3
Tsaꞌix tyejchiyetla loqꞌuel baꞌan sajtyemoꞌ bʌ laꞌ wicꞌot Cristo yubil. Jin chaꞌan yom mi laꞌ chʌc pensalin jini wen tyac bʌ tyʌlem bʌ ti panchan yaꞌ baꞌ buchul Cristo tiꞌ ñoj Dios chaꞌan mi tsictiyel an i ñuclel Cristo. 2 Chʌc pensalin jini am bʌ ti panchan. Maꞌ mi laꞌ chʌc pensalin jini jach chʌ bʌ yes an ti mulawil.
3 Como sajtyemetixla yicꞌot Cristo yubil cheꞌ machꞌan mi laꞌ chꞌujbin i tsuculel laꞌ pusicꞌal. Cʌñʌtyʌbilix jini tsijiꞌ bʌ laꞌ cuxtyʌlel yicꞌot Cristo am bʌ ti Dios.
4 Cristo laj cuxtyʌlelʌch. Cheꞌ mi chaꞌ tyʌlel Cristo mi quej laꞌ tsictiyel laꞌ wicꞌot Cristo tiꞌ ñuclel.
Tsucul bʌ yicꞌot tsijiꞌ bʌ laj cuxtyʌlel
5 Qꞌuele cheꞌ bajcheꞌ tsʌnsʌbilix ti pejtyelel jini tsucul tyac bʌ i chaꞌan bʌ mulawil am bʌ ti laꞌ pusicꞌal: Jiñʌch cheꞌ an tꞌan yicꞌot yambʌ winic yambʌ xꞌixic, o laꞌ bibiꞌlel, o cheꞌ laꞌ pusicꞌal miꞌ wersa cꞌajtin laꞌ chaꞌlen laꞌ tsuculel, mi yambʌ tiqꞌuil tyac bʌ, mi i michꞌqꞌuelol i chaꞌan bʌ laꞌ piꞌʌlob. Como i michꞌqꞌuelol i chaꞌan bʌ laꞌ piꞌʌlob lajalʌch cheꞌ bajcheꞌ i chꞌujutisʌntyel melel jach bʌ dios tyac yubil.
6 Como chaꞌan ti caj jini mach bʌ wen bʌ i chaꞌlibal, tyal i yorojlel mi quej i yubiñob i michꞌlel Dios jini muꞌ bʌ i ñusʌben i tꞌan Dios.
7 Ti yambʌ ora chʌꞌʌch ti laꞌ chaꞌle jeꞌel cheꞌ ñac max tyo baꞌan ti laꞌ ñaꞌtyʌ.
8 Pero wale cʌyʌla pejtyelel jini mach bʌ wen. Laꞌ michꞌlel, i tsꞌaꞌqꞌuelol laꞌ piꞌʌlob, yicꞌot jopꞌ tꞌan, yicꞌot i wajlentyel laꞌ piꞌʌlob yicꞌot bibajax bʌ tꞌan muꞌ bʌ i loqꞌuel ti laꞌ tiꞌ.
9 Mach yom mi laꞌ lotin laꞌ piꞌʌlob. Como tsaꞌix laꞌ cʌyʌ pejtyelel jini machꞌʌ wen bʌ laꞌ chaꞌlibal bajcheꞌ ti laꞌ chaꞌle ti yambʌ ora.
10 Como tsaꞌix tsijibtisʌbentiyetla laꞌ pusicꞌal. Dios tsaꞌ bʌ tsijibtisʌbeyetla chʌncol i bej tsijibtisañetla majlel chaꞌan más lajalet tyo la bajcheꞌ Cristo chaꞌan mi laꞌ más cʌñeꞌ Dios.
11 Machꞌan chʌ bʌ miꞌ chaꞌlen mi israelob mi mach bʌ israelobic, mi tsepel i pʌchʌlel, mi machꞌan tsepel, mi chꞌoyol bʌ ti ñajt, mi machꞌan cʌntisʌbil, mi an tiꞌ wenta i yum, mi machꞌan tiꞌ wenta i yum. Como Cristo i yumʌch ti pejtyelelob yicꞌot ti pejtyelel chʌ bʌ an tyac.
12 Dios miꞌ pꞌuntyañetla. Tsaꞌix i yajcʌyetla chaꞌan ochemetla ti i chaꞌan bʌ Dios. Jin chaꞌan, ajñenla bajcheꞌ yom Dios. Pꞌuntyan a piꞌʌlob, cotyañob, pʌsʌ a bʌ ti pecꞌ, ajñenla ti uts, cuchbenla ti utsꞌat i ñajayel tyac yañoꞌ bʌ.
13 Cuchben laꞌ bʌ ti utsꞌat laꞌ ñajayel tyac. Mi an periyal bʌ tꞌan ti laꞌ contra, ñusʌben laꞌ bʌ laꞌ mul. Cheꞌ bajcheꞌ Cristo tiꞌ ñusʌbeyetla laꞌ mul, chʌꞌʌch yom mi laꞌ ñusʌbeñob i mul yañoꞌ bʌ jeꞌel.
14 Pero jini más yom bʌ laꞌ chaꞌlen, jiñʌch pꞌuntyaya. Como jini mi yʌqꞌueñetla laꞌ motin ajñel ti uts ti jumpꞌej jach laꞌ pusicꞌal.
15 Laꞌ i pʌsꞌeñetla Dios bajcheꞌ yom mi laꞌ wajñel ti i ñʌchꞌtyʌlel laꞌ pusicꞌal tyʌlem bʌ ti Dios. Como Dios tiꞌ pʌyʌyetla chaꞌan mi laꞌ wajñel ti ñʌchꞌʌl ti jumpꞌej jach laꞌ bʌcꞌtyal yubil. Como i bʌcꞌtyaletla Cristo. Subenla Dios wocox i yʌlʌ.
16 Laꞌ luꞌ bujtꞌic laꞌ pusicꞌal tiꞌ tꞌan Cristo. Cʌntisan laꞌ bʌ. Tyumbin laꞌ bʌ ti pejtyelel laꞌ ñaꞌtyʌbal tyʌlem bʌ ti Dios. Cꞌʌyinla Dios ti salmo tyac yicꞌot himno tyac yicꞌot i cꞌay tyac Dios. Yom an wocox i yʌlʌ Dios ti laꞌ pusicꞌal.
17 Chʌ bʌ jach mi laꞌ chaꞌlen, chʌ bʌ jach mi laꞌ wʌleꞌ, chaꞌlenla chaꞌan tsiquilic i chaꞌañetla lac Yum Jesús. Subenla wocox i yʌlʌ Dios lac Tyat ti Jesús.
Jiñʌch bajcheꞌ yom i chaꞌlen baꞌan yañoꞌ bʌ ochemoꞌ bʌ tiꞌ tꞌan Dios
18 Xꞌixicob, chꞌujbibenla i tꞌan a ñoxiꞌal. Como chʌꞌʌch yom mi laꞌ chaꞌlen cheꞌ ochemetla ti lac Yum.
19 Winicob, pꞌuntyan laꞌ wijñam. Maꞌ mi laꞌ mimichꞌ pejcan.
20 Alpꞌeñalob, chꞌujbibenla i tꞌan laꞌ tyat, laꞌ ñaꞌ ti chʌ bʌ jach miꞌ subeñetla, como chʌꞌʌch miꞌ mulan lac Yum.
21 Tyatyʌlet bʌ la, ñaꞌʌlet bʌ la, maꞌ mi laꞌ bej lolon tsʌts ticꞌob laꞌ walobilob cꞌʌlʌ jintyo mi michꞌan ame mi lujbañob i jopꞌ i chaꞌlen wen bʌ.
22 Ajtroñelob, chꞌujbibenla i tꞌan laꞌ yum wʌꞌ ti mulawil ti chʌ bʌ jach miꞌ xiqꞌuetla laꞌ chaꞌlen. Mach jinic jach cheꞌ yaꞌan i qꞌueletla chaꞌan utsꞌat miꞌ qꞌueletla. Pero chꞌujbibenla ti jumpꞌej laꞌ pusicꞌal chaꞌan chʌncol laꞌ qꞌueleꞌ ti ñuc Dios.
23 Pejtyelel chʌ bʌ jach mi laꞌ chaꞌlen, chaꞌlenla ti jumpꞌej laꞌ pusicꞌal cheꞌ bajcheꞌ i toñel lac Yum, mach cheꞌic jach yom mi laꞌ chaꞌlen cheꞌ bajcheꞌ i toñel jach quixtyañujob.
24 Laꞌ wujilʌch isujm lac Yum mi quej i yʌqꞌueñetla jini muꞌ bʌ laꞌ wʌqꞌuentyel cheꞌ bajcheꞌ laꞌ tyojol yubil. Como chʌncol laꞌ chaꞌliben i toñel Cristo como jiñʌch yoque laꞌ Yum bʌ.
25 Pero jini muꞌ bʌ i chaꞌlen machꞌʌ wen, mi quej i yʌqꞌuentyel i xotꞌeꞌ jini machꞌʌ wen tsaꞌ bʌ i chaꞌle. Como junlajal miꞌ qꞌuelob quixtyañujob Dios, mi ajtroñelob, mi i yumob ajtroñelob.