2 Mi cʌl tsaꞌix laꞌ wubi chaꞌan Dios tiꞌ pʌsꞌeyon i yutslel i pusicꞌal chaꞌan ti yʌqꞌueyon c subeñetla jini wen bʌ tꞌan chaꞌan laj cotyʌntyel.

3 Tsaꞌix c wʌ tsꞌityaꞌ tsꞌijbubeyetla chaꞌan cheꞌ bajcheꞌ tic ñajal Dios ti yʌqꞌueyon j cʌñeꞌ jini machꞌʌ baꞌan tsictiyem ti yambʌ ora.

4 Cheꞌ mi laꞌ qꞌueleꞌ ili jun mi quej laꞌ ñaꞌtyan chaꞌan ti aqꞌuentiyon c chꞌʌmben i sujmlel jini machꞌʌ baꞌan tsictiyem chaꞌan Cristo ti yambʌ ora.

5 Ti ñoj oniyix Dios maꞌan ti yʌqꞌue quixtyañu i chꞌʌmꞌen isujm jini max tyo bʌ baꞌan tsictiyem ti yambʌ ora. Pero wale chaꞌan tiꞌ Chꞌujul bʌ i Chꞌujlel Dios ti yʌqꞌueyob i chꞌʌmꞌen isujm jini yajcʌbiloꞌ bʌ ajsubtꞌañob ñumel yicꞌot jini tsaꞌ bʌ i xiqꞌui yʌleꞌ Dios tsaꞌ bʌ wen aqꞌueyob i bʌ Dios.

6 Jini machꞌʌ baꞌan tsictiyem ti yambʌ ora jiñʌch iliyi: Chaꞌan ti jini wen bʌ tꞌan chaꞌan laj cotyʌntyel cheꞌ miꞌ chꞌujbiñob junlajal mi quej i yʌqꞌuentyelob israelob yicꞌot mach bʌ israelob jini chʌncol bʌ i pijtyañob. Junlajal añob ti Cristo cheꞌ ochemob tiꞌ tꞌan Dios. Junlajal mi quej i motin aqꞌuentyelob ti Cristo Jesús jini tsaꞌ bʌ i wʌ alʌ Dios.

7 Aunque maꞌix c ñuclel chaꞌan ti yutslel i pusicꞌal Dios ti yʌqꞌueyon c toñel tiꞌ subol jini wen bʌ tꞌan chaꞌan laj cotyʌntyel. Ti i pꞌʌtyʌlel Dios mic subeꞌ.

8 Mi an majch i chaꞌan bʌ Dios mach sajlic an i ñuclel mi yubin, joñon más i sajon tyo mi cubin cheꞌ bajcheꞌ pejtyelelob yañoꞌ bʌ yubil. Pero aunque maꞌix c ñuclel yubil, Dios ti yʌqꞌueyon i yutslel i pusicꞌal chaꞌan mic subeñob jini mach bʌ israelob bajcheꞌ an lac ricojlel ti Cristo. Maꞌix i pꞌisol lac ricojlel ti Cristo.

9 Dios tsaꞌ bʌ i mele pejtyel chʌ bʌ an tyac ti yʌqꞌueyon c tsictisʌben pejtyelel quixtyañu jini yom bʌ i chaꞌlen Dios chaꞌan miꞌ chꞌʌmꞌeñob isujm jini machꞌʌ baꞌan ti yʌcꞌʌ ti tsictiyel Dios cꞌʌlʌ ti ñoj oniyix.

10 Chaꞌan wale iliyi chaꞌan ti jini ochemoꞌ bʌ tiꞌ tꞌan Dios mi yʌcꞌob ti cʌjñel pejtyelel ñoj ñuc bʌ i ñaꞌtyʌbal Dios tiꞌ tyojlel ajtroñelob i chaꞌan Dios añoꞌ bʌ i yeꞌtyel yicꞌot i pꞌʌtyʌlel yaꞌ ti panchan.

11 Cꞌʌlʌ ti ñoj oniyix cheꞌ max tyo tiꞌ mele mulawil Dios tiꞌ wʌ ñaꞌtyʌ bajcheꞌ mi quej i chaꞌlen. Wale tsaꞌix i tsꞌʌctisʌ ti lac Yum Jesucristo.

12 Chaꞌan ti lac chꞌujbi Cristo machꞌan mi lac saj bʌcꞌñan lac pejcan Dios ti oración. Como la cujil isujm mux i yubibeñon la coración cheꞌ mi lac pejcan.

13 Jin chaꞌan mic subeñetla chaꞌan mach yom chꞌʌjyemetla chaꞌan ti caj jini wocol chʌncol bʌ c ñusan chaꞌañetla. Como jiñʌch chaꞌan laꞌ ñuclel.

14 Cheꞌ mic pensalin pejtyelel ñoj ñuc bʌ i ñaꞌtyʌbal Dios yicꞌot bajcheꞌ tiꞌ chaꞌle chaꞌañonla, mic ñoctyʌl chaꞌan mic pejcan ti oración i Tyat lac Yum Jesucristo.

15 Como jujunchajp tyatyʌlob mi wʌꞌ ti mulawil mi yaꞌ ti panchan ti aqꞌuentiyob i cꞌabaꞌ ti tyatyʌl ti Dios lac Tyat.

16 Cheꞌ bajcheꞌ an ñoj cabʌl i ñuclel Dios lac Tyat mij cꞌajtiben chaꞌan miꞌ wen pꞌʌtyʌlisʌbeñetla laꞌ pusicꞌal ti ñoj ñuc bʌ i pꞌʌtyʌlel chaꞌan ti Chꞌujul bʌ i Chꞌujlel.

17 Mij cꞌajtiben Dios chaꞌan Cristo mi yajñel ti laꞌ pusicꞌal chaꞌan ti laꞌ chꞌujbi. Chaꞌan wen tsʌts chuculetla yubil tiꞌ pꞌuntyaya,

18 mij cꞌajtiben Dios chaꞌan chꞌujbi laꞌ chꞌʌmꞌen isujm yicꞌot pejtyelel ochemoꞌ bʌ tiꞌ tꞌan Dios bajcheꞌ an i pochtyʌlel yicꞌot i ñajtlel yicꞌot i chanlel, yicꞌot i tyʌmlel i pꞌuntyaya Cristo chaꞌañonla.

19 Más ñuc i pꞌuntyaya Cristo cheꞌ bajcheꞌ baꞌic jach bʌ ñaꞌtyʌbalʌl. Mij cꞌajtiben Dios chaꞌan mi laꞌ cʌmben ili i pꞌuntyaya Cristo chaꞌan mi luꞌ bujtꞌel laꞌ pusicꞌal ti Dios.

20 Wale laꞌ sujbic i ñuclel Dios am bʌ i pꞌʌtyʌlel muꞌ bʌ ti toñel ti lac pusicꞌal. Chaꞌan ti jini i pꞌʌtyʌlel chꞌujbi i chaꞌlen más yonlel bajcheꞌ muꞌ bʌ laj cꞌajtiben mi jini muꞌ bʌ lac pensalin.

21 Laꞌ sujbic i ñuclel Dios ti pejtyelel ochemoꞌ bʌ tiꞌ tꞌan Dios yicꞌot ti Cristo Jesús cꞌʌlʌ ti beleꞌ qꞌuin.