10
Quermañujob, ti pejtyelel c pusicꞌal wersa com mi cotyʌntyelob c piꞌʌlob israeloꞌ bʌ. Mij cꞌajtiben Dios ti oración chaꞌan mi cotyʌntyelob.2 Cujil isujm miꞌ chꞌujutisañob Dios ti jumpꞌej i pusicꞌal pero machꞌan miꞌ chꞌʌmꞌeñob isujm bajcheꞌ Dios yom i cotyan quixtyañujob.
3 Machꞌan miꞌ ñaꞌtyañob bajcheꞌ Dios mi yʌqꞌuen quixtyañujob tyoj bʌ i pusicꞌal. Miꞌ bajñel jopꞌ i tyoj isan i bʌ chaꞌan qꞌuejlic ti tyoj ti Dios. Maꞌan mi yʌcꞌob i bʌ ti Dios chaꞌan mi qꞌuejlel ti tyoj.
4 Como ti Cristo ti tsꞌʌctiyi i cꞌʌjnibal i mandar Moisés. Jin chaꞌan miꞌ qꞌuel ti tyoj ti pejtyelelob muꞌ bʌ i chꞌujbiñob Cristo tiꞌ pusicꞌal.
5 Ti Tsꞌijbubil bʌ i Tꞌan Dios, Moisés tiꞌ tyaja ti tꞌan jini quixtyañujob muꞌ bʌ i bajñel jopꞌ i tyoj isan i bʌ chaꞌan mi qꞌuejlel ti tyoj ti Dios chaꞌan i chꞌujbintyel mandar tyac. Ti yʌlʌ: Jini muꞌ bʌ i junyajlel jacꞌben ti tsꞌʌcal jini mandar tyac cꞌajacña i yoj mi yajñel wʌꞌ ti mulawil yicꞌot mi quejel i yʌqꞌuentyel tsijiꞌ bʌ i cuxtyʌlel machꞌʌ yujil jilel.
6 An tꞌan tiꞌ tꞌan Dios jeꞌel chaꞌan jini muꞌ bʌ i qꞌuejlel ti tyoj ti Dios chaꞌan miꞌ chꞌujbiñob Cristo tiꞌ pusicꞌal. Mi yʌl: Mach yom a wʌleꞌ ti a pusicꞌal, ¿majchqui mi quejel i letsel majlel ti panchan? cheꞌetla, chaꞌan mi pʌyeꞌ jubel Cristo i cotyañonla.
7 Yicꞌot mach yom a wʌleꞌ, ¿majchqui mi quejel i jubel majlel baꞌan sajtyemoꞌ bʌ? cheꞌetla, chaꞌan miꞌ pʌy letsel Cristo.
8 ¿Chʌ bʌ yom i yʌleꞌ ili tꞌan? Mi yʌleꞌ: Yaꞌan lʌcꞌʌl baꞌañet i tꞌan Dios. An ti laꞌ tiꞌ chaꞌan mi laꞌ sub. An ti laꞌ pusicꞌal chaꞌan mi laꞌ chꞌʌmben isujm. Cheꞌ mi yʌleꞌ. Jiñʌch jini tꞌan muꞌ bʌ lac sub majlel chaꞌan an laj cotyʌntyel cheꞌ mi lac chꞌujbin Cristo ti lac pusicꞌal.
9 Mi ti a subu ti a tiꞌ mi a yumʌch Jesús, mi ti a chꞌujbi ti a pusicꞌal chaꞌan tsaꞌix i tyeche loqꞌuel Dios baꞌan sajtyemoꞌ bʌ, mi quejel a cotyʌntyel.
10 Como cheꞌ mi lac chꞌujbin Jesucristo ti lac pusicꞌal mi laj qꞌuejlel ti tyoj ti Dios. Cheꞌ mi lac sub tiꞌ tyojlel quixtyañujob chaꞌan tsaꞌix lac chꞌujbi cheꞌ jini mi laj cotyʌntyel.
11 Mi yʌleꞌ ti Tsꞌijbubil bʌ i Tꞌan Dios: Machꞌan majch muꞌ bʌ i chꞌujbin Jesucristo muꞌ bʌ quejel i yʌleꞌ chaꞌan maꞌix wen chaꞌan tiꞌ chꞌujbi. Cheꞌ tsꞌijbubil.
12 Como Dios junlajal miꞌ qꞌuel quixtyañu mi israelob mi mach bʌ israelobic. Juntiquil jach lac Yum, jiñʌch i Yum ti pejtyelelob. Mi wen yʌqꞌueñob i yutslel i pusicꞌal ti pejtyelelob muꞌ bʌ i cꞌajtin i cotyʌntyel.
13 Como mi yʌleꞌ ti Tsꞌijbubil bʌ i Tꞌan Dios: Majchical jach miꞌ pejcan lac Yum chaꞌan i cꞌajtin i cotyʌntyel mi quejel i cotyʌntyel. Chʌꞌʌch tsꞌijbubil.
14 ¿Pero bajcheꞌ chꞌujbi i pejcañob lac Yum chaꞌan i cꞌajtin i cotyʌntyel mi machꞌan tiꞌ chꞌujbiyob chaꞌan ajcotyayajʌch i chaꞌan? ¿Bajcheꞌ chꞌujbi i chꞌujbiñob lac Yum mi machꞌan baꞌ bʌ ora ti yubibeyob i tꞌan? ¿Bajcheꞌ chꞌujbi i yubiñob i tꞌan Dios mi machꞌan majch miꞌ subeñob?
15 ¿Bajcheꞌ chꞌujbi i sujbel majlel i tꞌan Dios mi machꞌan majch miꞌ chocob majlel ti subtꞌan? Mi yʌleꞌ ti Tsꞌijbubil bʌ i Tꞌan Dios: Ñoj cotyajax jini muꞌ i tyʌlelob i sub jini tꞌan chaꞌan bajcheꞌ mi lac tyaj i ñʌchꞌtyʌlel lac pusicꞌal. Jiñʌch jini wen tꞌan chaꞌan laj cotyʌntyel. Cheꞌ mi yʌleꞌ ti Tsꞌijbubil bʌ i Tꞌan Dios.
16 Pero mach ti pejtyelel miꞌ chꞌujbiñob chaꞌan ñoj melel jini wen tꞌan chaꞌan laj cotyʌntyel. Cheꞌʌch bajcheꞌ ti yʌlʌ Isaías jeꞌel. C Yum, machꞌan cabʌlob miꞌ chꞌujbiñob chaꞌan ñoj melel jini tꞌan muꞌ bʌ lojon c subeñob. Cheꞌ ti yʌlʌ Isaías.
17 Pero jini tsaꞌ bʌ chꞌujbiyob tiꞌ chꞌujbiyob chaꞌan ti yubiyob jini tꞌan. Jini tꞌan tsaꞌ bʌ yubiyob jiñʌch tꞌan chaꞌan Cristo.
18 Cheꞌ jini mij cꞌajtibeñetla, ixcu jini machꞌʌ baꞌan tiꞌ chꞌujbiyob, ¿machꞌa baꞌan ti yubiyob jini tꞌan? Tsaꞌix i yubiyob. Como ti Tsꞌijbubil bʌ i Tꞌan Dios mi yʌleꞌ:
Tsaꞌix pujqui majlel jini tꞌan ti pejtyelel mulawil.
Tsaꞌix cꞌoti tꞌan cꞌʌlʌ ti junwejl mulawil.
Cheꞌ tsꞌijbubil.
19 Cheꞌ jini an chʌ bʌ yambʌ mij cꞌajtibeñetla. ¿Machꞌa baꞌan tiꞌ chꞌʌmbeyob isujm jini israelob chaꞌan jini tꞌan tsaꞌ bʌ subentiyob? Tsaꞌix i chꞌʌmbeyob isujm, yubil. Como cheꞌ ñac max tyo tiꞌ chaꞌle tꞌan Isaías, ñaxan Dios tiꞌ cʌmbe i tiꞌ Moisés i yʌleꞌ:
Mi quej j cꞌʌñeꞌ machꞌʌ israelobic bʌ quixtyañujob chaꞌan i yʌqꞌueñetla laꞌ michꞌqꞌuelob chaꞌan ti caj miꞌ tyajob i wenlel.
Mi quej j cꞌʌñob jini machꞌʌ baꞌan i ñaꞌtyʌbal chaꞌan i tyejchbeñetla laꞌ michꞌlel chaꞌan ti caj ti aqꞌuentiyob i wenlel ti Dios.
Cheꞌ ti yʌlʌ Moisés.
20 Ti wiꞌil Isaías tiꞌ chaꞌle chꞌejl bʌ tꞌan tsaꞌ bʌ subenti ti Dios. Ti yʌlʌ:
Jini machꞌʌ baꞌan tiꞌ sajcʌyon tiꞌ tyajayoñob.
Tic tsictisʌbe c bʌ ti jini machꞌʌ baꞌan tiꞌ cꞌajtibeyon majchonqui.
Cheꞌ ti yʌlʌ Dios ti tiꞌ Isaías.
21 Cheꞌ tiꞌ tyaja tiꞌ tꞌan israelob, Dios tiꞌ cꞌʌmbe i tiꞌ Isaías i yʌleꞌ: Ti pejtyelel qꞌuin chʌncol c pʌyeꞌ quixtyañujob mach bʌ yomob i chꞌujbiñoñob chaꞌan mi yʌqꞌueñoñob i bʌ. Miꞌ contrajiñob c tꞌan. Cheꞌ ti yʌlʌ Dios, cheꞌen Isaías.