2 Cheꞌ ñajt tyo añon mic chaꞌ subeñetla ti laꞌ pejtyelel cheꞌ bajcheꞌ tic wʌ subeyob jini tsaꞌ bʌ i chaꞌle mulil cheꞌ ñac tsajniyon ti chaꞌyajlel yaꞌ baꞌ añetla. Cheꞌ mic chaꞌ tyʌlel maꞌix mi quejel j cuchben jini tsaꞌ bʌ i chaꞌle mulil. Mi quejel c tyoj isañob.

3 Cheꞌ jini mi quejel laꞌ qꞌueleꞌ mi añʌch i pꞌʌtyʌlel c tꞌan. Como laꞌ wom laꞌ ñaꞌtyan mi chʌncol i chaꞌlen tꞌan Cristo ti joñon. Mach lolon tꞌanic jach miꞌ chaꞌlen Cristo cheꞌ miꞌ tyoj isañetla. Miꞌ pʌsꞌeñetla i pꞌʌtyʌlel i tꞌan.

4 Melelʌch cꞌun Cristo yubil cheꞌ ti jocꞌle ti cruz. Pero wale iliyi mi yajñel chaꞌan tiꞌ pꞌʌtyʌlel Dios yicꞌot. Chʌꞌʌch jeꞌel cꞌuñon lojon quicꞌot Cristo pero pꞌʌtyʌlon lojon chaꞌan tiꞌ pꞌʌtyʌlel Dios quicꞌot chaꞌan mi lojon c motin ajñel yicꞌot chaꞌan mi lojon c tyoj isañetla.

5 Ñaꞌtyanla mi melelʌch mi laꞌ chꞌujbin Dios. Pensalinla ti laꞌ bajñel pusicꞌal bajcheꞌ añetla. ¿Machꞌa baꞌan mi laꞌ ñaꞌtyan Jesucristo mi yajñel laꞌ wicꞌot mi i chaꞌañetla? Mi machꞌan mi yajñel laꞌ wicꞌot chʌncol jach laꞌ lotin laꞌ bʌ cheꞌ mi laꞌ wʌl ochemetla tiꞌ tꞌan Dios.

6 Pero cꞌoꞌojl mi laꞌ ñaꞌtyan mach ti tiꞌic jach mi lojon c chꞌujbin Dios.

7 Mi lojon c pejcʌbeñetla Dios chaꞌan machic laꞌ chaꞌlen jini machꞌʌ wen. Mach chaꞌan tsictiyic mi wen mi lojon c chaꞌlen cʌntisa pero chaꞌan weñʌch añetla aunque maꞌix lojon c wenlel yubil.

8 Como maꞌix mi lojon contrajin jini yoque melel bʌ i tꞌan Dios pero yom c tsictisan chaꞌan melelʌch i tꞌan Dios.

9 Jin chaꞌan cꞌajacña lojon coj mi cubin cheꞌ pꞌʌtyʌletla, aunque cꞌuñon lojon yilal. Mucꞌon lojon ti oración chaꞌan más mi laꞌ xucꞌtyʌl tiꞌ tꞌan Dios.

10 Ñaxan tyo mic wʌ tsꞌijbubeñetla ili jun cheꞌ max tyo chaꞌ ajñon chaꞌan mi laꞌ tyoj isan laꞌ bʌ. Chaꞌan cheꞌ mij cꞌotyel mach wersa mic tsʌtsʌ xiqꞌuetla tiꞌ pꞌʌtyʌlel c tꞌan. Ti yʌcꞌon c pꞌʌtyʌlel lac Yum chaꞌan mi laꞌ xucꞌtyʌl. Mach chaꞌanic mi laꞌ jisʌntyel.

11 Wale hermañujob, ajñenla cheꞌ cꞌajacña laꞌ woj mi laꞌ wubin. Jopꞌola laꞌ wajñel ti xucꞌul. Laꞌ aqꞌuentiquetla i ñuc isʌntyel laꞌ pusicꞌal. Ajñenla ti uts yicꞌot tiꞌ ñʌchꞌtyʌlel laꞌ pusicꞌal. Laꞌ ajnic laꞌ wicꞌot i ñʌchꞌtyʌlel laꞌ pusicꞌal yicꞌot pꞌuntyaya tyʌlem bʌ ti Dios.

12 Aqꞌuen laꞌ bʌ saludos cheꞌ bajcheꞌ mi laꞌ beleꞌ chaꞌlen.

13 Pejtyel hermañujob muꞌ bʌ i chꞌujbin Dios miꞌ chocbeñetla tyʌlel saludos.

14 Laꞌ ajniquetla ti yutslel i pusicꞌal lac Yum Jesucristo, yicꞌot tiꞌ pꞌuntyaya Dios yicꞌot mi laꞌ motin ajñel ti uts yicꞌot ti Chꞌujul bʌ i Chꞌujlel Dios. Amén.