Mach yom a lolon al mi mach wen miꞌ chaꞌlen yambʌ cheꞌ machꞌan maꞌ ñaꞌtyan
14
Mi an juntiquil ochem bʌ tiꞌ tꞌan Dios pero mi max tyo miꞌ wen chꞌʌmben i sujmlel jini tꞌan, pʌyʌla ochel yaꞌ baꞌ mi laꞌ muchꞌquin laꞌ bʌ, pero mach chaꞌanic jach laꞌ wom laꞌ cʌlʌx pejcan chaꞌan muꞌ bʌ i pensalin ti chaꞌchajplel i pusicꞌal.2 Laꞌ lac poj aleꞌ: An ochemoꞌ bʌ muꞌ bʌ i ñaꞌtyan chaꞌan chꞌujbiyʌch i luꞌ cꞌuxeꞌ chʌ bʌ cꞌuxbil. Pero jini max tyo tiꞌ wen chꞌʌmbeyob isujm, maꞌix mi luꞌ cꞌuxeꞌ. Jini jach miꞌ cꞌuxob pʌcꞌbil tyac bʌ.
3 Jini muꞌ bʌ i cꞌuxeꞌ ti pejtyelel chʌ bʌ cꞌuxbil, mach yom i yʌleꞌ chaꞌan mach wen miꞌ chaꞌlen jini mach bʌ yom i luꞌ cꞌuxeꞌ. Jini mach bʌ yom i luꞌ cꞌuxeꞌ chʌ bʌ tyac, mach yom i lolon yʌleꞌ tiꞌ pusicꞌal chaꞌan an i mul jini muꞌ bʌ i luꞌ cꞌuxeꞌ como i chaꞌañʌch Dios jini quixtyañu jeꞌel.
4 ¿A wenta ba chaꞌan maꞌ wʌleꞌ mach wen miꞌ chaꞌlen i winic juntiquil yumʌl? I wentajʌch i yum jini winic chaꞌan miꞌ qꞌuel mi wen o mi mach wen miꞌ chaꞌlen. Pero weñʌch mi quejel i yujtyel yicꞌot jini ochemoꞌ bʌ tiꞌ tꞌan Dios como an i pꞌʌtyʌlel Dios yicꞌot chaꞌan i cotyan chaꞌan weñʌch mi yujtyel.
5 Laꞌ lac poj chaꞌ ale: An jeꞌel jini muꞌ bʌ i qꞌuel ti más ñuc jumpꞌej qꞌuin bajcheꞌ yambʌ qꞌuin. An yañoꞌ bʌ junlajal miꞌ qꞌuelob ti pejtyelel qꞌuin tyac. Pero ti jujuntiquil yom i wen ñaꞌtyan ti jumpꞌej i pusicꞌal bajcheꞌ yom.
6 Jini muꞌ bʌ i mel qꞌuin chaꞌan i chꞌujutisan lac Yum, miꞌ meleꞌ chaꞌan i nuc isan lac Yum. Jini mach bʌ baꞌan mi mel qꞌuin miꞌ ñusan i meleꞌ chaꞌan i ñuc isʌntyel lac Yum jeꞌel. Jini muꞌ bʌ i luꞌ cꞌuxeꞌ chʌ bʌ cꞌuxbil chʌꞌʌch miꞌ chaꞌlen chaꞌan miꞌ ñuc isan lac Yum como miꞌ suben Dios wocox i yʌlʌ. Jini mach bʌ baꞌan miꞌ cꞌuxeꞌ ti pejtyelel chʌ bʌ tyac, chʌꞌʌch miꞌ chaꞌlen jeꞌel chaꞌan i ñuc isʌntyel lac Yum. Miꞌ suben Dios wocox i yʌlʌ jeꞌel.
7 Joñonla, cheꞌ ochemonla tiꞌ tꞌan Dios, añonla tiꞌ cꞌʌb lac Yum. Maꞌan mi lac chaꞌlen bajcheꞌ mi lac bajñel mulan ti lac pusicꞌal. Mi la cajñel bajcheꞌ yom lac Yum. I wentajonla Dios mi cuxulonla o mi ti sajtiyonla.
8 Cheꞌ cuxulon tyo la, cuxulonla chaꞌan mi lac chaꞌlen bajcheꞌ yom lac Yum. Cheꞌ mi lac sajtyel mi lac sajtyel chaꞌan cheꞌ yom lac Yum. Jin chaꞌan, mi cuxulonla o mi sajtyemonla, i chaꞌañonla lac Yum.
9 Como ti sajti Cristo. Ti chaꞌ tyejchi loqꞌuel baꞌan sajtyemoꞌ bʌ. Chaꞌ cuxulix chaꞌan mi yochel tiꞌ Yum sajtyemoꞌ bʌ yicꞌot cuxuloꞌ bʌ.
10 Jatyet, ¿chucoch maꞌ lolon al ti a pusicꞌal an i mul a wermañu cheꞌ machꞌan maꞌ ñaꞌtyan? ¿Chucoch maꞌ tsꞌaꞌqꞌuel a wermañu? Como ti lac pejtyelel mi quejel lac waꞌtyʌl yaꞌ baꞌ miꞌ melonla Cristo.
11 Mi yʌleꞌ ti Tsꞌijbubil bʌ i Tꞌan Dios:
Lajal melel ili tꞌan cheꞌ bajcheꞌ melelʌch cuxulon, cheꞌ mi yʌl lac Yum. Ti pejtyelel quixtyañujob mi quejel i wersa ñoc chocoñob i bʌ tic tyojlel.
Ti pejtyelelob mi quejel i subob i bʌ chaꞌan joñon Dioson.
Cheꞌ tsꞌijbubil.
12 Cheꞌ jini ti jujuntiquilonla mi quejel lac sub lac bʌ yaꞌ ti tyojlel Dios.
Mach a wacꞌ ti yajlel ti mulil a wermañu
13 Cheꞌ jini mach yom mi lac bej al ti lac pusicꞌal mi an i mul lac piꞌʌlob cheꞌ machꞌan mi lac ñaꞌtyan. An ti lac wenta lac wersa ñaꞌtyan chaꞌan machꞌan mi lac saj chaꞌlen chʌ bʌ tyac muꞌ bʌ i yʌsan ti mulil la quermañu, mi chʌ bʌ yes mi yʌcꞌ i yajlel ti mulil.
14 Chaꞌan ti lac chꞌujbi ajcotyaya lac chaꞌan lac Yum Jesús, mi lac wen ñaꞌtyan ti jumpꞌej lac pusicꞌal chaꞌan machꞌan chʌ bʌ ticꞌbil chaꞌan laj cꞌuxeꞌ. Luꞌ cꞌuxbilʌch. Pero mi an majch muꞌ bʌ i bajñel pensalin chaꞌan mach wen i cꞌuxeꞌ chʌ bʌ jach, cheꞌ jini mach wen i cꞌuxeꞌ como chʌꞌʌch miꞌ bajñel pensalin tiꞌ pusicꞌal.
15 Aunque machꞌan chʌ bʌ mi yʌl a pusicꞌal cheꞌ maꞌ cꞌuxeꞌ chʌ bʌ jach, pero mi chaꞌan ti a cꞌuxu ti a tyejchbe i chꞌʌjyemlel i pusicꞌal a wermañu chaꞌan ti caj mach yom cꞌuxol miꞌ lolon ñaꞌtyan, cheꞌ jini mi ti a bej cꞌuxu machꞌan maꞌ pꞌuntyan a wermañu, yubil. Mach yom a wʌcꞌ ti yajlel a wermañu chaꞌan jach a wom a cꞌuxeꞌ chʌ bʌ jach, como Cristo ti sajti chaꞌan a wermañu jeꞌel.
16 Aunque maꞌ ñaꞌtyan wen jini chʌncol bʌ a chaꞌlen, pero mach yom a wʌcꞌ ti tyechol machꞌʌ wen bʌ tꞌan ti caj.
17 Cheꞌ mi lac yumin Dios mach jinic mi yʌqꞌueñonla lac pensalin chʌ bʌ yom mi laj cꞌux chʌ bʌ yom mi lac jap. Pero mi yʌqꞌueñonla lac pensalin chaꞌan yom mi la cajñel ti tyoj chaꞌan mi la cajñel ti ñʌchꞌtyʌlel lac pusicꞌal yicꞌot ti cꞌajacña bʌ la coj chꞌoyol bʌ ti Chꞌujul bʌ i Chꞌujlel Dios.
18 Jini muꞌ bʌ i ñaꞌtyan aunque machꞌan chʌ bʌ miꞌ chaꞌlen mi tiꞌ cꞌuxu chʌ bʌ jach, pero machꞌan miꞌ cꞌuxeꞌ chaꞌan miꞌ pꞌuntyan i yermañu, miꞌ chaꞌliben i toñel Cristo. Mi qꞌuejlel ti wen ti Dios yicꞌot ti quixtyañujob.
19 Cheꞌ jini, laꞌ lac wersa ñaꞌtyan chʌ bʌ tyac yom chaꞌan mi la cajñel ti ñʌchꞌʌl yicꞌot chaꞌan bajcheꞌ yom mi lac motin xucꞌchocon lac bʌ ti lac Yum.
20 Mach a mʌctyʌben i nijcʌbentyel i pusicꞌal quixtyañu ti Dios chaꞌan ti caj chʌ bʌ jach maꞌ cꞌux. Melel, weñʌch ti pejtyelel chʌ bʌ tyac an. Pero mi an juntiquil la quermañu muꞌ bʌ i pensalin chaꞌan mulilʌch i cꞌuxeꞌ chʌ bʌ mi laj cꞌux, pero mi ti wersa cꞌuxu cheꞌ mi yilan chʌncol laj cꞌuxeꞌ, tsaꞌix la cʌcꞌʌ ti yajlel ti mulil yubil como tiꞌ cꞌuxu jini muꞌ bʌ i bajñel pensalin tiqꞌuil i cꞌuxeꞌ.
21 Weñʌch machꞌan mi laꞌ bej cꞌuxeꞌ weꞌel mi machꞌan mi laꞌ japeꞌ vino mi machꞌan mi laꞌ chaꞌlen chʌ bʌ tyac muꞌ bʌ i yʌqꞌuen i yajlel ti mulil la quermañu, o muꞌ bʌ i yʌqꞌuen chaꞌchajplel i pensal chaꞌan bajcheꞌ miꞌ chꞌujbin lac Yum.
22 Jini muꞌ bʌ a chꞌujbin, chꞌujbin ti pejtyelel a pusicꞌal tiꞌ tyojlel Dios. Tijicña jini winic machꞌʌ baꞌan chʌ bʌ mi yʌleꞌ i pusicꞌal chaꞌan jini muꞌ bʌ i chaꞌlen.
23 An i mul jini muꞌ bʌ i cꞌuxeꞌ chʌ bʌ tyac cheꞌ chaꞌchajp i pensal chaꞌan miꞌ pensalin mi wen o mi mach wen i cꞌuxeꞌ. Como machꞌan tiꞌ cꞌuxu ti jumpꞌej i pusicꞌal. Cheꞌ mi lac pensalin ti lac pusicꞌal chaꞌan mach cheꞌic yom mi lac chaꞌlen pero mi ti lac chaꞌle, mulilʌch cheꞌ jini como machꞌan ti lac chaꞌle ti jumpꞌej lac pusicꞌal.