2 Mic subeñetla ti wocol tꞌan chaꞌan maꞌix mi laꞌ lolon wʌqꞌueñon c wersa pʌsꞌen chaꞌtiquil uxtiquiletla mi chꞌejlon cheꞌ mi quejel c tiqꞌuetla cheꞌ mi quejel j cꞌotyel c julaꞌ añetla. Como chaꞌtiquil uxtiquiletla mi laꞌ lolon al chʌncolon jach lojon ti troñel chaꞌan jach com lojon. Com c pʌsꞌeñob i pꞌʌtyʌlel c tꞌan mi cubin chaꞌan machꞌan mi lolon bej tyajon tiꞌ tꞌan.

3 Melel, quixtyañujon jach lojon jeꞌel pero maꞌix mic jopꞌ cajñel ti tyoj ti lojon c bajñel c pꞌʌtyʌlel cheꞌ bajcheꞌ mi lolon jopꞌ i chaꞌlen jini i chaꞌañoꞌ bʌ mulawil.

4 Como i tronijib chaꞌan contrajiya muꞌ bʌ lojon j cꞌʌñeꞌ mach i chaꞌanic ili mulawil. Pero mi lojon j cꞌʌñeꞌ pꞌʌtyʌl bʌ tronijib i chaꞌan bʌ Dios chaꞌan mi jisʌntyel i pꞌʌtyʌlel jini muꞌ bʌ i mʌctyʌbeñob quixtyañujob i chꞌujbiñob Dios.

5 Cheꞌ jini mi lojon quisan cabʌl tꞌan muꞌ bʌ i tyajob ti machꞌʌ wen bʌ tꞌan Dios yicꞌot chʌ bʌ yes muꞌ bʌ yʌqꞌuen i chan isan i bʌ, muꞌ bʌ i mʌctyʌbeñob i chꞌujbiñob Dios. Mi lojon cʌqꞌuen tiꞌ wenta Cristo tsucul tyo bʌ i pensal quixtyañu chaꞌan miꞌ chꞌujbiñob Cristo.

6 Chajpʌbilon lojon cʌqꞌuen i xotꞌe i mul ti pejtyelelob mach bʌ baꞌan miꞌ chꞌujbin tꞌan cheꞌ tsaꞌix laꞌ yoque chꞌujbi tꞌan yaꞌ baꞌ añetla.

7 Jatyetla mi laꞌ lolon pensalin laꞌ qꞌueleꞌ bajcheꞌ an quixtyañu. Mi an majch miꞌ ñaꞌtyan tiꞌ bajñel pusicꞌal yoque i chaꞌañʌch Cristo yom i ñaꞌtyan i chaꞌañon lojon Cristo jeꞌel.

8 Aunque chʌncox c pʌs c bʌ ti ñuc yubil mi laꞌ wubin cheꞌ mi cʌl añʌch lojon i pꞌʌtyʌlel c tꞌan pero maꞌix quisintic mi cubin. Tsaꞌix i yʌqꞌueyon lojon i pꞌʌtyʌlel c tꞌan lac Yum chaꞌan mi laꞌ xucꞌtyʌl, mach chaꞌan mi laꞌ jisʌntyel.

9 Mach com mi laꞌ lolon ñaꞌtyan chʌncol jach c jopꞌ c bʌcꞌtisañetla ti cun.

10 Como mi yʌlob ti i jun chꞌejl miꞌ chaꞌlen tꞌan. Pꞌʌtyʌlʌch miꞌ chaꞌlen. Pero cheꞌ yaꞌan, cꞌun yilal, cheꞌob. Maꞌix i cꞌʌjnibal i tꞌan, cheꞌob. Cheꞌ miꞌ lolon yʌloñob.

11 Pero jini muꞌ bʌ i yʌleꞌ cheꞌ bajcheꞌ jini, yom i ñaꞌtyan jeꞌel cheꞌ bajcheꞌ chꞌejlon yubil cheꞌ mic tsꞌijbun jun cheꞌ ñajt añon lojon chʌꞌʌch chꞌejlon jeꞌel cheꞌ yaꞌ añon laꞌ wicꞌot. Chʌꞌʌch mi quejel lojon c chaꞌlen tyoj isaya cheꞌ bajcheꞌ tic tsꞌijbubeyetla.

12 Maꞌix mi cʌl mi ñoj weñon bajcheꞌ jini muꞌ bʌ i tyajob i bʌ ti wen bʌ tꞌan. Mi lolon lajob i bʌ bajcheꞌ miꞌ chaꞌlen lajalob jach bʌ i piꞌʌlob. Leco bajcheꞌ miꞌ chaꞌleñob cheꞌ miꞌ lajeꞌ i bʌ i ñuclel yicꞌot yambʌ i piꞌʌl.

13 Maꞌix mic sub lojon c ñuclel chaꞌan ti jini machꞌʌ c tꞌan ti yubibon lojon. Diosʌch tsaꞌ bʌ pʌsꞌeyon lojon baꞌ jaxʌl jini troñel tsaꞌ bʌ aqꞌuentiyon lojon tic wenta. Ti yʌqꞌueyon c chaꞌlen lojon c troñel cꞌʌlʌ yaꞌ baꞌ añetla yaꞌ ti Corinto.

14 Jin chaꞌan maꞌix chʌncol lojon c más ñumel majlel baꞌ tiꞌ pʌsꞌeyon lojon c troñel Dios como tsaꞌix lojon c chaꞌlen troñel yaꞌ baꞌ añetla. Joñon ñaxan ti cꞌotiyon lojon ti troñel yaꞌ baꞌ añetla chaꞌan lojon c subeñetla i tꞌan Cristo.

15 Maꞌix mi lojon c subeꞌ lojon c ñuclel ti i troñel ti subtꞌan yañoꞌ bʌ cheꞌ bajcheꞌ mi lojon c troñelʌch. Pero mi lojon c pijtyan chaꞌan mi laꞌ más chꞌujbin chaꞌan más chꞌujbi lojon c chaꞌlen troñel laꞌ wicꞌot. Pero yaꞌ jach mi lojon chaꞌlen troñel yaꞌ baꞌ ti yʌqꞌueyon lojon c chaꞌlen troñel Dios.

16 Ti wiꞌil com lojon c chaꞌlen troñel yaꞌ ti jumpatlel yaꞌ baꞌ añetla. Cheꞌ jini mi lojon c puqueꞌ majlel jini tꞌan chaꞌan laj cotyʌntyel. Pero maꞌix mi lojon c tyajeꞌ lojon c ñuclel chaꞌan ti troñel yañoꞌ bʌ ajcʌntisajob.

17 Mi an majch yom i sub i ñuclel laꞌ i subeꞌ i ñuclel lac Yum.

18 Como maꞌix i ñuclel quixtyañu chaꞌan i bajñel tyaj i bʌ ti wen bʌ tꞌan. Pero añʌch i ñuclel jini muꞌ bʌ i tyajtyʌl ti wen bʌ tꞌan ti lac Yum.