2 Yom mi laꞌ wajñel ti pecꞌ. Tiꞌ pꞌuntyaya yom mi laꞌ cuchben ti utsꞌat i ñajayel tyac laꞌ piꞌʌlob.

3 Chaꞌan ti Chꞌujul bʌ i Chꞌujlel Dios muꞌ bʌ i cotyañetla, chaꞌlenla wersa laꞌ wajñel ti jumpꞌej laꞌ pusicꞌal chaꞌan ñʌchꞌʌl añetla yicꞌot laꞌ piꞌʌlob.

4 Ti lac pejtyelel ochemon bʌ la tiꞌ tꞌan Dios cheꞌ bajcheꞌ jumpꞌej jach lac bʌcꞌtyal. An juntiquil jach Chꞌujul bʌ i Chꞌujlel Dios. Chaꞌan Dios tiꞌ pʌyʌyonla an junchajp jach muꞌ bʌ lac pijtyan ti Dios.

5 An juntiquil jach lac Yum. An junsujm jach muꞌ bʌ lac chꞌujbin. Tsaꞌix lac chꞌʌmʌ jaꞌ chaꞌan mi tsictiyel tsaꞌix lac chꞌujbi Cristo Jesús ti lac pusicꞌal.

6 An juntiquil jach Dios lac Tyat ti lac pejtyelel. I yumʌch pejtyelel chʌ bʌ tyac an. Miꞌ chaꞌlen i toñel chaꞌan ti lac pejtyelel. Mi yajñel ti lac pusicꞌal ti lac pejtyelel.

7 Pero ti jujuntiquilonla ti aqꞌuentiyonla laj cꞌʌjnibal chʌꞌʌch yonlel bajcheꞌ yom i yʌqꞌueñonla Cristo.

8 Jin chaꞌan ti Tsꞌijbubil bʌ i Tꞌan Dios mi yʌleꞌ:

9 Cheꞌ mi yʌleꞌ chaꞌan ti chaꞌ letsi majlel Cristo ti panchan. Cheꞌ jini tsiquilʌch i tyʌlelʌch yaꞌ an ti panchan cheꞌ ñac ti jubi tyʌlel cꞌʌlʌ wʌꞌ ti mulawil.

10 Jini tsaꞌ bʌ jubi tyʌlel cꞌʌlʌ wʌꞌ ti mulawil jiñʌch jini tsaꞌ bʌ chaꞌ letsi majlel yaꞌ ti panchan chaꞌan mi yumiñob pejtyelelob baꞌical jach añob.

11 Ti chajp ti chajp ti yʌqꞌueyob i cꞌʌjnibal tyac jujuntiquil. An jini tsaꞌ bʌ yʌqꞌueyob i cꞌʌjnibal ti yajcʌbiloꞌ bʌ ajsubtꞌañob ñumel, yañoꞌ bʌ chaꞌan i yʌleꞌ tsaꞌ bʌ i xiqꞌui yʌleꞌ Dios, yañoꞌ bʌ ti yʌqꞌue i subeꞌ tꞌan chaꞌan laj cotyʌntyel, yañoꞌ bʌ chaꞌan i chaꞌlen i toñel ti ajcʌñʌtyajob ochemoꞌ bʌ tiꞌ tꞌan Dios, yicꞌot yañoꞌ bʌ chaꞌan ajcʌntisajob chaꞌan ochemoꞌ bʌ tiꞌ tꞌan Dios.

12 Chʌꞌʌch ti aqꞌuentiyob i cꞌʌjnibal tyac chaꞌan miꞌ cʌntisañob ochemoꞌ bʌ tiꞌ tꞌan Dios chaꞌan jini ochemoꞌ bʌ jeꞌel miꞌ chaꞌlibeñob i toñel Dios chaꞌan mi más xucꞌtyʌlob i pusicꞌal. Como pejtyelelob ochemoꞌ bʌ tiꞌ tꞌan Dios i bʌcꞌtyalobʌch Cristo yubi.

13 Chʌꞌʌch yom cꞌʌlʌ jintyo junlajal mi lac chꞌujbin chaꞌan laj cotyʌntyel yicꞌot junlajal mi laj cʌñeꞌ majlel i Yalobil Dios. Chʌꞌʌch mi lac bej colel majlel cꞌʌlʌ jintyo pꞌʌtyʌlonixla bʌ quixtyañu ti Cristo cheꞌ bajcheꞌ an Cristo i bajñel.

14 Cheꞌ jini mach añonicla cheꞌ bajcheꞌ alpꞌeñalob muꞌ bʌ i waꞌ qꞌuexob i pensal, muꞌ bʌ i waꞌ chꞌujbiñob tiꞌ pusicꞌal chʌ bʌ tyac jach bʌ tꞌan muꞌ bʌ i subentyelob ti jiñob muꞌ bʌ i lotiñob. Como wen yujil bajcheꞌ miꞌ pucob i bajñel i ñajayel tyac.

15 Pero joñonla mi lac bej aleꞌ jini melel bʌ tꞌan ti pꞌuntyaya chaꞌan mi lac más xucꞌtyʌl majlel ti Cristo ti pejtyelel chʌ bʌ tyac jach mi lac chaꞌlen. Como Cristo i jolʌch lac bʌcꞌtyal yubil. Ochemoꞌ bʌ tiꞌ tꞌan Dios i bʌcꞌtyalʌch yubil.

16 Yaꞌ tyʌlem i pꞌʌtyʌlel pejtyelel i bʌcꞌtyal Cristo tiꞌ jol. Jini i bʌcꞌtyal tsꞌuyulʌch ti pejtyelel i pꞌac. Mi colel i bʌcꞌtyal yicꞌot mi yocꞌan i pꞌuntyaya cheꞌ weñʌch miꞌ chaꞌlen i toñel pejtyelel i pꞌac tyac.

17 Jini mic subeñet chaꞌan chʌꞌʌch mi yʌcꞌon c subeñetla lac Yum: Mach yom mi laꞌ wajñel cheꞌ bajcheꞌ yañoꞌ bʌ machꞌʌ baꞌan miꞌ cʌñeꞌ Dios como lolom jach bajcheꞌ miꞌ pensaliñob.

18 Añob ti icꞌtꞌojñal yubil como maꞌan miꞌ ñaꞌtyañob bajcheꞌ añob. Machꞌañobix i cuxtyʌlel tyʌlem bʌ ti Dios chaꞌan ti caj ñum jach i chaꞌan. Machꞌanix miꞌ chꞌʌmeñob isujm bajcheꞌ yom Dios.

19 Machꞌan mi saj quisnin i chaꞌlen machꞌʌ wen bʌ i chaꞌlibal. Tsaꞌix i yʌqꞌueyob i bʌ i chaꞌlen chʌ bʌ jach bʌ i tsuculel. Cheꞌ jach miꞌ bej más mulañob i chaꞌlen chʌ bʌ jach machꞌʌ wen.

20 Pero jatyetla mach cheꞌic ti cʌntisʌntiyetla. Pero ti cʌntisʌntiyetla chaꞌan Cristo.

21 Como mi cʌl tsaꞌix laꞌ wubi chaꞌan Cristo. Tsaꞌix i cʌntisʌyetla Cristo ti Chꞌujul bʌ i Chꞌujlel. Como an ti Jesús jini yoque melel bʌ i sujmlel.

22 Como jini miꞌ cʌntisañonla chaꞌan yom mi lac junyajlel cʌyeꞌ jini machꞌʌ wen tsaꞌ bʌ lac chaꞌle wajali cheꞌ max tyo ti lac chꞌujbi Cristo. Como junyajlel bibajax lac chaꞌlibal ti wajali como lac pusicꞌal tiꞌ lotiyonla chaꞌan ti lac mulʌ lac chaꞌlen machꞌʌ wen.

23 Yom mi tsijibtisʌntyel laꞌ pusicꞌal yicꞌot laꞌ pensal.

24 Ajñenla cheꞌ bajcheꞌ tsijib quixtyañujetla tsaꞌ bʌ tsijibtisʌnti ti Dios bajcheꞌ yom i pusicꞌal. Ajñenla ti tyoj yicꞌot ti sʌc.

25 Jin chaꞌan cʌyʌla laꞌ chaꞌlen lot. Jujuntiquiletla yom mi laꞌ chaꞌlen melel bʌ tꞌan yicꞌot laꞌ piꞌʌlob como ti lac pejtyelel añonla ti jumpꞌej jach bʌcꞌtyalʌl yubil chaꞌan añonla ti Cristo.

26 Mi ti michꞌʌyetla, wen qꞌuele laꞌ bʌ chaꞌan machꞌan mi laꞌ chaꞌlen mulil. Mach yom michꞌetla cꞌʌlʌ mi ñumel qꞌuin.

27 Maꞌ mi laꞌ wʌqꞌuen i chaꞌlen toñel xiba ti laꞌ pusicꞌal chaꞌan ti caj a michꞌlel.

28 Yom i cʌyeꞌ i chaꞌlen xujchꞌ jini ajxujchꞌ. Yom i chaꞌlen wen bʌ toñel tiꞌ cꞌʌb chaꞌan an chʌ bʌ an i chaꞌan, chaꞌan chꞌujbi i yʌqꞌuen jini machꞌʌ baꞌan i chaꞌan.

29 Maꞌ mi laꞌ chaꞌlen tsucul tꞌan pero chaꞌlenla uts bʌ tꞌan muꞌ bʌ i cotyan a piꞌʌlob bajcheꞌ yom. Chaꞌlenla tꞌan muꞌ bʌ i yʌqꞌuen i yutslel i pusicꞌal jini muꞌ bʌ i yubiñob.

30 Mach yom mi laꞌ chaꞌlen chʌ bʌ jach muꞌ bʌ i yʌqꞌuen i yubin i chꞌʌjyemlel jini Chꞌujul bʌ i Chꞌujlel Dios am bʌ ti laꞌ pusicꞌal. Como ti aqꞌuentiyetla jini Chꞌujul bʌ i Chꞌujlel Dios ti laꞌ pusicꞌal i wenta laꞌ marcajlel chaꞌan mi tsictiyel i chaꞌañet bʌ la Dios cꞌʌlʌ ti jim bʌ qꞌuin cheꞌ mi quej i tsꞌʌctiyel laꞌ cotyʌntyel.

31 Pero cʌyʌla a tsꞌaꞌqꞌuel laꞌ piꞌʌlob yicꞌot michꞌlel yicꞌot alꞌiya yicꞌot jopꞌtꞌan yicꞌot pejtyel machꞌʌ wen.

32 Pero yom utsetla yicꞌot yañoꞌ bʌ. Pꞌuntyañob. Ñusʌbeñob i mul cheꞌ bajcheꞌ Dios tiꞌ ñusʌbeyetla laꞌ mul ti Cristo jeꞌel.