2 Beleꞌ chaꞌlenla oración ti xucꞌtyʌlel laꞌ pusicꞌal. Mach yom mi laꞌ lujbꞌan pero chaꞌlenla ti pejtyelel laꞌ pensal. Subenla Dios wocox i yʌlʌ.

3 Tyajayon lojon ti oración chaꞌan Dios miꞌ pʌsꞌeñon lojon baꞌ mi lojon c majlel ti subtꞌan chaꞌan mi lojon subeñob bajche ti sajti Cristo yicꞌot bajcheꞌ ti chaꞌ tyejchi loqꞌuel baꞌan sajtyemoꞌ bʌ chaꞌan miꞌ cotyañonla. Añon ti cʌchol chaꞌan ti caj tic subu ili tꞌan.

4 Chaꞌlenla oración chaꞌan luꞌ tsꞌʌcʌl mic tsictisʌbeñob i tꞌan Dios bajcheꞌ yom mic subeꞌ.

5 Ajñenla ti xucꞌul ti cantyʌlel i wut jini machꞌʌ baꞌan ochemoꞌ bʌ tiꞌ tꞌan Dios. Mach yom mi laꞌ sʌtyeꞌ laꞌ tiempo, pero ti jujumpꞌej qꞌuin cꞌʌñʌla ti wen.

6 Yom mi laꞌ beleꞌ chaꞌlen uts bʌ tꞌan yicꞌot tsꞌityaꞌ wen bʌ alas tꞌan machꞌʌ baꞌan bibajax ti alol. Yom mi laꞌ ñaꞌtyan bajcheꞌ yom mi laꞌ jacꞌbeñob i tꞌan majchical jach bʌ quixtyañu.

7 Jini pꞌuntyʌbil bʌ hermañu Tíquico mi quej i luꞌ subeñetla bajcheꞌ añon. Xucꞌul bʌ ajtoñel i chaꞌan lac Yum jini Tíquico. Tiꞌ wen cotyʌyon tiꞌ toñel lac Yum.

8 Jin chaꞌan chʌncol c xiqꞌueꞌ tyʌlel Tíquico yaꞌ baꞌ añetla chaꞌan mi laꞌ wubin bajcheꞌ añon lojon chaꞌan miꞌ ñuc isʌbeñetla laꞌ pusicꞌal.

9 Pꞌuntyʌbil bʌ lac hermañu Onésimo. Xucꞌul jeꞌel. Mi quej i tyʌlel yicꞌot Tíquico. Chꞌoyol yaꞌ baꞌ añetla jini Onésimo. Jini chaꞌtiquilob mi quej i subeñetla pejtyelel chʌncol bʌ i yujtyel wʌꞌwʌꞌi.

10 C piꞌʌl ti cʌchol Aristarco bʌ i cꞌabaꞌ miꞌ chocbeñetla tyʌlel saludos yicꞌot Marcos i primo Bernabé. Tsaꞌix c wʌ subeyetla bajcheꞌ yom mi laꞌ chaꞌlen mi yaꞌ mi cꞌotyel ti julaꞌ Marcos. Yom mi laꞌ pʌy ochel ti julaꞌ.

11 Miꞌ choqueꞌ tyʌlel saludos jeꞌel jini Jesús chaꞌchajp bʌ i cꞌabaꞌ muꞌ bʌ i pejcʌntyel ti Justo. Jini jach jini uxtiquilob israeloꞌ bʌ ochemoꞌ bʌ tiꞌ tꞌan Dios chʌncol i wen cotyañon ti toñel chaꞌan i yumintyel Dios. Tsaꞌix i wen ñuc isʌbon c pusicꞌal.

12 Jini Epafras, chꞌoyol yaꞌ baꞌ añetla, miꞌ choqueꞌ tyʌlel saludos. Ajtoñel i chaꞌan bʌ Cristo jini Epafras. Jini miꞌ bej chaꞌlen wersa ti oración chaꞌañetla chaꞌan xucꞌul mi laꞌ wajñel yicꞌot chaꞌan tsꞌʌcʌl mi laꞌ luꞌ ñaꞌtyan bajcheꞌ yom Dios.

13 Como cujil isujm miꞌ chʌc pensaliñetla jini Epafras. Yicꞌot miꞌ pensalin jini añoꞌ bʌ ti lum tyac Laodicea yicꞌot Hierápolis bʌ i cꞌabaꞌ.

14 Lucas, jini pꞌuntyʌbil bʌ ajtsꞌʌcaya, miꞌ chocbeñetla tyʌlel saludos, yicꞌot Demas jeꞌel.

15 Aqꞌuen saludos jini hermañujob yaꞌ ti Laodicea. Aqꞌuen saludos jeꞌel jini lac hermana Ninfas, yicꞌot jini muꞌ bʌ i muchꞌquiñob i bʌ yaꞌ ti yotyot.

16 Cheꞌ mi yujtyel laꞌ qꞌueleꞌ jini jun yaꞌ baꞌ añetla yom mi laꞌ choc majlel yaꞌ ti Laodicea chaꞌan miꞌ qꞌuelob jeꞌel jini ochemoꞌ bʌ tiꞌ tꞌan Dios yaꞌyaꞌi. Yicꞌot yom mi laꞌ qꞌueleꞌ jeꞌel jini tsaꞌ bʌ c choco majlel yaꞌ ti Laodicea.

17 Pejcan jini Arquipo. Subenla: Yom a qꞌuel a bʌ chaꞌan tsꞌʌcʌl maꞌ chaꞌliben jini toñel tsaꞌ bʌ aqꞌuentiyet ti lac Yum. Chʌꞌʌch yom mi laꞌ suben.

18 Joñon Pablojon mic tsꞌijbubeñet ili saludo tic bajñel j cꞌʌb. Cꞌajal laꞌ chaꞌan cʌchʌlon. Beleꞌ pejcʌbeñonla Dios ti oración. Laꞌ ajnic laꞌ wicꞌot i yutslel i pusicꞌal Dios. Amén.