2 Pʌyʌla ochel ti laꞌ wotyot cheꞌ bajcheꞌ yom cheꞌ hermañujonla ti lac Yum. Cotyanla mi an chʌ bʌ yom i chaꞌan como tsaꞌix i cotyʌyob cabʌlob. Tsaꞌix i cotyʌyon jeꞌel.

3 Aqꞌueñob saludos Priscila yicꞌot Aquila. Tiꞌ chaꞌlebeyob i toñel Cristo Jesús quicꞌot.

4 Colel i tsʌnsʌntyelob chaꞌan tiꞌ cotyʌyoñob. Mic subeñob wocox i yʌlʌ. Mach c bajñel jach mic subeñob wocox i yʌlʌ pero ti pejtyelel mach bʌ israelobic bʌ hermañujob jeꞌel baꞌical jach miꞌ muchꞌquiñob i bʌ mi subeñob wocox i yʌlʌ, jini chaꞌtiquilob.

5 Aqꞌueñob saludos jeꞌel jini hermañujob muꞌ bʌ i muchꞌquiñob i bʌ yaꞌ ti yotyot Priscila yicꞌot Aquila. Aqꞌuen saludos jeꞌel jini pꞌuntyʌbil bʌ Epeneto bʌ i cꞌabaꞌ, uts bʌ quicꞌot. Jiñʌch jini ñaxan bʌ tsaꞌ bʌ i chꞌujbi lac Yum yaꞌ ti pañimil Acaya bʌ i cꞌabaꞌ.

6 Aqꞌuenla saludos jini María tsaꞌ bʌ i chaꞌle cabʌl toñel yaꞌ baꞌañetla.

7 Aqꞌueñob saludos Andrónico yicꞌot Junias, jini israeloꞌ bʌ c piꞌʌlob. Ti cʌjchiyob jeꞌel. Ñuc mi qꞌuejlelob chaꞌan jini chocoloꞌ bʌ majlel ti subtꞌan. Ñaxan tiꞌ chꞌujbiyob Cristo tiꞌ pusicꞌal. Wiꞌilon jeꞌel.

8 Aqꞌuen saludos Amplias, jini uts bʌ quicꞌot muꞌ bʌ c pꞌuntyan ti lac Yum.

9 Aqꞌuen saludos Urbano, muꞌ bʌ ti toñel la quicꞌot ti i toñel Cristo Jesús. Aqꞌuen saludos jeꞌel Estaquis muꞌ bʌ c pꞌuntyan.

10 Aqꞌuen saludos Apeles tsaꞌ bʌ i cuchu ti wen cabʌl wocol chaꞌan tiꞌ chꞌujbi Cristo. Aqꞌuen saludos jeꞌel jini añoꞌ bʌ ti yotyot Aristóbulo.

11 Aqꞌuen saludos Herodión, juntiquil israel bʌ c piꞌʌl. Yicꞌot aqꞌuen saludos jeꞌel jini muꞌ bʌ i chꞌujbin lac Yum añoꞌ bʌ ti yotyot Narciso.

12 Aqꞌuen saludos Trifena yicꞌot Trifosa muꞌ bʌ i wen chaꞌlibeñob i toñel lac Yum. Aqꞌuen saludos jeꞌel jini pꞌuntyʌbil bʌ la quermana Pérsida tsaꞌ bʌ i chaꞌlibe cabʌl i toñel lac Yum jeꞌel.

13 Aqꞌuen saludos Rufo, wen ñuc bʌ ti lac Yum. Aqꞌuen saludos i ñaꞌ jeꞌel. Cheꞌ bajcheꞌ c ñaꞌʌch ti cubi.

14 Aqꞌuen saludos jeꞌel Asíncrito, yicꞌot Flegonte, yicꞌot Hermas, yicꞌot Patrobas yicꞌot Hermes yicꞌot yambʌ hermañujob yaꞌ bʌ añob yicꞌot.

15 Aqꞌuen saludos jeꞌel Filólogo yicꞌot Julia yicꞌot Nereo yicꞌot xꞌixic bʌ i yijtsꞌin yicꞌot Olimpas yicꞌot ti pejtyelelob hermañujob ti Cristo jeꞌel yaꞌ bʌ añob yicꞌot.

16 Aqꞌuen laꞌ bʌ saludos. Chucben laꞌ bʌ laꞌ cꞌʌb. Ti pejtyelel hermañujob ti Cristo ti baꞌical jach miꞌ muchꞌquiñob i bʌ miꞌ chocbeñetla tyʌlel saludos.

17 Hermañujob, ti wocol tꞌan mic subeñetla, ñaꞌtyanla majchqui jini yom bʌ i tꞌoxetla. Miꞌ jopꞌ i yʌsañetla ti mulil. Chʌncol i contrajiñob jini tꞌan tsaꞌ bʌ cʌntisʌntiyetla. Mach yom mi laꞌ muchꞌquin laꞌ bʌ yicꞌotyob.

18 Como jini muꞌ bʌ i chaꞌlen bajcheꞌ jini maꞌan miꞌ chaꞌleñob bajcheꞌ yom lac Yum. Pero cheꞌ jach miꞌ chaꞌleñob bajcheꞌ bajñel yom i pusicꞌal. Ti uts bʌ tꞌan yicꞌot cꞌotyajax bʌ tꞌan miꞌ lotiñob quixtyañujob mach bʌ baꞌan miꞌ ñaꞌtyan mi simaroñob.

19 Ti pejtyelel quixtyañujob miꞌ luꞌ ñaꞌtyañob bajcheꞌ ti laꞌ chꞌujbibe i tꞌan Dios. Jin chaꞌan tijicñayon chaꞌañetla. Com mi laꞌ cʌn jini wen bʌ chaꞌan mi laꞌ chaꞌlen wen bʌ. Mach com mi laꞌ cʌn laꞌ chaꞌlen machꞌʌ wen.

20 Dios muꞌ bʌ i yʌqꞌueñonla i ñʌchꞌtyʌlel lac pusicꞌal mach jalix mi quejel i jisʌben i pꞌʌtyʌlel Satanás chaꞌan maꞌix i bej tyʌcꞌlañonla. Laꞌ ajnic laꞌ wicꞌot i yutslel i pusicꞌal lac Yum Jesucristo.

21 Mic chocbeñetla tyʌlel saludos Timoteo, jini c piꞌʌl ti toñel. Cheꞌ jeꞌel Lucio yicꞌot Jasón yicꞌot Sosípater jini israeloꞌ bʌ c piꞌʌlob.

22 Joñon Terciojon chʌncol bʌ j cotyan ti tsꞌijb Pablo chaꞌan ili jun, mic chocbeñetla tyʌlel saludos ti lac Yum.

23 Mi yʌqꞌueñetla saludos Gayo, i yum ili otyot baꞌ poj jijlemon yicꞌot baꞌ miꞌ muchꞌquiñob i bʌ ochemoꞌ bʌ tiꞌ tꞌan Dios. Mi yʌqꞌueñet saludos Erasto jini am bʌ yeꞌtyel ti tesorero chaꞌan lum. Yicꞌot jeꞌel, mi yʌqꞌueñetla saludos lac hermano Cuarto.

24 Laꞌ ajnic i yutslel i pusicꞌal lac Yum Jesucristo laꞌ wicꞌot ti laꞌ pejtyelel. Amén.

25 Laꞌ lac suben i ñuclel Dios. Dios chꞌujbi i más xucꞌchocobeñetla laꞌ pusicꞌal cheꞌ bajcheꞌ mi yʌleꞌ jini wen bʌ tꞌan chaꞌan laj cotyʌntyel tsaꞌ bʌ c subeyetla cheꞌ ñac tij cʌntisʌyetla chaꞌan Jesucristo. Miꞌ xucꞌchocobeñetla laꞌ pusicꞌal bajcheꞌ mi yʌleꞌ Dios ti i tꞌan max tyo bʌ ti yʌcꞌʌ ti tsictiyel ti yambʌ ora cꞌʌlʌ ñoj oniyix cheꞌ max tyo ti mejli mulawil, cꞌʌlʌ wale.

26 Pero wale tsictiyemix jini tꞌan ti Tsꞌijbubil bʌ i Tꞌan Dios tsaꞌ bʌ yʌcꞌʌ i tsꞌijbuñob winicob tsaꞌ bʌ xiqꞌui yʌleꞌ Dios ti ñoj oniyix. Dios, jini cuxul bʌ ti beleꞌ ora, tiꞌ xiqꞌuiyob quixtyañujob chaꞌan i puqueꞌ majlel ili tꞌan chaꞌan jini am bʌ ti pejtyelel pañimil mi quejel i chꞌujbiñob Cristo yicꞌot miꞌ jacꞌbeñob i tꞌan.

27 Laꞌ sujbic i ñuclel Dios jini cojach bʌ, jini am bʌ ti pejtyelel ñaꞌtyʌbalʌl. Laꞌ sujbic i ñuclel ti Jesucristo cꞌʌlʌ ti beleꞌ ora. Amén.