2 Jin chaꞌan, jini muꞌ bʌ i ñusʌbeñob i tꞌan jini añoꞌ bʌ yeꞌtyel chʌncol i ñusʌben jini waꞌchocobil bʌ i chaꞌan Dios. Jini muꞌ bʌ i ñusañob tꞌan añʌch i mul. Mi quej i xotꞌ i mul ti tyojlel am bʌ yeꞌtyel.

3 Como mach waꞌchocobil am bʌ yeꞌtyel chaꞌan i bʌcꞌtisan quixtyañu muꞌ bʌ i chaꞌlen chʌ bʌ wen pero jini jach muꞌ bʌ i chaꞌlen simaronlel. Mi mach a wom a bʌcꞌñan jini am bʌ yeꞌtyel, bej chaꞌlenla wen bʌ. Cheꞌ jini miꞌ qꞌuelet ti wen.

4 Como jini am bʌ yeꞌtyel i winicʌch Dios chaꞌan maꞌ cʌñʌtyʌntyel. Mi chʌncol a chaꞌlen simaronlel, yom mi laꞌ bʌcꞌñan cheꞌ jini, como mach lolomic jach an i yeꞌtyel chaꞌan i yʌqꞌueñet a xoteꞌ jini tsaꞌ bʌ a chaꞌle. Dios miꞌ cꞌʌñeꞌ jini am bʌ yeꞌtyel chaꞌan i yʌqꞌuen i xoteꞌ i mul jini muꞌ bʌ i chaꞌlen simaronlel.

5 Jin chaꞌan yom mi laꞌ chꞌujbiben i tꞌan jini añoꞌ bʌ yeꞌtyel, mach chaꞌan jach mi laꞌ bʌcꞌñan i yʌqꞌueñet a xotꞌ a mul, pero chaꞌan machꞌan mi quej ti tꞌan laꞌ pusicꞌal.

6 Jin chaꞌan yom mi laꞌ wʌcꞌ tyojoñel jeꞌel chaꞌan i cotyʌntyelob jini añoꞌ bʌ yeꞌtyel. Como i winicobʌch Dios chʌncol bʌ i chaꞌlibeñob i yeꞌtyel chaꞌan lac wenlel.

7 Aqꞌueñob ti pejtyelelob jini yom bʌ i yʌqꞌuentyelob. Jini muꞌ bʌ i chꞌʌmeꞌ tyojoñel, aqꞌuenla. Jini muꞌ bʌ i chꞌʌmeꞌ tyojoñel chaꞌan chʌ bʌ an laꞌ chaꞌan, aqꞌuenla jeꞌel. Jini yom bʌ qꞌuejlic ti ñuc qꞌuelela ti ñuc. Jini yom bʌ sujbic ti ñuc, subula i ñuclel.

8 Tyojo laꞌ bet ti pejtyelel bajcheꞌ ti a wʌcꞌʌ a tꞌan. Como chʌꞌʌch an ti a wenta. Como chaꞌan pꞌuntyaya, an ti laꞌ wenta laꞌ bej pꞌuntyan laꞌ bʌ, como jini muꞌ bʌ i pꞌuntyan i piꞌʌlob tsꞌʌcʌl miꞌ chꞌujbiben bajcheꞌ mi xijqꞌuelob ti mandar.

9 Mi yʌleꞌ ti mandar tyac: Mach a pejcan yambʌ winic yambʌ xꞌixic. Mach a chaꞌlen tsʌnsa. Mach a chaꞌlen xujchꞌ. Mach a chaꞌlen lot tiꞌ contra a piꞌʌlob. Mach a michꞌqꞌuel chʌ bʌ an i chaꞌan a piꞌʌlob. Cheꞌ mi yʌl ti mandar. Pero tsꞌʌcʌl mi lac jacꞌ ili mandar yicꞌot ti pejtyelel yambʌ mandar tyac cheꞌ mi lac chꞌujbiben jini jumpꞌej mandar baꞌ miꞌ yʌleꞌ: Pꞌuntyan a piꞌʌlob cheꞌ bajcheꞌ maꞌ bajñel pꞌuntyan a bʌ. Cheꞌ an ti mandar.

10 Jini muꞌ bʌ i pꞌuntyan i piꞌʌlob machꞌan chʌ bʌ miꞌ chaꞌlen tiꞌ contra. Jin chaꞌan, cheꞌ mi lac chaꞌlen pꞌuntyaya, tsꞌʌcʌl chʌncol lac jacꞌ jini mandar.

11 Yom mi laꞌ chaꞌlen pejtyel bajcheꞌ tic subetla, pero com jeꞌel mi lac ñaꞌtyan jiñʌch i yorojlel yom mi lac pꞌixtisan lac bʌ ti wʌyel yubil. Como wale más lʌcꞌʌlix i yorojlel mi quej i tyʌlel Cristo cheꞌ bajcheꞌ cheꞌ ñac ti lac ñaxan chꞌujbi melelʌch i tꞌan.

12 Yomox ñumel acꞌbʌlel. Yomox sʌcꞌan yubil como lʌcꞌʌlix i chaꞌ tyʌlel lac Yum. Jin chaꞌan yom mi laj cʌy lac chaꞌlen muꞌ bʌ i chaꞌleñob ti icꞌtꞌojñal yubil. Laꞌ la cajñel ti wen cheꞌ bajcheꞌ quixtyañu muꞌ bʌ i chaꞌlen xʌmbal ti qꞌuinil yubil.

13 Laꞌ lac chaꞌlen bajcheꞌ yom cheꞌ añonla ti qꞌuinil. Mach yom mi lac chaꞌlen qꞌuixnijel, mi lecojic bʌ qꞌuinijel tyac, mi tꞌanic yicꞌot yambʌ winic yambʌ ꞌixic, mi yanic bʌ bibajax bʌ muꞌ bʌ i chaꞌleñob, mi periyalic, mi i michꞌqꞌuelolic chʌ bʌ i chaꞌan lac piꞌʌlob.

14 Pero jini yom bʌ, jiñʌch chaꞌan mi la cʌcꞌ lac bʌ ti Cristo chaꞌan mi la cajñel cheꞌ bajcheꞌ yom lac yum Jesucristo. Yom mi laj cʌy lac pensalin lac chaꞌlen chʌ bʌ miꞌ xicꞌonla lac chaꞌlen jini lac bajñel pusicꞌal.