2 Ubin. Joñon Pablojon, mic subeñetla mi ti laꞌ wʌqꞌue laꞌ bʌ ti tsepol laꞌ pʌchʌlel i tyʌlel bʌ miꞌ chaꞌlen jini winicoꞌ bʌ lojon c piꞌʌlob israelob, lolon jach ti laꞌ chꞌujbi Cristo cheꞌ jini.

3 Com c chaꞌ suben majchical jach bʌ winic muꞌ bʌ i yʌcꞌ i bʌ ti tsepol i pʌchʌlel wersa yom miꞌ chꞌujbiben ti pejtyelel muꞌ bʌ i yʌleꞌ i mandar Moisés.

4 Jatyetla muꞌ bʌ laꞌ ñaꞌtyan mi laꞌ cotyʌntyel ti Dios cheꞌ tsꞌʌcʌl mi laꞌ chꞌujbiben jini i mandar Moisés, tsaꞌix laꞌ cʌyʌ i yutslel Cristo. Tsaꞌix laꞌ pꞌaja i yutslel Dios.

5 Pero joñon lojon muꞌ bʌ lojon c chꞌujbin chaꞌan Cristo miꞌ cotyañon lojon, jini Chꞌujul bʌ i Chꞌujlel Dios miꞌ cotyañon lojon c ñaꞌtyan chaꞌan mi lojon j qꞌuejlel ti tyoj ti Dios.

6 Cheꞌ mi lojon cajñel lojon quicꞌot Cristo Jesús, maꞌix i cꞌʌjnibal chaꞌan mi lojon j qꞌuejlel ti tyoj cheꞌ tsepel lac pʌchʌlel o mi machꞌan tsepel lac pʌchʌlel. Jini ñuc bʌ i cꞌʌjnibal chaꞌan mi laj qꞌuejlel ti tyoj, jiñʌch cheꞌ mi lac chꞌujbin. Chaꞌan chʌncol lac chꞌujbin mi lac chaꞌlen pꞌuntyaya.

7 Weñʌch ti ajniyetla ti ñaxan chaꞌan ti laꞌ chꞌujbi chaꞌan Cristo miꞌ cotyañetla. ¿Majchqui, cheꞌ jini tiꞌ mʌctyʌbeyetla laꞌ bej chꞌujbiben jini melel bʌ tꞌan chaꞌan laj cotyʌntyel?

8 Mach Diosic tsaꞌ bʌ i mʌctyʌbeyetla. Como jiñʌch tsaꞌ bʌ i pʌyʌyetla laꞌ chꞌujbin.

9 Mach yom miꞌ ñajayel ti laꞌ pusicꞌal i sujmlel jini albil bʌ tꞌan: Tsꞌityaꞌ jach jini levadura mi yʌqꞌuen i wos i bʌ ti pejtyelel jini caxlan waj, miꞌ luꞌ xaxan, cheꞌ tsꞌijbubil. Como jasʌl jach juntiquil miꞌ tyech tꞌan chaꞌan miꞌ luꞌ tsʌcleñob yambʌ cʌntisa.

10 Ñʌchꞌʌl c pusicꞌal como mic ñaꞌtyan lac Yum mi quejel i cotyañetla chaꞌan machꞌan mi laꞌ chꞌujbin yambʌ tꞌan, pero chaꞌan mi quejel laꞌ bej chꞌujbin bajcheꞌ mic chꞌujbin jeꞌel. Dios mi quejel i yʌqꞌuen i xotꞌeꞌ i mul majchical jach muꞌ bʌ i soc laꞌ ñaꞌtyʌbal.

11 Jixcu joñon muqꞌuic tyo c bej suben winicob i yʌcꞌob i bʌ ti tsepbentyel i pʌchʌlel, mi lajmel c tyʌcꞌlʌntyel ti lojon c piꞌʌlob jini israelob. Cheꞌ jini, mi lajmel i tsꞌaꞌlentyel jini tꞌan chaꞌan ti sajti Cristo ti cruz chaꞌan i cotyañonla.

12 Pero muqꞌuic jax i junyajlel tsepob i bʌ jini chʌncol bʌ i tyʌcꞌlañetla cheꞌ mi lolon al wersa yom mi tsepbentyel laꞌ pʌchʌlel chaꞌan mi laꞌ cotyʌntyel.

13 Como jatyetla hermañujob, ti pʌjyiyetla mach chaꞌan mi laꞌ yumin i mandar Moisés pero chaꞌan mi laꞌ wajñel ti libre. Pero mach yom mi laꞌ lolon ñaꞌtyan libre añonla chaꞌan jach mi lac tsʌclen chʌ bʌ bajñel yom lac pusicꞌal. Pero jini más yom bʌ, jiñʌch chaꞌan mi laꞌ cotyan laꞌ bʌ ti pꞌuntyaya.

14 Como tsꞌʌcʌl mi chꞌujbibentyel pejtyelel muꞌ bʌ i yʌleꞌ ti mandar Dios chaꞌan ti jumpꞌej jach xicꞌojel muꞌ bʌ i yʌl: Pꞌuntyan a piꞌʌlob ti chumtyʌl lajal bajcheꞌ maꞌ bajñel pꞌuntyan a bʌ, cheꞌen.

15 Pero cheꞌ mi laꞌ michꞌqꞌuel laꞌ bʌ chaꞌan ti periyal yicꞌot alꞌiya chʌncox laꞌ cꞌux laꞌ bʌ yubil. Xucꞌuletla chaꞌan machꞌan mi laꞌ jisan laꞌ bʌ yubil.

16 Jini muꞌ bʌ c subeñetla jiñʌch iliyi: Ajñenla cheꞌ bajcheꞌ yom jini Chꞌujul bʌ i Chꞌujlel Dios. Cheꞌ jini machꞌan mi quejel laꞌ chaꞌlen chʌ bʌ yom i bajñel chaꞌlen laꞌ pusicꞌal.

17 Como chʌ bʌ bajñel yom i chaꞌlen laꞌ pusicꞌal miꞌ contrajin chʌ bʌ yom jini Chꞌujul bʌ i Chꞌujlel Dios. Jini Chꞌujul bʌ i Chꞌujlel Dios i contra jini muꞌ bʌ i bajñel mulan laꞌ pusicꞌal. I contra i bʌ. Jin chaꞌan mach chꞌujbi laꞌ chaꞌlen chʌ bʌ laꞌ wom.

18 Pero mi jiñʌch Chꞌujul bʌ i Chꞌujlel Dios muꞌ bʌ i bej tyoj isañetla majlel, cheꞌ jini mach laꞌ wenta laꞌ chꞌujbiben i mandar Moisés.

19-21 Wen tsiquil chʌ bʌ miꞌ chaꞌleñob muꞌ bʌ i tsʌclen chʌ bʌ bajñel yom i pusicꞌal quixtyañu: An tꞌan yicꞌot yambʌ winic yambʌ xꞌixic. Miꞌ chaꞌleñob i tsuculel. Maꞌix i quisin. Miꞌ chꞌujutisan melel jach bʌ dios tyac. Miꞌ chaꞌleñob wujt. Miꞌ michꞌqꞌuelob i piꞌʌlob. Miꞌ chaꞌleñob alꞌiya. Miꞌ michꞌqꞌuel chʌ bʌ an i chaꞌan i piꞌʌlob. Ora jach miꞌ michꞌan. Miꞌ lolon bajñel pensalin i bajñel i wenlel. Miꞌ tꞌoxob i bʌ ti periyal bʌ tꞌan. Miꞌ michꞌqꞌuel i wenlel yañoꞌ bʌ. Miꞌ chaꞌleñob tsʌnsa. Xqꞌuixñijelob. Xwoꞌlelob. Miꞌ chaꞌleñob yan tyac bʌ lajal bʌ mulil bajcheꞌ jini. Mic chaꞌ subeñetla bajcheꞌ tic wʌ subeyetla ti yambʌ ora. Jini muꞌ bʌ i chaꞌlen tyac jini, maꞌan mi quejel i yochel yaꞌ baꞌ miꞌ chaꞌlen yumʌl Dios.

22-23 Pero Chꞌujul bʌ i Chꞌujlel Dios miꞌ tsictisan wen bʌ miꞌ chaꞌlen ti lac pusicꞌal. Mi yʌqꞌueñonla lac chaꞌlen pꞌuntyaya yicꞌot cꞌajacña bʌ la coj yicꞌot i ñʌchꞌtyʌlel lac pusicꞌal yicꞌot chaꞌan laj cucheꞌ ti wen i simaronlel yañoꞌ bʌ yicꞌot chaꞌan mi lac pʌs lac bʌ ti uts yicꞌot chaꞌan mi laj cotyan yañoꞌ bʌ yicꞌot i xucꞌtyʌlel lac pusicꞌal yicꞌot la cajñel ti pecꞌ yicꞌot chaꞌan mi lac ticꞌ lac pusicꞌal. Machꞌan mandar muꞌ bʌ i ticꞌonla lac chaꞌlen ili tyac.

24 Jini i chaꞌañoꞌ bʌ Cristo tsaꞌix i yʌcꞌʌ ti jocꞌtyʌl ti cruz yicꞌot Cristo yubil i chaꞌan bʌ i bajñel i pusicꞌal chaꞌan machꞌan miꞌ bej chꞌujbiben i xicꞌol muꞌ bʌ i mulan i chaꞌan bʌ i bajñel i pusicꞌal quixtyañu yicꞌot i bajñel i simaronlel.

25 Chaꞌan cuxulonla chaꞌan ti Chꞌujul bʌ i Chꞌujlel Dios ti lac pusicꞌal yom jeꞌel mi lac tsʌclen Chꞌujul bʌ i Chꞌujlel Dios cheꞌ miꞌ pʌsꞌeñonla majlel bajcheꞌ yom mi la cajñel.

26 Mach yom mi lac lolon pʌs lac bʌ ti ñuc chaꞌan machꞌan mi lac tyejchben i michꞌlel lac piꞌʌlob. Mach yom mi lac michꞌqꞌuel i ñuclel lac piꞌʌlob.