob. Mi quej i chꞌujbin cʌntisa tyʌlem ti xibajob.2 Mi quej i chꞌujbin i cʌntisa i chaꞌan chaꞌchajpjax bʌ i pensal muꞌ bʌ ti lot. Jini xlot bʌ ajcʌntisajob machꞌan miꞌ chaꞌ pensalin i mul como maꞌan bajcheꞌ yʌlʌ i pusicꞌal como ñʌmʌlʌch ti lot. Senix yubil cheꞌ bajcheꞌ i tsoyil chaꞌan ti puli ti tsucu tyaqꞌuin.
3 Jini xlot bʌ ajcʌntisajob miꞌ ticꞌob chaꞌan mach yom i pʌyeꞌ i yijñam winic. Miꞌ ticꞌob jeꞌel chaꞌan mach i cꞌuxob chaꞌchajp uxchajp chʌ bʌ tyac cꞌuxbil. Aunque Dios tiꞌ luꞌ mele chaꞌan jini muꞌ bʌ i chꞌujbiñob chaꞌan jini muꞌ bʌ i ñaꞌtyan i sujmlel. Miꞌ subeñob Dios wocox i yʌlʌ. Miꞌ cꞌuxob.
4 Pejtyel tsaꞌ bʌ i mele Dios luꞌ weñʌch. Machꞌan chʌ bʌ yom bʌ mi lac pꞌajeꞌ. Yom jach mi lac suben Dios wocox i yʌlʌ cheꞌ mi laj cꞌuxeꞌ.
5 Como luꞌ weñʌch chaꞌan chʌꞌʌch mi yʌleꞌ Dios tiꞌ tꞌan. Weñʌch chaꞌan ti lac sube Dios wocox i yʌlʌ.
Jini wen bʌ ajtoñel i chaꞌan bʌ Jesucristo
6 Mi chʌꞌʌch maꞌ cʌntisañob hermañujob wen bʌ ajtoñelet i chaꞌan Jesucristo cheꞌ jini. Mi quej a pꞌʌtyʌliyel ti jini wen bʌ tꞌan tsaꞌix bʌ a chꞌujbi yicꞌot wen bʌ cʌntisa tsaꞌix bʌ a tsʌcle.
7 Pero mach a chꞌujbin jini oñoꞌtꞌanix bʌ tꞌan, jini lolon jach bʌ. Mach i chaꞌanic Dios. Yom a wʌcꞌ ti a pusicꞌal jini yom bʌ Dios.
8 An tsꞌityaꞌ i cꞌʌjnibal i chaꞌan lac bʌcꞌtyal cheꞌ mi lac tsʌts lac bʌ ti alas. Pero más an i cꞌʌjnibal mi lac chaꞌlen chʌ bʌ yom Dios. Como cꞌʌjnibalʌch chaꞌan ili laj cuxtyʌlel wale iliyi yicꞌot cꞌʌjnibal chaꞌan jini tyal tyo bʌ ora machꞌʌ yujil jilel.
9 Melelʌch ili tꞌan. Ti pejtyelelob yomʌch i luꞌ chꞌujbiñob.
10 Como tsaꞌix lac chꞌujbi jini ñoj cuxul bʌ Dios. Jiñʌch Ajcotyaya i chaꞌan ti pejtyelelob. Yoque i chaꞌañʌch jini tsaꞌ bʌ i chꞌujbiyob tiꞌ pusicꞌal. Jin chaꞌan mi lac chaꞌlen toñel. Mi lac ñusan lac wajlentyel.
11 Yom maꞌ tyumbiñob. Yom maꞌ wen cʌntisañob ti ili tꞌan.
12 Mach a wʌcꞌ a bʌ ti michꞌqꞌuelol chaꞌan alobet tyo. Pero yom a pʌsꞌeñob jini ochemoꞌ bʌ tiꞌ tꞌan Dios bajcheꞌ yom i yajñelob. Pʌsꞌeñob bajcheꞌ maꞌ chaꞌlen tꞌan bajcheꞌ maꞌ wajñel ti xucꞌul. Pʌsꞌeñob bajcheꞌ maꞌ chʌc chaꞌlen pꞌuntyaya. Pʌsꞌeñob bajcheꞌ maꞌ meleꞌ chʌꞌʌch bajcheꞌ yom Dios. Pʌsꞌeñob bajcheꞌ maꞌ wen chꞌujbin Dios yicꞌot bajcheꞌ maꞌ wajñel ti sʌc.
13 Qꞌuelbeñob jini Tsꞌijbubil bʌ i Tꞌan Dios cheꞌ miꞌ muchꞌquiñob i bʌ. Chaꞌlen subtꞌan. Cʌntisañob tiꞌ tꞌan Dios hermañujob jintyo mij cꞌotyel.
14 Mach yom ñajayel a chaꞌan a cꞌʌn a majtyan ti toñel Dios tsaꞌ bʌ yʌqꞌuet Dios cheꞌ ñac ti yʌcꞌʌyob i cꞌʌb ti a jol jini ancianojob i chaꞌan ochemoꞌ bʌ tiꞌ tꞌan Dios chaꞌan cheꞌ yom Dios.
15 Chʌc mele jini a toñel ti jumpꞌej a pusicꞌal chaꞌan ti pejtyelelob chꞌujbiyʌch i qꞌuel bajcheꞌ chʌncol a más ajñel ti wen.
16 Cʌñʌtyan a bʌ. Wen ñaꞌtyan jini muꞌ bʌ a wʌleꞌ ti cʌntisa. Chʌc ajñen ti xucꞌul. Mi chʌꞌʌch maꞌ meleꞌ, cheꞌ jini mi quej a cotyʌntyel. Mi quej i cotyʌntyel jeꞌel jini muꞌ bʌ i ñʌchꞌtyʌbeñetyob a tꞌan.