2 Jini ñaxan bʌ i mandar Dios baꞌ mi yʌleꞌ chaꞌan an chʌ bʌ yes mi quej la cʌqꞌuentyel mi yʌleꞌ cheꞌ bajcheꞌ iliyi: Qꞌuele ti ñuc a tyat a ñaꞌ,

3 chaꞌan weñʌch mi yujtyel chʌ bʌ tyac yes mi yujtyel ti laꞌ tyojlel yicꞌot chaꞌan mi quej laꞌ tyaj cabʌl laꞌ jabilel wʌꞌ ti mulawil. Chʌꞌʌch mi yʌleꞌ ti mandar.

4 Tyatyʌlet bʌ la, ñaꞌʌlet bʌ la, maꞌ mi laꞌ bej lolon tsʌts ticꞌob laꞌ walobilob cꞌʌlʌ jintyo mi michꞌañob. Pero tyoj isañob ti wen. Cʌntisañob bajcheꞌ yom i chꞌujbiñob lac Yum.

5 Ajtoñelob, chꞌujbibeñob i tꞌan laꞌ yumob wʌꞌ ti mulawil chaꞌan chʌncol laꞌ qꞌuel ti ñuc Dios. Ti jumpꞌej jach laꞌ pusicꞌal yom mi laꞌ chaꞌlen bajcheꞌ miꞌ xiqꞌuetyob laꞌ yumob. Chaꞌlenla cheꞌ bajcheꞌ mi i toñel Cristo am bʌ ti panchan mi laꞌ chaꞌlen.

6 Mach cheꞌic jach cheꞌ chʌncol i yilañetla laꞌ yum mi laꞌ chaꞌlen wen bʌ toñel chaꞌan quixtyañujob mi yilañetla ti wen, pero ti pejtyelel laꞌ pusicꞌal yom mi laꞌ chaꞌlen bajcheꞌ yom Dios cheꞌ bajcheꞌ mi ajtoñeletla i chaꞌan Cristo.

7 Pero ti pejtyelel laꞌ pusicꞌal yom mi laꞌ chaꞌlen i toñel laꞌ yum wʌꞌ ti mulawil cheꞌ bajcheꞌ mi i toñel lac Yum am bʌ ti panchan, mach cheꞌic bajcheꞌ mi i toñel jach quixtyañu.

8 Como laꞌ wujil isujm lajal mi quej la cʌqꞌuentyel lac tyojol ti lac Yum am bʌ ti panchan ti jujuntiquilonla mi añonla tiꞌ wenta lac yum wʌꞌ ti mulawil, mi mach añonla tiꞌ wenta lac yum wʌꞌ ti mulawil jiñʌch bajcheꞌ ti lac chaꞌle.

9 Jatyetla, yumʌlet bʌ la, chaꞌlenla wen bʌ tiꞌ tyojlel ajtoñelob laꞌ chaꞌan cheꞌ bajcheꞌ tic xiqꞌuiyob i chaꞌleñob ti laꞌ tyojlel jeꞌel. Cʌyʌla laꞌ bʌcꞌtisañob. Cꞌajal laꞌ chaꞌan añetla tiꞌ wenta lac Yum am bʌ ti panchan lajal cheꞌ bajcheꞌob. Junlajal miꞌ qꞌuelob quixtyañu lac Yum am bʌ ti panchan.

10 Wale hermañujob, mic subeñetla yom mi laꞌ pꞌʌtyʌlisan laꞌ pusicꞌal ti lac Yum ti ñuc bʌ i pꞌʌtyʌlel como añetla ti lac Yum.

11 Lʌpʌla pejtyelel laꞌ mʌctijib muꞌ bʌ i yʌqꞌueñetla Dios chaꞌan laꞌ cʌñʌtyʌntyel chaꞌan chꞌujbi laꞌ wajñel ti xucꞌul cheꞌ miꞌ jopꞌ i lotiñetla xiba.

12 Como machꞌan chʌncol laj contrajin quixtyañujob am bʌ i bʌcꞌtyal am bʌ i chꞌichꞌel, pero chʌncol laj contrajin yubi jini laj contra machꞌʌ baꞌan tsiquil ti lac wut muꞌ bʌ ti xicꞌojel wʌꞌ ti mulawil, jini muꞌ bʌ i yʌqꞌuen quixtyañujob i bej yajñelob ti icꞌtꞌojñal.

13 Jin chaꞌan chꞌʌmʌla pejtyelel jini laꞌ mʌctijib muꞌ bʌ i yʌqꞌueñetla Dios chaꞌan chꞌujbi laꞌ mʌctyan jini laj contra chaꞌan maꞌan mi laꞌ jaqꞌueꞌ mulil cheꞌ ti yorojlel cabʌl simaronlel. Cheꞌ mi yujtyel laꞌ luꞌ chajpan laꞌ bʌ ti pejtyelel laꞌ mʌctijib ajñenla ti xucꞌul.

14 Ajñenla ti xucꞌul. Laꞌ wujil isujm jini yoque melel bʌ tꞌan. Laꞌ cʌylec ti laꞌ pusicꞌal jini melel bʌ tꞌan chaꞌan chajpʌbiletla cheꞌ bajcheꞌ juntiquil miꞌ chajpan i bʌ i loqꞌuel cheꞌ miꞌ cʌcheꞌ i cinturón. Beleꞌ chaꞌlenla tyoj bʌ laꞌ chaꞌlibal como jini tyoj bʌ yi jiñʌch cheꞌ bajcheꞌ i mʌctijib i tyajn muꞌ bʌ i cʌñʌtyan soldado yubil.

15 Yom chajpʌbiletla chaꞌan mi laꞌ subeꞌ majlel jini wen tꞌan chaꞌan i ñʌchꞌtyʌlel lac pusicꞌal cheꞌ bajcheꞌ miꞌ chajpan i bʌ soldado chaꞌan mi loqꞌuel majlel cheꞌ miꞌ lʌpeꞌ i zapatos.

16 Pero jini más yom bʌ, jiñʌch chaꞌan mi lac chꞌujbin Cristo ti pejtyelel lac pusicꞌal ti chʌ bʌ jach yes mi yujtyel como jiñʌch cheꞌ bajcheꞌ i mʌctijib muꞌ bʌ i chuqueꞌ tiꞌ cꞌʌb soldado. Jini laꞌ mʌctijib yubil miꞌ yʌpben jini i wʌn tyeꞌ xiba muꞌ bʌ ti lejmel i ñiꞌ.

17 Chꞌʌmʌla jini laꞌ cotyʌntyel muꞌ bʌ i yʌqꞌueñetla Dios. Jini miꞌ beleꞌ cʌñʌtyañonla cheꞌ bajcheꞌ tsucul tyaqꞌuin bʌ pixol muꞌ bʌ i xojeꞌ soldado chaꞌan i cʌñʌtyan i jol. Chꞌʌmʌla jini espada muꞌ bʌ i yʌqꞌueñonla Chꞌujul bʌ i Chꞌujlel Dios. Jini i tꞌan Dios cheꞌ bajcheꞌ espada.

18 Beleꞌ chaꞌlenla oración cheꞌ chʌncol laꞌ chaꞌlen chʌ bʌ tyac yes mi laꞌ chaꞌlen. Beleꞌ cꞌajtiben Chꞌujul bʌ i Chꞌujlel Dios i luꞌ pʌsꞌeñetla chʌ bʌ yes yom mi laꞌ wʌleꞌ, chʌ bʌ yes yom mi laꞌ cꞌajtiben. Mach yom mi laꞌ qꞌuextyan laꞌ pensal cheꞌ muqꞌuetla ti oración. Mach yom mi laꞌ lujbꞌan laꞌ chaꞌlen oración. Bej tyajala ti oración pejtyelel i chaꞌañoꞌ bʌ Dios.

19 Tyajayonla ti oración jeꞌel chaꞌan Dios mi yʌcꞌon ti tꞌan chaꞌan wen chꞌejl mic tsictisʌbeñob quixtyañujob jini machꞌʌ baꞌan tsictiyem bʌ ti yambʌ ora chaꞌan bajcheꞌ mi lac tyaj laj cotyʌntyel.

20 Dios tiꞌ xiqꞌuiyon chaꞌan cheꞌ bajcheꞌ i qꞌuexolon Cristo mic subeꞌ ili tꞌan. Wale añon ti cʌchol chaꞌan tiꞌ subol ili tꞌan. Tyajayonla ti oración chaꞌan chꞌejlon mic subeꞌ ili tꞌan cheꞌ bajcheꞌ yom.

21 Tíquico, jini pꞌuntyʌbil bʌ lac hermano, xucꞌul bʌ ajtoñel ti i toñel lac Yum, mi quej i luꞌ subeñetla chaꞌan mi laꞌ ñaꞌtyan bajcheꞌ añon yicꞌot chʌ bʌ yes chʌncol c chaꞌlen.

22 Jin chaꞌan tic xiqꞌui tyʌlel yaꞌ baꞌ añetla chaꞌan mi laꞌ wubin bajcheꞌ añon lojon yicꞌot chaꞌan miꞌ ñuc isʌbeñetla laꞌ pusicꞌal.

23 Laꞌ aqꞌuenticob ochemoꞌ bʌ tiꞌ tꞌan Dios i ñʌchꞌtyʌlel i pusicꞌal yicꞌot i pꞌuntyaya cheꞌ yicꞌot i chꞌujbintyel Cristo tyʌlem bʌ ti Dios lac Tyat yicꞌot ti lac Yum Jesucristo.

24 Laꞌ aqꞌuenticob i yutslel i pusicꞌal Dios pejtyelelob muꞌ bʌ i pꞌuntyañob lac Yum Jesucristo tiꞌ pꞌuntyaya mach bʌ yujil qꞌuextiyel. Amén.