2 Como mi melelʌch tsaꞌiqui qꞌuejli ti tyoj ti Dios chaꞌan chʌ bʌ wen tiꞌ chaꞌle, cheꞌ jini chꞌujbiyʌch i chan isan i bʌ ti caj. Pero mach chꞌujbi i chan isan i bʌ tiꞌ tyojlel Dios.

3 Mi yʌleꞌ ti Tsꞌijbubil bʌ i Tꞌan Dios bajcheꞌ ti qꞌuejli ti tyoj Abraham. Mi yʌl: Abraham tiꞌ chꞌujbi chaꞌan melelʌch mi yujtyel ti pejtyelel jini tsaꞌ bʌ i wʌ alʌ Dios. Jasʌl ti yubi Dios chaꞌan miꞌ qꞌueleꞌ ti tyoj. Chʌꞌʌch mi yʌleꞌ ti Tsꞌijbubil bʌ i Tꞌan Dios.

4 Cheꞌ an majch miꞌ chaꞌlen toñel mi yʌqꞌuentyel i tyojol chaꞌan jini tsaꞌ bʌ i chaꞌle. Machꞌan mi yʌqꞌuentyel cheꞌ bajcheꞌ mi i majtyan jach, pero mi yʌqꞌuentyel cheꞌ bajcheꞌ yoque i tyojol tsaꞌ bʌ i ganari.

5 Pero maꞌan chʌ bʌ chꞌujbi lac saj chaꞌlen muꞌ bʌ i yʌqꞌuen Dios i qꞌuelonla ti tyoj. Pero miꞌ qꞌuelonla ti tyoj cheꞌ mi lac chꞌujbin chaꞌan melelʌch tsaꞌ bʌ i yʌlʌ Dios. Como Dios bʌ yi miꞌ qꞌuel ti tyoj xmulilob muꞌ bʌ i chꞌujbin.

6 Jini lac yum ti ñoj oniyix David bʌ i cꞌabaꞌ ti yʌlʌ bajcheꞌ an cꞌajacña bʌ i yoj jini quixtyañu muꞌ bʌ i qꞌuejlel ti tyoj ti Dios cheꞌ machꞌan chʌ bʌ chꞌujbi i bajñel chaꞌlen muꞌ bʌ i yʌqꞌuen Dios i qꞌueleꞌ ti tyoj.

7 David ti yʌlʌ:

9 Ixcu jini tijicñiyel, ¿jini jach ba mi yʌqꞌuentyelob jini tsepbil bʌ i pʌchʌlel maꞌ wʌl, o jim ba i chaꞌan jeꞌel jini mach bʌ tsepbil i pʌchʌlel? Ixcu jini Abraham, tsaꞌix la cʌlʌ chaꞌan ti qꞌuejli ti tyoj ti Dios chaꞌan tiꞌ chꞌujbi melelʌch mi yujtyel tsaꞌ bʌ subenti ti Dios.

10 Pero cheꞌ ñac ti qꞌuejli ti tyoj ti Dios jini Abraham, ¿tsepbilix ba i pʌchʌlel o max tyo tsepbilic? Ti qꞌuejli ti tyoj ti Dios cheꞌ max tyo tsepbil i pʌchʌlel.

11 Ti wiꞌil tyo ti tsepbenti i pʌchʌlel Abraham chaꞌan i sellojlel tiꞌ bʌcꞌtyal chaꞌan tsaꞌix qꞌuejli ti tyoj ti Dios cheꞌ ñac max tyo tsepbil i pʌchʌlel chaꞌan tiꞌ chꞌujbi chaꞌan melelʌch tsaꞌ bʌ subenti ti Dios. Jin chaꞌan ti ochi Abraham ti i tyat yubil, ti pejtyelelob muꞌ bʌ i chꞌujbiñob chaꞌan melelʌch muꞌ bʌ i yʌl Dios, aunque maꞌan ti tsepbentiyob i pʌchʌlel. Lajal bajcheꞌ Abraham, mi qꞌuejlelob ti tyoj ti Dios jeꞌel.

12 Abraham i tyatyʌch jini israelob tsaꞌix bʌ tsepbentiyob i pʌchʌlel. Pero mach chaꞌan jach ti tsepbentiyob i pʌchʌlel pero chaꞌan tiꞌ chꞌujbiyob melelʌch tsaꞌ bʌ i yʌlʌ Dios cheꞌ bajcheꞌ tiꞌ chꞌujbi Dios Abraham cheꞌ ñac max tyo ti tsepbenti i pʌchʌlel.

13 Dios tiꞌ wʌ sube Abraham yicꞌot i jiñʌjlel chaꞌan mi yʌqꞌuentyelob pañimil tiꞌ wenta. Mach cheꞌic ti subentiyob chaꞌan ti caj Abraham tiꞌ chꞌujbi jini mandar tyac, pero chaꞌan tiꞌ chꞌujbi chaꞌan melelʌch mi yujtyel ti pejtyelel tsaꞌ bʌ i subenti ti Dios. Cheꞌ jini ti qꞌuejli ti tyoj ti Dios.

14 Mi jini jach mi yʌqꞌuentyelob pañimil tiꞌ wenta jini muꞌ bʌ i chꞌujbiñob jini mandar tyac, lolom jach i chꞌujbintyel Dios, cheꞌ jini. Mi cheꞌiqui, maꞌan sajlic i cꞌʌjnibal jini tsaꞌ bʌ i wʌ alʌ Dios.

15 Como jini mandar mucꞌ jach i sub an xotꞌmulil chaꞌan i ñusʌntyel mandar. Machic an mandar, machꞌan i ñusʌntyel mandar.

16-17 Jin chaꞌan tiꞌ yutslel i pusicꞌal, Dios mi quejel i yʌqꞌuen pañimil tiꞌ wenta jini tsaꞌ bʌ i chꞌujbiyob chaꞌan melelʌch jini tsaꞌ bʌ i wʌ alʌ Dios. Tsiquilʌch cheꞌ jini, chaꞌan jini tꞌan tsaꞌ bʌ wʌ subenti Abraham xucꞌulʌch chaꞌan i jiñʌjlel Abraham jeꞌel. Mach chaꞌanic jach i jiñʌjlel muꞌ bʌ i chꞌujbiben i mandar Moisés, pero chaꞌan jeꞌel jini muꞌ bʌ i chꞌujbin chaꞌan melelʌch i tꞌan Dios lajal bajcheꞌ tiꞌ chꞌujbi Abraham. Como Abraham ti ochi ti lac tyat yubil, yaꞌ tiꞌ tyojlel Dios tsaꞌ bʌ i chꞌujbi. Ti Tsꞌijbubil bʌ i Tꞌan Dios mi yʌleꞌ: Tsaꞌix cotsʌyet ti i tyat tiꞌ tyojlel yonlel quixtyañujob ti cabʌl pañimil tyac. Cheꞌ tsꞌijbubil. Jiñʌch bʌ Dios muꞌ bʌ i cuxtisan sajtyemoꞌ bʌ, muꞌ bʌ i mel tiꞌ pꞌʌtyʌlel jach bʌ i tꞌan jini tsiquil tyac bʌ max tyo bʌ baꞌan ti yambʌ ora.

18 Aunque maꞌan tsiquil tiꞌ wut Abraham bajcheꞌ mi quej i tsꞌʌctiyel jini tꞌan tsaꞌ bʌ wʌ subenti ti Dios, tiꞌ bej chꞌujbi ti i xucꞌtyʌlel i pusicꞌal chaꞌan mi quejel i yochel ti tyat i yonlel quixtyañujob ti cabʌl pañimil tyac bajcheꞌ ti wʌ subenti ti Dios. Como ti wʌ subenti: Chʌꞌʌch mi quejel i yajñel i yonlel a jiñʌjlelob. Cheꞌ yʌlol.

19 Pero Abraham maꞌan tiꞌ saj cʌyʌ i chꞌujbin chaꞌan mi yujtyel jini tsaꞌ bʌ wʌ subenti ti Dios, aunque tiꞌ ñaꞌtyʌ maꞌix i pꞌʌtyʌlel chaꞌan mi tyʌlel i yalobilob yicꞌot i yijñam como yomox i tyaj cien año i jabilelob.

20 Pero wen xucꞌul tiꞌ bej chꞌujbi jini tꞌan tsaꞌ bʌ wʌ subenti ti Dios. Maꞌan tiꞌ saj cʌyʌ i chꞌujbin pero tiꞌ más xucꞌchoco i pusicꞌal ti Dios. Tiꞌ subu i ñuclel Dios.

21 Ti jumpꞌej i pusicꞌal tiꞌ chꞌujbi chaꞌan an i pꞌʌtyʌlel Dios chaꞌan i chaꞌlen ti pejtyelel jini tsaꞌ bʌ i wʌ alʌ mi quejel i chaꞌlen.

22 Jin chaꞌan ti qꞌuejli ti tyoj ti Dios chaꞌan jach tiꞌ chꞌujbi.

23 Mach chaꞌanic jach Abraham ti tsꞌijbunti ili tꞌan baꞌ mi yʌl chaꞌan ti qꞌuejli ti tyoj chaꞌan tiꞌ chꞌujbi melel mi yujtyel bajcheꞌ ti wʌ alʌ Dios.

24 Pero ti tsꞌijbunti chaꞌañonla jeꞌel. Como cheꞌ mi lac chꞌujbin Dios tsaꞌ bʌ tyeche loqꞌuel lac Yum Jesús baꞌan sajtyemoꞌ bʌ, mux laj qꞌuejlel ti tyoj ti Dios jeꞌel.

25 Como Dios ti yʌcꞌʌ ti tsʌnsʌntyel lac Yum Jesús chaꞌan i xotꞌbeñonla lac mul. Ti chaꞌ tyejchi loqꞌuel baꞌan sajtyemoꞌ bʌ chaꞌan chꞌujbi laj qꞌuejlel ti tyoj ti Dios.