2 Cheꞌ ñac ti chaꞌ sujti ti Jerusalén Pedro, jini israeloꞌ bʌ ochemoꞌ bʌ tiꞌ tꞌan Dios ti queji i yʌlꞌeñob.

3 Ti yʌlʌyob: ¿Chucoch tsajñiyet a julaꞌan mach bʌ israelob? ¿Chucoch ti uchꞌiyet yicꞌotyob? Cheꞌ ti yʌlʌyob.

4 Cheꞌ jini Pedro tiꞌ luꞌ subeyob cꞌʌlʌ ti tyejchibal pejtyel chʌ bʌ ti ujti. Ti yʌlʌ:

5 Yaꞌ añon ti lum Jope bʌ i cꞌabaꞌ. Mucꞌon ti oración. Cheꞌ jini ti quilʌ cheꞌ bajcheꞌ tic ñajal cheꞌ bajcheꞌ colem pisil yilal. Lajal chucul ti chʌnwejl i xujc. Ti jubi tyʌlel ti chan. Cꞌʌlʌl ti cꞌoti yaꞌ baꞌañon.

6 Tiꞌ queji c wen qꞌueleꞌ chaꞌan miꞌ qꞌuel chʌ bʌ an. Yaꞌan ti quilʌ animal tyac chʌntsꞌijt bʌ yoc yicꞌot simaron bʌ am bʌ ti maꞌtyeꞌel, yicꞌot lucum tyac yicꞌot xmaꞌtyeꞌmut tyac.

7 Ti cubi tꞌan tsaꞌ bʌ yʌlʌ: Waꞌi Pedro. Tsʌnsan. Cꞌuxu chʌ bʌ jach yes. Cheꞌ ti yʌlʌ jini ajtꞌan.

8 Pero joñon tic jacꞌʌ. Maꞌix, c Yum. Maꞌan baꞌ bʌ ora tij cꞌuxu ticꞌbil bʌ bajcheꞌ mi lojon c chꞌujbin ti i mandar israelob.

9 Cheꞌ jini tic chaꞌ ubi tꞌan loqꞌuem bʌ ti panchan tsaꞌ bʌ yʌlʌ: Machꞌan maꞌ wʌleꞌ mach wen muꞌ bʌ cʌl ti wen. Chʌꞌʌch ti yʌlʌ jini ajtꞌan.

10 Uxyajlel chʌꞌʌch ti ujti. Cheꞌ jini ti chaꞌ letsi ti chan jini colem pisil. Cheꞌ ti yʌlʌ Pedro.

11 Tiꞌ bej chaꞌle tꞌan Pedro. Ti yʌlʌ: Ti jim bʌ ora cheꞌ ñac ti ujti pejtyel jini, yaꞌ ti cꞌotiyob ti otyot baꞌ ti poj ajniyon uxtiquil winic loqꞌuemoꞌ bʌ ti Cesarea. Ti cꞌoti i sʌclañon.

12 Jini Chꞌujul bʌ i Chꞌujlel Dios tiꞌ xiqꞌuiyon majlel yicꞌotyob. Cucu a wicꞌotyob. Mach a saj tsꞌaꞌqꞌuel jini mach bʌ israelob. Cheꞌ ti subentiyon. Cheꞌ jini seis winicob ochemoꞌ bʌ tiꞌ tꞌan Dios ti majli quicꞌot. Yaꞌ ti ochiyon lojon ti yotyot juntiquil winic.

13 Cheꞌ jini, tiꞌ subeyon lojon bajcheꞌ ti yilʌ cheꞌ bajcheꞌ ti ñajal juntiquil ajtroñel i chaꞌan Dios chꞌoyol bʌ ti panchan. Yaꞌ ti waꞌle ti yotyot. Tiꞌ sube: Choco majlel winicob yaꞌ ti Jope chaꞌan miꞌ pʌy tyʌlel juntiquil Simón bʌ i cꞌabaꞌ. Chaꞌchajplel bʌ i cꞌabaꞌ Simón jini Pedro.

14 Jini mi quej i subeñet bajcheꞌ chꞌujbi a tyaj a cotyʌntyel jatyet yicꞌot pejtyel a piꞌʌlob ti a wotyot. Cheꞌ ti subenti jini winic, cheꞌ Pedro.

15 Cheꞌ jini, cheꞌ ti quejiyon ti tꞌan yaꞌ tiꞌ tyojlelob, jini Chꞌujul bʌ i Chꞌujlel Dios ti ochi tiꞌ pusicꞌalob lajal cheꞌ bajcheꞌ ti ochi ti lac chaꞌan ti yambʌ ora.

16 Cheꞌ jini cꞌajal c chaꞌan jini tsaꞌ bʌ i yʌlʌ Jesús cheꞌ ti yʌlʌ: Melelʌch ti yʌcꞌʌ chꞌʌm jaꞌ Juan pero Dios mi quej i yʌqꞌueñetla Chꞌujul bʌ i Chꞌujlel, cheꞌen.

17 Dios ti yʌcꞌob Chꞌujul bʌ i Chꞌujlel lajal bajcheꞌ ti yʌqꞌueyonla cheꞌ ñac ti ochiyonla ti lac Yum Jesucristo. Cheꞌ jini machꞌan tic wenta chaꞌan c tiqꞌueꞌ Dios mi yom i yʌqꞌueñob Chꞌujul bʌ i Chꞌujlel. Cheꞌ ti yʌlʌ Pedro.

18 Cheꞌ ñac jini ochemoꞌ bʌ ti tꞌan Dios yaꞌ ti Jerusalén ti yubiyob i tꞌan Pedro ti waꞌ lajmiyob ti tꞌan. Ti queji i subeñob i ñuclel Dios. Ti yʌlʌyob: Qꞌuele a wilan, Dios ti yʌqꞌue jeꞌel mach bʌ israelob chaꞌan miꞌ qꞌuextyañob i pusicꞌal i tyajob i cuxtyʌlel machꞌʌ yujil jilel. Cheꞌ ti yʌlʌyob.

19 Ti jim bʌ qꞌuin cheꞌ ñac tiꞌ tsʌnsʌyob Esteban ti queji i cabʌl tyʌcꞌlañob yambʌ ochemoꞌ bʌ tiꞌ tꞌan Dios jeꞌel. Lamital ti putsꞌiyob cꞌʌlʌl ti pañimil Fenicia bʌ i cꞌabaꞌ yicꞌot yaꞌ ti lum joyol bʌ ti jaꞌ Chipre bʌ i cꞌabaꞌ yicꞌot yaꞌ ti lum Antioquía bʌ i cꞌabaꞌ. Jini jach tiꞌ subeyob i tꞌan baꞌan israelob. Machꞌan tiꞌ subeyob jini mach bʌ israelob.

20 Pero lamital jini ochemoꞌ bʌ tiꞌ tꞌan Dios, jini loqꞌuemoꞌ bʌ ti Chipre yicꞌot ti yambʌ pañimil Cirene bʌ i cꞌabaꞌ ti cꞌotiyob yaꞌ ti lum Antioquía bʌ i cꞌabaꞌ. Yaꞌi tiꞌ subeyob mach bʌ israelob bajcheꞌ miꞌ tyajob i cotyʌntyel ti Jesús.

21 An i pꞌʌtyʌlel Jesús yicꞌotyob tsaꞌ bʌ i chaꞌleyob subtꞌan. Cabʌlob tsaꞌ bʌ i yubiyob i tꞌan tiꞌ cʌyʌyob oñiyix bʌ tꞌan tsaꞌ bʌ i chꞌujbiyob. Tiꞌ chꞌujbiyob Jesús.

22 Cheꞌ ñac ti yubiyob ochemoꞌ bʌ tiꞌ tꞌan Dios yaꞌ ti Jerusalén pejtyel bajcheꞌ chʌncol yujtyel yaꞌ ti yambʌ pañimil tyac tiꞌ chocoyob majlel Bernabé ti Antioquía.

23 Cheꞌ ñac ti cꞌoti Bernabé ti yilʌ bajcheꞌ ti aqꞌuentiyob i yutslel i pusicꞌal Dios jini yaꞌ bʌ añob. Cꞌajacña i yoj Bernabé. Tiꞌ wen xiqꞌuiyob chaꞌan i chʌc xucꞌchocoñob i pusicꞌal ti Jesús.

24 Wen uts Bernabé. Butꞌul i pusicꞌal ti Chꞌujul bʌ i Chꞌujlel Dios. Ti jumpꞌej jach i pusicꞌal tiꞌ chꞌujbi Dios. Cabʌlob tiꞌ chꞌujbi Jesús tiꞌ pusicꞌal cheꞌ ñac ti yubiyob chʌ bʌ ti yʌlʌ Bernabé.

25 Ti wiꞌil ti majli Bernabé yaꞌ ti Tarso chaꞌan miꞌ sʌclan Saulo. Cheꞌ ñac tiꞌ tyaja, tiꞌ pʌyʌ majlel ti Antioquía.

26 Cꞌʌlʌl jumpꞌej jab yaꞌ ti cʌyleyob yicꞌot ochemoꞌ bʌ tiꞌ tꞌan Dios. Tiꞌ cʌntisʌyob cabʌl quixtyañujob. Yaꞌ ti Antioquía jiñʌch baꞌ ti queji i ñaxan ajlelob ti ochemoꞌ bʌ tiꞌ tꞌan Dios bʌ quixtyañujob.

27 Cheꞌ ñac muꞌ tyo ti cʌntisʌ Bernabé yicꞌot Saulo yaꞌ ti Antioquía, ti cꞌotiyob chaꞌtiquil uxtiquil tsaꞌ bʌ i xiqꞌui yʌleꞌ Dios chꞌoyol bʌ ti Jerusalén.

28 Juntiquil Agabo bʌ i cꞌabaꞌ ti waꞌle ti xiñil ochemoꞌ bʌ tiꞌ tꞌan Dios. Jini Chꞌujul bʌ i Chꞌujlel Dios ti yʌqꞌue i wʌ wen tsictisʌben chaꞌan tyal cabʌl wiꞌñal ti pejtyel mulawil. Chʌꞌʌch ti ujti cheꞌ ñac an yeꞌtyel jini ñoj ñuc bʌ yumʌl Claudio bʌ i cꞌabaꞌ.

29 Jini ochemoꞌ bʌ tiꞌ tꞌan Dios yaꞌ ti Antioquía tiꞌ lajayob i tꞌan chaꞌan i chocob majlel tyaqꞌuin baꞌan ochemoꞌ bʌ tiꞌ tꞌan Dios yaꞌ ti Judea. Jujuntiquil ti bajñel ñaꞌtyʌ bajcheꞌ yonlel chꞌujbi i yʌqꞌuen.

30 Chʌꞌʌch tiꞌ chaꞌleyob. Cheꞌ jini tiꞌ cꞌʌb Bernabé yicꞌot Saulo tiꞌ chocoyob majlel jini muchꞌquibilix bʌ tyaqꞌuin yaꞌ baꞌan ancianojob yaꞌ ti Judea.