2 Ñoj chꞌʌjyem c pusicꞌal. Cꞌux mi cubin tic pusicꞌal ti pejtyel ora como mach yom i chꞌujbin Cristo jini c piꞌʌlob israelob.

3 Muqꞌuic i cotyʌntyel c piꞌʌlob israelob mi ti cʌcꞌʌ c bʌ ti xotꞌmulil, mi chꞌujbiyic c chojquel tiꞌ tyojlel Cristo chʌꞌʌch mic chaꞌlen como wersa com mi cotyʌntyelob como jiñʌch yoque c piꞌʌlob yubil como junlajal lojon c yum ti ñoj oniyix.

4 I jiñʌjlelob Israel. Dios tiꞌ pʌyʌyob chaꞌan mi yotsañob ti yalobilob. Ti tsictiyi i cꞌotyajlel i ñuclel Dios ti i tyojlelob. Ti yʌqꞌueyob trato bʌ tꞌan yicꞌot i mandar Moisés. Ti cʌntisʌntiyob bajcheꞌ yom i chꞌujutisañob Dios. Tiꞌ wʌ subeyob chaꞌan muꞌ bʌ i yʌqꞌueñob ti tyal tyo bʌ ora jini wʌ albil bʌ i chaꞌan Dios.

5 Israelob i jiñʌjlel cojax tyo bʌ lojon c yum Abraham. Cheꞌ ñac tiꞌ chꞌʌmʌ i bʌcꞌtyal Cristo, loqꞌuem jeꞌel baꞌan israelob. Diosʌch Cristo. An tiꞌ wenta ti pejtyelel chʌ bʌ tyac jach an. Laꞌ sujbic i ñuclel ti beleꞌ ora. Amén.

6 Mach chꞌujbi la cʌl chaꞌan maꞌix ti tsꞌʌctiyi jini wʌ albil bʌ tꞌan tsaꞌ bʌ yʌqꞌueyob israelob Dios. Pero mach luꞌ i chaꞌañob Dios ti pejtyelelob i jiñʌjlelob Israel.

7 Mach ti pejtyelel i jiñʌjlelob Abraham mi quejel i yajñel cheꞌ bajcheꞌ yoque i jiñʌjlelob. Pero Dios tiꞌ wʌ sube: I yalobilob Isaac mi quejel i yochelob ti yoque a jiñʌjlelob. Cheꞌ ti subenti Abraham.

8 Jini mi yʌqꞌueñonla lac ñaꞌtyan chaꞌan maꞌan mi yajñel ti i yalobil Dios chaꞌan jach yajcʌbil ti Dios Abraham i yumob ti ñoj oniyix. Pero jini jach mi yajñel ti yalobilob Dios jini muꞌ bʌ i chꞌujbiñob chaꞌan melelʌch jini wʌ albil bʌ tꞌan tsaꞌ bʌ i sube Abraham Dios.

9 Jiñʌch jini wʌ albil bʌ tꞌan tsaꞌ bʌ i sube Abraham Dios. Ti yʌlʌ: Ti wʌ ñaꞌtyʌbil bʌ ora mi quejel c pʌs c pꞌʌtyʌlel. Mi quejel i chꞌoc an aloꞌ bʌ i yalobil Sara. Cheꞌ ti subenti Abraham.

10 Mach jinic jach jini pero an yambʌ tsaꞌ bʌ ujti jeꞌel. Ti ñumi ora. I yalobil Sara, lac yum bʌ ti ñoj oniyix Isaac bʌ i cꞌabaꞌ ti coli. Tiꞌ pʌyʌ yijñam Rebeca bʌ i cꞌabaꞌ. Tiꞌ chꞌocʌ lut bʌ i yalobil.

11-13 Pero cheꞌ ñac max tyo chꞌocayob, cheꞌ max tyo tiꞌ chaꞌleyob mi chʌ bʌ wen mi chʌ bʌ machꞌʌ wen, Dios tiꞌ wʌ sube Rebeca: Jini ascuñʌl bʌ mi quejel i chaꞌliben i toñel jini ijtsꞌiñʌl bʌ, cheꞌen. Jini miꞌ loqꞌuel bajcheꞌ an ti Tsꞌijbubil bʌ i Tꞌan Dios baꞌ Dios ti wʌ alʌ: Mic pꞌuntyan Jacob pero Esaú maꞌix mic ñoj pꞌuntyan, cheꞌen. Chʌꞌʌch tsꞌijbubil. Chaꞌan chʌꞌʌch an tiꞌ tꞌan Dios, tsiquilʌch, cheꞌ jini, chaꞌan Dios chaꞌan jach ti wʌ ñaꞌtyʌ chʌꞌʌch yom i chaꞌlen, miꞌ yajcan baꞌ bʌ yom i pʌyeꞌ chaꞌan mi yochel ti i chaꞌan bʌ. Machꞌan mi yajcʌntyel chaꞌan ti caj bajcheꞌ miꞌ chaꞌlen pero chaꞌan chʌꞌʌch yom i pusicꞌal Dios.

14 ¿Chʌ bʌ yom mi la cʌl cheꞌ jini? ¿Muꞌ ba la cʌleꞌ chaꞌan machꞌan tyoj Dios cheꞌ miꞌ pꞌuntyan juntiquil, pero maꞌan miꞌ ñoj pꞌuntyan yambʌ? Mach cheꞌ yom mi la cʌleꞌ.

15 Como Dios tiꞌ sube Moisés: Mi quej c pꞌuntyan jini com bʌ c pꞌuntyan. Mi quej c pʌsꞌen i yutslel c pusicꞌal jini com bʌ c pʌsꞌen, cheꞌen.

16 Tsiquil, cheꞌ jini, mi pꞌuntyʌntyel quixtyañu mach chaꞌan cheꞌ yom i pusicꞌal quixtyañu, mi chaꞌanic chʌncol i wersa sajcan i pꞌuntyʌntyel. Mi pꞌuntyʌntyel chaꞌan jach Dios ti wʌ yajcʌ majchqui yom i pꞌuntyan.

17 Ti Tsꞌijbubil bʌ i Tꞌan Dios mi yʌl chaꞌan Dios tiꞌ sube jini ñuc bʌ yumʌl yaꞌ ti pañimil Egipto bʌ i cꞌabaꞌ. Ti yʌlʌ: Tic waꞌchocoyet ti ñuc bʌ yumʌl chaꞌan jach mic pʌs c pꞌʌtyʌlel ti a tyojlel, chaꞌan mi pujquel majlel j cꞌabaꞌ ti pejtyelel mulawil. Cheꞌ ti yʌlʌ Dios.

18 Tsiquil, cheꞌ jini, Dios miꞌ pꞌuntyan majchqui jach yom i pꞌuntyan, yicꞌot mi yʌqꞌuen i tsʌts an i pusicꞌal majchqui jach yom i tsʌts an.

19 Pero mi chʌꞌʌch an bajcheꞌ jini, mi quejel a cꞌajtibeyon: ¿Chucoch miꞌ beleꞌ al Dios añʌch i mul quixtyañu, cheꞌ jini? ¿Majchqui chꞌujbi i contrajin chʌ bʌ yom Dios? cheꞌetla mi quejel laꞌ cꞌajtibeñon.

20 Pero jatyetla, quixtyañujet jach la. ¿Majchetqui cheꞌ jini chaꞌan maꞌ letsan a tꞌan tiꞌ contra Dios? Ixcu jini pꞌejt, ¿yom ba i suben xmel pꞌejt: ¿Chucoch chʌꞌʌch ti a meleyon? cheꞌen.

21 Pero jini xmel pꞌejt chꞌujbiyʌch i cꞌʌn jini ocꞌol chʌꞌʌch bajcheꞌ yom. Ti juncꞌojl ocꞌol miꞌ mel chaꞌpꞌej pꞌejt, jumpꞌej muꞌ bʌ i cꞌʌjñel ti ñuc bʌ i cꞌʌjnibal, yambʌ muꞌ bʌ i cꞌʌjñel chaꞌan machꞌʌ ñoj an i cꞌʌjnibal.

22 ¿Chuqui, cheꞌ jini? Dios, aunque yom i pʌs i michꞌlel yicꞌot i pꞌʌtyʌlel, jal tiꞌ cuchbeyob i mul quixtyañujob tsaꞌ bʌ tyejchbeyob i michꞌlel. Cꞌʌjnibal jach ili quixtyañujob chaꞌan mi jisʌntyel.

23 Wen jal tiꞌ cuchbon lac mul chaꞌan yom i yʌcꞌ ti tsictiyel i cꞌotyajlel i ñuclel chaꞌañonla pꞌuntyʌbilon bʌ la i chaꞌan, como ti wʌ yajcʌyonla chaꞌan mi yʌqꞌueñonla i ñuclel.

24 Joñonla pʌybilonla i chaꞌan Dios. An tsaꞌ bʌ i pʌyʌ loqꞌuel baꞌan israelob. An yambʌ pʌyʌbiloꞌ bʌ loqꞌuel baꞌan mach bʌ israelobic.

25 Cheꞌ bajcheꞌ mi yʌleꞌ tiꞌ tꞌan Dios yaꞌ ti jun Oseas bʌ i cꞌabaꞌ. Mi yʌl:

27 Isaías jeꞌel tiꞌ tyaja ti tꞌan jini israeloꞌ bʌ quixtyañujob. Ti yʌlʌ: Aunque ñoj i yonlelob jini israelob cheꞌ bajcheꞌ an i jiꞌil colem jaꞌ, pero maꞌix ñoj cabʌlob mi quejel i cotyʌntyelob.

28 Como cheꞌ lac Yum mi quejel i yʌcꞌ melojel ti mulawil tsꞌʌcʌl yicꞌot ti ora jach mi quejel i melob quixtyañujob. Cheꞌ ti yʌlʌ Isaías.

29 Yicꞌot an yambʌ tꞌan tsaꞌ bʌ i ñaxan alʌ Isaías cheꞌ tiꞌ tyaja ti tꞌan israelob. Ti yʌlʌ:

30 ¿Chʌ bʌ yom mi la cʌl, cheꞌ jini? Mi la cʌl chaꞌan jini machꞌʌ israeloꞌ bʌ quixtyañujob machꞌʌ baꞌan ti sajcʌyob i tyoj isʌntyel ti Dios, jiñobʌch ti qꞌuejli ti tyoj ti Dios chaꞌan tiꞌ chꞌujbiyob chaꞌan ajcotyaya i chaꞌan Cristo.

31 Pero jini israelob tsaꞌ bʌ lolon jopꞌoyob i tyoj isañob i bʌ yicꞌot Dios chaꞌan i jacꞌbentyel i mandar Moisés chaꞌan i yʌqꞌuentyelob i qꞌuejlel ti tyoj ti Dios, machꞌan tiꞌ qꞌueleyob ti tyoj ti Dios como maꞌan ti mejli i luꞌ jacꞌben ti tsꞌʌcʌl pejtyelel jini mandar tyac.

32 ¿Chucoch machꞌan ti qꞌuejliyob ti tyoj ti Dios? Como tiꞌ jopꞌo i qꞌuejlel ti tyoj chaꞌan miꞌ chaꞌleñob ti pejtyelel bajcheꞌ tsꞌijbubil ti jini mandar tyac, mach chaꞌanic tiꞌ chꞌujbiyob Cristo tiꞌ pusicꞌal. Tiꞌ jatsꞌʌyob i yoc ti tyun yubil. Como Cristo cheꞌ bajcheꞌ tyun yaꞌ ti bij baꞌ mi ñumel quixtyañu.

33 Jiñʌch jini tyun muꞌ bʌ i tyajeꞌ ti tꞌan Tsꞌijbubil bʌ i Tꞌan Dios baꞌ Dios ti yʌlʌ: