2 Mij cʌñeꞌ juntiquil quixtyañu chʌncol bʌ i chꞌujbin Cristo. Añʌch catorce jabil wale iliyi ti pʌjyi letsel cꞌʌlʌ ti yuxlajmlel bʌ chan. Mach cujil mi an tiꞌ bʌcꞌtyal o mi an jach tiꞌ chꞌujlel cheꞌ ti pʌjyi letsel. Dios jach yujil.

3 Mi an tiꞌ bʌcꞌtyal o mi machꞌan tiꞌ bʌcꞌtyal, Dios jach yujil.

4 Pero cujil ti pʌjyi letsel ti paraíso bʌ i cꞌabaꞌ baꞌ ti yubi tꞌan wen mucul tyac bʌ machꞌʌ chꞌujbi chaꞌ ajlic wʌꞌ ti mulawil pero jeꞌel mach yom bʌ mi chaꞌ subentyel yambʌ quixtyañu yubil.

5 Chꞌujbi c sub c ñuclel chaꞌan ti jini tsaꞌ bʌ quilʌ pero mach chꞌujbi c bajñel c pʌs c bʌ ti ñuc. Pero mux poj c pʌs ti ñuc yubil i cꞌunlel c bʌcꞌtyal. Como joñoñʌch tsaꞌ bʌ pʌjyiyon ti chan.

6 Aunque com c tyajeꞌ c bʌ ti wen bʌ tꞌan mach tonto tꞌanic jach jini como melelʌch bajcheꞌ mi cʌleꞌ. Pero maꞌix mi quejel c lolon cʌleꞌ c ñuclel ame an majch miꞌ qꞌuelon ti más ñucon cheꞌ bajcheꞌ añon o cheꞌ bajcheꞌ tsaꞌix yubi ti cʌlʌ ti yambʌ ora.

7 Ame mic lolon chan isan c bʌ chaꞌan jini ñoj wen bʌ tsaꞌ bʌ aqꞌuentiyon c chꞌʌmeꞌ i sujmlel ti aqꞌuentiyon c ñusan wocol cheꞌ bajcheꞌ chꞌix ochem tic bʌcꞌtyal yubil. Tyʌlem ti Satanás jini c wocol chaꞌan i tyʌcꞌlañon.

8 Uxyajlel tij cꞌajtibe lac Yum chaꞌan mi lajmel jini cꞌux bʌ c chaꞌan.

9 Pero lac Yum tiꞌ subeyon: Jasʌl c pꞌuntyaya chaꞌañet. Más mi tsictiyel c pꞌʌtylel cheꞌ maꞌix i bajñel i pꞌʌtyʌlel quixtyañu, cheꞌ tiꞌ subon lac Yum. Jin chaꞌan cꞌajacña coj cheꞌ cꞌuñon chaꞌan mi tsictiyel i pꞌʌtyʌlel Cristo quicꞌot.

10 Jin chaꞌan cꞌajacña coj mi cubin cheꞌ cꞌuñon, cheꞌ miꞌ wajleñoñob, cheꞌ an c wocol, cheꞌ mic tyʌcꞌlʌntyel, cheꞌ an ñoj tsʌts tyac bʌ c wocol muꞌ bʌ quilan chaꞌan ti caj Cristo. Como cheꞌ más cꞌuñon más chꞌujbi i tsictisʌben i pꞌʌtyʌlel Cristo.

11 Tic chaꞌle bajcheꞌ machꞌan mic ñaꞌtyan pañimil cheꞌ ñac tic tyaja c bʌ ti wen bʌ tꞌan pero wersa ti laꞌ xiqꞌuiyon ti tꞌan yubil. Aunque maꞌix ñucon maꞌix más ñucob bajcheꞌon jini muꞌ bʌ i cuyob i bʌ ti ñoj ñuc bʌ yajcʌbiloꞌ bʌ ajsubtꞌañob ñumel. Pero chʌncox laꞌ lolon tsʌclen majlel jini chʌncol bʌ i cuyob i bʌ ti ñoj ñuc bʌ ajsubtꞌañob ñumel.

12 Ti tsictiyi mi yoque yajcʌbilon bʌ ajsubtꞌan ñumel cheꞌ tic pʌsʌ i señʌjlel i pꞌʌtyʌlel Dios ti ñuc tyac bʌ c melbal yicꞌot bʌbʌqꞌuen bʌ señʌjlel cheꞌ ñac tic chaꞌle subtꞌan yaꞌ baꞌ añetla. Jal tij cuchu laꞌ ñajayel.

13 Maꞌix tij qꞌuele ti más ñuc jini ochemoꞌ bʌ tiꞌ tꞌan Dios ti yan tyac bʌ templo. Lajal tij qꞌueleyetla ti ñuc. Cheꞌ bajcheꞌ mi maꞌix tij qꞌueleyetla ti ñuc yubil cheꞌ maꞌix tij cꞌajtibeyetla laꞌ cotyañon ti chʌ bʌ yes yom c chaꞌan. Mi tic michꞌqꞌueleyetla mi laꞌ wubin, ñusʌbeñonla c mul, cheꞌ jini.

14 Wale iliyi chʌncox c pensalin c julaꞌ añetla ti uxyajlel. Maꞌix mi quejel j cꞌajtibeñetla j cotyʌntyel. Como maꞌix mic pensalin chʌ bʌ an laꞌ chaꞌan pero mic pesaliñetla. Como tyatyʌlob miꞌ cotyañob ti tyaqꞌuin i yalobilob. Mach jinic yalobilob miꞌ cotyañob ti tyaqꞌuin i tyat.

15 Ti pejtyelel c pusicꞌal mij cꞌʌñeꞌ c tyaqꞌuin chaꞌañetla. Jinic tyo mi cʌcꞌ c bʌ chaꞌan j cotyañetla chaꞌan laꞌ wenlel. Pero cheꞌ más mic pꞌuntyañetla tsꞌityaꞌ jach mi laꞌ pꞌuntyañon yubil.

16 Pero an tyo jini muꞌ bʌ i lolon alob chaꞌan mic mucul ñaꞌtyan bajcheꞌ mic chaꞌlen. Tic chꞌʌmbeyetla chʌ bʌ an laꞌ chaꞌan aunque maꞌix tij cꞌajtibeyetla j cotyʌntyel ti chʌ bʌ jach yom c chaꞌan mi lolon yʌlob.

17 Cheꞌ bajcheꞌ tsaꞌix c lotiyetla yubil miꞌ chaꞌleñob chaꞌan ti jini quixtyañu tsaꞌ bʌ c choco majlel yaꞌ baꞌ añetla.

18 Tij cꞌajtibe Tito chaꞌan majlic i julaꞌ añetla. Tic choco majlel yambʌ hermañu yicꞌot. ¿Tsaꞌix ba i lotiyetla Tito? ¿Mach ba lajal ti ajniyon lojon quicꞌot jini Tito? Lajalʌch.

19 Cꞌoꞌojl chʌncol laꞌ lolon ñaꞌtyan chʌncol lojon c jopꞌ j cotyan c bʌ ti tꞌan ti laꞌ tyojlel chaꞌan mi laꞌ qꞌuelon lojon ti wen. Pero mach cheꞌiqui. Pero chʌncox lojon c chaꞌlen tꞌan tiꞌ tyojlel Dios tiꞌ cꞌabaꞌ Cristo. Pero pejtyelel jini ti lojon c chaꞌle chaꞌan mi laꞌ xucꞌchocontyel ti lac Yum, pꞌuntyʌbilet bʌ la quermañujob.

20 Pero añʌch c bʌqꞌuen ame cheꞌ mi quejel j cꞌotyel culaꞌ añetla maꞌix mi quejel c tyajetla cheꞌ bajcheꞌ com j qꞌueletla. Ame mach cheꞌic añon bajcheꞌ laꞌ wom laꞌ qꞌuelon. Añʌch c bʌqꞌuen ame an periyal, ame mi laꞌ michꞌqꞌuel chʌ bʌ an i chaꞌan yambʌ, ame mi laꞌ michꞌ qꞌuel laꞌ bʌ, ame chʌncol laꞌ lolon bajñel pensalin laꞌ bajñel wenlel, ame mi laꞌ jopꞌben laꞌ bʌ laꞌ mul ti tyojlel laꞌ piꞌʌl, ame mi laꞌ lolon tyaj laꞌ bʌ ti tꞌan, ame chʌncol laꞌ lolon pʌs laꞌ bʌ ti ñuc, ame mach wenic añetla cheꞌ mij cꞌotyel yaꞌ baꞌ añetla.

21 Añʌch c bʌqꞌuen ame cheꞌ mi quejel j cꞌotyel ti julaꞌ yaꞌ baꞌ añetla Dios mi quejel i yʌqꞌueñon cubin chꞌʌjyem bʌ. Ame mi quejel c wersa chaꞌlen uqꞌuel cheꞌ mij qꞌuel tsaꞌix laꞌ wotsʌ laꞌ mul cꞌʌlʌ wajali. Cꞌʌlʌ max tyo ti laꞌ cʌyʌ laꞌ chaꞌlen laꞌ tsuculel, laꞌ pejcan yambʌ winic yambʌ xꞌixic. Ame cꞌʌlʌ tyo mi laꞌ chaꞌlen jini machꞌʌ wen tsaꞌ bʌ laꞌ chaꞌle wajali.