3
¿Am ba chʌ bʌ och más wen cheꞌ israelob cheꞌ bajcheꞌ cheꞌ mach bʌ israeloꞌ bʌ quixtyañu? ¿Am ba i cꞌʌjnibal cheꞌ tsepbilix i pʌchʌlel winicob?2 Añʌch. An cabʌl i cꞌʌjnibal. Pero jini más cꞌʌjnibal bʌ, jiñʌch chaꞌan ti aqꞌuentiyob jini israelob i cʌñʌtyan jini tꞌan tsaꞌ bʌ subu Dios.
3 ¿Pero chʌ bʌ mi yujtyel mi chaꞌtiquil uxtiquil maꞌix bej xucꞌul mi yajñelob? ¿Machꞌa baꞌan bej xucꞌul Dios aunque maꞌix xucꞌul quixtyañu? ¿O muꞌ ba i lajmel i tsꞌʌctisan jini tsaꞌ bʌ i wʌ alʌ?
4 Machꞌan. Mi sajlic. Aunque luꞌ xlotyob ti pejtyelel quixtyañujob, pero Dios bʌ, luꞌ melelʌch miꞌ chaꞌlen ti pejtyelel chʌ bʌ tyac jach miꞌ chaꞌlen. Tiꞌ Tsꞌijbubil bʌ i Tꞌan Dios miꞌ tyajeꞌ Dios ti tꞌan. Mi yʌleꞌ:
Jatyet Dios, cheꞌ maꞌ wʌcꞌ a tꞌan mi quejel i luꞌ ñaꞌtyañob chaꞌan ñoj melel bajcheꞌ maꞌ wʌleꞌ.
Cheꞌ miꞌ pensaliñob quixtyañujob mi tyojetyʌch o mi maꞌix tyojet, mi quejel a loqꞌuel ti wen como maꞌan majch chꞌujbi i saj aleꞌ chaꞌan maꞌix tyojet.
Cheꞌ mi yʌleꞌ ti Tsꞌijbubil bʌ i Tꞌan Dios.
5 Pero mi ti caj lac simaronlel mi más tsictiyel chaꞌan tyoj i pusicꞌal Dios, ¿chuqui yom mi la cʌleꞌ cheꞌ jini? ¿Yom ba mi la cʌleꞌ chaꞌan maꞌix tyoj miꞌ chaꞌlen Dios cheꞌ mi yʌqꞌueñonla lac xotꞌeꞌ lac mul? (Chʌncol cʌleꞌ bajcheꞌ mi lolon alob quixtyañujob.)
6 Machꞌan. Mach cheꞌic yom mi la cʌleꞌ. Mi machic tyoj Dios, ¿bajcheꞌ chꞌujbi i melob quixtyañujob am bʌ ti mulawil cheꞌ jini?
7 Pero an jini muꞌ bʌ i lolon alob chaꞌan quixtyañujob miꞌ cotyan Dios cheꞌ miꞌ chaꞌleñob lot, como chaꞌan ti caj i lot mi wen tsictiyel chaꞌan ñoj melelʌch tsaꞌ bʌ i yʌlʌ Dios como Dios maꞌ baꞌ bʌ ora miꞌ chaꞌlen lot. Cheꞌ jini mi quejel i lolon alob: ¿Chucoch mi yʌlon ti xmulil Dios mi ti caj c lot mi más tsictiyel i yutslel? lolon cheꞌob.
8 Mi lolon yʌlob: ¿Mach ba yom mi lac bej chaꞌlen lac simaronlel chaꞌan mi tsictiyel i wenlel Dios? Chʌꞌʌch mucꞌon lojon ti cʌntisa mi lolon alob lamitalob. Pero chʌꞌʌch miꞌ lolon alob chaꞌan jach yom i yʌcꞌ ti yʌsintyel lojon j cʌntisa. Pero jini muꞌ bʌ i yʌl bajcheꞌ jini, yom ajlic chaꞌan mi quejel i xotꞌ i mul.
Luꞌ an i mul quixtyañujob
9 ¿Bajcheꞌ yom mi lac pensalin cheꞌ jini? ¿Más ba weñonla israelon bʌ la cheꞌ bajcheꞌ jini mach bʌ israelobic maꞌ wʌl? Machꞌan. Mi sajlic. Como tsaꞌix la quilʌ chaꞌan an i mul israelob yicꞌot mach bʌ israelob como ti pejtyelelonla cheꞌ bajcheꞌ chuculonla ti i pꞌʌtyʌlel mulil.
10 Ti Tsꞌijbubil bʌ i Tꞌan Dios mi yʌleꞌ:
Maꞌan majch tyoj, mi junticlec.
11 Maꞌan majch yom i chꞌʌmeꞌ isujm.
Maꞌan majch yom i chꞌujbin Dios.
12 Ti pejtyelelob tiꞌ tꞌuñuyob majlel yambʌ bij. Ti pejtyelelob ti sʌtyʌob i bʌ ti i simaronlel.
Maꞌan majch miꞌ chaꞌlen chʌ bʌ wen, mi junticlec.
13 Tsucul i tꞌan cheꞌ bajcheꞌ i tyuwel muconibʌl cheꞌ tyocol i tiꞌ.
Lot jach mucꞌob.
Xʌctyubil i tꞌan cheꞌ bajcheꞌ ti i venenojlel lucum.
14 Chꞌʌcojel jach bʌ tꞌan miꞌ chaꞌleñob. Miꞌ wen wajleñob i bʌ.
15 Ti saj ora jach waꞌ yom i tsʌnsan i piꞌʌlob.
16 Chaꞌan ti caj bajcheꞌ mi yajñelob mi jisʌbeñob i tijicñʌyel quixtyañujob. Mi yʌqꞌueñob i ñusan wocol.
17 Machꞌan mi saj ñaꞌtyañob bajcheꞌ mi ñʌchꞌtisañob jini yomob periyal.
18 Machꞌan mi pensaliñob bajcheꞌ an Dios chaꞌan miꞌ bʌcꞌñan. Machꞌan mi saj yʌcꞌ ti ñuc.
Cheꞌ mi yʌleꞌ ti Tsꞌijbubil bʌ i Tꞌan Dios.
19 La cujil isujm chaꞌan ti pejtyelel quixtyañujob añob bʌ tiꞌ wenta jini oniyix bʌ mandar yom i luꞌ jacꞌbeñob bajcheꞌ tsꞌijbubil ti mandar. Maꞌan majch chꞌujbi i yʌleꞌ machꞌan i mul como junlajal an lac mul ti lac pejtyelel. Mi quejel lac wersa mel lac bʌ yaꞌ baꞌan Dios.
20 Maꞌan majch mi qꞌuejlel ti tyoj ti Dios chaꞌan jach i beleꞌ jacꞌben jini oniyix bʌ mandar. Como an jach i cꞌʌjnibal jini mandar tyac chaꞌan i yʌqꞌueñonla lac ñaꞌtyan chaꞌan xmulilonla.
An laj cotyʌntyel chaꞌan mi lac chꞌujbin Cristo
21 Dios chʌncol i yʌqꞌueñonla lac ñaꞌtyan bajcheꞌ chꞌujbi laj qꞌuejlel ti tyoj ti i wut. Como tsiquil mach chꞌujbi laj qꞌuejlel ti tyoj chaꞌan i jacꞌbentyel i mandar Moisés. Jini chʌncol bʌ i pʌsꞌeñonla jiñʌch jini tsaꞌ bʌ i wʌ tyajle ti tꞌan ti jini oniyix bʌ mandar yicꞌot jini tsaꞌ bʌ i wʌ tsꞌijbu jini tsaꞌ bʌ i xiqꞌui yʌleꞌ Dios ti ñoj oniyix.
22 Dios miꞌ qꞌuelonla ti tyoj cheꞌ mi lac chꞌujbin chaꞌan ajcotyaya lac chaꞌan Jesucristo. Majchical jach miꞌ chꞌujbin mi qꞌuejlel ti tyoj como Dios junlajal miꞌ qꞌuelonla.
23 Como ti pejtyelel quixtyañu tsaꞌix i luꞌ chaꞌleyob mulil. Maꞌan majch mi qꞌuejlel ti ñuc ti Dios.
24 Pero Dios chaꞌan ti i yutslel i pusicꞌal ti majtyan jach miꞌ qꞌuelob ti tyoj quixtyañujob. Ti cotyʌntiyob ti Cristo Jesús.
25 Dios tiꞌ waꞌchoco Cristo chaꞌan i bec i chꞌichꞌel ti cruz chaꞌan i xotꞌben i mul majchical jach miꞌ chꞌujbin tiꞌ pusicꞌal. Chaꞌan ti yʌcꞌʌ ti sajtyel Cristo chaꞌan i mul ti pejtyelel quixtyañujob, Dios tiꞌ tsictisʌ chaꞌan tyojʌch bajcheꞌ miꞌ chaꞌlen.
26 Pero cheꞌ ñac ti sajti Cristo ti cruz ti tsictiyi chaꞌan ñoj tyojʌch Dios como ti qꞌuejli ti tyoj jini oniyix bʌ quixtyañujob pero miꞌ qꞌuel ti tyoj wale iliyi jeꞌel majchical jach miꞌ chꞌujbin ajcotyayajʌch i chaꞌan Jesús.
27 ¿Bajcheꞌ chꞌujbi i chan isañob i bʌ quixtyañujob cheꞌ jini? Mach chꞌujbi. ¿Chucoch mach chꞌujbi? Como mi chꞌujbiyʌch laj qꞌuejlel ti tyoj chaꞌan tsꞌʌcʌl ti lac luꞌ jacꞌbe i mandar Moisés, an jini muꞌ bʌ i chan isan i bʌ ti caj, cheꞌ jini. Pero mach saj chꞌujbi i chan isañob i bʌ como machꞌan mi laj qꞌuejlel ti tyoj chaꞌan ti lac chꞌujbi muꞌ bʌ i xicꞌonla jini mandar pero chaꞌan ti lac chꞌujbi Cristo ti lac pusicꞌal.
28 Tsiquilʌch, cheꞌ jini, mi qꞌuejlel ti tyoj ti Dios quixtyañu chaꞌan jach miꞌ chꞌujbin chaꞌan ajcotyayajʌch i chaꞌañob Cristo. Dios machꞌan miꞌ chꞌʌm tiꞌ wenta mi tiꞌ jacꞌʌyob bajcheꞌ ti xijqꞌuiyob ti mandar o mi machꞌan tiꞌ jacꞌʌyob.
29 Ixcu Dios, ¿jim ba i Dios jach israelob? ¿Mach ba jinic i Dios jini mach bʌ israelobic jeꞌel? Jiñʌchi. Como Dios, i Diosʌch israelob yicꞌot mach bʌ israelobic.
30 Como an juntiquil jach Dios. Jiñʌch jini muꞌ bʌ i qꞌuel ti tyoj majchical jach miꞌ chꞌujbin Cristo tiꞌ pusicꞌal, mi israel bʌ quixtyañu, jiñʌch jini tsepbil bʌ i pʌchʌlel o mi mach bʌ israelob jiñʌch jini mach bʌ tsepbil bʌ i pʌchʌlel.
31 ¿Muꞌ ba la quisʌben i cꞌʌjnibal jini mandar cheꞌ jini chaꞌan ti lac chꞌujbi chaꞌan Cristo ajcotyayajʌch lac chaꞌan? Machꞌan. Mi sajlic. Pero mi lac más ñaꞌtyan an i cꞌʌjnibal jini mandar tyac.