2 Cheꞌ bajcheꞌ cheꞌ an i ñoxiꞌal xꞌixic, jini mandar chaꞌan ñujpuñel mi yʌleꞌ chaꞌan wersa mi yajñel yicꞌot i ñoxiꞌal cheꞌ cuxul tyo i ñoxiꞌal. Pero mi ti sajti, librejix jini xꞌixic. Mach bej an tiꞌ wenta jini mandar.

3 Mi ti ajni yicꞌot yambʌ winic cheꞌ cuxul tyo i ñoxiꞌal, i tsuculelʌch miꞌ chaꞌlen. Pero mi ti sajti i ñoxiꞌal, mach bej an tiꞌ wenta i mandar ñujpuñel. Mach i tsuculel mi tiꞌ chaꞌle ñujpuñel yicꞌot yambʌ winic.

4 Quermañujob, jiñʌch bajcheꞌ añetla wajali jeꞌel. Laꞌ noxiꞌalʌch jini mandar tyac yubil como ti laꞌ wersa chꞌujbi jini mandar. Pero ti sajtiyonla yubil chaꞌan machꞌan mi lac jacꞌ jini mandar tyac como cheꞌ bajcheꞌ ti sajtiyonla yicꞌot Cristo cheꞌ ñac ti tsʌnsʌnti ti cruz. Mach bej añonla tiꞌ wenta lac wersa chꞌujbin jini mandar tyac. Libre añonla la cajñel yicꞌot Cristo tsaꞌ bʌ tyejchi loqꞌuel baꞌan sajtyemoꞌ bʌ. Mi lac chꞌujbiben i tꞌan. Mi lac chaꞌlen wen bʌ lac chaꞌlibal bajcheꞌ yom Dios.

5 Ti wajali ti lac chaꞌle lac simaronlel chʌ bʌ jach bʌ yom lac bajñel pusicꞌal. Pero chaꞌan ti lac ñaꞌtyʌ bajcheꞌ tiqꞌuil ti mandar, lac pusicꞌal tiꞌ más nijcʌbeyonla lac chaꞌlen jini mach bʌ wen. Jini lac simaronlel mi quejel i yʌcꞌonla ti sajtyel.

6 Pero tsaꞌix loqꞌuiyonla tiꞌ wenta jini mandar tsaꞌ bʌ lac yumi. Wale libre añonla. An tsijiꞌ bʌ laj cuxtyʌlel chaꞌan Chꞌujul bʌ i Chꞌujlel Dios chaꞌan mi lac chaꞌliben i troñel Dios. Maꞌan mi lac wersa chaꞌlen bajcheꞌ tsꞌijbubil ti mandar.

7 ¿Chuquiyes i sujmlel jini tsaꞌ bʌ cʌlʌ, cheꞌ jini? ¿Mulil ba jini mandar tyac? Machꞌan. Mi sajlic. Machic an mandar machꞌan ti laj cʌñʌ mulil. Machꞌan ti lac ñaꞌtyʌ mi mulil cheꞌ mi lac mulʌben chʌ bʌ yes an i chaꞌan lac piꞌʌlob machic tiꞌ subu mandar baꞌ mi yʌleꞌ: Mach a mulʌben chʌ bʌ yes an i chaꞌan a piꞌʌlob, cheꞌen.

8 Cheꞌ mi lac cʌn bajcheꞌ tiqꞌuilonla ti mandar, lac pusicꞌal mi utsi quejel i wersa mulan i chaꞌlen jini tiqꞌuil bʌ. Como cheꞌ ñac max tyo ti laj cʌñʌ bajcheꞌ miꞌ ticꞌonla machꞌan tsiquil mulil yubil como machꞌan ti lac ñaꞌtyʌ mi chʌncol lac chaꞌlen tiqꞌuil bʌ.

9 Cheꞌ max tyo ubibil lac chaꞌan mandar, weñʌch añonla ti la cubi. Pero cheꞌ ñac ti la cubi mandar, ti lac ñaꞌtyʌ chaꞌan anix lac mul. Ti queji lac ñaꞌtyan chaꞌan wersa mi lac xotꞌ lac mul.

10 Ti ujti, cheꞌ jini, chaꞌan jini mandar tsaꞌ bʌ aqꞌuentiyonla chaꞌan i yʌqꞌueñonla tsijiꞌ bʌ laj cuxtyʌlel mi tsꞌʌcʌl mi lac chꞌujbiben, cheꞌ jach ti yʌqꞌueyonla lac xotꞌ lac mul como machꞌan tsꞌʌcʌl ti lac chꞌujbibe.

11 Como ti yʌqꞌueyonla lac lotin lac bʌ. Ti lac lolon ñaꞌtyʌ chaꞌan chꞌujbi lac luꞌ jaqꞌueꞌ bajcheꞌ mi yʌl mandar. Ti jini jach bʌ mandar miꞌ tsictisʌbeñonla chaꞌan mi yʌcꞌonla ti xotꞌmulil ti caj lac mul.

12 Jin chaꞌan, chꞌujul jini mandar como tyʌlem baꞌan Dios. Lajal chꞌujul jeꞌel jujumpꞌej i ticꞌoñel am bʌ ti mandar. Tyojʌch. Weñʌch.

13 ¿Pero chꞌujbi ba i yʌcꞌonla ti xotꞌmulil jini wen bʌ mandar? Machꞌan. Mi sajlic. Jiñʌch mulil muꞌ bʌ i yʌcꞌonla ti xotꞌmulil chaꞌan tsictiyic mulilʌch. Ti cꞌʌjni jini wen bʌ mandar chaꞌan miꞌ tsictisan ñoj bibajax jini lac mul.

14 Como la cujil tyʌlem jini mandar ti Chꞌujul bʌ i Chꞌujlel Dios. Pero joñon quixtyañujon jach. Chuculon tiꞌ pꞌʌtyʌlel mulil.

15 Machꞌan mic chꞌʌmben isujm chʌ bʌ och chʌꞌʌch mi yujtyel, pero machꞌan mic chaꞌlen jini wen bʌ com bʌ c chaꞌlen. Pero jini muꞌ bʌ c tsꞌaꞌqꞌuel, jiñʌch muꞌ bʌ c yoque chaꞌlen.

16 Cheꞌ jini, cheꞌ mic chaꞌlen jini machꞌʌ wen bʌ mach bʌ c com chaꞌlen, chʌncol cʌcꞌ c tꞌan chaꞌan weñʌch jini mandar.

17 Jin chaꞌan mach joñonic chʌncol bʌ c chaꞌlen jini muꞌ bʌ c tsꞌaꞌqꞌuel, pero jiñʌch mulil am bʌ tic pusicꞌal mi yʌqꞌueñon c chaꞌlen jini machꞌʌ wen bʌ mach bʌ com chaꞌlen.

18 Como cujil isujm machꞌan chʌ bʌ wen ti bajñel bʌ c pusicꞌal. Como com c chaꞌlen chʌ bʌ wen, pero mach chꞌujbi c chaꞌlen.

19 Machꞌan mic chaꞌlen jini wem bʌ com bʌ c chaꞌlen, pero jini machꞌʌ wen mach bʌ com c chaꞌlen, jiñʌch muꞌ bʌ c bej chaꞌlen.

20 Jin chaꞌan cheꞌ mic bej chaꞌlen jini mach bʌ com c chaꞌlen, mach joñonic chʌncol c chaꞌlen, pero jiñʌch mulil am bʌ tic pusicꞌal mi yʌqꞌueñon c chaꞌlen.

21 Jiñʌch bajcheꞌ mi yujtyel tic pusicꞌal mi cubin: Jini mulil am bʌ tic pusicꞌal miꞌ nijcʌbeñon chaꞌan cheꞌ com c chaꞌlen wen bʌ, jini jach miꞌ wersa aqꞌueñon c chaꞌlen machꞌʌ wen.

22 Tic pusicꞌal mic wen mulan i mandar Dios. Ñoj weñʌch jini mandar mi cubin.

23 Pero mic ñaꞌtyan an chʌ bʌ an ti bajñel c pusicꞌal muꞌ bʌ i yʌqꞌueñon j contrajin c bʌ. Jiñʌch jini mulil am bʌ tic pusicꞌal tsaꞌ bʌ i wersa chucuyon tiꞌ pꞌʌtyʌlel yubil.

24 Pero ñoj pꞌumpꞌuñon, cheꞌ jini. ¿Majchqui mejl i ticꞌbeñon bajñel c pusicꞌal chaꞌan maꞌan mi yʌcꞌon ti xotꞌmulil?

25 Jin jach Dios chꞌujbi i ticꞌbeñon bajñel yom bʌ c pusicꞌal chaꞌan ti lac Yum Jesucristo. Wocox i yʌlʌ Dios. Cheꞌ jini cujil isujm yom mic chꞌujbin c xicꞌol ti Dios. Pero bajñel yom bʌ c pusicꞌal miꞌ jopꞌ i xicꞌon c chaꞌlen mulil.