2 Chaꞌ tsajniyon yaꞌ baꞌan lojon c piꞌʌlob israelob. Como Dios tiꞌ xiqꞌuiyon majlel chaꞌan wersa yom mic majlel. Yaꞌ ti Jerusalén ti lojon c muchꞌqui lojon c bʌ quicꞌot jini añoꞌ bʌ yeꞌtyel chaꞌan hermañujob. Tic subeyob ti i bajñelob jini tꞌan chaꞌan laj cotyʌntyel muꞌ bʌ c subeñetla mach bʌ israelet bʌ la chaꞌan miꞌ ñaꞌtyañob chaꞌan weñʌch tic subeyetla i tꞌan Dios chaꞌan mach lolomic jach tic chaꞌle toñel o chaꞌan mach lolomic jach mic bej chaꞌlen troñel.

3 Pero mi jinic Tito tsajni bʌ quicꞌot machꞌan ti xijqꞌui chaꞌan mi tsejpel i pʌchʌlel aunque mach israel bʌ quixtyañu jini Tito.

4 Melelʌch, an jini tsaꞌ bʌ i lolon subu i bʌ ti ochemoꞌ bʌ tiꞌ tꞌan Dios tsaꞌ bʌ mucul otsʌyob i bʌ lojon quicꞌot. Tiꞌ xiqꞌuiyob Tito chaꞌan mi tsepbentyel i pʌchʌlel. Ti ochiyob chaꞌan yom jach i qꞌuelob bajcheꞌ añonla cheꞌ añonla ti Cristo Jesús. Yom i chaꞌ chuconla yubil chaꞌan mi lac jacꞌben jini oniyix bʌ mandar.

5 Pero machꞌan ti lojon c saj chꞌujbibe bajcheꞌ tiꞌ xiqꞌuiyon lojon como com lojon mi cʌñʌtyʌntyel jini melelʌch bʌ tꞌan chaꞌan laj cotyʌntyel chaꞌañetla.

6 Pero jini ñuc bʌ i yeꞌtyel chaꞌan jini ochemoꞌ bʌ tiꞌ tꞌan Dios maꞌan tiꞌ subeyon lojon yambʌ tꞌan yom bʌ mi lojon j cʌntisañetla. Aunque ñuc i yeꞌtyel machꞌan mic pensalin mi ñuc como junlajal miꞌ qꞌuel quixtyañujob Dios.

7 Maꞌan tiꞌ subeyoñob yambʌ tꞌan yom bʌ mij cʌntisañetla. Pero tiꞌ ñaꞌtyʌyob chaꞌan Dios ti yʌqꞌueyon tic wenta chaꞌan mic majlel ti subtꞌan yaꞌ baꞌ añetla chaꞌan mic subeñetla jini wen bʌ tꞌan chaꞌan laj cotyʌntyel baꞌan mach bʌ israelet la. Chʌꞌʌch bajcheꞌ ti aqꞌuenti tiꞌ wenta Pedro i sub majlel jini jach bʌ tꞌan baꞌan jini israelob.

8 Como jini jach bʌ Dios tsaꞌ bʌ i choco majlel Pedro chaꞌan yajcʌbil bʌ ajsubtꞌan ñumel baꞌan lojon c piꞌʌlob jini israeloꞌ bʌ, tiꞌ chocoyon majlel jeꞌel yaꞌ baꞌ añetla jini mach bʌ israeletla.

9 Jin chaꞌan jini Jacobo, Pedro yicꞌot Juan muꞌ bʌ i qꞌuejlel ti ñuc bʌ yeꞌtyel chaꞌan ochemoꞌ bʌ tiꞌ tꞌan Dios tiꞌ ñaꞌtyʌyob chaꞌan Dios ti yʌqꞌueyon c troñel. Tiꞌ chucbeyoñob j cꞌʌb quicꞌot Bernabé chaꞌan tsiquil uts lojon quicꞌot, chaꞌan junlajal tiꞌ ñaꞌtyʌyob chaꞌan mi lojon c majlel ti subtꞌan baꞌan jini mach bʌ israelob. Jini mi majlelob ti subtꞌan baꞌan jini israeloꞌ bʌ.

10 Jini jach tiꞌ subeyon chaꞌan mi lojon j cotyañob jini pꞌumpꞌuñoꞌ bʌ. Jiñʌch tsaꞌ bʌ c wʌ ñaꞌtyʌ c chaꞌlen ti pejtyelel c pusicꞌal.

11 Pero cheꞌ ñac ti majli Pedro ti lum Antioquía bʌ i cꞌabaꞌ, yaꞌ añon jeꞌel. Tic tiqꞌui tiꞌ tyojlel hermañujob, como mach wen bajcheꞌ tiꞌ chaꞌle.

12 Como weñʌch tiꞌ ñaxan chaꞌle. Tiꞌ chaꞌle uchꞌel Pedro yicꞌot jini mach bʌ israelobic jintyo ti cꞌoti chaꞌtiquil uxtiquil i piꞌʌlob jini Jacobo. Cheꞌ jini ti xucꞌul cʌyʌ i chaꞌlen uchꞌel yicꞌotyob jini machꞌʌ israelob. Como tiꞌ lolon bʌcꞌñʌ jini yambʌ israeloꞌ bʌ muꞌ bʌ i lolon wersa xicꞌob i chꞌʌmob tsep pʌchʌlel chaꞌan i cotyʌntyel jini mach bʌ israelob.

13 Cheꞌ jini, jini yambʌ ochemoꞌ bʌ tiꞌ tꞌan Dios israeloꞌ bʌ yaꞌ ti Antioquía lajal tiꞌ lolon chaꞌleyob ti chaꞌchajplel i pensal jeꞌel. Jinic tyo Bernabé jeꞌel ti lotinti. Lajal tiꞌ cʌyʌ uchꞌel yicꞌot jini mach bʌ israelob.

14 Pero cheꞌ ñac ti quilʌ mach wen ti ajniyob cheꞌ bajcheꞌ miꞌ cʌntisañonla jini melel bʌ tꞌan chaꞌan laj cotyʌntyel, tic sube jini Pedro tiꞌ tyojlel ti pejtyelel muchꞌquibiloꞌ bʌ: Jatyet israelet. Chaꞌan ti a chꞌujbi ajcotyayajʌch a chaꞌan Cristo ti ajniyet cheꞌ bajcheꞌ jini mach bʌ israelob, mach cheꞌic bajcheꞌ juntiquil israel bʌ. Pero wale chʌncol a xicꞌ jini mach bʌ israeloꞌ bʌ i yajñel cheꞌ bajcheꞌ israelob muꞌ tyo bʌ i bej chꞌujbiben jini oniyix bʌ mandar. Mach wen bajcheꞌ maꞌ chaꞌlen, choꞌon tic sube. Cheꞌ ti yʌlʌ Pablo.

15 Pablo tiꞌ sube Pedro: Joñonla israelon bʌ la ti chꞌocʌyonla. Machꞌan mi lac chaꞌlen jini mulil tyac muꞌ bʌ i bej chaꞌlen jini yañoꞌ bʌ mach bʌ baꞌan miꞌ ñaꞌtyañob.

16 Pero la cujil machꞌan majch mi qꞌuejlel ti tyoj ti Dios chaꞌan ti caj tiꞌ chaꞌle chʌ bʌ miꞌ xicꞌ jini mandar i chaꞌan Moisés. Jini jach mi qꞌuejlel ti tyoj muꞌ bʌ i chꞌujbin ajcotyayajʌch i chaꞌan Jesucristo. Jin chaꞌan joñonla israelon bʌ la jeꞌel ti lac chꞌujbi ajcotyayajʌch lac chaꞌan Jesucristo chaꞌan miꞌ qꞌuelonla ti tyoj Dios cheꞌ mi lac chꞌujbin. Machꞌan mi laj qꞌuejlel ti tyoj chaꞌan ti lac chaꞌle jini muꞌ bʌ i xicꞌonla lac chaꞌlen jini mandar. Como machꞌan majch mi qꞌuejlel ti tyoj ti Dios chaꞌan ti caj tiꞌ chꞌujbibe chʌ bʌ miꞌ xicꞌ jini mandar.

17 Cheꞌ la com laj qꞌuejlel ti tyoj ti Dios chaꞌan mi lac chꞌujbin ajcotyayajʌch lac chaꞌan Cristo, mi lac tsictisan chaꞌan lajal xmuliloñʌchla jeꞌel cheꞌ bajcheꞌ jini mach bʌ israelob. ¿Chʌncol ba i xicꞌonla ti mulil Cristo chaꞌan ti caj machꞌan mi lac bej xicꞌbentyel ti i mandar Moisés? Machꞌan.

18 Tsaꞌix cʌlʌ chaꞌan machꞌan mi laj cotyʌntyel ti i jacꞌbentyel i mandar Moisés. Pero mi muqꞌuic c chaꞌ jacꞌ jini mandar cheꞌ bajcheꞌ mi chʌncol i cotyañonla yubil, tsiquil mach wen bajcheꞌ chʌncol c chaꞌlen como cheꞌ bajcheꞌ mi chaꞌchajp c pensal, cheꞌ jini.

19 Maꞌix bej an i cꞌʌjnibal i mandar Moisés chaꞌañonla como mach tsꞌʌcʌl chꞌujbi lac chꞌujbiben jini mandar tyac. Tsꞌijbubil ti mandar mi yʌl: Wersa mi tsʌnsʌntyel ti pejtyelel mach bʌ baꞌan tsꞌʌcʌl miꞌ chꞌujbiben jini mandar tyac. Jin chaꞌan mi lac chꞌujbin ajcotyaya lac chaꞌan Cristo chaꞌan cuxul mi la cajñel cheꞌ bajcheꞌ yom Dios.

20 Cheꞌ ñac Cristo ti jocꞌle ti cruz tiꞌ xotꞌbe i mul ti pejtyelel machꞌʌ tsꞌʌcʌl miꞌ chꞌujbiben i mandar Moisés. Cheꞌ bajcheꞌ ti sajtiyon cheꞌ ñac ti sajti Cristo. Tsaꞌix jocꞌleyon ti cruz quicꞌot Cristo yubil. Jin chaꞌan mach joñon c bajñel cuxulon wale, pero cuxulon chaꞌan an quicꞌot Cristo tic pusicꞌal. Cuxulon chaꞌan mic chꞌujbin chaꞌan ajcotyayajʌch c chaꞌan i Yalobil bʌ Dios tsaꞌ bʌ i pꞌuntyʌyon. Ti yʌcꞌʌ i bʌ ti sajtyel chaꞌañon.

21 Machꞌan mic pꞌajeꞌ i yutslel Dios. Muqꞌuic laj qꞌuejlel ti tyoj ti Dios chaꞌan mi lac chꞌujbiben jini mandar Moisés cheꞌ jini lolom jachix ti sajti Cristo.