2 Com mi ñuc isʌntyel laꞌ pusicꞌal. Com junlajal mi laꞌ wajñel ti pꞌuntyaya yicꞌot mi laꞌ más cʌn Cristo cheꞌ mi laꞌ más chꞌʌmꞌen isujm jini yom bʌ i pʌsꞌeñonla. Jini muꞌ bʌ i pʌsꞌeñonla Dios wale iliyi machꞌʌ baꞌan tsictiyem ti yambʌ ora, jiñʌch Cristo.

3 Ti Cristo jach mi lac tyajeꞌ pejtyelel ñuc bʌ lac ñaꞌtyʌbal yicꞌot pejtyelel chʌ bʌ tyac mi laj cʌñeꞌ chaꞌan mi la cajñel ti wen.

4 Chʌꞌʌch mic subeñetla chaꞌan maꞌan majch chꞌujbi i lotiñetla ti cꞌotyajax bʌ tꞌan ti alol yubil.

5 Aunque mach yoque yaꞌ añon quicꞌotyetla pero yaꞌ añon yubil tic pusicꞌal. Cꞌajacña coj mi cubin chaꞌan chʌncol laꞌ wajñel ti jumpꞌej laꞌ pusicꞌal yicꞌot chaꞌan xucꞌul chʌncol laꞌ chꞌujbin Cristo.

6 Cheꞌ bajcheꞌ ti laꞌ chꞌujbi lac Yum Jesucristo chaꞌan laꞌ cotyʌntyel, chʌꞌʌch yom mi laꞌ bej ajñel ti Cristo. Chꞌujbinla Cristo chaꞌan miꞌ cotyañetla chaꞌan chʌ bʌ yes mi yujtyel ti jujumpꞌej qꞌuin.

7 Yom xucꞌuletla cheꞌ bajcheꞌ an laꞌ wiꞌ ti Cristo yubil. Yom mi laꞌ bej colel majlel ti Cristo. Yom xucꞌuletla ti jini tsaꞌ bʌ laꞌ chꞌujbi cheꞌ bajcheꞌ ti cʌntisʌntiyetla. Chʌc subenla Dios wocox i yʌlʌ.

8 Qꞌuele laꞌ bʌ chaꞌan machꞌan majch mi yʌcꞌ ti sojquel laꞌ pusicꞌal chaꞌan jach tiꞌ tꞌan quixtyañu cheꞌ lot jach i tꞌan. Como mach tyʌlem ti Cristo jini lot. Pero tyʌlem jach ti quixtyañu bajcheꞌ i tyʌlel ti xijqꞌuiyob i yumob ti ñoj oniyix, cheꞌ bajcheꞌ miꞌ pensaliñob i chaꞌan bʌ mulawil.

9 Como ti pejtyelel i pꞌʌtyʌlel i ñuclel yicꞌot i cuxtyʌlel Dios mi yajñel tiꞌ bʌcꞌtyal Cristo.

10 Cheꞌ jini cheꞌ mi laꞌ wajñel ti Cristo an i pꞌʌtyʌlel, i ñuclel yicꞌot i cuxtyʌlel Dios ti jatyetla jeꞌel. Más ñuc Cristo bajcheꞌ pejtyelel ajtroñelob i chaꞌan bʌ Dios am bʌ ti panchan yicꞌot. Más ñuc Cristo bajcheꞌ xibajob.

11 Chaꞌan mi laꞌ wajñel ti Cristo tsaꞌix laꞌ chꞌʌmʌ cheꞌ bajcheꞌ tsep pʌchʌlel aunque mach jinic tsep pʌchʌlel tyʌlem ti quixtyañujob bajcheꞌ miꞌ chꞌʌmob tiꞌ bʌcꞌtyal. Pero ti laꞌ chꞌʌmʌ cheꞌ bajcheꞌ tsep pʌchʌlel tyʌlem ti Cristo jiñʌch i locꞌsʌbentyel i tsuculel laꞌ pusicꞌal.

12 Cheꞌ ñac ti laꞌ chꞌʌmʌ jaꞌ, cheꞌ bajcheꞌ ti motin chꞌujñʌntiyetla yicꞌot Cristo. Yicꞌot tsaꞌix tyejchiyetla loqꞌuel baꞌan sajtyemoꞌ bʌ yicꞌot Cristo yubil, como tsaꞌix laꞌ chꞌujbi an i pꞌʌtyʌlel Dios tsaꞌ bʌ tyejche loqꞌuel Cristo baꞌan sajtyemoꞌ bʌ.

13 Ti yambʌ ora cheꞌ bajcheꞌ sajtyemetixla chaꞌan ti laꞌ mul yicꞌot chaꞌan machꞌan ti aqꞌuentiyetla tsep pʌchʌlel. Pero wale Dios tiꞌ ñusʌbetla pejtyelel laꞌ mul. Ti yʌqꞌuetla laꞌ motin ajñel yicꞌot Cristo.

14 Dios ti yʌpʌ lac mul tsaꞌ bʌ lac chaꞌle tiꞌ contra. Ti tsictiyi an lac mul chaꞌan ti tsꞌijbubil bʌ i mandar. Tiꞌ locꞌsʌ lac mul ti lac tyojlel. Cheꞌ bajcheꞌ tiꞌ bajle ti cruz lac mul.

15 Cheꞌ ñac ti sajti ti cruz Cristo tiꞌ jotbe i pꞌʌtyʌlel xiba yicꞌot ajtroñelob i chaꞌan bʌ xiba. Ti quisnisʌntiyob tiꞌ cantyʌlel i wut ti pejtyelelob. Ti ganari Cristo.

16 Jin chaꞌan mach yom mi an majch mi lolon al mi an laꞌ mul chaꞌan ti caj chʌ bʌ mi laꞌ cꞌuxeꞌ, chʌ bʌ mi la japeꞌ, mi chaꞌanic ti caj qꞌuiñejel tyac, mi i qꞌuiñejelic ti jujumpꞌej uw, mi chaꞌanic yorojlel cꞌaj oj.

17 Como pejtyelel jini qꞌuiñejel tyac i señʌjlel jach yubil jini muꞌ tyo bʌ quej i tyʌlel. Pero Cristo i tsictisʌntyelʌch pejtyelel jini.

18 Mach yom mi laꞌ lolon aqꞌuen i chilbeñetla jini ñoj cꞌotyajax bʌ muꞌ bʌ laꞌ wʌqꞌuentyel ti Dios chaꞌan ti caj mi laꞌ lolon chꞌujbin i bajñel i cʌntisa. Como an jini muꞌ bʌ i lolon xiqꞌuetla laꞌ pʌs laꞌ bʌ cheꞌ bajcheꞌ mi peqꞌuetla, muꞌ bʌ i lolon xiqꞌuetla laꞌ chꞌujutisañob jini ajtroñelob i chaꞌan bʌ Dios chꞌoyol bʌ ti panchan. Como jiñob miꞌ lolon chaꞌleñob cheꞌ bajcheꞌ más an i ñaꞌtyʌbal chaꞌan jini tsaꞌ bʌ i qꞌueleyob cheꞌ bajcheꞌ ti ñajal miꞌ lolon yʌlob. Miꞌ lolon chan isañob i bʌ ti jini muꞌ bʌ i bajñel pensalin quixtyañujob.

19 Pero jiñob machꞌan mi yajñelob ti Cristo. Como Cristo i jolʌch ochemoꞌ bʌ tiꞌ tꞌan Dios yubil baꞌ miꞌ tyajob pejtyel i pꞌʌtyʌlel i cuxtyʌlel chʌ bʌ jach yom chaꞌan colic i bʌcꞌtyal. Pejtyel i bʌcꞌtyal tsꞌuyulʌch tiꞌ pꞌac tyac yicꞌot ti i chijil tyac. Mi colel majlel cheꞌ bajcheꞌ yom Dios.

20 Chaꞌan ti sajtiyetla yicꞌot Cristo tsaꞌix laꞌ cʌyʌ pejtyelel jini cʌntisʌ mach bʌꞌan tyʌlem ti Cristo. ¿Chucoch chʌncol tyo laꞌ chʌc ajñel cheꞌ bajcheꞌ mi i chaꞌañet tyo la mulawil? ¿Chucoch chʌncol laꞌ chʌc chꞌujbin jini oniyix bʌ tꞌan tyʌlem jach bʌ ti mulawil?

21 Como jini oniyix bʌ tꞌan mi yʌleꞌ: Mach laꞌ tyʌleꞌ jini, mach laꞌ cꞌuxeꞌ jini, mach laꞌ chuqueꞌ jini. Cheꞌ mi yʌleꞌ oniyix bʌ tꞌan.

22 Como jini muꞌ bʌ laꞌ tyʌl, muꞌ bʌ laꞌ cꞌux, muꞌ bʌ laꞌ chuc mi jilel tyac cheꞌ mi cꞌʌjñel. Che jini, tsiquil tyʌlem jach tiꞌ ñaꞌtyʌbal quixtyañu ili xicꞌojel. I bajñel i pensal ili ticꞌojel tyac.

23 Melel, cheꞌ bajcheꞌ añʌch i cꞌʌjnibal jini ticꞌojel tyac lolon yubil. Como jini muꞌ bʌ i lolon chꞌujbiñob miꞌ chaꞌleñob cheꞌ bajcheꞌ muꞌ ti chꞌujutisa. Miꞌ lolon peqꞌuisan i bʌ. Miꞌ lolon aqꞌuen i yilan wocol i bʌcꞌtyal. Pero machꞌan sajlic i cꞌʌjnibal jini ticꞌojel tyac chaꞌan miꞌ tsijibtisan tsucul bʌ i pusicꞌal quixtyañujob.