2 Como mic wen pensalin laꞌ wenlel. Tyʌlem jini c pensal ti Dios. Tsaꞌix cʌcꞌʌyetla Cristo yubil chaꞌan laꞌ chꞌujbin Cristo. Com cʌqꞌuetla ti Cristo cheꞌ bajcheꞌ yoque tsijiꞌ bʌ xcꞌalʌl tsaꞌix bʌ tyaja juntiquil jach bʌ i ñoxiꞌal.

3 Mic chaꞌlen bʌqꞌuen ame añʌch bajcheꞌ mi laꞌ wʌcꞌ laꞌ bʌ ti lotintyel cheꞌ bajcheꞌ jini lucum jiñʌch jini xiba ti loti Eva ti wen bʌ i tꞌan lolon yubil. Ame ti laꞌ bajñel pensal jach mi laꞌ ñajt isan laꞌ bʌ ti Cristo chaꞌan maꞌix mi laꞌ yoque pꞌuntyan Cristo ti pejtyelel laꞌ pusicꞌal.

4 Como chʌncox laꞌ lolon wen ñʌchꞌtyan jini chʌncol bʌ i subeñetla yambʌ cʌntisa. Chʌncol i tyʌlel i lolon subeñetla yambʌ Jesús yubil machꞌʌ baꞌan mic subeꞌ lojon. Mi laꞌ tyajeꞌ yambʌ i chꞌujlel yubil machꞌʌ baꞌan jini tsaꞌ bʌ aqꞌuentiyetla ti yambʌ ora. Mi laꞌ lolon mulan laꞌ ñʌchꞌtyan yambʌ tꞌan machꞌʌ baꞌan jini wen bʌ tꞌan chaꞌan laj cotyʌntyel tsaꞌ bʌ laꞌ ñaxan ubi.

5 Chʌncox laꞌ lolon tsʌclen jini muꞌ bʌ i lolon cuyob i bʌ ti ñoj ñuc bʌ ajsubtꞌañob ñumel. Cujil maꞌix más i sajon bajcheꞌ jini yañoꞌ bʌ ajsubtꞌañob.

6 Aunque maꞌix cꞌotyajax mic chaꞌlen tꞌan, añʌch wen bʌ c ñatyʌbal. Tsaꞌix c bej pʌsꞌeyetla añʌch wen bʌ lojon c ñaꞌtyʌbal ti pejtyelel chʌ bʌ jach tic chaꞌle baꞌ añetla.

7 ¿Tsaꞌ ba c chaꞌle mulil cheꞌ ti laꞌ majtyan jach tic subeyetla i tꞌan Dios chaꞌan laj cotyʌntyel? Tsaꞌix c peqꞌuisʌ c bʌ yubil chaꞌan mi laꞌ tyaj laꞌ wenlel.

8 Tic chilbeyob i tyaqꞌuin yubil jini ochemoꞌ bʌ tiꞌ tꞌan Dios ti yan tyac bʌ templo tsaꞌ bʌ i tyojoyoñob yubil cheꞌ ñac ti yʌqꞌueyon c majtyan. Pero tic tyaja j cotyʌntyel tsaꞌ bʌ i yʌqꞌueyoñob chaꞌan j cꞌʌñeꞌ chaꞌan c chaꞌlen troñel yaꞌ baꞌ añetla.

9 Cheꞌ yaꞌ añon yaꞌ baꞌ añetla maꞌix tij cꞌajtibeyetla j cotyʌntyel mi junticlec cheꞌ an chʌ bʌ tyo yom c chaꞌan. Jini hermañujob tsaꞌ bʌ juli chꞌoyol bʌ ti pañimil Macedonia ti yʌqꞌueyon chʌ bʌ i cꞌʌjnibal c chaꞌan. Chʌꞌʌch tic chaꞌle chaꞌan maꞌix mi laꞌ ñusan wocol tij caj. Maꞌix mi quejel j cꞌajtiben j cotyʌntyel ti chʌ bʌ yes yom c chaꞌan yaꞌ baꞌ añetla.

10 Mic ñaꞌtyan mic chꞌʌmꞌen i sujmlel chaꞌan Cristo. Chʌꞌʌch jeꞌel mic ñatyan com ti majtyan jach mic chaꞌlen troñel yaꞌ baꞌ añetla chaꞌan bej cꞌajacña coj mi cubin. Maꞌix mi quejel j cꞌajtin j cotyʌntyel ti pejtyelel pañimil Acaya bʌ i cꞌabaꞌ chaꞌan chʌ bʌ yom c chaꞌan.

11 ¿Chucoch cheꞌ mucꞌon ti tꞌan? ¿Chaꞌan ba maꞌix mic pꞌuntyañetla, mi laꞌ wʌl? Mach jiniqui. Como Dios yujil isujm mic wen pꞌuntyañetla.

12 Pero chʌꞌʌch tyo mi quejel c bej chaꞌlen cheꞌ maꞌix mij cꞌajtin lojon j cotyʌntyel chaꞌan chʌ bʌ tyo yom c chaꞌan yaꞌ baꞌ añetla cheꞌ mi lojon c chaꞌlen subtꞌan. Cheꞌ maꞌix mi lojon c chꞌʌmeꞌ c tyojol ti subtꞌan cheꞌ jini mach chꞌujbi i lolon aleꞌ jini yom jach bʌ i chan isan i bʌ chaꞌan lajal mucꞌon lojon ti troñel.

13 Pero lot mucꞌob cheꞌ mi lolon al yajcʌbil bʌ ajsubtꞌañob ñumel. Xlotyob. Muꞌ jach i cuyob i bʌ ti yajcʌbiloꞌ bʌ ajsubtꞌañob ñumel i chaꞌan bʌ Cristo.

14 I tyʌlelʌch cheꞌ xlotyob. Como Satanás jeꞌel miꞌ cuy i bʌ ti ajtroñel i chaꞌan Dios tyʌlem bʌ ti panchan muꞌ bʌ i pʌseꞌ i sʌclel.

15 Jin chaꞌan i tyʌlelʌch chʌꞌʌch miꞌ chaꞌlen quixtyañujob jeꞌel muꞌ bʌ i chaꞌliben i troñel Satanás. Miꞌ lolon pʌsꞌeꞌ i bʌ ti wen bʌ quixtyañu miꞌ chaꞌlen. Mi quejel i yʌqꞌuentyel i xotꞌ i mul.

16 Pablo ti yʌlʌ: Mic chaꞌ subeñetla: Mach yom an majch miꞌ lolon ñaꞌtyan machꞌan mic ñaꞌtyan pañimil. Pero mi chʌꞌʌch miꞌ lolon pensalin tiꞌ pusicꞌal, laꞌ tyo c pejcañetla cheꞌ bajcheꞌ machꞌan mic ñaꞌtyan pañimil chaꞌan mic poj pʌs c bʌ ti ñuc yubil.

17 Maꞌix mi cʌl cheꞌ bajcheꞌ jini chaꞌan chʌꞌʌch ti xiqꞌuiyon cʌleꞌ lac Yum. Pero cheꞌ bajcheꞌ machꞌan mic ñaꞌtyan pañimil mucꞌon ti tꞌan cheꞌ mic tsꞌityaꞌ pʌs c bʌ ti ñuc.

18 Melel an cabʌl muꞌ bʌ i chan isan i bʌ chaꞌan ti caj chʌ bʌ mi yujtyel wʌꞌ ti mulawil. Chʌꞌʌch joñon jeꞌel mi quejel c poj pʌs c bʌ ti ñuc.

19 Como chaꞌan wen añʌch laꞌ ñaꞌtyʌbal mi laꞌ wubin chʌncol laꞌ mulan laꞌ ñʌchꞌtyan locojob.

20 Como chʌncox laꞌ lolon cucheꞌ ti jumpꞌej laꞌ pusicꞌal jini chʌncol bʌ yotsañetla ti ajtroñel i chaꞌañob o jini chʌncol bʌ i xujchꞌibeñetla laꞌ chaꞌan o mi jini muꞌ bʌ yotsañetla tiꞌ wenta cheꞌ wen ñuc miꞌ pʌs i bʌ o muꞌ bʌ i jatsꞌetla ti laꞌ choj yubil cheꞌ chʌncol i lolon wajleñetla.

21 Mij quisnin como maꞌix lojon c chꞌejlel yubil chaꞌan lojon c chaꞌlen cheꞌ bajcheꞌ miꞌ lolon chaꞌleñob. Pero ti chʌ bʌ jach yom i lolon chan isan i bʌ, joñon jeꞌel mi quejel c poj pʌs c bʌ ti ñuc. Chʌncolon ti tꞌan cheꞌ bajcheꞌ loco bʌ quixtyañu.

22 ¿Hebreojob ba jini yañoꞌ bʌ ajcʌntisajob? Hebreojon jeꞌel. ¿Loqꞌuemoꞌ ba ti junmujchꞌ quixtyañujob i jiñʌjlel Israel? Chʌꞌʌch joñon jeꞌel, loqꞌuemon ti i jiñʌjlel Israel. ¿I jiñʌjlel ba jini Abraham? I jiñʌjlelon Abraham jeꞌel.

23 ¿Ajtroñelob ba i chaꞌan Cristo? Más ñumen ajtroñelon tyo i chaꞌan Cristo aunque cheꞌ bajcheꞌ machꞌan mic ñaꞌtyan pañimil yubil mic chaꞌlen tꞌan. Como tsaꞌix c más chaꞌle subtꞌan cheꞌ bajcheꞌ jini yañoꞌ bʌ ajcʌntisajob. Tsaꞌix i más jatsꞌʌyoñob. Tsaꞌix más cʌjchiyon. Ti más ñumiyon baꞌ bʌbʌqꞌuen mic sajtyel.

24 Joꞌyajlel tiꞌ jatsʌyoñob cheꞌ puro treinta y nueve tiꞌ jatsꞌʌyoñob jini lojon c piꞌʌlob jini israeloꞌ bʌ cheꞌ ti yʌqꞌueyon c xotꞌ c mul yubil.

25 Uxyajlel tiꞌ jatsꞌʌyoñob ti tyeꞌ. Junyajlel tiꞌ juluyoñob ti tyun. Uxyajlel ti ochi barco ti mal jaꞌ cheꞌ yaꞌ añon. Junyajlel ti lojon c ñusʌ jumpꞌej qꞌuin jumpꞌej acꞌbʌlel ti pam tyam bʌ jaꞌ cheꞌ ti sujpꞌi ochel ti mal jaꞌ barco.

26 Cabʌl tic chaꞌle ñajt bʌ xʌmbal. Bʌbʌqꞌuen jini colem jaꞌ tyac ti quilʌ cheꞌ ti ñumiyon ti i pam. Bʌbʌqꞌuen miꞌ xujchꞌibeñon chʌ bʌ an c chaꞌan ti ajxujchꞌob. Bʌbʌqꞌuen mic sajtyel tiꞌ cꞌʌb lojon c piꞌʌlob tic lumal yicꞌot tiꞌ cꞌʌb tyʌlem bʌ ti yambʌ lum tyac ti cubi. Bʌbʌqꞌuen mic sajtyel ti lum tyac, ti maꞌtyeꞌel tyac yicꞌot ti colem jaꞌ tyac ti cubi. Bʌbʌqꞌuen mic jilel chaꞌan ti quixtyañu muꞌ bʌ i cuy i bʌ ti hermañujob ti cubi.

27 Cabʌl tic ñusʌ c lujbel chaꞌan tic wen chaꞌle tsʌts tyac bʌ troñel. Tic ñusʌ ñoj tsʌts tyac bʌ c wocol. Cabʌl maꞌan tic chaꞌle wʌyel. Tic ñusʌ wiꞌñal yicꞌot tyʌquin tiꞌ. Cabʌl tic chaꞌle chꞌajb. Tic ñusʌ wocol chaꞌan tsʌñal yicꞌot cheꞌ maꞌix jasʌl c pislel.

28 Mach jinic jach jini, pero an yan tyac bʌ jeꞌel. An al bʌ j cuch yubil jeꞌel ti jujumpꞌej qꞌuin chaꞌan an tic wenta pejtyelel ochemoꞌ bʌ tiꞌ tꞌan Dios ti templo tyac.

29 Mi an hermañu machꞌʌ baꞌan xucꞌul mach xucꞌulonic jeꞌel ti caj mi cubin. Mi an majch mi yotsʌben i mul juntiquil hermañu quisintic mi cubin. Com j cotyan mi cubin. Michꞌon yicꞌot jini tsaꞌ bʌ i xiqꞌui i yotsan i mul yubil.

30 Mi wersa yom mic pʌs c bʌ ti ñuc mi quejel c sub c ñuclel chaꞌan ti jini muꞌ bʌ i tsictisan añʌch i cꞌunlel c bʌcꞌtyal.

31 Dios i Tyat lac Yum Jesucristo yom bʌ mi sujbel i ñuclel ti beleꞌ ora yujil isujm melelʌch c tꞌan muꞌ bʌ c subeꞌ.

32 Cheꞌ ñac yaꞌ añon ti lum Damasco bʌ i cꞌabaꞌ an ñuc bʌ yeꞌtyel am bʌ tiꞌ wenta jini rey Aretas bʌ i cꞌabaꞌ. Tiꞌ waꞌchoco ajcʌñʌtya ti jujumpꞌej i tiꞌ lum chaꞌan i chucon chaꞌan mij cʌjchel.

33 Pero ti colem chiquib tiꞌ chocoyoñob jubel ti lum ti jumpꞌej chan bʌ ventana ti jumpatlel jini corral i chaꞌan jini lum. Cheꞌ jini ti putsꞌiyon loqꞌuel tiꞌ cꞌʌb.