2 Subeñon: ¿Tsaꞌ ba aqꞌuentiyetla jini Chꞌujul bʌ i Chꞌujlel Dios chaꞌan ti laꞌ chꞌujbibe muꞌ bʌ i xiqꞌueꞌ jini mandar Moisés mi laꞌ wʌl? ¿O chaꞌan ba ti laꞌ chꞌujbi jini wen bʌ tꞌan chaꞌan laj cotyʌntyel tsaꞌ bʌ laꞌ wubi?

3 Ti queji laꞌ cotyʌntyel chaꞌan ti laꞌ chꞌujbi melelʌch jini wen bʌ tꞌan chaꞌan laj cotyʌntyel. Chaꞌan ti jini Chꞌujul bʌ i Chꞌujlel Dios ti laꞌ chꞌujbi. ¿Bajcheꞌ isujm cheꞌ machꞌan mi laꞌ ñaꞌtyan? Wale mi laꞌ lolon ñaꞌtyan chaꞌan chꞌujbi laꞌ tsꞌʌctisan laꞌ cotyʌntyel chaꞌan ti caj mi laꞌ chꞌujbiben i mandar Moisés.

4 ¿Lolom jach ba ti laꞌ ñusʌ pejtyelel laꞌ wocol chaꞌan ti caj ti laꞌ chꞌujbi melelʌch jini wen bʌ tꞌan? Cꞌoꞌojl añʌch i cꞌʌjnibal ti laꞌ ñusʌ wocol chaꞌan muꞌ tyo quejel laꞌ bej chꞌujbin.

5 Cheꞌ Dios mi yʌqꞌueñonla Chꞌujul bʌ i Chꞌujlel yicꞌot cheꞌ miꞌ pʌs ñuc tyac bʌ i pꞌʌtyʌlel ti laꞌ tyojel, ¿chucoch miꞌ pʌs mi laꞌ wʌl? Miꞌ pʌs chaꞌan ti caj mi laꞌ chꞌujbin jini wen bʌ tꞌan chaꞌan laj cotyʌntyel tsaꞌ bʌ laꞌ wubi. Maꞌix tiꞌ pʌsʌ ñuc tyac bʌ i pꞌʌtyʌlel chaꞌan ti caj ti laꞌ jacꞌʌ chʌ bʌ miꞌ xicꞌonla i mandar Moisés.

6 Abraham tiꞌ chꞌujbi chaꞌan mi quejel i yujtyel bajcheꞌ tiꞌ wʌ sube Dios. Jasʌl tiꞌ qꞌuele Dios chaꞌan mi qꞌuejlel ti tyoj jini Abraham.

7 Jin chaꞌan yom mi laꞌ ñaꞌtyan chaꞌan jini yoque melel bʌ i jiñʌjlel Abraham yubil jiñʌch muꞌ bʌ i chꞌujbin bajcheꞌ tiꞌ chꞌujbi Abraham.

8 Ti wʌ ajli ti jini Tsꞌijbubil bʌ i Tꞌan Dios ti ñoj oniyix chaꞌan Dios mi quejel i qꞌueleꞌ ti tyoj jini machꞌʌ israeloꞌ bʌ muꞌ tyo bʌ quejel i chꞌujbiñob jeꞌel. Ili wen bʌ tꞌan ti wʌ subenti Abraham: Chaꞌan ti jatyet mi quejel i tyaj i wenlel añoꞌ bʌ ti pejtyelel pañimil tyac, cheꞌ ti subenti Abraham.

9 Jin chaꞌan, jini muꞌ bʌ i chꞌujbin miꞌ lajal tyajeꞌ i wenlel yicꞌot Abraham tsaꞌ bʌ i chꞌujbi chaꞌan mi quejel i yujtyel bajcheꞌ tiꞌ wʌ sube Dios.

10 Chocolix ti Dios jini muꞌ bʌ i lolon ñaꞌtyan i tyaj i cotyʌntyel chaꞌan ti caj miꞌ jacꞌben i mandar Moisés. Como ti Tsꞌijbubil bʌ i Tꞌan Dios mi yʌl: Chocolix ti Dios ti pejtyelel machꞌʌ baꞌan tsꞌʌcʌl miꞌ jacꞌben ti pejtyelel tsꞌijbubil bʌ ti i mandar Moisés, cheꞌ tsꞌijbubil.

11 Tsiquil cheꞌ jini machꞌan majch mi qꞌuejlel ti tyoj ti Dios chaꞌan ti caj tiꞌ chꞌujbibe jini mandar. Como jini Tsꞌijbubil bʌ i Tꞌan Dios mi yʌl: An i cuxtyʌlel machꞌʌ baꞌan mi jilel jini muꞌ bʌ i qꞌuejlel ti tyoj ti Dios chaꞌan ti caj tiꞌ chꞌujbi melelʌch jini tsaꞌ bʌ i yʌlʌ Dios.

12 Mach lajalic i chꞌujbintyel Dios yicꞌot i jacꞌol i mandar Moisés pero mi yʌl: Mi an tsꞌʌcʌl bʌ miꞌ jacꞌ jini mandar tyac, cuxul mi quejel i yajñel ti beleꞌ ora chaꞌan tiꞌ jacꞌol jini mandar tyac, cheꞌ mi yʌl.

13 Cristo tiꞌ mʌñʌyonla loqꞌuel tiꞌ pꞌʌtyʌlel jini mandar muꞌ bʌ i yʌcꞌonla ti chojquel ti Dios. Pero Cristo ti poj chojqui ti Dios chaꞌan ti caj lac mul. Como Tsꞌijbubil bʌ i Tꞌan Dios mi yʌl: Chojquem ti Dios majchical jach muꞌ bʌ i jocꞌtyʌl ti tyeꞌ, cheꞌen.

14 Chʌꞌʌch tiꞌ mʌñʌyonla loqꞌuel tiꞌ pꞌʌtyʌlel jini mandar chaꞌan mi laꞌ wʌqꞌuentyel laꞌ cotyʌntyel jeꞌel mach bʌ israeletla tsaꞌ bʌ wʌ subenti Abraham ti Dios mi quejel i yʌqꞌuentyelob chaꞌan ti Jesucristo. Ti pejtyeleletla chaꞌan ti laꞌ chꞌujbi chaꞌan ajcotyaya laꞌ chaꞌan Jesucristo mi laꞌ wʌqꞌuentyel jini Chꞌujul bʌ i Chꞌujlel Dios tsaꞌ bʌ i wʌ alʌ Dios mi quejel la cʌqꞌuentyel.

15 Hermañujob, laꞌ lac lajeꞌ muꞌ bʌ i chaꞌlen Dios yicꞌot bajcheꞌ miꞌ chaꞌlen quixtyañujob wʌꞌ ti mulawil. An quixtyañujob muꞌ bʌ i wʌ tsꞌijbun ti jun bajcheꞌ mi quejel i tꞌoxtyʌl chʌ bʌ an i chaꞌan cheꞌ baꞌ bʌ ora mi sajtyel. Machꞌan majch miꞌ ñusan. Machꞌan majch miꞌ chaꞌ qꞌuextyan jini tꞌan cheꞌ tsaꞌix i ñaxan wʌ otsʌ i cꞌabaꞌ jini quixtyañu tsaꞌix bʌ sajti.

16 Chʌꞌʌch bajcheꞌ jini, Dios tiꞌ wʌ sube Abraham muꞌ bʌ quejel i yʌqꞌuentyel yicꞌot i jiñʌjlel. Machꞌan tiꞌ sube i jiñʌjlelob chaꞌan cabʌlon lojon pero tiꞌ sube i jiñʌjlel chaꞌan juntiquil jach bʌ i jiñʌjlel tiꞌ tyaja ti tꞌan. Jiñʌch Cristo.

17 Jiñʌch chʌncol bʌ cʌl: Dios tiꞌ chaꞌle jumpꞌej trato yicꞌot Abraham baꞌ ti yʌqꞌue i tꞌan chaꞌan muꞌ tyo i tsꞌʌctisan. Aunque ti wiꞌil tyo ti aqꞌuenti lojon c piꞌʌlob i mandar Moisés cheꞌ ñumenix cuatrocientos treinta jabil, pero mach chꞌujbi i ñusan jini tꞌan tsaꞌ bʌ i wʌ alʌ Dios. Machꞌan mi yʌqꞌuen i jilel i cꞌʌjnibal jini wʌ albil bʌ i chaꞌan Dios.

18 Muqꞌuic la cʌqꞌuentyel laj cotyʌntyel chaꞌan i chꞌujbibentyel i mandar Moisés, maꞌix i cꞌʌjnibal jini tsaꞌ bʌ i wʌ alʌ Dios mi quejel la cʌqꞌuentyel. Pero Dios ti wʌ alʌ chaꞌan ti majtyan jach mi yʌqꞌuen Abraham i cotyʌntyel.

19 ¿Chuqui i cꞌʌjnibal i mandar Moisés cheꞌ jini? Ti wiꞌil ti aqꞌuentiyob jini mandar chaꞌan miꞌ tsictiyel chaꞌan ti jini mandar mulilʌch i ñusʌntyel mandar. An jach i cꞌʌjnibal jintyo ti tyʌli Cristo i jiñʌjlel bʌ Abraham tsaꞌ bʌ aqꞌuenti jini tꞌan. Jini mandar ti aqꞌuentiyob chaꞌan ti ajtroñelob i chaꞌan Dios chꞌoyoloꞌ bʌ ti panchan. Ti aqꞌuenti jini mandar juntiquil ajñusa tꞌan Moisés bʌ i cꞌabaꞌ.

20 Pero maꞌan i cꞌʌjnibal ajñusa tꞌan cheꞌ an juntiquil jach. An ajñusa tꞌan cheꞌ miꞌ lajob i tꞌan chaꞌtiquilob. Pero Dios cheꞌ ñac ti yʌcꞌʌ i tꞌan chaꞌan mi quejel i cotyan quixtyañujob tiꞌ bajñel yʌcꞌʌ i tꞌan.

21 ¿Muꞌ ba i contrajin i bʌ i mandar Moisés yicꞌot jini wʌ albil bʌ tꞌan i chaꞌan Dios? Machꞌan. Como tsaꞌic aqꞌuenti quixtyañujob i cuxtyʌlel machꞌʌ yujil jilel chaꞌan ti chꞌujbintyel i mandar Moisés, cheꞌ jini chꞌujbiyʌch i qꞌuejlel ti tyoj quixtyañujob chaꞌan tiꞌ chꞌujbibentyel jini mandar.

22 Pero tsꞌijbubil ti mandar mi yʌl: Cʌchʌlob ti mulil ti pejtyelel quixtyañujob, cheꞌen. Jin chaꞌan mi yʌqꞌuentyel i cotyʌntyel cheꞌ bajcheꞌ ti wʌ alʌ Dios cheꞌ miꞌ chꞌujbin chaꞌan Jesucristo ajcotyayajʌch i chaꞌan.

23 Cheꞌ max tyo ti tyʌli Cristo chaꞌan mi lojon c chꞌujbin chaꞌan ajcotyaya lojon c chaꞌan israelon bʌ lojon añon tyo lojon tiꞌ wenta jini mandar. Cheꞌ bajcheꞌ mi cʌchʌlon lojon tiꞌ pꞌʌtyʌlel mandar jintyo ti tyʌli Cristo muꞌ bʌ i colonla.

24 Jin chaꞌan jini mandar cheꞌ bajcheꞌ ajcʌñʌtya alʌl tiꞌ cʌñʌtyʌyon lojon yubil chaꞌan miꞌ tsictisʌbeñon lojon chaꞌan wersa yom lojon j cotyʌntyel ti Cristo. Chaꞌan cheꞌ ti lojon c chꞌujbi chaꞌan Cristo ajcotyaya lojon c chaꞌan ti qꞌuejliyon lojon ti tyoj ti Dios.

25 Wale mi lac chꞌujbin chaꞌan Cristo tiꞌ coloyonla. Pero wale maꞌix miꞌ bej cʌñʌtyañon lojon jini mandar chaꞌan mi lojon chꞌujbiben i xicꞌoñel.

26 Como chaꞌan jatyetla ti laꞌ chꞌujbi chaꞌan Cristo ajcotyaya laꞌ chaꞌan, i yalobiletla Dios jeꞌel chaꞌan mi laꞌ motin ajñel yicꞌot Cristo Jesús cheꞌ bajcheꞌ mi lojon cajñel yicꞌot jeꞌel.

27 Ti pejtyeleletla tsaꞌ bʌ laꞌ chꞌʌmʌ jaꞌ chaꞌan ti laꞌ chꞌujbi Cristo, wale mi laꞌ wajñel yicꞌot Cristo jeꞌel.

28 Junlajal mi qꞌuejlel ti Dios mi israel o mi mach bʌ israel bʌ quixtyañu, mi chucul ti lolon ajtroñel jach bʌ o mi maꞌix ti i yum bʌ quixtyañu, mi winic o mi xꞌixic como ti junmujchꞌ jach mi yajñelob yicꞌot Cristo Jesús.

29 Mi i chaꞌañonla Cristo i jiñʌjlelonla Abraham yubil. Jin chaꞌan lajal mi quejel la cʌqꞌuentyel jini tsaꞌ bʌ wʌ subenti Abraham ti Dios.