2 Jini Cornelio yicꞌot pejtyelelob am bʌ ti yotyot tiꞌ chꞌujutisayob Dios. Tiꞌ qꞌueleyob ti ñuc Dios. Wen uts jini Cornelio. Aunque mach israel bʌ winic ti yʌqꞌue cabʌl tyaqꞌuin chaꞌan miꞌ cotyan pꞌumpꞌum bʌ israelob. Cabʌl tiꞌ chaꞌle oración.

3 Junyajlel cheꞌ ti och an qꞌuin ti yilʌ cheꞌ bajcheꞌ ti ñajal juntiquil ajtroñel i chaꞌan Dios chꞌoyol bʌ ti panchan. Jini tiꞌ pejcʌ. Ti yʌlʌ: Cornelio, cheꞌen.

4 Tyoj bʌcꞌñʌjel Cornelio. Tiꞌ chꞌuj qꞌuele jini ajtroñel i chaꞌan Dios. Ti yʌlʌ: ¿Chuquiyes a wom? c Yum, cheꞌen. Jini ajtroñel i chaꞌan Dios tiꞌ sube: Tsaꞌix i yubi a woración Dios. Tsaꞌix i yilʌ bajcheꞌ maꞌ pꞌuntyan pꞌumpꞌuñoꞌ bʌ.

5 Choco majlel chaꞌtiquil uxtiquil winic yaꞌ ti Jope chaꞌan miꞌ tyaj juntiquil Simón bʌ i cꞌabaꞌ. I chaꞌchajplel bʌ i cꞌabaꞌ Simón jiñʌch Pedro.

6 Yaꞌ mi yajñel yicꞌot yambʌ winic Simón bʌ i cꞌabaꞌ jeꞌel. An i troñel ti tsꞌaj pʌchij jini yambʌ Simón. Yaꞌ chumul yaꞌ ti lʌcꞌʌl colem jaꞌ. Jini Pedro mi quej i subeñet chʌ bʌ yom a chaꞌlen. Cheꞌ ti subenti Cornelio.

7 Ti loqꞌui majlel jini ajtroñel i chaꞌan Dios. Cheꞌ jini, Cornelio tiꞌ pʌyʌ tyʌlel chaꞌtiquil ajtroñel i chaꞌan yicꞌot juntiquil soldado. Jini soldado miꞌ chʌc mel bajcheꞌ miꞌ mulan Cornelio. Miꞌ chꞌujutisan Dios jeꞌel.

8 Tiꞌ wen sube jini uxtiquil pejtyel tsaꞌ bʌ subenti ti i yajtroñel Dios. Cheꞌ jini tiꞌ xiqꞌuiyob majlel yaꞌ ti Jope.

9 Ti yijcꞌʌlel cheꞌ yomox tyaj xinqꞌuinil añob tyo ti bij jini uxtiquil. Lʌcꞌʌlix mach cꞌot ti Jope. Ti jim bʌ ora Pedro ti letsi ti pamacña bʌ i jol otyot chaꞌan miꞌ chaꞌlen oración.

10 Wen an i wiꞌñal. Yom uchꞌel. Pero cheꞌ ñac chʌncol tyo i chajpʌbeñob i yuchꞌel an chʌ bʌ ti queji i qꞌuel cheꞌ bajcheꞌ ti ñajal.

11 Ti yilʌ ti jajmi ti chan. Ti jubi tyʌlel cꞌʌlʌ yaꞌ baꞌan cheꞌ bajcheꞌ yoque colem bʌ pisil lajal chucul tiꞌ chʌnwejl i xujc yilal.

12 Yaꞌ tiꞌ mali jini pisil an cheꞌ bajcheꞌ jujunchajp pejtyel jini animal chʌntsꞌijt bʌ yoc. An lucum tyac jeꞌel yicꞌot xmaꞌtyeꞌmut.

13 Cheꞌ jini, ti yubi ajtꞌan tsaꞌ bʌ yʌlʌ: Waꞌi, Pedro. Tsʌnsan. Cꞌuxu chʌ bʌ jach yes bʌ animal. Cheꞌ ti yʌlʌ jini ajtꞌan.

14 Cheꞌ jini Pedro tiꞌ jacꞌʌ. Mach cheꞌiqui, c Yum. Maꞌan baꞌ bʌ ora mij cꞌux ticꞌbil bʌ bajcheꞌ miꞌ chꞌujbiñob pejtyel israelob. Cheꞌ ti jacꞌʌ Pedro.

15 Ti chaꞌ ubi ili tꞌan tsaꞌ bʌ yʌlʌ: Mach yom a tsꞌaꞌqꞌuel jini muꞌ bʌ i qꞌuel Dios ti wen, cheꞌen.

16 Uxyajlel ti yubi tꞌan jini Pedro. Cheꞌ jini ti chaꞌ letsi ti chan jini colem pisil.

17 Wen muꞌ ti pensal Pedro. ¿Chuquiyes i sujmlel pejtyel jini? Cheꞌ ti yʌlʌ tiꞌ pusicꞌal. Cheꞌ ñac muꞌ tyo ti pensal yaꞌ ti cꞌotiyob ti tiꞌ otyot jini tsaꞌ bʌ i xiqꞌui tyʌlel Cornelio. Chʌncol i sʌclan i yotyot Simón.

18 Cheꞌ ti cꞌotiyob yaꞌi ti queji i cꞌajtibeñob ti cꞌam bʌ tꞌan mi yaꞌan Simón chaꞌchajplel bʌ i cꞌabaꞌ Pedro.

19 Cheꞌ ñac chʌncol tyo i pensalin Pedro tsaꞌ bʌ pʌsꞌenti, Chꞌujul bʌ i Chꞌujlel Dios tiꞌ pejcʌ. Ti yʌlʌ: Ubin, uxtiquil winic chʌncol i sʌclañet.

20 Tyejchen. Jubenix yaꞌ baꞌañob. Cucu yicꞌotyob. Mach a saj tsꞌaꞌqꞌuel mach bʌ israelob como joñon tic xiqꞌuiyob tyʌlel chaꞌan i pʌyetyob majlel. Cheꞌ ti subenti ti Chꞌujul bʌ i Chꞌujlel Dios.

21 Cheꞌ jini, Pedro ti jubi majlel yaꞌ baꞌan jini uxtiquil winic tsaꞌ bʌ i xiqꞌuiyob majlel Cornelio. Tiꞌ subeyob. Joñoñʌch jini chʌncol bʌ laꞌ sʌclan. ¿Chucoch ti tyʌliyetla? cheꞌ ti yʌlʌ Pedro.

22 Jiñob tiꞌ jacꞌʌyob: Jini am bʌ tiꞌ wenta cien soldadojob, Cornelio bʌ i cꞌabaꞌ tiꞌ xiqꞌuiyon lojon tyʌlel. Wen uts jini Cornelio. Miꞌ wen qꞌuel ti ñuc Dios. Mi qꞌuejlel ti wen ti pejtyel israelob. Cheꞌ jini, juntiquil ajtroñel i chaꞌan Dios chꞌoyol bʌ ti panchan tiꞌ pejcʌ Cornelio. Ti subenti chaꞌan mi lojon c tyʌlel c pʌyet majlel ti yotyot chaꞌan miꞌ wen ñʌchꞌtyan pejtyel muꞌ bʌ a suben. Cheꞌ ti yʌlʌyob jini uxtiquil winic.

23 Cheꞌ jini Pedro ti yʌqꞌueyob ochel. Yaꞌ tiꞌ ñusʌyob acꞌbʌlel yicꞌot. Ti yijcꞌʌlel ti majli Pedro yicꞌotyob. Chaꞌtiquil uxtiquil ochemoꞌ bʌ tiꞌ tꞌan Dios yaꞌ ti Jope tiꞌ piꞌleyob ti xʌmbal jeꞌel.

24 Ti chaꞌpꞌejlel qꞌuin ti cꞌotiyob yaꞌ ti Cesarea. Cornelio chʌncol i pijtyañob. Tsaꞌix i pʌyʌyob ochel ti yotyot yoque i piꞌʌlob jeꞌel yicꞌot chaꞌtiquil uxtiquil i piꞌʌlob ti chumtyʌl.

25 Cheꞌ ñac ti cꞌoti Pedro yaꞌ ti yotyot, Cornelio ti loqꞌui i tyaj tyʌlel. Ti ñocle tiꞌ tꞌejl cheꞌ bajcheꞌ mi quej i chꞌujutisan Pedro.

26 Pero Pedro tiꞌ waꞌchoco. Ti yʌlʌ: Waꞌi. Lajal winicon cheꞌ bajcheꞌet, cheꞌen.

27 Cheꞌ chʌncol tyo i pejcan, ti ochi ti mal yicꞌot. Yaꞌ ti mal tiꞌ tyaja cabʌl quixtyañujob.

28 Cheꞌ jini, Pedro tiꞌ subeyob: Jatyetla laꞌ wujil isujm joñon lojon israelon lojon. Wen ticꞌbil chaꞌan mi lojon c muchꞌquin lojon c bʌ yicꞌot mach bʌ israelob o mi chaꞌanic mi lojon cochel ti yotyot. Pero Dios tiꞌ pʌsbeyon mach yom mi cʌleꞌ mach wen yambʌ quixtyañujob, cheꞌen.

29 Jin chaꞌan cheꞌ ti a pʌyʌyon ti tyʌliyon ti ora jach. Maꞌan chʌ bʌ ti cʌlʌ. Com cubin, cheꞌ jini, chucoch ti a pʌyʌyon. Cheꞌ ti yʌlʌ jini Pedro.

30 Cornelio tiꞌ jacꞌʌ: Chʌmpꞌejlix qꞌuin wale iliyi ti jim bʌ ora cheꞌ chʌncolon ti chꞌajb wʌꞌ ti cotyot. Mucꞌon ti oración cheꞌ bajcheꞌ i tyʌlel mic chaꞌlen ti och an qꞌuin. Cheꞌ jini, ti tsictiyi tic tyojlel juntiquil winic yoque sʌsʌc bʌ i pislel.

31 Jini tiꞌ subeyon: Cornelio, tsaꞌix i yubi a woración Dios. Tsaꞌix i qꞌuele bajcheꞌ maꞌ cotyañob pꞌumpꞌuñoꞌ bʌ.

32 Xiqꞌui majlel yaꞌ ti Jope jini muꞌ bʌ i pʌy tyʌlel jini Simón chaꞌchajplel bʌ i cꞌabaꞌ Pedro. Yaꞌ mi yajñel ti yotyot yambʌ Simón jini muꞌ bʌ i tsꞌajeꞌ pʌchij. Chumul ti lʌcꞌʌl colem jaꞌ. Cheꞌ mi tyʌlel mux i wen subeñet. Cheꞌ ti subentiyon, cheꞌ Cornelio.

33 Chʌꞌʌch cheꞌ jini, tic waꞌ xiqꞌui majlel winicob i tyajet. Weñʌch ti waꞌ tyʌliyet. Wale wʌꞌ luꞌ muchꞌquibilon lojon. Wʌꞌan Dios la quicꞌot. Com lojon cubin pejtyel tsaꞌ bʌ i xiqꞌuiyet a subeñon lojon lac Yum. Cheꞌ ti yʌlʌ Cornelio.

34 Cheꞌ jini Pedro ti queji ti tꞌan. Ti yʌlʌ: Wale, cujil isujm mach partejic bajcheꞌ miꞌ qꞌuelonla Dios.

35 Pero mux i qꞌuel ti wen majchical jach muꞌ bʌ i qꞌuel ti ñuc Dios, muꞌ bʌ i chaꞌlen wen bʌ mi israelob mi mach bʌ israelob.

36 Dios tiꞌ pejcʌ i jiñʌjlel israeloꞌ bʌ. Tiꞌ subeyob tꞌan chaꞌan bajcheꞌ miꞌ tyaj i ñʌchꞌtyʌlel i pusicꞌal ti Jesucristo. Jiñʌch i Yum pejtyel quixtyañujob.

37 Wen laꞌ wujil bajcheꞌ ti ujti yaꞌ ti pejtyel i lumal israelob. Ti queji jini tꞌan yaꞌ ti Galilea cheꞌ ñac ti subu tꞌan Juan, cheꞌ ñac ti yʌcꞌʌ chꞌʌm jaꞌ.

38 Jini Jesús chꞌoyol bʌ ti Nazaret ti aqꞌuenti Chꞌujul bʌ i Chꞌujlel Dios yicꞌot i pꞌʌtyʌlel Dios. Baꞌical jach ti majli tiꞌ chaꞌle wen bʌ. Cabʌl tiꞌ lajmisʌ tyʌcꞌlʌbil bʌ ti xiba. Chʌꞌʌch tiꞌ chaꞌle como Dios an yicꞌot.

39 Joñon lojon yajcʌbilon lojon bʌ ajsubtꞌan ñumel ti lojon quilʌ pejtyel tsaꞌ bʌ i chaꞌle Jesús yaꞌ ti Judea yicꞌot yaꞌ ti Jerusalén jeꞌel. Ti wiꞌil tiꞌ jocꞌchocoyob ti cruz. Tiꞌ tsʌnsʌyob.

40 Pero ti yuxpꞌejlel qꞌuin Dios tiꞌ tyeche loqꞌuel Jesús baꞌan sajtyemoꞌ bʌ. Ti yoque i cuxtyʌlel ti chaꞌ pʌsʌ i bʌ baꞌañon lojon.

41 Machꞌan tiꞌ pʌsʌ i bʌ baꞌan pejtyel quixtyañujob pero yaꞌ jach tiꞌ pʌsʌ i bʌ baꞌañon lojon. Como Dios ti wʌ yajcʌyon lojon chaꞌan lojon c sub i sujmlel ti pejtyel tsaꞌ bʌ lojon quilʌ. Cheꞌ ñac chaꞌ cuxulix Jesús ti lojon c chaꞌle uchꞌel quicꞌot.

42 Dios tiꞌ xiqꞌuiyon lojon chaꞌan mi lojon c sub majlel i tꞌan baꞌan pejtyel quixtyañujob. Jujuntiquil mi quej i wersa mel i bʌ tiꞌ tyojlel Jesús. Chʌꞌʌch Dios ti yajcʌ Jesús chaꞌan miꞌ chaꞌlen melojel. Chʌꞌʌch an ti lojon c wenta c sub.

43 Pejtyelelob jini tsaꞌ bʌ i xiqꞌui yʌleꞌ Dios ti ñoj oniyix tiꞌ tyajayob ti tꞌan Jesús. Tiꞌ luꞌ subuyob chaꞌan majchical jach miꞌ chꞌujbin Jesús miꞌ tyaj i ñusʌntyel i mul ti Jesús. Cheꞌ ti yʌlʌ ti subtꞌan Pedro yaꞌ baꞌan Cornelio.

44 Cheꞌ muꞌ tyo ti tꞌan Pedro, ti bujtꞌiyob i pusicꞌal ti Chꞌujul bʌ i Chꞌujlel Dios pejtyel jini chʌncol bʌ i ñʌchꞌtyʌbeñob i tꞌan.

45 Tyoj bʌcꞌñʌjel jini israelob tsaꞌ bʌ i piꞌleyob ti xʌmbal Pedro cheꞌ ñac ti yilʌyob ti aqꞌuenti Chꞌujul bʌ i Chꞌujlel Dios mach bʌ israelob.

46 Cheꞌ ñac jini Chꞌujul bʌ i Chꞌujlel Dios ti ochi tiꞌ pusicꞌal jini mach bʌ israelob jiñob ti quejiyob ti tꞌan ti yan tyac bʌ tꞌan. Tiꞌ wen subuyob i ñuclel Dios.

47 Cheꞌ jini, ti yʌlʌ Pedro: Maꞌan chʌꞌ bʌ miꞌ mʌctyʌbeñob i chꞌʌmob jaꞌ ili quixtyañujob como tsaꞌix aqꞌuentiyob Chꞌujul bʌ i Chꞌujlel Dios lajal cheꞌ bajcheꞌonla. Cheꞌ ti yʌlʌ Pedro.

48 Cheꞌ jini, Pedro tiꞌ xiqꞌui i chꞌʌmob jaꞌ mach bʌ israelob chaꞌan tsiquil tiꞌ chꞌujbiyob Jesús. Jini mach bʌ israelobic tiꞌ cꞌajtibeyob Pedro ti wocol tꞌan chaꞌan cʌylec yicꞌotyob chaꞌpꞌej uxpꞌej qꞌuin.