2 An i pꞌʌtyʌlel Chꞌujul bʌ i Chꞌujlel Dios chaꞌan i yʌqꞌueñonla tsijib bʌ laj cuxtyʌlel. Chaꞌan añonla ti Cristo Jesús tiꞌ coloyonla ti i pꞌʌtyʌlel mulil muꞌ bʌ i yʌcꞌonla ti sajtyel.

3 Como mach chꞌujbi i cotyañonla i mandar Moisés como chaꞌan ti caj i tsuculel lac pusicꞌal mach saj chꞌujbi lac luꞌ jacꞌben jini muꞌ bʌ i xicꞌonla lac chaꞌlen. Pero Dios chꞌujbi i cotyañonla. Tiꞌ choco tyʌlel i Yalobil tsaꞌ bʌ i chꞌʌmʌ i bʌcꞌtyal cheꞌ bajcheꞌ quixtyañu jach chaꞌan i yacꞌ i bʌ i xotꞌbeñonla lac mul. Aunque tiꞌ chꞌʌmʌ i bʌcꞌtyal cheꞌ bajcheꞌ quixtyañu jach pero machꞌan tiꞌ chaꞌle mulil. Dios ti yʌcꞌʌ ti sajtyel cheꞌ bajcheꞌ tsʌnsʌbil bʌ i majtyan chaꞌan i xotꞌbeñonla lac mul. Chʌꞌʌch ti xojtꞌi mulil cheꞌ bajcheꞌ jini cheꞌ ñac ti poj ajni cheꞌ bajcheꞌ quixtyañu jach jini Jesús.

4 Chʌꞌʌch tiꞌ chaꞌle Dios chaꞌan i yʌqꞌueñonla lac chaꞌlen tyoj bʌ bajche tiꞌ xiqꞌuiyonla ti mandar. Como wale maꞌix mi la cajñel bajcheꞌ bajñel yom lac pusicꞌal pero mi la cajñel bajcheꞌ yom Chꞌujul bʌ i Chꞌujlel Dios am bʌ ti lac pusicꞌal.

5 Como jini muꞌ bʌ i bajñel pensalin bajcheꞌ bajñel yom i pusicꞌal, jin jach miꞌ pensalin jini mach bʌ wen i chaꞌan bʌ mulawil. Pero jini muꞌ bʌ i pensalin bajcheꞌ yom Chꞌujul bʌ i Chꞌujlel Dios miꞌ pensalin bajcheꞌ yom Dios.

6 Jini muꞌ bʌ i beleꞌ pensalin jini mach bʌ wen i chaꞌan jach bʌ mulawil mi quejel i yʌqꞌuentyel i xotꞌ i mul. Jini muꞌ bʌ i beleꞌ pensalin chʌ bʌ yom Chꞌujul bʌ i Chꞌujlel Dios mi quejel i yʌqꞌuentyel i cuxtyʌlel machꞌʌ yujil jilel yicꞌot i ñʌchꞌtyʌlel i pusicꞌal.

7 Jini muꞌ bʌ i beleꞌ pensalin mach bʌ wen i chaꞌan jach bʌ mulawil miꞌ contrajin Dios. Como mach yom i jacꞌben bajcheꞌ xiqꞌuil ti i mandar Dios, mach chꞌujbi i jaqꞌueꞌ jeꞌel.

8 Jin chaꞌan, jini muꞌ bʌ i chaꞌlen bajcheꞌ bajñel yom i pusicꞌal mach chꞌujbi i chaꞌlen jini muꞌ bʌ i mulan Dios.

9 Pero jatyetla machꞌan mi laꞌ wajñel bajcheꞌ yom laꞌ pusicꞌal. Mi laꞌ wajñel bajcheꞌ yom Chꞌujul bʌ i Chꞌujlel Dios yaꞌ bʌ an laꞌ wicꞌot. Jini machꞌʌ baꞌan Chꞌujul bʌ Chꞌujlel Cristo yicꞌot, mach i chaꞌanic Cristo.

10 Pero mi an Cristo ti laꞌ pusicꞌal aunque mi sajtyel laꞌ bʌcꞌtyal bajcheꞌ i tyʌlel mi sajtyel chaꞌan ti caj mulil, pero anix i cuxtyʌlel laꞌ chꞌujlel como tsaꞌix i yʌqꞌueyetla tyoj bʌ laꞌ pusicꞌal Dios.

11 Mi an laꞌ wicꞌot Chꞌujul bʌ i Chꞌujlel Dios tsaꞌ bʌ tyeche loqꞌuel Cristo Jesús baꞌan sajtyemoꞌ bʌ, mi quejel i tyejch isañetla loqꞌuel baꞌan sajtyemoꞌ bʌ jeꞌel. Mi quejel i yʌqꞌuen i cuxtyʌlel lac bʌcꞌtyal chaꞌan ti Chꞌujul bʌ i Chꞌujlel am bʌ la quicꞌot.

12 Quermañujob, an ti lac wenta chʌ bʌ mi lac chaꞌlen. Mach lac wenta mi lac wersa ajñel bajcheꞌ miꞌ xicꞌonla lac pusicꞌal.

13 Como mi chʌncol jach laꞌ wajñel bajcheꞌ miꞌ wersa bajñel xiqꞌuetla laꞌ pusicꞌal mi quejel laꞌ wʌqꞌuentyel xotꞌmulil. Pero mi ti lac chaꞌle bajcheꞌ miꞌ xicꞌonla Chꞌujul bʌ i Chꞌujlel Dios, chaꞌan mi laj cʌyeꞌ mulil, cheꞌ jini mi quejel la cajñel ti laj cuxtyʌlel machꞌʌ yujil jilel.

14 Ti pejtyelelob muꞌ bʌ i tyoj isʌntyelob majlel ti Chꞌujul bʌ i Chꞌujlel Dios i yalobilobʌch Dios.

15 Como jini Chꞌujul bʌ i Chꞌujlel Dios tsaꞌ bʌ aqꞌuentiyonla ti Dios, machꞌan mi yʌqꞌueñonla lac chaꞌ bʌcꞌñan xotꞌmulil bajcheꞌ juntiquil ajtroñel miꞌ bʌcꞌñan simaron bʌ i yum. Pero mi yotsañonla ti yalobil Dios. Jini Chꞌujul bʌ i Chꞌujlel Dios mi yʌqꞌueñonla la cʌl: C Tyat, choꞌonla.

16 Chꞌujul bʌ i Chꞌujlel Dios mi yʌqꞌueñonla lac ñaꞌtyan ti lac pusicꞌal jeꞌel chaꞌan i yalobilonla Dios.

17 Chaꞌan i yalobilonla Dios mi quejel la cʌqꞌuentyel ti Dios jini wen bʌ tsaꞌ bʌ i wʌ alʌ. Lajal bajcheꞌ mi yʌqꞌuen Cristo chʌꞌʌch mi quejel i yʌqꞌueñonla jeꞌel. Mi ti lac ñusʌ wocol chaꞌan ti caj mi lac tsʌclen majlel Cristo mi quejel lac motin ochel tiꞌ ñuclel ti panchan la quicꞌot.

18 Cujil isujm chaꞌan mach chꞌujbi lac lajeꞌ jini wocol tyac muꞌ bʌ lac ñusan ti ili bʌ ora yicꞌot i cꞌotyajlel i ñuclel Cristo muꞌ bʌ quejel lac pʌsꞌentyel ti tyal tyo bʌ ora.

19 Ti pejtyelel chʌ bʌ ti mejli ti Dios chʌncol i wen pijtyan jintyo i yorojlel mi tsictisʌntyel majchqui i yalobilob Dios.

20 Como ti pejtyel chʌ bʌ an tyac maꞌan ti tsꞌʌctiyi i cꞌʌjnibal bajcheꞌ yom, mach chaꞌan cheꞌ ti yʌlo yajcʌ, pero chaꞌan chʌꞌʌch yom Dios. Pero tyal i yorojlel mi quejel i tsꞌʌctiyel bajcheꞌ yom, chaꞌan chʌꞌʌch yom Dios.

21 Pero tyal i yorojlel cheꞌ maꞌix mi quejel i sajtyel ti pejtyel chʌ bʌ an, mi jinic muꞌ bʌ i colel, maꞌix miꞌ pʌcꞌmʌl majlel. Chʌꞌʌch mi quejel i yujtyel ti jim bʌ ora cheꞌ Dios mi quejel i yʌqꞌuen i ñuclel i yalobilob.

22 La cujil isujm cꞌʌlʌ ti tyejchibal mulawil cꞌʌlʌ wale iliyi, ti pejtyelel i melbal Dios muꞌ ti ajacniyel. Mi yilan wocol cheꞌ bajcheꞌ juntiquil xꞌixic muꞌ bʌ ti bajqꞌuel.

23 Mach jinic jach pejtyel chʌ bʌ an ti mulawil mi yilan wocol pero ñoj wocol mi la cubin joñonla jeꞌel aunque ti aqꞌuentiyonla jini ñaxan bʌ lac majtyan ti Dios, jiñʌch Chꞌujul bʌ i Chꞌujlel Dios. Chʌncolonla ti pijt jintyo mi tsictiyel chaꞌan i yalobilonla Dios cheꞌ mi quejel la cʌqꞌuentyel tsijiꞌ bʌ lac bʌcꞌtyal.

24 Cheꞌ ñac ti cotyʌntiyonla ti queji lac pijtyan jini muꞌ tyo bʌ quejel la cʌqꞌuentyel. Pero mi chʌncol laj qꞌuel jini tsaꞌ bʌ lac pijtyʌ, mach yoque pijtyayajic, como maꞌix chʌ bʌ och mi lac bej pijtyan como chʌncox laj qꞌueleꞌ.

25 Pero mi chʌncol lac pijtyan jini max tyo bʌ an mi laj qꞌuel, tiꞌ xucꞌtyʌlel lac pusicꞌal yom mi lac wersa bej pijtyan.

26 Cheꞌ jeꞌel, cheꞌ la com lac chaꞌlen oración Chꞌujul bʌ i Chꞌujlel Dios miꞌ cotyañonla cheꞌ machꞌan mi lac ñaꞌtyan bajcheꞌ yom mi lac pejcan Dios. Cheꞌ chʌncol lac pensalin Dios ti oración pero maꞌix mi loqꞌuel tꞌan ti lac tiꞌ, jini Chꞌujul bʌ i Chꞌujlel Dios miꞌ pejcʌbeñonla Dios ti oración ti tꞌan mach bʌ mejl la cʌl bajcheꞌ com lac pejcan ti oración.

27 Dios muꞌ bʌ i cʌmben i pusicꞌal quixtyañujob yujil chʌ bʌ chʌncol i cꞌajtin Chꞌujul bʌ i Chꞌujlel como Chꞌujul bʌ i Chꞌujlel Dios miꞌ cꞌajtiben Dios chaꞌan i cotyan i chaꞌañoꞌ bʌ bajcheꞌ yom i pusicꞌal Dios.

28 La cujil ti pejtyelel chʌ bʌ jach mi yujtyel, Dios miꞌ cꞌʌñeꞌ chaꞌan i wenlel jini muꞌ bʌ i pꞌuntyañob Dios tsaꞌ bʌ pʌjyi bajcheꞌ tiꞌ wʌ ñaꞌtyʌ Dios i chaꞌlen ti ñoj oniyix.

29 Como cheꞌ ñac max tyo tiꞌ mele mulawil Dios tiꞌ wʌ ñaꞌtyʌ majchqui mi quejel i yochel ti i yalobilob. Tiꞌ wʌ yajcʌ chaꞌan i yajñel bajcheꞌ i yalobil. I Yalobil Dios ti ochi ti ascuñʌl yubil. Cheꞌ jini tiꞌ tyaja cabʌl i yijtsꞌiñob yubil.

30 Dios tiꞌ pʌyʌ chaꞌan mi yochel ti i chaꞌan jini tsaꞌ bʌ i wʌ yajcʌ. Tiꞌ qꞌuele ti tyoj jini pʌyʌbiloꞌ bʌ i chaꞌan. Tyal i yorojlel jini tsaꞌ bʌ qꞌuejli ti tyoj mi quejel i yʌqꞌuentyelob i ñuclel bajcheꞌ i Yalobil Dios.

31 ¿Chuqui yom mi la cʌl, cheꞌ jini? Cheꞌ Diosʌch am bʌ la quicꞌot chaꞌan i cotyañonla, ¿majchqui chꞌujbi i yʌsiñonla cheꞌ jini? Maꞌan majch.

32 Dios machꞌan tiꞌ cotyʌ chaꞌan machꞌan mi sajtyel i Yalobil, pero ti yʌcꞌʌ ti tsʌnsʌntyel chaꞌan ti lac pejtyelel. Mi ti yʌqꞌueyonla i Yalobil, ¿mach ba muqꞌuic i yʌqꞌueñonla ti pejtyel chʌ bʌ tyac yom? Mucꞌʌch.

33 ¿Majchqui chꞌujbi i jopꞌben i mul jini yajcʌbiloꞌ bʌ i chaꞌan yaꞌ ti tyojlel Dios? Maꞌan majch. Como jiñʌch Dios muꞌ bʌ i qꞌuelob ti tyoj.

34 ¿Majchqui chꞌujbi i yʌl chaꞌan wersa mi la xotꞌ lac mul? Maꞌan majch. Cristo ti sajti chaꞌan i xotꞌbeñonla lac mul. Ti tyejchi loqꞌuel baꞌan sajtyemoꞌ bʌ. Wale yaꞌan tiꞌ ñoj Dios baꞌ miꞌ pejcʌbeñonla Dios.

35 ¿Am ba chʌ bʌ chꞌujbi i quipañonla loqꞌuel baꞌan Cristo chaꞌan i cʌy i pꞌuntyañonla? Machꞌan. ¿Ixcu mi an ba lac wocol, mi pensal, mi tyʌcꞌlʌntyel, mi wiꞌñal, mi maꞌix lac pislel, mi an bʌbʌqꞌuen bʌ, mi bʌqꞌuentic mi lac tsʌnsʌntyel? Machꞌan chʌ bʌ mi yʌqꞌuen Dios i cʌy i pꞌuntyañonla.

36 Como ti Tsꞌijbubil bʌ i Tꞌan Dios mi yʌleꞌ:

37 Pero aunque an cabʌl lac wocol mi lac wen ganarin ti Cristo muꞌ bʌ i pꞌuntyañonla.

38-39 Jin chaꞌan chꞌujbi lac junyajlel ñaꞌtyan chaꞌan machꞌan sajlic chʌ bʌ chꞌujbi i quipañonla loqꞌuel baꞌan Dios chaꞌan i cʌy i pꞌuntyañonla. Mi ti tsʌnsʌntiyonla, mi cuxulon tyo la miꞌ pꞌuntyañonla. Mi ajtroñelobic i chaꞌan Dios chꞌoyolob ti panchan chꞌujbi i yʌqꞌuen i cʌy Dios i pꞌuntyañonla. Mi xibajic, mi yajtroñelobic i chaꞌan xiba, mi chʌ bʌ tyaquic an wale, mi jinic tyo muꞌ bʌ yujtyel ti tyal tyo bʌ ora, mi chʌ bʌ tyaquic jach an ti panchan mi an ti mulawil, machꞌan sajlic i melbal bʌ Dios chꞌujbi bʌ i quipañonla loqꞌuel baꞌan Dios tsaꞌ bʌ i pʌsꞌeyonla ti lac Yum Jesucristo bajcheꞌ cꞌamel miꞌ pꞌuntyañonla.