2 Ochemonixla ti i yutslel i pusicꞌal Dios chaꞌan ti lac chꞌujbi chaꞌan Cristo miꞌ cotyañonla. Mi lac xucꞌchocon lac bʌ ti i yutslel i pusicꞌal Dios. Tijicñayonla chaꞌan la cujil isujm mi quejel la cʌqꞌuentyel i ñuclel Dios muꞌ bʌ quej i tsictiyel ti lac tyojlel.

3 Mach jinic jach tijicñayonla chaꞌan jini chʌncol bʌ lac pijtyan, pero tijicñayonla jeꞌel chaꞌan lac wocol como la cujil isujm cheꞌ an lac wocol miꞌ pꞌʌtyʌlitisan lac pusicꞌal chaꞌan mi lac más cucheꞌ ti wen.

4 Cheꞌ mi laj cucheꞌ ti wen lac wocol miꞌ xucꞌchocobeñonla lac pusicꞌal. Cheꞌ xucꞌul lac pusicꞌal tijicñayonla mi lac pijtyan jini muꞌ bʌ i yʌqꞌueñonla Dios.

5 Cheꞌ mi lac pijtyan jini muꞌ bʌ i yʌqꞌueñonla Dios, mach lolom mi lac pijtyan. Dios tiꞌ cꞌʌñʌ Chꞌujul bʌ i Chꞌujlel tsaꞌ bʌ i yʌqꞌueyonla chaꞌan i butꞌbeñonla lac pusicꞌal ti i pꞌuntyaya Dios chaꞌañonla.

6 Pero cheꞌ ñac mach chꞌujbi lac bajñel cotyan lac bʌ cheꞌ ti yoque i yorojlel tsaꞌ bʌ i wʌ yajcʌ Dios, Cristo ti sajti ti cruz chaꞌan xmulilob.

7 Casi maꞌan majch muꞌ bʌ i yʌlol yʌcꞌ i bʌ ti sajtyel chaꞌan yambʌ quixtyañu aunque tyoj bʌ quixtyañu. Pero cꞌoꞌojl an jini machꞌʌ saj yujil bʌqꞌuen muꞌ bʌ i yʌcꞌ i bʌ ti sajtyel chaꞌan juntiquil ñoj uts bʌ quixtyañu.

8 Pero Dios miꞌ pʌsꞌeñonla chaꞌan miꞌ pꞌuntyañonla como ti sajti Cristo chaꞌañonla cheꞌ ñac xmulilon tyo la.

9 Wale, chaꞌan mi laj qꞌuejlel ti tyoj ti Dios chaꞌan ti caj ti sajti Cristo chaꞌañonla, más tyo melel mi quej i cotyañonla Cristo chaꞌan machꞌan mi quejel lac majlel ti xotꞌmulil.

10 Cheꞌ ñac chʌncol tyo laj contrajin Dios, ti yutsisʌbeyonla lac pusicꞌal la quicꞌot chaꞌan ti caj ti sajti i Yalobil chaꞌañonla. Wale, cheꞌ jini, cheꞌ utsonixla la quicꞌot Dios más tyo melel an laj cotyʌntyel chaꞌan chaꞌ cuxul Cristo.

11 Mach jinic jach jini, pero tijicñayonla jeꞌel chaꞌan lac Diosʌch chaꞌan ti sajti lac Yum Jesucristo chaꞌañonla. Como Cristo ti yutsisʌ lac pusicꞌal yicꞌot Dios.

12 Ti ñaxan an juntiquil jach bʌ winic Adán bʌ i cꞌabaꞌ tsaꞌ bʌ i chaꞌle mulil. Chaꞌan ti caj mulil ti queji i sajtyel quixtyañujob. Wale ti pejtyelelob mi sajtyelob como ti pejtyelelob miꞌ chaꞌleñob mulil.

13 Cheꞌ ñac max tyo baꞌan tsꞌijubil bʌ mandar, anix mulil ti mulawil. Pero cheꞌ ñac max tyo baꞌan ti aqꞌuenti mandar, max tyo ti ajli mi an i mul quixtyañujob.

14 Pero cꞌʌlʌ cheꞌ ñac waꞌ an ti mulawil jini ñaxan bʌ winic Adán bʌ i cꞌabaꞌ, cꞌʌlʌ jintyo wʌꞌ an ti mulawil Moisés, ti luꞌ sajtiyob xmulilob, aunque mach junlajal i mul bajcheꞌ Adán tsaꞌ bʌ i ñusʌbe i ticꞌoñel Dios. Chaꞌan ti caj chʌ bʌ tiꞌ chaꞌle Adán ti ochiyonla ti xmulil. Chaꞌan chʌ bʌ tiꞌ chaꞌle Cristo, tiꞌ locꞌsʌyonla ti xmulil cheꞌ ti tyʌli wʌꞌ ti mulawil.

15 Pero mach chꞌujbi lac saj lajeꞌ jini tsaꞌ bʌ i chaꞌle Adán yicꞌot jini lac majtyan muꞌ bʌ i yʌqꞌueñonla Dios. Como chaꞌan ti caj i mul jini juntiquil winic Adán bʌ i cꞌabaꞌ cabʌlob ti sajtiyob. Pero jini laj cotyʌntyel muꞌ bʌ i yʌqꞌueñonla Dios ti lac majtyan jach chaꞌan ti yutslel i pusicꞌal, ti aqꞌuentiyob i yonlelob chaꞌan ti jini juntiquil winic Jesucristo. Jini tsaꞌ bʌ i chaꞌle Cristo jiñʌch chaꞌan i wenlel ti yonlelob.

16 Mach chꞌujbi lac saj lajeꞌ i mul jini juntiquil winic Adán bʌ i cꞌabaꞌ yicꞌot jini laj cotyʌntyel muꞌ bʌ i yʌqꞌueñonla Dios. Como chaꞌan ti caj jini tsaꞌ bʌ i chaꞌle jini juntiquil ti wʌ ajli chaꞌan mi quejel i xotꞌeꞌ i mul quixtyañu. Pero mach cheꞌiqui chaꞌan laj cotyʌntyel. Como ti majtyan jach Dios miꞌ qꞌuelob ti tyoj winicob aunque tiꞌ chaꞌleyob cabʌl mulil.

17 Chaꞌan tiꞌ mul juntiquil winic mi wersa sajtyel quixtyañujob. Pero chaꞌan ti cabʌl i yutslel i pusicꞌal Dios, ti juntiquil jeꞌel, jiñʌch Jesucristo, mi quejel i yʌqꞌuentyel tsijiꞌ bʌ i cuxtyʌlel tiꞌ majtyan jach majchical yom i chꞌʌmeꞌ. Mi qꞌuejlelob ti tyoj ti Dios.

18 Chaꞌan tiꞌ mul jini juntiquil, jiñʌch Adán, ti wʌ ajli chaꞌan mi quejel i xotꞌeꞌ i mul ti pejtyelel quixtyañujob. Cheꞌ jeꞌel chaꞌan tiꞌ tyoj bʌ i chaꞌlibal juntiquil, jiñʌch Jesucristo, mi cojlelob ti xotꞌmulil chaꞌan i yʌqꞌuentyelob tsijiꞌ bʌ i cuxtyʌlel.

19 Cheꞌ bajcheꞌ ti qꞌuejliyob ti xmulil cabʌlob chaꞌan ti juntiquil jach winic tsaꞌ bʌ i ñusʌbe bajcheꞌ ti subenti ti Dios, cheꞌ jeꞌel cabʌl mi quejel i qꞌuejlel ti tyoj ti Dios chaꞌan jini yambʌ juntiquil winic tsaꞌ bʌ i jacꞌʌ bajcheꞌ ti subenti ti Dios.

20 Ti tsꞌijbunti jini mandar chaꞌan mi lac más ñaꞌtyan añʌch lac mul. Pero cheꞌ ñac ti lac más ñaꞌtyʌ an cabʌl lac mul ti queji lac ñaꞌtyan más on tyo i yutslel Dios.

21 Cheꞌ bajcheꞌ mulil tiꞌ wersa yʌcꞌʌ ti sajtyel quixtyañujob, cheꞌ bajcheꞌ jini cheꞌ Dios miꞌ qꞌuelonla ti tyoj ti yutslel i pusicꞌal mi yʌqꞌueñonla laj cuxtyʌlel machꞌʌ yujil jilel chaꞌan ti lac Yum Jesucristo.