2 Mach yom mi laꞌ chaꞌlen machꞌʌ wen bajcheꞌ i tyʌlel miꞌ chaꞌleñob jini añoꞌ bʌ ti mulawil. Pero jini yom bʌ jiñʌch chaꞌan qꞌuextiyic laꞌ pensal chaꞌan miꞌ tsijibtisʌntyel laꞌ pusicꞌal. Cheꞌ jini chꞌujbi laꞌ cʌn chʌ bʌ yom Dios. Mi laꞌ cʌn chʌ bʌ wen tyac, chʌ bʌ miꞌ mulan Dios yicꞌot tsꞌʌcʌl mi laꞌ meleꞌ bajcheꞌ yom Dios.

3 Dios ti yʌqꞌueyon j cꞌʌjnibal ti subtꞌan chaꞌan ti yutslel i pusicꞌal. Jin chaꞌan mic subeñetla ti jujuntiquiletla mach yom mi laꞌ ñaꞌtyan ti laꞌ pusicꞌal más an laꞌ ñuclel bajcheꞌ an laꞌ ñuclel. Pero ti tyoj bʌ laꞌ pensal ti jujuntiquil yom i pensalin chʌ bʌ yes yoque i cꞌʌjnibal tsaꞌ bʌ aqꞌuenti ti Dios chaꞌan tiꞌ chꞌujbi chaꞌan miꞌ chaꞌlen chʌ bʌ yom Dios.

4 Tiꞌ bʌcꞌtyal jujuntiquil an cabʌl chʌ bʌ tyac chucul. Pero mach junchajpic jach i cꞌʌjnibal jini chucbil tyac bʌ.

5 Cheꞌ jeꞌel ochemon bʌ la tiꞌ tꞌan Dios, aunque cabʌlonla, jumpꞌej jach lac bʌcꞌtyal yubil cheꞌ mi la cajñel yicꞌot Cristo. Lac tyem chaꞌañʌch lac bʌ ti jumpꞌej jach bʌcꞌtyalʌl yubil.

6 Dios, ti yutslel i pusicꞌal, ti yʌqꞌueyonla laj cꞌʌjnibal ti jujuntiquilonla jiñʌch bajcheꞌ yom Dios. Mach junlajal ti yʌcꞌonla laj cꞌʌjnibal. Yom mi laj cꞌʌn laj cꞌʌjnibal. Mi an laj cꞌʌjnibal ti subtꞌan, yom mi lac sub ti pꞌisol bajcheꞌ Dios mi yʌqꞌueñonla lac chꞌujbin.

7 Mi ti yʌqꞌueyonla laj cꞌʌjnibal chaꞌan laj cotyan yañoꞌ bʌ, yom mi lac chaꞌlen cotyaj ti jumpꞌej lac pusicꞌal. Mi an laj cꞌʌjnibal lac chaꞌlen cʌntisa yom mi lac chaꞌlen ti wen.

8 Jini yujil i ñuc isʌben i pusicꞌal i piꞌʌl, laꞌ i bej chaꞌlen. Jini muꞌ bʌ i yʌqꞌuen i piꞌʌlob chʌ bʌ an i chaꞌan, yom i yʌqꞌuen ti pejtyel i pusicꞌal. Jini am bʌ i yeꞌtyel chaꞌan i tyojꞌisan ochemoꞌ bʌ tiꞌ tꞌan Dios, yom i wen chaꞌlen ti xucꞌtyʌlel i pusicꞌal. Jini muꞌ bʌ i pꞌuntyan añoꞌ bʌ i wocol chaꞌan i cotyan, yom i chaꞌlen tiꞌ tijicniyel i pusicꞌal.

9 Yom mi laꞌ pꞌuntyan laꞌ bʌ ti pejtyel laꞌ pusicꞌal. Choco loqꞌuel ti laꞌ pusicꞌal ti pejtyel i simaronlel. Bej chaꞌlenla chʌ bʌ tyac wen.

10 Pꞌuntyan laꞌ bʌ ti pejtyel laꞌ pusicꞌal cheꞌ bajcheꞌ laꞌ wijtsꞌin laꞌ bʌ. Yom mi laꞌ más qꞌuel ti ñuc laꞌ piꞌʌlob bajcheꞌ mi laꞌ bajñel qꞌuel laꞌ bʌ.

11 Bej chaꞌlenla wersa. Mach yom tsꞌubetla. Chaꞌlibenla i toñel lac Yum ti pejtyel laꞌ pusicꞌal.

12 Yom tijicñayetla chaꞌan jini chʌncol bʌ laꞌ bej pijtyan ti lac Yum. Yom mi laꞌ cucheꞌ ti wen laꞌ wocol. Mach yom laꞌ saj cʌy laꞌ chaꞌlen oración.

13 Cheꞌ an i wocol ochemoꞌ bʌ tiꞌ tꞌan Dios cotyañob ti chʌ bʌ tyac yom i chaꞌan. Pʌyʌla ochel ti laꞌ wotyot muꞌ bʌ i julaꞌañetla.

14 Aqꞌuenla i yutslel laꞌ tꞌan jini muꞌ bʌ i tyʌcꞌlañetla. Mach yom mi laꞌ chꞌʌqueꞌ. Yom mi laꞌ cꞌajtiben Dios i yutslel i tꞌan tiꞌ tyojlelob.

15 Yom cꞌajacña laꞌ woj yicꞌot cꞌajacñayob bʌ i yoj. Chaꞌlenla uqꞌuel yicꞌot jini mucꞌob bʌ ti uqꞌuel.

16 Ajñenla ti jumpꞌej laꞌ pusicꞌal yicꞌot laꞌ piꞌʌlob. Mach yom mi laꞌ qꞌuel laꞌ bʌ ti ñuc pero lajal ajñenla awicꞌot jini muꞌ bʌ i qꞌuelob i bʌ ti pecꞌ. Mach yom mi laꞌ lolon ñaꞌtyan jatyetla an cabʌl laꞌ bajñel ñaꞌtyʌbal.

17 Mach yom mi laꞌ qꞌuextyan i simaronlel yambʌ quixtyañu. Jopꞌoxla laꞌ chaꞌlen wen bʌ tiꞌ tyojlelob ti pejtyelel quixtyañujob.

18 Chaꞌlenla ti pejtyelel bajcheꞌ chꞌujbi laꞌ chaꞌlen, chaꞌan mi mux i mejlel mi laꞌ wajñel ti ñʌchꞌʌl yicꞌot ti pejtyel quixtyañujob.

19 Pꞌuntyʌbilet bʌ la quermañujob, mach yom mi laꞌ bajñel qꞌuextyʌben i simaronlel yañoꞌ bʌ. Laꞌ ajnic. Dios mi quejel i qꞌuextyʌben. Como mi yʌleꞌ ti Tsꞌijbubil bʌ i Tꞌan Dios: An tic wenta mij qꞌuextyʌben i simaronlel. Joñon mi cʌqꞌuen i xotꞌeꞌ chʌ bʌ tiꞌ chaꞌle ti a contra, cheꞌ mi yʌl lac Yum ti Tsꞌijbubil bʌ i Tꞌan.

20 Mi yʌleꞌ jeꞌel: Cheꞌ mi yubin wiꞌñal a contra, weꞌisan. Mi tyʌquin i tiꞌ, aqꞌuen chʌ bʌ miꞌ jap. Mi chʌꞌʌch mi laꞌ chaꞌlen mi quej i quisnin i bʌ chaꞌan jini tsaꞌ bʌ i chaꞌle ti a contra. Cheꞌ mi yʌleꞌ tiꞌ tꞌan Dios.

21 Cheꞌ an laꞌ contrajintyel, maꞌ mi laꞌ qꞌuextyʌben i simaronlel, pero yom mi laꞌ chaꞌlen uts bʌ ti i tyojlel.