2 Pero la cujil isujm chaꞌan yoque tyoj miꞌ chaꞌlen melojel Dios cheꞌ miꞌ meleꞌ quixtyañu muꞌ bʌ i chaꞌlen ili tyac.

3 Ixcu jatyet muꞌ bʌ a sub i mul a piꞌʌlob pero lajalʌch maꞌ bajñel chaꞌlen, ¿chꞌujbi ba a putsꞌtyan i melojel Dios maꞌ lon al? Mach chꞌujbi.

4 ¿Chʌncol ba a pꞌajeꞌ i yutslel i pusicꞌal Dios? Machꞌan maꞌ saj ñaꞌtyan yubil chucoch maꞌan miꞌ waꞌ melet. Chʌncol a lolon qꞌuel cheꞌ bajcheꞌ lolom jach i yutslel i pusicꞌal Dios. Pero chaꞌan ti caj i yutslel chʌncol i jal pijtyañet chaꞌan a qꞌuextyan a pensal chaꞌan a cʌyeꞌ a mul.

5 Pero tsʌts a pusicꞌal. Mach a wom a qꞌuextyan a pensal chaꞌan a cʌyeꞌ a mul. Jin chaꞌan chʌncol jach a wocꞌ isan a xotꞌmulil muꞌ bʌ a wersa xotꞌeꞌ ti jim bʌ qꞌuin cheꞌ Dios mi quejel i yʌcꞌ tyoj bʌ melojel bajcheꞌ yom.

6 Dios mi quejel i yʌqꞌuen jujuntiquil jiñʌch bajcheꞌ tiꞌ chaꞌle.

7 Jini muꞌ bʌ i beleꞌ chaꞌlen wen bʌ chaꞌan wersa yom mi qꞌuejlel ti ñuc ti Dios yicꞌot wersa yom jini wen tyac bʌ machꞌʌ yujil jilel, mi quejel i yʌqꞌuentyel i cuxtyʌlel machꞌʌ yujil jilel.

8 Pero jini muꞌ bʌ i chaꞌleñob bajcheꞌ yom i bajñel i pusicꞌal, machꞌʌ baꞌan miꞌ jaqꞌue jini melel bʌ pero cheꞌ jach miꞌ chaꞌlen mach bʌ wen bʌ, mi quejel i yubiñob i michꞌlel Dios. Mi quejel i yʌqꞌuentyelob i xotꞌob i mul.

9 Ñoj mach cujch i wocol yicꞌot i pensal mi quejel i yubiñob jujuntiquil muꞌ bʌ i chaꞌlen i simaronlel. Chʌꞌʌch mi quejel i ñaxan yubiñob jini israel bʌ quixtyañujob tsaꞌ bʌ i chaꞌleyob simaronlel. Ti wiꞌil mi quejel i yubin jini mach bʌ israelobic.

10 Pero jini israelob muꞌ bʌ i beleꞌ chaꞌlen wen bʌ mi quejel i sujbel ti ñuc, mi qꞌuejlel ti ñuc ti Dios. Mi quejel i yʌqꞌuentyelob i ñʌchꞌtyʌlel i pusicꞌal ti Dios. Ñaxan mi quejel i yʌqꞌuentyelob jini israel bʌ quixtyañujob, ti wiꞌil jeꞌel jini mach bʌ israelobic.

11 Como Dios junlajal miꞌ qꞌuel quixtyañujob.

12 Ti pejtyelelob tsaꞌ bʌ i chaꞌleyob mulil max tyo bʌ ubibil i chaꞌan i mandar Moisés mi quejel i luꞌ jilelob chaꞌan i mul. Dios machꞌan mi quej i cꞌʌñeꞌ jini mandar tyac chaꞌan miꞌ melob. Jini tsaꞌ bʌ i yubiyob jini mandar tyac, pero tiꞌ chaꞌleyob mulil, Dios mi quejel i cꞌʌñeꞌ jini mandar chaꞌan miꞌ melob.

13 Como machꞌan mi qꞌuejlel ti tyoj ti Dios jini muꞌ jach bʌ i nʌchꞌtyan bajcheꞌ tsꞌijbubil ti mandar. Pero mi qꞌuejlel ti tyoj jini muꞌ bʌ i chꞌujbin bajcheꞌ tsꞌijbubil.

14 Pero jini mach bʌ israeloꞌ bʌ quixtyañu machꞌʌ baꞌan i chaꞌan jini mandar tyac, cheꞌ ti i bajñel i pusicꞌal jach miꞌ chaꞌleñob cheꞌ bajcheꞌ tsꞌijbubil ti mandar, cheꞌ bajcheꞌ an jini mandar tyac ti i pusicꞌal yubil.

15 Chaꞌan ti caj i chaꞌlibal miꞌ pʌsꞌob cheꞌ bajcheꞌ yaꞌ tsꞌijbubil mandar tyac ti i pusicꞌal. Ti i pusicꞌal miꞌ ñaꞌtyañob chʌ bʌ yom i chaꞌleñob. Ti i pusicꞌal miꞌ pensaliñob mi añob i mul o mi tyojʌch i chaꞌlibal.

16 Chʌꞌʌch mi quejel i yujtyel ti jim bʌ qꞌuin cheꞌ Dios mi quejel i cꞌʌñeꞌ Jesucristo chaꞌan miꞌ melob quixtyañujob chaꞌan jini tsaꞌ bʌ i mucu chaꞌleyob. Chʌꞌʌch mi yʌleꞌ ti jini wen bʌ tꞌan chaꞌan laj cotyʌntyel chʌncol bʌ c sub majlel.

17 Jini c piꞌʌlob, jini israel bʌ quixtyañujob, miꞌ xucꞌchocoñob i bʌ ti i mandar Moisés. Miꞌ lolon chan isañob i bʌ chaꞌan weñʌch añob mi yʌlob chaꞌan i chaꞌañob Dios.

18 Yujilob isujm chʌ bʌ yom Dios. Chaꞌan cʌntisʌbilob ti mandar tyac yujilob i yajcañob chʌ bʌ wen.

19 Miꞌ lolon ñaꞌtyañob chaꞌan chꞌujbi i pʌseꞌ i bijlel Dios jini machꞌʌ baꞌan miꞌ ñaꞌtyañob. Miꞌ lolon ñaꞌtyañob chaꞌan miꞌ pʌsꞌeñob i sʌclel pañimil jini añoꞌ bʌ ti icꞌtꞌojñal yubil. Chʌꞌʌch miꞌ lolon qꞌuelob i bʌ.

20 Miꞌ pensaliñob chaꞌan ajtyoj isayajob chaꞌan jini sojquemoꞌ bʌ yicꞌot mi yʌlob chaꞌan yujilob i cʌntisañob jini machꞌʌ cʌntisʌbilobic tiꞌ tꞌan Dios. Miꞌ ñaꞌtyañob chaꞌan yaꞌ ti mandar tyac miꞌ tyajob i ñaꞌtyʌbal yicꞌot i sujmlel tyac.

21 Mi chʌꞌʌch yujilob i cʌntisan yañoꞌ bʌ, ¿chucoch maꞌix miꞌ bajñel cʌntisañob i bʌ cheꞌ jini? Mi yʌlob chaꞌan mach wen i chaꞌlen xujchꞌ. ¿Chucoch mi bajñel chaꞌleñob xujchꞌ cheꞌ jini?

22 Mi yʌlob chaꞌan mach wen miꞌ chaꞌleñob i tsuculel quixtyañujob. ¿Chucoch chʌꞌʌch miꞌ bajñel chaꞌleñob, cheꞌ jini? Miꞌ wen tsꞌaꞌqꞌuelob dios tyac melel bʌ ti cꞌʌbʌl. Pero mi yochelob i xujchꞌiben chʌ bʌ an yaꞌ ti i yotyotlel tyac.

23 Miꞌ wen chan isañob i bʌ chaꞌan cʌñʌlob i chaꞌan jini mandar tyac pero mi yʌcꞌob ti wajlentyel Dios chaꞌan chʌncol i ñusañob jini mandar tyac.

24 Jin chaꞌan an i sujmlel jini Tsꞌijbubil bʌ i Tꞌan Dios baꞌ mi yʌleꞌ: Jini mach bʌ israelobic bʌ quixtyañujob miꞌ tyajeꞌ Dios ti leco bʌ tꞌan chaꞌan ti caj i chaꞌlibal jini israeloꞌ bʌ. Cheꞌ mi yʌleꞌ ti Tsꞌijbubil bʌ i Tꞌan Dios.

25 Como jini israel bʌ quixtyañujob melelʌch an i cꞌʌjnibal tsep pʌchʌlel i chaꞌan mi tiꞌ tsꞌʌctisʌ ti pejtyelel bajcheꞌ xiqꞌuil ti i mandar Moisés muꞌ bʌ i jacꞌob. Pero mi tiꞌ ñusʌyob jini mandar tyac, cheꞌ bajcheꞌ machꞌan ti tsepbenti i pʌchʌlel cheꞌ jini como chʌncol i yajñelob lajal bajcheꞌ mach bʌ israel bʌ quixtyañujob.

26 Yicꞌot jeꞌel, mi jini mach bʌ tsepbil i pʌchʌlel bʌ quixtyañu, jiñʌch jini mach bʌ israelob, mi tyojʌch miꞌ chaꞌlen bajcheꞌ mi yʌleꞌ ti mandar, lajal mi quejel i qꞌuejlel cheꞌ bajcheꞌ jini tsepbil bʌ i pʌchʌlel aunque mach tsepbil i chaꞌan.

27 Como cheꞌ tsꞌʌcʌl miꞌ jacꞌben jini mandar tyac jini mach bʌ israel bʌ quixtyañu jiñʌch jini mach bʌ tsepbil bʌ i pʌchʌlel, mi yʌcꞌ ti tsictiyel laꞌ mul jatyetla muꞌ bʌ laꞌ ñusan mandar tyac, aunque an laꞌ chaꞌan jini tsꞌijbubil bʌ mandar yicꞌot jeꞌel tsepbil laꞌ pʌchʌlel.

28 I tyʌlel i chaꞌañoꞌ bʌ Dios jini israelob. Pero maꞌix mi yochel ti i chaꞌan bʌ Dios chaꞌan jach israel bʌ quixtyañu i tyat i ñaꞌ mi chaꞌan jach miꞌ chꞌʌm i marcajlel tsep pʌchʌlel ti i bʌcꞌtyal.

29 Pero jini yoque israel bʌ quixtyañu jiñʌch jini tsaꞌ bʌ yʌcꞌʌ ti tyoj isʌntyel i pusicꞌal ti Chꞌujul bʌ i Chꞌujlel Dios mach ti mandar tyac jach tsaꞌ bʌ tsꞌijbunti ti quixtyañu. Jini yoque israel bʌ, machꞌan mi sujbel ti wen ti quixtyañu, pero ti Dios.