2 Machꞌan. Mi sajlic. Sajtyemonixla yubil chaꞌan maꞌix mi lac bej jaqꞌueꞌ mulil. ¿Bajcheꞌ chꞌujbi lac bej chaꞌlen mulil, cheꞌ jini?

3 ¿Mach ba laꞌ wujil isujm chaꞌan ti lac pejtyelel tsaꞌ bʌ lac chꞌʌmʌ jaꞌ mi la cajñel la quicꞌot Cristo? Chaꞌan ti sajti Cristo chaꞌañonla, cheꞌ bajcheꞌ chʌncol lac cʌcꞌ lac bʌ ti sajtyel la quicꞌot yubil cheꞌ mi lac chꞌʌmeꞌ jaꞌ.

4 Ti sajtiyonla yubil. Chaꞌan ti lac chꞌʌmʌ jaꞌ cheꞌ bajcheꞌ ti mujquiyonla la quicꞌot Cristo yubil. Jin chaꞌan cheꞌ bajcheꞌ ti tyejchi loqꞌuel Cristo baꞌan sajtyemoꞌ bʌ chaꞌan tiꞌ ñuclel Dios lac Tyat, cheꞌ joñonla jeꞌel ti tyejchiyonla yubil chaꞌan chꞌujbi la cajñel ti tsijiꞌ bʌ laj cuxtyʌlel.

5 Como mi añonla ti Cristo chaꞌan ti sajtyiyonla yubil cheꞌ bajcheꞌ ti sajti Cristo, mi lac tyejchel ti tsijiꞌ bʌ laj cuxtyʌlel jeꞌel cheꞌ bajcheꞌ ti tyejchi Cristo.

6 Como cheꞌ ñac tiꞌ bajle ti cruz Cristo cheꞌ bajcheꞌ yaꞌ ti bajle tsucul bʌ lac pusicꞌal yicꞌot jeꞌel chaꞌan i jisʌntyel i simaronlel lac pusicꞌal chaꞌan maꞌix bej chuculonla tiꞌ pꞌʌtyʌlel mulil.

7 Como cheꞌ an majch mi sajtyel, tsaꞌix cojli tiꞌ pꞌʌtyʌlel mulil.

8 Mi ti sajtiyonla la quicꞌot Cristo, la cujil isujm mi quejel lac chaꞌ cuxtiyel la quicꞌot jeꞌel.

9 Como la cujil isujm chaꞌan ti chaꞌ tyejchi loqꞌuel Cristo baꞌan sajtyemoꞌ bʌ, maꞌan baꞌ bʌ ora mi quejel i chaꞌ sajtyel. Mach chꞌujbi i chaꞌ sajtyel.

10 Como cheꞌ ñac ti sajti Cristo jasʌl junyajlel ti sajti chaꞌan i luꞌ xotꞌbeñob i mul quixtyañujob. Pero wale chaꞌ cuxulix chaꞌan miꞌ tsictisan i ñuclel Dios.

11 Jatyetla, jeꞌel, ñaꞌtyanla cheꞌ bajcheꞌ sajtyemetixla chaꞌan machꞌan miꞌ nijcʌbeñetla laꞌ pusicꞌal mulil. Pero ñaꞌtyanla cheꞌ bajcheꞌ chaꞌ cuxuletla chaꞌan mi laꞌ tsictisan i ñuclel Dios, como tyem añonla la quicꞌot lac Yum Cristo Jesús.

12 Jin chaꞌan, cheꞌ wʌ tyo añonla ti mulawil mach yom mi lac saj cʌcꞌ lac pusicꞌal i yotsañonla ti mulil. Como mulil miꞌ jopꞌ i wersa nijcʌbeñonla lac jaqꞌueꞌ i tsuculel lac pusicꞌal.

13 Mach yom mi la cʌcꞌ lac bʌcꞌtyal i chaꞌlen mulil. Pero jini yom bʌ, jiñʌch chaꞌan la cʌcꞌ lac bʌ ti Dios. Como tsaꞌix sajtiyonla la quicꞌot Cristo yubil. Wale anix tsijiꞌ bʌ laj cuxtyʌlel. Yom mi la cʌcꞌ lac bʌ ti Dios chaꞌan i cꞌʌñonla lac chaꞌlen wen bʌ lac chaꞌlibal.

14 Como mach chꞌujbi i bej yʌsañonla mulil como wale maꞌix añonla tiꞌ wenta jini oniyix bʌ mandar pero añonla tiꞌ wenta i yutslel i pusicꞌal Dios.

15 ¿Bajcheꞌ maꞌ pensalin cheꞌ jini? ¿Yom ba mi lac chaꞌlen mulil cheꞌ maꞌix bej añonla tiꞌ wenta oniyix bʌ mandar pero añonixla tiꞌ wenta i yutslel i pusicꞌal Dios? Machꞌan. Mi sajlic.

16 Como wen laꞌ wujil isujm cheꞌ mi la cʌcꞌ lac bʌ tiꞌ wenta juntiquil yumʌl, i winiconla jini yumʌl cheꞌ jini. Wersa mi lac jaqꞌueꞌ chʌ bʌ miꞌ xicꞌonla lac chaꞌlen. Cheꞌ bajcheꞌ jini, cheꞌ mi la cʌcꞌ lac bʌ chaꞌan mi lac yumin mulil, wersa mi lac xotꞌeꞌ lac mul cheꞌ mi lac sajtyel. Cheꞌ mi la cʌcꞌ lac bʌ chaꞌan mi lac yumin Dios, mi yʌqꞌueñonla la cajñel ti tyoj.

17 Ti wajali ti laꞌ wʌcꞌʌ laꞌ bʌ laꞌ yumin mulil. Pero wale, wocox i yʌlʌ Dios tsaꞌix laꞌ chꞌujbibe ti jumpꞌej laꞌ pusicꞌal i cʌntisʌ tsaꞌ bʌ aqꞌuentiyetla ti Dios.

18 Wale tsaꞌix cojliyetla ti mulil tsaꞌ bʌ laꞌ yumi. Tsaꞌix ochiyetla ti i winiquetla Dios chaꞌan mi laꞌ chaꞌlen chʌ bʌ tyoj tiꞌ wut.

19 (Chʌncol c subeñetla jini tꞌan ti lajoñel tyac como mero wocol mi laꞌ chꞌʌmꞌen isujm.) Cheꞌ lajal bajcheꞌ ti wajali ti laꞌ wʌcꞌʌ laꞌ bʌ chaꞌan mi laꞌ chaꞌlen baꞌical bʌ laꞌ tsuculel yicꞌot laꞌ simaronlel jintyo maꞌix i pꞌisol laꞌ simaronlel. Wale, cheꞌ jini, yom mi laꞌ wʌcꞌ laꞌ bʌ chaꞌan mi laꞌ chaꞌlen chʌ bʌ tyoj tiꞌ wut Dios chaꞌan mi laꞌ wajñel ti i chaꞌañetla Dios ti junyajlel.

20 Como cheꞌ ñac chʌncol tyo laꞌ wʌcꞌ laꞌ bʌ laꞌ yumin mulil mach libre añetla chaꞌan mi laꞌ chaꞌlen chʌ bʌ tyoj.

21 ¿Chʌ bʌ yes i cꞌʌjnibal jini tsaꞌ bʌ laꞌ chaꞌle wajali muꞌ bʌ laꞌ quisnin laꞌ chaꞌ pensalin? Maꞌix sajlic i cꞌʌjnibal. Cheꞌ jach mi yʌcꞌonla ti xotꞌmulil cheꞌ mi lac sajtyel.

22 Pero wale tsaꞌix colbentiyetla ti i pꞌʌtyʌlel mulil. Ti ochiyetla ti i winic Dios. Mi laꞌ wochel ti i chaꞌañet bʌ la Dios. Mi quejel laꞌ wʌqꞌuentyel laꞌ cuxtyʌlel machꞌʌ yujil jilel.

23 I tyojol lac mul jiñʌch cheꞌ mi quejel lac majlel ti xotꞌmulil cheꞌ mi lac sajtyel, pero lac majtyan muꞌ bʌ i yʌqꞌueñonla Dios jiñʌch laj cuxtyʌlel machꞌʌ yujil jilel cheꞌ mi la cajñel la quicꞌot Cristo Jesús lac Yum.