2 Como cujil isujm laꞌ wom laꞌ wʌqꞌueñob i cotyʌntyel ti pejtyelel laꞌ pusicꞌal. Chʌncox c beleꞌ subeñob jini añoꞌ bʌ ti pañimil Macedonia bʌ i cꞌabaꞌ cꞌajacña coj chaꞌan jatyetla añet bʌ la ti pañimil Acaya bʌ i cꞌabaꞌ. Chajpʌbiletixla cꞌʌlʌ jumpꞌej jab wale chaꞌan laꞌ wʌqꞌuen jini cotyaj. Jin chaꞌan cabʌl jini añoꞌ bʌ ti Macedonia tsaꞌix i chꞌejlisʌyob i bʌ chaꞌan i chaꞌlen cotyaj jeꞌel chaꞌan ti caj ti pejtyelel laꞌ pusicꞌal chʌncox laꞌ wʌcꞌ ofrenda jatyetla jeꞌel.

3 Pero chʌncol tyo c choqueꞌ tyʌlel yaꞌ baꞌ añetla jini hermañujob chaꞌan i cꞌajtisʌbeñetla chaꞌan jini ofrenda tsaꞌ bʌ laꞌ wʌ alʌ mi quejel laꞌ locꞌ. Chaꞌan melelʌch tsaꞌix laꞌ locꞌo ofrenda cheꞌ bajcheꞌ tic wʌ subeyob mi quejel laꞌ loqꞌueꞌ.

4 Ame majlic hermañujob loqꞌuem bʌ ti Macedonia mi cꞌotyel quicꞌot cheꞌ mi lojon c ñumel majlel chaꞌan mic chꞌʌmeꞌ majlel jini ofrenda. Mi quejel i qꞌueleꞌ max tyo baꞌan tsꞌʌcʌl jini laꞌ wofrenda. Quisintic mi quejel lojon cubin cheꞌ tsaꞌix c lolon wʌ alʌ chajpʌbiletix la. Más quisintic tyo mi quejel laꞌ wubin mi max tyo ti laꞌ locꞌo.

5 Jin chaꞌan tic pensali cꞌʌjnibal i ñaxan ñumel jini hermañujob i julaꞌ añetla. Cheꞌ jini miꞌ cꞌajtisʌbeñetla laꞌ locꞌ jini ofrenda tsaꞌix bʌ laꞌ wʌ alʌ mi quejel laꞌ locꞌ. Cheꞌ jini tsaꞌix laꞌ wʌ locꞌo jini ofrenda cheꞌ mi lojon j cꞌotyel. Tsiquilʌch i yutslel laꞌ pusicꞌal laꞌ chaꞌlen cotyaj cheꞌ jini. Tsiquil maꞌix mi lojon c xiqꞌuetla pero ti laꞌ bajñel pusicꞌal ti laꞌ wʌcꞌʌ jini ofrenda.

6 Cꞌajtisanla jini wʌ albil bʌ tꞌan muꞌ bʌ yʌlob: Jini tsꞌityaꞌ bʌ mi pʌcꞌ, tsꞌitya jach mi quejel i cꞌajeꞌ jeꞌel. Jini on bʌ mi pʌqꞌueꞌ on mi quejel i cꞌajeꞌ jeꞌel, cheꞌob.

7 Jujuntiquil yom i yʌcꞌ majtyañʌl cheꞌ bajcheꞌ tiꞌ pensali tiꞌ bajñel pusicꞌal. Mach ti chꞌʌjyemlelic i pusicꞌal mi chaꞌanic ti xijqꞌui mi wersa yʌcꞌ ofrenda. Pero Dios miꞌ pꞌuntyan jini muꞌ bʌ i yʌcꞌ ti pejtyelel i pusicꞌal.

8 Dios chꞌujbi i yʌqꞌueñetla i yonlel chʌ bʌ yes yom laꞌ chaꞌan chaꞌan ti yutslel i pusicꞌal. Cheꞌ jini, bej an pejtyelel chʌ bʌ yom laꞌ chaꞌan yicꞌot añʌch cabʌl chaꞌan laꞌ cotyan yañoꞌ bʌ ti chʌ bʌ jach bʌ cotyaj jeꞌel.

9 Cheꞌ bajcheꞌ mi yʌl ti Tsꞌijbubil bʌ i Tꞌan Dios:

10 Dios mi yʌqꞌueñonla pacꞌ chaꞌan lac pʌqꞌueꞌ yicꞌot wen bʌ cꞌajbal chaꞌan laj cꞌuxeꞌ yicꞌot chaꞌan lac chaꞌ pʌqꞌueꞌ yambʌ jeꞌel. Chʌꞌʌch jeꞌel mi yʌqꞌueñonla pejtyelel chʌ bʌ yom bʌ chaꞌan laꞌ pʌqꞌueꞌ yubil cheꞌ mi laꞌ wʌqꞌuen yañoꞌ bʌ chʌ bʌ yom i chaꞌan. Dios mi yʌqꞌuen i colel jeꞌel tsaꞌ bʌ laꞌ pʌcꞌʌ wen bʌ laꞌ chaꞌlibal yubil chaꞌan mi laꞌ cꞌajeꞌ jeꞌel wen tyac bʌ laꞌ chaꞌlibal yubil cheꞌ mi laꞌ chaꞌlen cotyaj.

11 Cheꞌ añʌch cabʌl chʌ bʌ an laꞌ chaꞌan chꞌujbi laꞌ bej aqꞌuen cabʌl i majtyan yañoꞌ bʌ ti pejtyelel laꞌ pusicꞌal. Cabʌl hermañujob mi quejel i suben Dios wocox i yʌlʌ chaꞌan ti jini ofrenda muꞌ bʌ laꞌ choqueꞌ majlel quicꞌot lojon.

12 Como cheꞌ mi la cʌqꞌueñob i cotyʌntyel, mach i bajñel jach chʌncol la cʌqꞌuen chʌ bʌ yom i chaꞌañob jini hermañujob pero chʌncol la cʌqꞌuen cabʌlob i suben Dios wocox i yʌlʌ.

13 Jini hermañujob, mi quejel i subob ñucʌch Dios. Miꞌ tsictisʌbeñob jeꞌel chʌncox laꞌ wen chꞌujbiben i tꞌan Cristo chaꞌan jini cotyaj muꞌ bʌ laꞌ choqueꞌ majlel. Cheꞌ jeꞌel miꞌ qꞌuelob ti ñuc Dios chaꞌan ti cabʌl bʌ i majtyan muꞌ bʌ laꞌ chocben majlel yicꞌot i chaꞌan yañoꞌ bʌ jeꞌel.

14 Cheꞌ jini mi quejel i tyajetla ti oración jeꞌel. Mi quejel i wen pꞌuntyañetla chaꞌan ti ñoj ñuc bʌ i yutslel Dios tsiquil bʌ chaꞌañetla.

15 Wocox i yʌlʌ Dios tsaꞌix i yʌqꞌueyonla yoque ñuc bʌ lac majtyan machꞌʌ chꞌujbi la cʌl bajcheꞌ an i ñuclel como yoque ñoj ñuc.