Yom mi lac tyem cotyan lac bʌ
6
Hermañujob, mi ti yotsʌ i mul juntiquil ochem bʌ tiꞌ tꞌan Dios, jatyetla muꞌ bʌ laꞌ tsʌclen chʌ bʌ yom Chꞌujul bʌ i Chꞌujlel Dios, yom mi laꞌ cotyan chaꞌan miꞌ chaꞌ tyoj isan i bʌ. Pero yom mi laꞌ cotyan ti pecꞌlel laꞌ pusicꞌal. Qꞌuele laꞌ bʌ ame laꞌ wotsan laꞌ mul jeꞌel. 2 Cotyan laꞌ bʌ ti cuchol laꞌ wocol. Cheꞌ jini, tsꞌʌcʌl mi laꞌ chꞌujbiben i mandar Cristo.
3 Mi an majch miꞌ lolon qꞌuel i bʌ ti ñuc pero machꞌan i ñuclel mucꞌ jach i bajñel lotin i bʌ.
4 Jujuntiquil yom i bajñel ñaꞌtyan bajcheꞌ yilal muꞌ bʌ i chaꞌlen chaꞌan miꞌ ñaꞌtyan mi wen o mi mach wen miꞌ chaꞌlen. Jini muꞌ bʌ i ñaꞌtyan weñʌch tiꞌ chaꞌle cꞌajacña i yoj mi yubin. Mach yom miꞌ lajeꞌ tsaꞌ bʌ i chaꞌle yicꞌot tsaꞌ bʌ i chaꞌle yambʌ i piꞌʌlob chaꞌan miꞌ pʌs i bʌ ti ñuc.
5 Jujuntiquil an tiꞌ wenta i ñaꞌtyan mi wen o mi mach wen tiꞌ chaꞌle.
6 Jini muꞌ bʌ i cʌntisʌntyelob ti jini wen tꞌan chaꞌan laj cotyʌntyel yom i yʌqꞌueñob jini muꞌ bʌ i chaꞌleñob cʌntisa chʌ bʌ tyac cꞌʌjnibal i chaꞌan.
7 Mach yom mi laꞌ lotin laꞌ bʌ. Machꞌan majch chꞌujbi i lotin Dios. Mi quejel i tyojtyʌl yubil ti Dios ti tyal tyo bʌ ora, jiñʌch cheꞌ bajcheꞌ tiꞌ chaꞌle quixtyañu wʌꞌ ti mulawil. Cheꞌ bajcheꞌ miꞌ chaꞌleñob pacꞌ quixtyañujob chʌꞌʌch miꞌ cꞌajeꞌ jeꞌel.
8 Jini quixtyañujob muꞌ bʌ i chaꞌlen chʌ bʌ miꞌ bajñel mulan i pusicꞌal mi quejel i cꞌajeꞌ xotꞌmulil yubil. Pero jini quixtyañujob muꞌ bʌ i chaꞌlen chʌ bʌ miꞌ mulan jini Chꞌujul bʌ i Chꞌujlel Dios mi quejel i cꞌajeꞌ yubil i cuxtyʌlel machꞌʌ yujil jilel.
9 Jin chaꞌan mach yom mi lac lujbꞌan lac chaꞌlen wen bʌ. Muꞌ tyo quejel laj cꞌajeꞌ wen bʌ yubil cheꞌ ti yorojlel mi machꞌan ti lujbꞌayonla.
10 Jin chaꞌan ti jujunyajlel cheꞌ an bajcheꞌ chꞌujbi laj cotyan lac piꞌʌlob yom mi laj cotyañob. Más tyo yom mi laj cotyañob la quermañujob jini chʌncol bʌ i chꞌujbiñob Dios jeꞌel.
Cojix bʌ tꞌan tyac yicꞌot saludo tyac
11 Wale qꞌuele. Chʌncol c tsꞌijbubeñetla jun ti colem letra tyac tic bajñel j cꞌʌb.
12 Jini yom bʌ i wersa lolon xiqꞌuetla laꞌ wʌcꞌ laꞌ bʌ ti tsepol laꞌ pʌchʌlel yom jach i xiqꞌuetla chaꞌan mi qꞌuejlel ti ñuc ti jini lojon c piꞌʌlob israelob. Muqꞌuic i cʌntisañob chaꞌan mi laj cotyʌntyel chaꞌan jach mi lac chꞌujbin ti sajti ti cruz Jesús mi tyʌcꞌlʌntyelob. Jin chaꞌan miꞌ xiqꞌuetla laꞌ chꞌʌm tsep pʌchʌlel jeꞌel.
13 Mi jinic muꞌ bʌ i yʌcꞌ i bʌ ti tsepol i pʌchʌlel machꞌan miꞌ luꞌ chꞌujbiben ti pejtyelel i mandar Moisés. Pero yom jach i xiqꞌuetla laꞌ wʌcꞌ laꞌ bʌ ti tsepol laꞌ pʌchʌlel chaꞌan jach miꞌ pʌsob i bʌ ti ñuc cheꞌ mi laꞌ wersa chꞌujbibeñob i tꞌan.
14 Pero joñon mach com c pʌs c bʌ ti ñuc. Jini jach com c sub i ñuclel lac Yum Jesucristo tsaꞌ bʌ sajti ti cruz. Chaꞌan ti caj tic chꞌujbi ti sajti ti cruz chaꞌañon machꞌan mic bej qꞌuel ti ñuc chʌ bʌ tyac jach an ti mulawil. Machꞌan mic bej mulan c chaꞌlen i chaꞌan jach bʌ mulawil.
15 Como mi chʌncol lac tyem ajñel la quicꞌot Cristo Jesús, maꞌix i cꞌʌjnibal mi tsepel lac pʌchʌlel o mi mach tsepel lac pʌchʌlel. Jini am bʌ i cꞌʌjnibal jiñʌch cheꞌ tsaꞌix tsijibtisʌntiyonla ti Cristo.
16 Laꞌ ajnic laꞌ wicꞌot i ñʌchꞌtyʌlel laꞌ pusicꞌal yicꞌot i pꞌuntyaya Dios ti pejtyeletla muꞌ bʌ laꞌ wajñel ti tsijib quixtyañu cheꞌ bajcheꞌ yom Dios yicꞌot ti pejtyelel i chaꞌañoꞌ bʌ Dios muꞌ bʌ i qꞌuejlel ti yoque israeloꞌ bʌ ti Dios.
17 Wale iliyi cꞌʌlʌ ti beleꞌ ora mach com an majch miꞌ bej tyajon ti tꞌan cheꞌ mi lolon yʌl mach yajcʌbilon bʌ ajsubtꞌañon ñumel. Añʌch i tsoyil tyac c bʌcꞌtyal muꞌ bʌ i tsictisan ajtroñelon i chaꞌan lac Yum Jesús.
18 Hermañujob, laꞌ ajnic laꞌ wicꞌot i yutslel i pusicꞌal lac Yum Jesucristo ti laꞌ pejtyelel. Amén.