2 Ti yambʌ ora ti laꞌ chaꞌle simaronlel cheꞌ bajcheꞌ jini machꞌʌ baꞌan miꞌ ñaꞌtyañob. Ti laꞌ tsʌcle bajcheꞌ tiꞌ pʌsꞌeyetla xiba machꞌʌ tsiquil ti lac wut muꞌ bʌ ti xicꞌojel wʌꞌ ti mulawil. Como jini miꞌ chꞌejlisan jini muꞌ bʌ i ñusʌbeñob i xicꞌojel Dios.

3 Chʌꞌʌch ti luꞌ ajniyonla ti lac pejtyelel ti yambʌ ora. Ti lac chaꞌle bajcheꞌ yom i tsuculel lac pusicꞌal yicꞌot tsucul bʌ lac pensal. Jin chaꞌan cheꞌ bajcheꞌ yañoꞌ bʌ jeꞌel, lac bʌjʌch lac bʌ tiꞌ michꞌqꞌueleyonla Dios.

4 Pero ñoj cabʌl i yutslel i pusicꞌal Dios chaꞌañonla. Tiꞌ wen pꞌuntyʌyonla.

5 Ti yʌqꞌueyonla laj cuxtyʌlel ti Cristo aunque sajtyemon tyo la ti lac mul yubil. Dios tiꞌ cotyʌyetla chaꞌan ti yutslel i pusicꞌal.

6 Tiꞌ pꞌʌtyʌlel Dios an tsijiꞌ bʌ laj cuxtyʌlel chaꞌan tsaꞌix i tyejchisʌyonla loqꞌuel baꞌan sajtyemoꞌ bʌ la quicꞌot Cristo Jesús yubil. Cheꞌ bajcheꞌ ti yʌqꞌueyonla lac motin buchtyʌl yaꞌ ti panchan yicꞌot.

7 Chʌꞌʌch tiꞌ chaꞌle Dios chaꞌan miꞌ tsictisʌbeñonla Cristo Jesús cꞌʌlʌ ti tyal tyo bʌ ora bajcheꞌ tiꞌ wen pꞌuntyʌyonla chaꞌan ti ñoj on bʌ i yutslel i pusicꞌal.

8 Cotyʌbiletla chaꞌan tiꞌ pꞌuntyʌyetla chaꞌan ti laꞌ chꞌujbi Cristo ti laꞌ pusicꞌal. Mach chaꞌanic chʌ bʌ ti laꞌ bajñel chaꞌle wen bʌ, pero chaꞌan Dios ti yʌqꞌueyetla laꞌ cotyʌntyel ti laꞌ majtyan jach.

9 Machꞌan mi la cʌqꞌuentyel laj cotyʌntyel chaꞌan ti caj wen bʌ mi lac chaꞌlen chaꞌan machꞌan majch chꞌujbi i lolon pʌs i bʌ ti ñuc.

10 Como Dios tiꞌ meleyonla. Ti yʌqꞌueyonla tsijiꞌ bʌ laj cuxtyʌlel tyʌlem ti Cristo Jesús chaꞌan mi lac chaꞌlen wen bʌ tsaꞌ bʌ i wʌ chajpʌ Dios chaꞌan mi lac chaꞌlen.

11 Jatyetla, mach bʌ israeleticla, cꞌajal laꞌ chaꞌan bajcheꞌ añetla ti yambʌ ora. Chaꞌan mach israeleticla, jini israeloꞌ bʌ i tyʌlelʌch miꞌ tsepob i pʌchʌlel tiꞌ pejcʌyetla ti machꞌʌ baꞌan tsepel i pʌchʌlel bʌ quixtyañujob.

12 Cꞌajal laꞌ chaꞌan, ti jim bʌ ora max tyo ochemetla ti Cristo. Mach chꞌujbi laꞌ motin ajñel yicꞌot jini israeloꞌ bʌ. Maꞌan ti laꞌ cʌñʌ jini trato bʌ tꞌan tsaꞌ bʌ i wʌ alʌ Dios yicꞌot jini tsaꞌ bʌ i wʌ alʌ Dios mi quej la cʌqꞌuentyel. Añetla ti ili mulawil pero maꞌan chʌ bʌ ti laꞌ pijtyʌ. Machꞌan ti laꞌ cʌñʌ Dios.

13 Ti wajali ñajt añetla yubil chaꞌan maꞌan ti laꞌ chꞌujbi Cristo. Pero wale añetla ti Cristo Jesús. Tsaꞌix pʌjyiyetla ti lʌcꞌʌl yubil chaꞌan tiꞌ beque i chꞌichꞌel Cristo chaꞌañetla.

14 An i ñʌchꞌtyʌlel lac pusicꞌal ti Cristo. Ti yuts isʌbeyob i pusicꞌal israelob yicꞌot machꞌʌ israelob chaꞌan jini chaꞌmujchꞌob mi yajñelob ti junmujchꞌ jach. Tiꞌ jisʌyob i michꞌqꞌuelob i bʌ como tꞌoxolob cheꞌ bajcheꞌ corralibil ti tsꞌajc ti xinil yubil.

15 Chaꞌan ti sajti Cristo ti cruz tiꞌ jisʌ i cꞌʌjnibal jini oniyix bʌ mandar yicꞌot i xicꞌojel tyac i chaꞌan bʌ israelob. Chʌꞌʌch ti yotsʌ jini chaꞌtꞌox ti junmujchꞌ jach tsijiꞌ bʌ quixtyañujob yubil muꞌ bʌ i motin ajñel yicꞌot Cristo. Chʌꞌʌch ti ñʌchꞌchocontiyob.

16 Chaꞌan ti sajti ti cruz Cristo tiꞌ lajmisʌ i periyal jini chaꞌmujchꞌob. Ti aqꞌuentiyob i ñʌchꞌtyʌlel i pusicꞌal yicꞌot Dios. Cheꞌ jini ti otsʌntiyob ti junmujchꞌob jach bʌ quixtyañu yubil. Lajal añob ti Cristo cheꞌ ochemob tiꞌ tꞌan Dios.

17 Cristo ti tyʌli i subeꞌ wen bʌ tꞌan chaꞌan miꞌ tyaj i ñʌchꞌtyʌlel i pusicꞌal ti pejtyelelob. Chʌꞌʌch jatyetla ñajt bʌ añetla yubil chaꞌan machꞌan ti laꞌ chꞌujbi ti yambʌ ora yicꞌot jini lʌcꞌʌl bʌ añob yubil como yom i chꞌujbiñob.

18 Chaꞌan ti Cristo ti pejtyelelonla mi israelon bʌ la mi mach israelon bʌ la mi lac lʌqꞌueꞌ Dios lac Tyat chaꞌan ti jini jach bʌ Chꞌujul bʌ i Chꞌujlel.

19 Jin chaꞌan, jatyetla, wale maꞌix miꞌ qꞌueletla cheꞌ bajcheꞌ mi mach i cʌñʌyetla yubil, cheꞌ bajcheꞌ mi ñumel jach muqꞌuetla bʌ quixtyañu yubil. Pero wale junlajal miꞌ qꞌueletla cheꞌ bajcheꞌ jini yoque i chaꞌañoꞌ bʌ Dios. Laꞌ piꞌʌlob laꞌ bʌ yicꞌot yañoꞌ bʌ i chaꞌañoꞌ bʌ Dios.

20 Jatyetla cheꞌ bajcheꞌ tyuni bʌ otyotyetla yubil. Waꞌchocobiletla tiꞌ pam i tsꞌajquil i yebal otyot yubil tsaꞌ bʌ i waꞌchocoyob jini ajsubtꞌañob ñumel yicꞌot jini tsaꞌ bʌ i xiqꞌui yʌleꞌ Dios. Jesucristo cheꞌ bajcheꞌ más ñuc bʌ i cꞌʌjnibal bʌ i tyunil ti i tsꞌajquil i yebal otyot chaꞌan i yoyel.

21 Ti pam Cristo jiñʌch jini tsꞌajquil i yebal otyot mi bej waꞌchocontyel otyot yubil. Wen otsʌbiletla cheꞌ bajcheꞌ tyun am bʌ ti pam i tsꞌajquil cꞌʌlʌ jintyo mi yujtyel i meleꞌ jumpꞌej jach bʌ otyot. Chꞌujulʌch como i chaꞌañʌch Dios.

22 Jatyetla jeꞌel chaꞌan añetla ti Cristo lajal mi laꞌ motin ajñel yicꞌot pejtyelel yañoꞌ bʌ ochemoꞌ bʌ tiꞌ tꞌan Dios chaꞌan mi laꞌ wajñel ti yotyotyetla Dios yubil baꞌ miꞌ chaꞌlen chumtyʌl chaꞌan tiꞌ Chꞌujul bʌ i Chꞌujlel.