2 Aunque tiꞌ ñusʌyob yoque tsʌts tyac bʌ i wocol pero wen cꞌajacñayob i yoj. Aunque wen pꞌumpꞌuñob pero ti wen yʌqꞌueyob i majtyan tyaqꞌuin cheꞌ bajcheꞌ mi wen chumulob tiꞌ chaꞌleyob.

3 Tsaꞌix quilʌ bajcheꞌ ti ujti. Ti yʌqꞌueyob bajcheꞌ yonlel chꞌujbi i yʌqꞌuen. Ti más acꞌʌyob bajcheꞌ chꞌujbi i yʌqꞌuen yubil chaꞌan chʌꞌʌch ti bajñel mulʌ i yʌcꞌob.

4 Tiꞌ cꞌajtibeyon lojon ti wocol tꞌan chaꞌan mi lojon cʌqꞌueñob chaꞌan i cotyan hermañujob ti tyaqꞌuin jeꞌel.

5 Más on ti yʌqꞌueyob bajcheꞌ ti lojon c pensali mi quejel i yʌqꞌuen tyaqꞌuin. Ñaxan ti yʌqꞌueyob i bʌ lac Yum. Ti wiꞌil ti yʌqꞌueyoñob i bʌ chaꞌan i cotyañon lojon ti troñel chaꞌan jiñʌch bajcheꞌ yom Dios.

6 Chaꞌan ti caj chʌꞌʌch ti yʌqꞌueyob ofrenda ti lojon j cꞌajtibe Tito chaꞌan i tyʌlel yaꞌ baꞌ añetla chaꞌan laꞌ tsꞌʌctisan laꞌ locꞌsan jini majtyan tyaqꞌuin tsaꞌ bʌ laꞌ wʌ ñaꞌtyʌ laꞌ locꞌsan cheꞌ ñac Tito ti tyejchbeyetla laꞌ locꞌ jini ofrenda ti yambʌ jabil.

7 Wen cꞌʌjquemetla ti pejtyelel wen tyac bʌ troñel: Mi laꞌ wen chꞌujbin Dios. Wen laꞌ wujil cʌntisa. Wen mi laꞌ chꞌʌmꞌen i sujmlel. Ti pejtyelel laꞌ pusicꞌal mi laꞌ chaꞌlen cotyaya. Mi laꞌ wen pꞌuntyañon lojon. Wale iliyi yom tyo mi laꞌ wen locꞌ ofrenda jeꞌel.

8 Maꞌix mic wersa xiqꞌuetla chaꞌan laꞌ locꞌ ofrenda. Com jach mi laꞌ ñaꞌtyan ti pejtyelel i pusicꞌal tiꞌ chaꞌleyob cotyaya jini yaꞌ bʌ añoꞌ bʌ ti Macedonia cheꞌ ti yʌcꞌʌyob ofrenda. Tsiquilʌch tiꞌ chaꞌleyob pꞌuntyaya. Chʌncol jach c subeñetla chaꞌan tsictiyic mi melelʌch chʌncox laꞌ chaꞌlen pꞌuntyaya jeꞌel.

9 Com mi laꞌ ñaꞌtyan i yutslel i pusicꞌal lac Yum Jesucristo. Aunque wen chumul Jesucristo ti yʌcꞌʌ i bʌ ti ajñel ti pꞌumpꞌun chaꞌan tiꞌ wen pꞌuntyʌyonla. Chaꞌan ti caj ti ajni ti pꞌumpꞌun Jesucristo mi la cajñel ti chumul yubil.

10 Mic subeñetla bajcheꞌ mic pensalin chaꞌan laꞌ wenlel. Weñʌch bajcheꞌ ti queji laꞌ locꞌ jini ofrenda ti yambʌ jabil. Mach chaꞌanic jach ti laꞌ locꞌo ofrenda pero ti pejtyelel laꞌ pusicꞌal ti laꞌ muchꞌqui tyaqꞌuin.

11 Wale yom mi laꞌ jolontisan laꞌ locꞌ jini ofrenda ti pejtyelel laꞌ pusicꞌal cheꞌ bajcheꞌ ti queji laꞌ locꞌ ti pejtyelel laꞌ pusicꞌal ti yambʌ jabil. Jiñʌch cheꞌ bajcheꞌ yonlel an yom miꞌ laꞌ tsꞌityaꞌ locꞌ chaꞌan laꞌ wʌcꞌ ofrenda mi on o mi mach onic laꞌ chaꞌan.

12 Mi an majch ti pejtyelel i pusicꞌal yom i yʌqꞌuen majtyan tyaqꞌuin aunque maꞌix cabʌl i chaꞌan, weñʌch miꞌ yilan Dios. Yom mi la cʌqꞌuen tsꞌityaꞌ bajcheꞌ yonlel an lac chaꞌan. Maꞌix más i yonlel miꞌ cꞌajtin Dios bajcheꞌ an lac chaꞌan.

13 Mach yom mi laꞌ ñusan wocol chaꞌan ti caj chʌncox laꞌ cotyañob yañoꞌ bʌ ti chʌ bʌ yom i chaꞌañob mi maꞌix jasʌl laꞌ chaꞌan.

14 Pero yom mi laj cotyan yañoꞌ bʌ chaꞌan junlajal mi yajñel la quicꞌot. Wale iliyi añʌch laꞌ chaꞌan chaꞌan laꞌ cotyan jini an tyo bʌ yom i chaꞌañob. Ti yambʌ ora cheꞌ an i chaꞌan chꞌujbi i cotyañetla cheꞌ an tyo yom laꞌ chaꞌan. Cheꞌ jini junlajal mi laꞌ wajñel ti wen.

15 Cheꞌ bajcheꞌ an ti Tsꞌijbubil bʌ i Tꞌan Dios: Jini am bʌ cabʌl i chaꞌan maꞌix chʌ bʌ tiꞌ cʌyle i chaꞌan. Jini am bʌ tsꞌityaꞌ jach i chaꞌan maꞌix chʌ bʌ yom tyo i chaꞌan.

16 Pero wocox i yʌlʌ Dios, Dios ti yʌqꞌue i pensalibeyetla laꞌ wenlel jini Tito cheꞌ bajcheꞌ mic pensalibeñetla laꞌ wenlel jeꞌel.

17 Tiꞌ chꞌʌmʌ tiꞌ wenta Tito chaꞌan i tyʌlel yaꞌ baꞌ añetla cheꞌ bajcheꞌ tic wʌ pensali chaꞌan mi tyʌlel. Pero chaꞌan i bajñel miꞌ wen pensalin laꞌ wenlel, wale yom i bajñel tyʌlel i qꞌueletla chaꞌan chʌꞌʌch tiꞌ bajñel pensali.

18 Cheꞌ yicꞌot Tito chʌncox lojon c choqueꞌ tyʌlel juntiquil hermañu chʌncol bʌ i yʌjlel ti wen bʌ tꞌan chaꞌan ti wen bʌ i troñel ti pucol jini tꞌan chaꞌan laj cotyʌntyel. Chʌncol i tyajtyʌl ti wen bʌ tꞌan ti hermañujob ti pejtyelel templo tyac.

19 Mach jinic jach chaꞌan ti wen bʌ i troñel pero ochemoꞌ bʌ tiꞌ tꞌan Dios ti yajcʌyob jini hermañu chaꞌan mi majlel lojon quicꞌot cheꞌ mi lojon c chꞌʌmeꞌ majlel jini lac ofrenda tsaꞌ bʌ lac muchꞌqui chaꞌan mi tsictiyel i ñuclel lac Yum. Chaꞌan mi tsictiyel jeꞌel ti pejtyelel laꞌ pusicꞌal mi laꞌ cotyan yañoꞌ bʌ.

20 Com lojon c piꞌʌl ti xʌmbal chaꞌan maꞌan majch chꞌujbi i tyejcheꞌ tꞌan chaꞌan ti jini cabʌl tyaqꞌuin chʌncol bʌ lojon c chꞌʌmeꞌ majlel.

21 Como chʌncox lojon c jopꞌ c chaꞌlen ti wen jini muchꞌquiya tyaqꞌuin. Mach i bajñelic chaꞌan mi tsictiyel tiꞌ tyojlel lac Yum mi wen ti lojon c chaꞌle pero chaꞌan mi tsictiyel tiꞌ tyojlel pejtyelel quixtyañujob jeꞌel.

22 Mi quejel lojon c choqueꞌ majlel jeꞌel yicꞌotyob yambʌ juntiquil la quermañu. Tsaꞌix lojon cabʌl quilʌ tiꞌ chaꞌlibe i troñel Dios ti pejtyelel i pusicꞌal. Pero wale iliyi más tyo ti pejtyelel i pusicꞌal chaꞌan chʌncox i pensalin mi quejel laꞌ más wen acꞌ jini ofrenda chaꞌan cotyaj.

23 Mi an majch miꞌ cꞌajtibeñetla chaꞌan jini Tito, subeñob chaꞌan c piꞌʌl ti troñel Tito. Miꞌ chaꞌlen troñel quicꞌot chaꞌañetla. Mi an majch miꞌ cꞌajtibeñetla chaꞌan jini yambʌ hermañujob, subeñob chocolob tyʌlel chaꞌan ti ochemoꞌ bʌ tiꞌ tꞌan Dios ti templo tyac. Mi yʌcꞌob ti ñuc Cristo, cheꞌetla.

24 Jini chaꞌan pʌsꞌeñob Tito yicꞌot i piꞌʌl ti xʌmbal chaꞌan chʌncox laꞌ wen pꞌuntyañob, chaꞌan mi tsictiyel yaꞌ baꞌan ochemoꞌ bʌ tiꞌ tꞌan Dios ti templo tyac. Tsiquilʌch cheꞌ jini añʌch chʌ bʌ och ti lojon c tyajayetla ti wen bʌ tꞌan como tijicñayon lojon chaꞌan ti jatyetla.