2 Pꞌuntyañon lojon. Maꞌix ti lojon c chaꞌle machꞌʌ wen yaꞌ baꞌ añetla. Maꞌix majch ti lojon c yʌsʌ ti mulil. Maꞌix ti lojon c lotiyetla.

3 Como maꞌix chʌncol cʌleꞌ mi añʌch laꞌ mul. Como tsaꞌix c wʌ subeyetla mi cuxulon lojon o mi ti sajtiyon lojon laꞌ wicꞌot pero mic bej pꞌuntyañetla.

4 Maꞌix mij quisnin c tyajetla tic tꞌan como cujilʌch isujm chʌncox laꞌ chꞌujbibeñon c tꞌan. Tijicña mi cubin mic tyajetla ti wen bʌ tꞌan. Cheꞌ chʌncox lojon quilan wocol chʌc chꞌejlon tyo. Cꞌajacña coj mi cubin chaꞌan ti jatyetla.

5 Cꞌʌlʌ ti juliyon lojon wʌꞌ ti pañimil Macedonia bʌ i cꞌabaꞌ cꞌʌlʌ wale iliyi maꞌix ti lojon cꞌaja coj. Como tsaꞌix lojon c ñusʌ ñoj tsʌts tyac bʌ c wocol baꞌical ti ñumiyon lojon. Joy corrajlibilon lojon ti lojon contra yubil. Ti lojon c chaꞌle pensal chaꞌañetla jeꞌel.

6 Pero Dios muꞌ bʌ i ñuc isʌbeñob i pusicꞌal jini chꞌʌjyemoꞌ bʌ, ti ñuc isʌbeyon lojon c pusicꞌal chaꞌan ti pasi tyʌlel Tito wʌꞌ ti Macedonia.

7 Mach chaꞌanic jach ti juli Tito tijicña c pusicꞌal pero chaꞌan tijicña i pusicꞌal Tito jeꞌel chaꞌan ti jatyetla. Tiꞌ subeyon lojon wen laꞌ wom laꞌ chaꞌ qꞌuelon lojon. Tiꞌ subeyon Tito chaꞌan chꞌʌjyemetla. Chʌncol laꞌ wen chaꞌlen pensal chaꞌañon. Chaꞌan ti jini tꞌan más cꞌajacña coj ti cubi.

8 Aunque chꞌʌjyem ti laꞌ wubi chaꞌan ti cꞌoti jini jun tsaꞌ bʌ c tsꞌijbubeyetla pero wale iliyi maꞌix bej chꞌʌjyemon mi cubin chaꞌan chꞌʌjyemetla cheꞌ ñac ti laꞌ qꞌuele cun. Aunque poj chꞌʌjyemon ti cubi cheꞌ ñac tic ñaꞌtyʌ ti yʌqꞌuetla laꞌ chꞌʌjyemlel jini jun tsaꞌ bʌ cꞌoti. Pero maꞌix jal ti laꞌ wubi laꞌ chꞌʌjyemlel.

9 Wale cꞌajacña coj mach chaꞌanic chꞌʌjyem ti laꞌ poj ubi pero chaꞌan ti laꞌ qꞌuextyʌ laꞌ pensal chaꞌan laꞌ cʌyeꞌ jini mulil. Ti laꞌ ñusʌ ti wen laꞌ chꞌʌjyemlel cheꞌ bajcheꞌ miꞌ mulan Dios. Machꞌan ti lojon c yʌsʌyetla ti caj jini cun.

10 Como lac chꞌʌjyemlel muꞌ bʌ lac ñusan ti wen cheꞌ bajcheꞌ miꞌ mulan Dios, mi yʌqꞌueñonla laj qꞌuextyan lac pensal laj cʌyeꞌ lac mul chaꞌan lac tyajeꞌ laj cotyʌntyel. Mach yom chaꞌ chꞌʌjyemonla ti caj. Pero lac chꞌʌjyemlel tyʌlem jach wʌꞌ ti mulawil cheꞌ mach ochemonla tiꞌ tꞌan Dios muꞌ jach i yʌcꞌonla ti sajtyel.

11 Ti laꞌ ñusʌ laꞌ chꞌʌjyemlel bajcheꞌ miꞌ mulan Dios. Qꞌuele awilan, wale weñʌch ti loqꞌui. Ti laꞌ yoque chꞌʌmʌ ti laꞌ wenta laꞌ tyoj isan jini tsaꞌ bʌ i chaꞌle mulil. Ti laꞌ tsictisʌbeyon bajcheꞌ tiꞌ chaꞌle chaꞌan machꞌan laꞌ mul ti laꞌ pejtyelel. Ti laꞌ michꞌqꞌuelbe i mul. Ti laꞌ chaꞌle bʌqꞌuen. Ti wiꞌil laꞌ wom laꞌ chaꞌ qꞌuelon. Laꞌ wom laꞌ wʌqꞌuen i ñusan wocol chaꞌan ti caj i mul jini tsaꞌ bʌ i chaꞌle machꞌʌ wen. Chaꞌan ti pejtyelel jini, tsaꞌix laꞌ tsictisʌbeyon aunque an i mul juntiquil pero maꞌix laꞌ mul ti laꞌ pejtyelel.

12 Cheꞌ jini, cheꞌ ñac tic tsꞌijbubeyetla jini jun mach i bajñel tic pensali jini am bʌ i mul mi jinic jini tsaꞌ bʌ i yilʌ wocol chaꞌan ti caj, pero tic tsꞌijbubeyetla jun chaꞌan Dios miꞌ tsictisʌbeñetla chʌncox laꞌ wen pꞌuntyañon cheꞌ mi laꞌ chꞌujbibeñon lojon c tꞌan.

13 Jin chaꞌan tsaꞌix ñuc isʌbentiyon lojon c pusicꞌal. Pero más cꞌajacña tyo lojon coj cheꞌ ti quilʌ tijicña i pusicꞌal Tito. Ti laꞌ pejtyelel tsaꞌix laꞌ tijicñʌsʌbe i pusicꞌal.

14 Maꞌix quisintic ti cubi chaꞌan tsaꞌix c wʌ sube Tito chaꞌan bajcheꞌ añetla. Como melelʌch pejtyelel jini tsaꞌ bʌ lojon c subeyetla. Chʌꞌʌch jeꞌel melelʌch pejtyelel wen bʌ tsaꞌ bʌ lojon c sube Tito chaꞌañetla.

15 Tito miꞌ más pꞌuntyañetla cheꞌ miꞌ cꞌajtisan bajcheꞌ ti laꞌ chꞌujbibe i tꞌan cheꞌ ñac tiꞌ subeyetla bajcheꞌ yom mi laꞌ chaꞌlen. Ti laꞌ peqꞌuisʌ laꞌ bʌ cheꞌ ti laꞌ pʌyʌ ochel. Ti laꞌ bʌcꞌñʌ machic wen mi yujtyel.

16 Cꞌajacña coj mi cubin chaꞌan cujil isujm mach lolomic jach chʌncox j qꞌueletla ti wen.