2 Ajñenla ti pꞌuntyaya cheꞌ bajcheꞌ tiꞌ pꞌuntyʌyonla Cristo. Ti yʌcꞌʌ i bʌ ti sajtyel cheꞌ bajcheꞌ tsʌnsʌbil bʌ i majtyan Dios chaꞌan i tyojol lac mul. Dios tiꞌ qꞌuele ti wen jini tsaꞌ bʌ i chaꞌle Cristo.

3 Wale, chaꞌan i chaꞌañetla Dios mach yom mi laꞌ chaꞌlen laꞌ tsuculel mi baꞌic jach bʌ laꞌ bibiꞌlel mi i mulʌntyelic laꞌ tsuculel. Mi jinic tyo yom laꞌ pensalin laꞌ chaꞌlen baꞌic jach bʌ laꞌ bibiꞌlel mi i mulʌntyel laꞌ tsuculel.

4 Mach yom mi laꞌ chaꞌlen machꞌʌ wen bʌ tꞌan mi tonto tꞌanic mi alas tꞌanic machꞌʌ wen ti alol. Mach cheꞌic yom mi laꞌ chaꞌlen. Pero jini yom bʌ jiñʌch mi lac suben Dios wocox i yʌlʌ.

5 Como laꞌ wujil isujm machꞌan mi quej i yochel ti yumintyel Cristo yicꞌot Dios jini muꞌ bʌ i pejcan yambʌ winic yambʌ xꞌixic o muꞌ bʌ i chaꞌlen chʌ bʌ jach mach bʌ wen o muꞌ bʌ i mulan i chaꞌlen i tsuculel. Como i mulʌntyel i tsuculel jiñʌch lajal yicꞌot i chꞌujbintyel melel bʌ dios tyac.

6 Mach yom mi laꞌ wʌqꞌuen i lolon lotiñet laꞌ piꞌʌlob ti machꞌʌ baꞌan i cꞌʌjnibal bʌ tꞌan. Como ti caj jini tsucul bʌ i chaꞌlibal quixtyañu Dios mi quej i yʌqꞌuen i xotꞌe i mul majchical jach miꞌ ñusʌben i tꞌan.

7 Mach yom mi laꞌ wotsan laꞌ bʌ yicꞌotyob.

8 Ti wajali cheꞌ bajcheꞌ añetla ti icꞌtꞌojñal yubil cheꞌ añet tyo la ti laꞌ mul, pero wale chaꞌan añetla ti lac Yum añetla ti i sʌclel mulawil yubil. Ajñenla cheꞌ bajcheꞌ yom i yajñel jini am bʌ ti i sʌclel mulawil.

9 Jini muꞌ bʌ i yajñel ti i sʌclel mulawil miꞌ bej chaꞌlen wen bʌ yicꞌot melel bʌ. Mi yajñel ti tyoj.

10 Jopꞌox a ñaꞌtyan jini muꞌ bʌ i mulan Dios.

11 Mach yom mi laꞌ wotsan laꞌ bʌ ti jini lolom jach bʌ muꞌ bʌ i chaꞌlen jini añoꞌ bʌ ti icꞌtꞌojñal. Pero yom mi laꞌ tsictisʌbeñob i mul.

12 Como yoque quisintic jini muꞌ bʌ i mucul chaꞌleñob. Quisintic ti chaꞌ alol jini tsaꞌ bʌ i chaꞌleyob ti mucul.

13 Pero cheꞌ mi laꞌ subeñob i mul an jini muꞌ bʌ quej i pensaliñob i mul. Mi quej i cʌyob i mul. Mi quej i yochelob ti i sʌclel mulawil yubil.

14 Jin chaꞌan mi yʌleꞌ:

15 Wen qꞌuele laꞌ bʌ bajcheꞌ mi laꞌ wajñel. Mach yom mi laꞌ wajñel bajcheꞌ jini machꞌʌ baꞌan i ñaꞌtyʌbal pero ajñenla cheꞌ bajcheꞌ jini añoꞌ bʌ i ñaꞌtyʌbal.

16 Beleꞌ chaꞌlenla wen bʌ tiꞌ tyojlel laꞌ piꞌʌlob como an cabʌl simaronlel ti ili bʌ ora.

17 Mach yom mi laꞌ wajñel cheꞌ bajcheꞌ jini machꞌʌ baꞌan miꞌ ñaꞌtyan pañimil. Pero jopꞌox laꞌ chꞌʌmꞌenla isujm chʌ bʌ yom i yʌqꞌueñet laꞌ chaꞌlen Dios.

18 Mach yom mi laꞌ chaꞌlen qꞌuixñijel como jini mi yʌqꞌueñetla laꞌ chaꞌlen lolom jach bʌ machꞌʌ saj wen. Pero laꞌ bujtꞌic laꞌ pusicꞌal ti Chꞌujul bʌ i Chꞌujlel Dios.

19 Qꞌuelben laꞌ bʌ salmo tyac, cꞌʌyinla himno tyac yicꞌot i cꞌay tyac Dios. Cꞌʌybenla i ñuclel lac Yum ti pejtyelel laꞌ pusicꞌal.

20 Beleꞌ subenla wocox i yʌlʌ Dios lac Tyat tiꞌ cꞌabaꞌ lac Yum Jesucristo chaꞌan pejtyel chʌ bʌ an tyac.

21 Chꞌujbibenla i tꞌan laꞌ piꞌʌlob chaꞌan chʌncol laꞌ qꞌuel ti ñuc Dios.

22 Xꞌixicob, chꞌujbibenla i tꞌan a ñoxiꞌal como chʌꞌʌch yom lac Yum.

23 Como jini winic i yumʌch i yijñam cheꞌ bajcheꞌ Cristo i yumʌch jini ochemoꞌ bʌ tiꞌ tꞌan Dios. Como ochemoꞌ bʌ tiꞌ tꞌan Dios i bʌcꞌtyalʌch Cristo yubil. Cristo Ajcotyaya i chaꞌañob.

24 Pero cheꞌ bajcheꞌ miꞌ chꞌujbibeñob i tꞌan Cristo jini ochemoꞌ bʌ tiꞌ tꞌan Dios chʌꞌʌch yom jeꞌel miꞌ chꞌujbibeñob i tꞌan i ñoxiꞌal xꞌixicob ti chʌ bʌ tyac yes miꞌ chaꞌlen.

25 Winicob, pꞌuntyan a wijñam cheꞌ bajcheꞌ tiꞌ pꞌuntyʌ Cristo jini ochemoꞌ bʌ tiꞌ tꞌan Dios. Ti yʌcꞌʌ i bʌ ti sajtyel chaꞌañob.

26 Chʌꞌʌch ti yʌcꞌʌ i bʌ ti sajtyel Cristo chaꞌan junyajlel i chaꞌañʌch mi yajñel jini ochemoꞌ bʌ tiꞌ tꞌan Dios. I señʌjlel tiꞌ sʌc isʌyob cheꞌ tiꞌ chꞌʌmʌyob jaꞌ chaꞌan tiꞌ chꞌujbiyob i tꞌan Dios.

27 Chʌꞌʌch tiꞌ chaꞌle Cristo chaꞌan i bajñel i chaꞌañobʌch mi yajñelob ochemoꞌ bʌ tiꞌ tꞌan Dios chaꞌan junyajlel sʌc mi cꞌotyel yaꞌ tiꞌ tyojlel. Cheꞌ maꞌix i pʌjqꞌuemal tyac yubil, mi i xumicꞌticlelic tyac yubil mi chʌ bʌ yes yan tyac bʌ. Sʌcob. Mach sajlic añob i mul.

28 Jini winicob yom i pꞌuntyañob i yijñam cheꞌ bajcheꞌ miꞌ pꞌuntyan i bajñel i bʌcꞌtyal. Jini muꞌ bʌ i pꞌuntyan i yijñam chʌncol i bajñel pꞌuntyan i bʌ yubil.

29 Maꞌan winic muꞌ bʌ i michꞌqꞌuel i bajñel i bʌcꞌtyal pero miꞌ weꞌisan, miꞌ cʌñʌtyan i bʌcꞌtyal. Chʌꞌʌch Cristo jeꞌel miꞌ cʌñʌtyañob jini ochemoꞌ bʌ tiꞌ tꞌan Dios.

30 Como ochemon bʌ la tiꞌ tꞌan Dios i bʌcꞌtyalonla Cristo yubil.

31 Jin chaꞌan miꞌ cʌyeꞌ i tyat i ñaꞌ jini winic chaꞌan mi yajñel yicꞌot i yijñam. Jini chaꞌtiquilob mi yajñelob cheꞌ bajcheꞌ mi juntiquil jach bʌ quixtyañu yubil.

32 Jiñʌch ñuc bʌ i sujmlel machꞌʌ baꞌan tsictiyem ti yambʌ ora. Chʌncol c lajeꞌ ili i sujmlel chaꞌan chʌncol c tyajeꞌ ti tꞌan Cristo yicꞌot jini ochemoꞌ bʌ tiꞌ tꞌan Dios.

33 Pero mic subeñetla chaꞌan jujuntiquiletla yom mi laꞌ pꞌuntyan a wijñam cheꞌ bajcheꞌ maꞌ bajñel pꞌuntyan a bʌ. Yicꞌot jini xꞌixic yom i qꞌuel ti ñuc i ñoxiꞌal.