2 Cꞌʌlʌ ñoj oniyix Dios ti wʌ yajcʌ jini israelob chaꞌan i chaꞌañoꞌ bʌ. Maꞌan ti junyajlel cʌjyiyob. ¿Cꞌajal ba laꞌ chaꞌan bajcheꞌ an ti Tsꞌijbubil bʌ i Tꞌan Dios? Cheꞌ muꞌ ti oración, Elías tiꞌ subu Dios i mul israelob. Ti yʌlʌ:

3 C Yum, tsaꞌix i tsʌnsʌyob tsaꞌ bʌ a xiqꞌue i yʌleꞌ a tꞌan. Tsaꞌix i jemeyob jini yajnib tyac baꞌ maꞌ wʌqꞌuentyel a majtyan. C bajñel ti cʌyleyon. Yom i tsʌnsañoñob jeꞌel. Cheꞌ ti yʌlʌ Elías.

4 Pero Dios tiꞌ jacꞌʌ: Mach a bajñel ti cʌyleyet. Tsaꞌix j cʌñʌtyʌyob siete mil winicob machꞌʌ baꞌan tiꞌ ñoc chocoyob i bʌ i chꞌujutisañob jini dios tyeꞌ Baal bʌ i cꞌabaꞌ. Cheꞌ ti yʌlʌ Dios.

5 Cheꞌ bajcheꞌ wale iliyi jeꞌel machꞌan tiꞌ luꞌ cʌjyiyob ti Dios ti pejtyelel israelob. Pero añob jini tsaꞌ bʌ yajcʌntiyob ti Dios chaꞌan ti yutslel i pusicꞌal.

6 Dios mi yajcan quixtyañujob chaꞌan ti yutsꞌlel i pusicꞌal Dios, mach chaꞌanic wen bʌ i chaꞌlibal quixtyañujob. Mi tsaꞌic i yajcʌyob chaꞌan wen bʌ i chaꞌlibal, mach chaꞌanic i yutslel i pusicꞌal mi yajcʌntyelob, cheꞌ jini.

7 ¿Chʌ bʌ yes i sujmlel jini tsaꞌ bʌ ujti, cheꞌ jini? Jini israelob tiꞌ sʌcleyob bajcheꞌ miꞌ bajñel tyoj isañob i pusicꞌal yicꞌot Dios. An tsaꞌ bʌ qꞌuejliyob ti tyoj ti Dios, pero jini jach jini tsaꞌ bʌ yajcʌntiyob ti Dios. Ti tsʌts isʌnti i pusicꞌal jini yañoꞌ bʌ.

8 Cheꞌ bajcheꞌ mi yʌleꞌ ti Tsꞌijbubil bʌ i Tꞌan Dios: Dios maꞌan ti yʌqꞌueyob i chꞌʌmbeyob isujm. An i wut pero machꞌan miꞌ chꞌʌmbeñob isujm jini muꞌ bʌ i qꞌuelob. An i chiquin pero machꞌan miꞌ ñaꞌtyañob i sujmlel jini muꞌ bʌ yubiñob. Chʌꞌʌch mi yujtyel cꞌʌlʌ wale. Cheꞌ mi yʌleꞌ ti Tsꞌijbubil bʌ i Tꞌan Dios.

9 David ti yʌlʌ jeꞌel:

11 Wale mij cꞌajtibeñetla, ¿tsaꞌ ba i junyajlel cʌjyiyob ti Dios israelob chaꞌan tiꞌ poj jatsꞌʌyob i yoc chaꞌan machꞌan tiꞌ chꞌujbiyob Cristo tiꞌ pusicꞌal? Machꞌan. Pero chaꞌan machꞌan ti jacꞌbeyob Dios jini israelob, tsaꞌix cotyʌntiyob jini mach bʌ israelobic. Jiñʌch chʌ bʌ mi quejel i cꞌʌñeꞌ Dios chaꞌan i yʌqꞌuen israelob i mulan i cotyʌntyel cheꞌ ñac mi yilan cotyʌbilobix jini mach bʌ israelobic.

12 Chaꞌan machꞌan tiꞌ chꞌujbiyob Cristo israelob, ti aqꞌuentiyob i wenlel Dios yambʌ quixtyañujob añoꞌ bʌ ti pejtyelel mulawil. Cheꞌ jini, mi ti caj ti chilbentiyob i chaꞌan bʌ israelob ti aqꞌuenti jini mach bʌ israelobic, ñoj más wen mi quejel i yʌqꞌuentyelob ti pejtyelel añoꞌ bʌ ti mulawil cheꞌ miꞌ chꞌujbiñob Cristo jini israelob jeꞌel.

13 Wale an chʌ bʌ mic subeñetla mach bʌ israeletla. Dios tiꞌ chocoyon majlel ti sub tꞌan yaꞌ baꞌañetla. Mic ñaꞌtyan wen ñuc jini c troñel.

14 Jini com bʌ, jiñʌch chaꞌan c piꞌʌlob jini israelob bʌ mi yilan bajcheꞌ añetla cheꞌ an laꞌ cotyʌntyel ti Dios. Chaꞌan cheꞌ miꞌ qꞌueletla mi quejel i wersa mulan i yajñel bajcheꞌ añetla. Cheꞌ jini chaꞌtiquil, uxtiquil mi cotyʌntyelob jeꞌel.

15 Chaꞌan ti caj tiꞌ cʌjyiyob israelob ti Dios, ti lajmisʌbentiyob i contrajiya tiꞌ tyojlel ti pejtyelelob yañoꞌ bʌ quixtyañujob. ¿Mach ba ñoj cꞌotyajax mi quejel i yujtyel cheꞌ Dios miꞌ qꞌuel ti tyoj jini israelob? Cheꞌ bajcheꞌ mi ti tyejchiyob loqꞌuel baꞌan sajtyemoꞌ bʌ.

16 Jini israelob cheꞌ bajcheꞌ juncꞌojl saꞌ. Mi ti aqꞌuenti Dios jini ñaxan bʌ junqꞌuej waj jiñʌch i señʌjlel chaꞌan luꞌ i chaꞌañʌch Dios ti pejtyel jini saꞌ yubil. Mi i chaꞌañʌch Dios i wiꞌ tyeꞌ, luꞌ i chaꞌañʌch Dios i cꞌʌb tyac jeꞌel. Mi lac ñaꞌtyan, cheꞌ jini, i chaꞌañʌch Dios Abraham, jini chaꞌan i chaꞌañʌch Dios yañoꞌ bʌ israelob jeꞌel como luꞌ i jiñʌjlel Abraham.

17 Jini israelob tsaꞌ bʌ i cʌyʌyob Dios chʌꞌʌch añob bajcheꞌ i cꞌʌb tyac jini olivo tyeꞌ tsaꞌ bʌ tsejpi loqꞌuel ti i tyeꞌel. Pero jatyetla mach bʌ israeletla lajaletla bajcheꞌ i cꞌʌb tyac olivo tyeꞌ tsaꞌ bʌ bajñel coli ti maꞌtyeꞌel. Ti otsʌntiyetla yaꞌ baꞌ ti tsejpi loqꞌuel jini ñaxan bʌ i cꞌʌb tyac. Cheꞌ jini, mi laꞌ tyaj tsijiꞌ bʌ laꞌ cuxtyʌlel tiꞌ wiꞌ yubil.

18 Pero jatyetla tsaꞌ bʌ otsʌntiyetla ti tyeꞌ yubil, mach yom mi laꞌ lolon sub laꞌ bʌ ti ñuc tiꞌ contra i cꞌʌb tyeꞌ tsaꞌ bʌ tsejpi loqꞌuel. Mi ti a subu a bʌ ti ñuc, yom cꞌajal laꞌ chaꞌan chaꞌan machꞌan chʌncol laꞌ wʌqꞌuen i pꞌʌtyʌlel i wiꞌ jini tyeꞌ pero jini i wiꞌ tyeꞌ mi yʌqꞌueñetla laꞌ pꞌʌtyʌlel.

19 Cꞌoꞌojl mux laꞌ wʌleꞌ: Melel, pero ti tsejpi loqꞌuel lamital i cꞌʌb tyac chaꞌan ti otsʌntiyonla cheꞌetla.

20 Melelʌch. Pero ti tsejpi loqꞌuel yubil chaꞌan machꞌan ti chꞌujbiyob Dios tiꞌ pusicꞌal. Jatyetla ti otsʌntiyetla chaꞌan jach ti laꞌ chꞌujbi Dios. Maꞌ mi laꞌ chan isan laꞌ bʌ cheꞌ jini. Wen qꞌuele laꞌ bʌ.

21 Como mi Dios machꞌan tiꞌ ñusʌbeyob i mul jini israelob jini yoque i cꞌʌb olivo yubil chaꞌan machꞌan tiꞌ chꞌujbiyob Cristo, machꞌan mi quej i ñusʌbeñetla laꞌ mul jeꞌel.

22 Ñaꞌtyanla bajcheꞌ an i yutslel Dios. Pero an i pꞌʌtyʌlel jeꞌel cheꞌ mi yʌqꞌueꞌ xotꞌmulil. Ti pꞌʌtyʌlel i tꞌan ti yʌqꞌue xotꞌmulil israelob tsaꞌ bʌ i ñusʌbeyob i tꞌan. Pero tsaꞌix i pʌsꞌeyetla i yutslel Dios. Pero mi maꞌix mi laꞌ bej ajñel ti i yutslel mi quej laꞌ tsejpel loqꞌuel jeꞌel.

23 Pero jini israelob tsaꞌ bʌ tsejpiyob loqꞌuel chaꞌan machꞌan ti chꞌujbi Dios tiꞌ pusicꞌal, mi ti chaꞌ chꞌujbi mi quej i chaꞌ otsʌntyelob yubil. Como an i pꞌʌtyʌlel Dios chaꞌan i yotsan.

24 Como jatyetla mach bʌ israeletla, tsaꞌix tsejpiyetla loqꞌuel ti juntyejc olivo tyeꞌ tsaꞌ bʌ bajñel coli ti maꞌtyeꞌel. Ti otsʌntiyetla ti jini wen bʌ olivo tyeꞌ yubuil. Mi chꞌujbi laꞌ wotsʌntyel cheꞌ mach yoque i cꞌʌbeticla, jinic tyo israelob más chꞌujbi i chaꞌ otsʌntyelob como jiñʌch yoque i cꞌʌb jini olivo tyeꞌ yubil.

25 Hermañujob, com mi laꞌ ñaꞌtyan jini cʌntisa chaꞌan israelob max tyo bʌ baꞌan tsictiyem ti yambʌ ora. Ame mi laꞌ lolon chan isan laꞌ bʌ ti laꞌ pusicꞌal. Lamitalob israelob tiꞌ tsʌts isʌbentiyob i pusicꞌal pero mach ti junyajlel jach. Jini jach tsʌts mi cʌytyʌl jintyo mi cꞌotyel i yorojlel cheꞌ tsꞌʌcʌl tiꞌ chꞌujbi Dios jini mach bʌ israelob jiñʌch jaytiquil wʌ yajcʌbiloꞌ bʌ mi quejel i chꞌujbiñob.

26 Cheꞌ mi cotyʌntyelob jaytiquilob jini mach bʌ israelob muꞌ bʌ quej i cotyʌntyelob, cheꞌ jini ti jim bʌ ora ti pejtyelel israelob mi quejel i cotyʌntyelob. Como ti Tsꞌijbubil bʌ i Tꞌan Dios mi yʌl:

28 Jini israelob mi contrajintyelob ti Dios chaꞌan tiꞌ ñusʌbeyob i tꞌan chaꞌan laj cotyʌntyel. Pero chaꞌan tiꞌ contrajiyob Dios israelob, ti queji ti sujbel jini wen bʌ tꞌan yaꞌ baꞌañetla mach bʌ israelet bʌ la. Pero aunque chʌꞌʌch tiꞌ chaꞌle Dios, muꞌ tyo i bej pꞌuntyañob israelob como yajcʌbil i chaꞌan Dios jini i yumob ti ñoj oniyix.

29 Dios machꞌan miꞌ qꞌuextyan i pensal chaꞌan chʌ bʌ tyac mi yʌqꞌuen. Machꞌan miꞌ qꞌuextyan i pensal chaꞌan muꞌ bʌ i pʌyeꞌ chaꞌan mi yochel ti i chaꞌan.

30 Ti oniyix jatyetla mach bʌ israelet la ti laꞌ ñusʌbe i tꞌan Dios. Pero wale Dios miꞌ pꞌuntyañetla como jini israelob tiꞌ ñusʌbeyob i tꞌan.

31 Lajal bajcheꞌ jatyetla ti laꞌ ñusʌbe i tꞌan Dios ti ñoj oniyix, chʌꞌʌch chʌncox i ñusʌben i tꞌan Dios israelob jeꞌel. Pero Dios mi quejel i pʌsꞌeñob israelob i pꞌuntyʌntyel chʌꞌʌch bajcheꞌ miꞌ pꞌuntyañetla mach bʌ israelet la.

32 Como Dios mi yʌleꞌ ti xmulilob ti pejtyelel quixtyañu chaꞌan tiꞌ ñusʌbeyob i tꞌan. Pero chaꞌan luꞌ xmulilob, Dios chꞌujbi i luꞌ pʌsꞌeñob i pꞌuntyaya.

33 Maꞌan i pꞌisol jini wen tyac bʌ i chaꞌan Dios yicꞌot i ñaꞌtyʌbal. Mach chꞌujbi laj cʌmben i ñaꞌtyʌbal. Mach chꞌujbi lac saj chꞌʌmben isujm jini muꞌ bʌ i chaꞌlen.

34 Como ¿am ba majch miꞌ chꞌʌmben isujm chʌ bʌ miꞌ ñaꞌtyan lac Yum? ¿Am ba majch tiꞌ cʌntisʌ lac Yum? Machꞌan majch.

35 ¿Am ba majch ti ñaxan aqꞌue i majtyan Dios chaꞌan miꞌ chaꞌ chꞌʌmben i qꞌuexol? Maꞌan majch.

36 Como chꞌoyol ti Dios ti pejtyelel chʌ bʌ an. Luꞌ i melbalʌch. Tiꞌ luꞌ mejli chaꞌan mi tsictiyel i ñuclel. Laꞌ sujbic i ñuclel Dios ti pejtyelel ora. Amén.