2 Tiꞌ xiqꞌui ti tsʌnsʌntyel ti machit Jacobo i yʌscun Juan.

3 Herodes ti yilʌ wen cꞌajacñayob i yoj jini israelob chaꞌan tiꞌ tsʌnsʌ Jacobo. Jin chaꞌan tiꞌ chucu Pedro jeꞌel. Chʌꞌʌch ti ujti ti jini ñuc bʌ qꞌuin cheꞌ ñac i tyʌlel miꞌ cꞌuxob jini caxlan waj machꞌʌ baꞌan yicꞌot levadura muꞌ bʌ yʌqꞌuen i wos i bʌ.

4 Cheꞌ ñac tiꞌ chucu Pedro ti yotsʌ yaꞌ ti cʌchonibʌl baꞌ tiꞌ wen cʌñʌtyʌyob chʌnmojt soldadojob. An chʌntiquil soldado ti jujunmojt. Herodes tiꞌ ñaꞌtyʌ mi quej i locꞌsan Pedro cheꞌ ñumenix jini ñuc bʌ qꞌuin chaꞌan miꞌ pʌy majlel ti melojel tiꞌ tyojlel quixtyañujob.

5 Yaꞌ tyo an ti cʌchonibʌl Pedro. Wen cʌñʌtyʌbilʌch. Pero ochemoꞌ bʌ tiꞌ tꞌan Dios ti jumpꞌej jach i pusicꞌal chʌncol i chʌc tyajob ti oración Pedro.

6 Cheꞌ jini, ti jim bʌ acꞌbʌlel cheꞌ ijcꞌʌl tyo i pʌy loqꞌuel Herodes ti melojel, an tyo ti cʌchonibʌl Pedro. Xin lʌpʌl i chaꞌan chaꞌtiquil soldado. Wʌyʌl Pedro. Cʌchʌl ti chaꞌtꞌujm cadena. Yambʌ soldadojob chʌncol i cʌñʌtyañob i tiꞌ cʌchonibʌl.

7 Ti saj ora jach ti tsictiyi juntiquil ajtroñel i chaꞌan Dios chꞌoyol bʌ ti panchan. Sʌcpojan yaꞌ ti mali cʌchonibʌl. Jini tiꞌ nijcʌ Pedro tiꞌ quejlop. Tiꞌ pꞌixtisʌ. Ti yʌlʌ: Tyejchen ti ora, cheꞌen. Cheꞌ jini, i cadenajlel tyac am bʌ tiꞌ cꞌʌb ti bajñel tyujqꞌui loqꞌuel.

8 Jini ajtroñel i chaꞌan Dios chꞌoyol bʌ ti panchan ti yʌlʌ: Cʌchʌx a cinturón. Xojox a zapatos. Cheꞌ ñac ti ujti i meleꞌ Pedro che bajche jini, jini ajtroñel i chaꞌan Dios ti yʌlʌ: Lʌpʌx jini yambʌ ticʌw bʌ a bujc. Laꞌ. Tsʌcleñon majlel, cheꞌ ti yʌlʌ.

9 Pedro tiꞌ tsʌcle majlel jini ajtroñel i chaꞌan Dios chꞌoyol bʌ ti panchan. Pero machꞌan tiꞌ ñoj ñaꞌtyʌ mi yoque melelʌch bajcheꞌ chʌncol i yujtyel. Cheꞌ bajcheꞌ ñajal jach mucꞌ tiꞌ lolon ñaꞌtyʌ.

10 Ti ñumiyob baꞌan jini ñaxan bʌ jumojt ajcʌñʌtya cʌchonibʌl yicꞌot ti chaꞌmojtlel. Cheꞌ jini ti cꞌotiyob yaꞌ ti colem bʌ i tiꞌ cʌchonibʌl baꞌ mi loqꞌuelob ti calle. Melel ti tsucul tyaqꞌuin jini i tiꞌ cʌchonibʌl. Cheꞌ ti cꞌotiyob ti bajñel jajmi. Ti loqꞌuiyob. Tiꞌ motin tꞌuñuyob majlel jumpꞌej calle. Cheꞌ jini, i yajtroñel Dios tiꞌ bajñel waꞌ cʌyʌ Pedro.

11 Cheꞌ jini Pedro ti queji i ñaꞌtyan chʌ bʌ ti ujti. Tiꞌ pusicꞌal ti yʌlʌ: Wale cujilix isujm. Jini c Yum tiꞌ choco tyʌlel jini ajtroñel i chaꞌan, chaꞌan miꞌ locꞌsañon tiꞌ pꞌʌtyʌlel Herodes yicꞌot ti pejtyel jini bajcheꞌ yom i tyʌcꞌlañon israelob. Chʌꞌʌch ti bajñel alʌ tiꞌ pusicꞌal Pedro.

12 Chʌncol tyo i pensalin jini tsaꞌ bʌ ujti. Cheꞌ jini ti majli ti yotyot María i ñaꞌ Juan. I chaꞌchajplel bʌ i cꞌabaꞌ Juan jiñʌch Marcos. Cabʌl quixtyañujob yaꞌ muchꞌquibilob ti oración.

13 Cheꞌ ñac tiꞌ jatsꞌʌ i tiꞌ otyot Pedro, juntiquil xcꞌalʌl Rode bʌ i cꞌabaꞌ ti majli i qꞌuel majchqui yaꞌan.

14 Cheꞌ ñac ti yubibe i tꞌan Pedro maꞌix tiꞌ waꞌ jambe i tiꞌ otyot. Pero chaꞌan wen cꞌajacña i yoj ti sujti ti ajñel i subeñob yaꞌ bʌ añob ti mal chaꞌan yaꞌix an Pedro yaꞌ ti tiꞌ otyot.

15 Cheꞌ jini ti yʌlʌyob: Leco a jol, cheꞌob. Pero jini Rode tiꞌ chaꞌ subeyob chaꞌan yoque melelʌch i tꞌan. Jin chaꞌan ti yʌlʌyob: Cꞌoꞌojl jiñʌch yajtroñel i chaꞌan Dios chꞌoyol bʌ ti panchan tsaꞌ bʌ i choco tyʌlel chaꞌan i cʌñʌtyan Pedro. Cheꞌ ti yʌlʌyob.

16 Pero Pedro cꞌʌlʌl chʌncol tyo i jatsꞌ i tiꞌ otyot. Cheꞌ ti ñumi ora tiꞌ jambeyob i tiꞌ otyot. Tyoj bʌcꞌñʌjelob cheꞌ ñac ti yilʌyob Pedro.

17 Pedro tiꞌ pʌsꞌeyob i cꞌʌb chaꞌan mi lajmel ti tꞌan. Cheꞌ jini tiꞌ wen tsictisʌbeyob bajcheꞌ tiꞌ locꞌsʌ ti cʌchonibʌl ti lac Yum. Tiꞌ subeyob: Suben Jacobo yicꞌot yañoꞌ bʌ ochemoꞌ bʌ tiꞌ tꞌan Dios pejtyel chʌ bʌ ti ujti. Cheꞌ ti yʌlʌ Pedro. Cheꞌ jini ti loqꞌui majlel. Ti majli ti yambʌ otyot.

18 Cheꞌ ti sʌcꞌʌ tiꞌ wen chaꞌleyob tꞌan jini soldadojob. Maꞌan tiꞌ saj ñaꞌtyʌyob chʌ bʌ yes ti ujti, bajcheꞌ ti loqꞌui ti cʌchonibʌl Pedro.

19 Herodes tiꞌ xiqꞌui i wen sʌclañob Pedro. Pero maꞌan tiꞌ tyajayob. Cheꞌ jini tiꞌ wersa cꞌajtibe soldadojob bajcheꞌ ti loqꞌui Pedro. Pero mach chꞌujbi i jacꞌob como maꞌan tiꞌ chꞌʌmʌyob isujm. Jin chaꞌan Herodes ti yʌcꞌʌ ti tsʌnsʌntyel soldadojob. Cheꞌ jini Herodes ti loqꞌui majlel ti Judea. Ti majli ti chumtyʌl yaꞌ ti Cesarea.

20 Herodes chʌncol i wen michꞌqꞌuel jini quixtyañujob yaꞌ ti lum Tiro yicꞌot Sidón bʌ i cꞌabaꞌ. Pꞌumpꞌuñob jini quixtyañujob yaꞌi. Mach jasʌl i bʌlob i ñʌcꞌ. I tyʌlel Herodes miꞌ choc majlel i bʌlob i ñʌcꞌ. Pero maꞌ tiꞌ poj cotyʌyob como michꞌ. Jin chaꞌan quixtyañujob yaꞌ ti Tiro yicꞌot Sidón tiꞌ lajayob i tꞌan chaꞌan jini añoꞌ bʌ yeꞌtyel mi majlelob chaꞌan i pejcañob Herodes. Ñaxan tiꞌ pejcʌyob juntiquil ñuc bʌ ajtroñel i chaꞌan Herodes Blasto bʌ i cꞌabaꞌ. Tiꞌ pʌsꞌeyob tyaqꞌuin chaꞌan miꞌ cotyañob ti tꞌan tiꞌ tyojlel Herodes chaꞌan miꞌ lajmel i michꞌlel.

21 Cheꞌ jini Herodes tiꞌ subeyob chʌ bʌ ti qꞌuin mi muchꞌquiñob i bʌ jini loqꞌuemoꞌ bʌ ti Tiro yicꞌot Sidón. Ti jim bʌ qꞌuin tiꞌ xojo yoque cꞌotyajax bʌ i pislel bajcheꞌ miꞌ xojob ñoj ñuc bʌ yumʌlob. Ti buchle ti colem bʌ i buchlib. Tiꞌ wen pejcʌyob.

22 Cheꞌ jini pejtyel jini muchꞌquibiloꞌ bʌ quixtyañujob ti quejiyob ti cꞌam bʌ tꞌan. Mach quixtyañujic muꞌ bʌ ti tꞌan. Jiñʌch juntiquil dios, cheꞌ tiꞌ lolon alʌyob.

23 Ti jini jach bʌ ora juntiquil ajtroñel i chaꞌan Dios chꞌoyol bʌ ti panchan tiꞌ cꞌamisʌ Herodes como maꞌan tiꞌ qꞌuele ti ñuc Dios pero ti yʌcꞌʌ i bʌ ti chꞌujutisʌntyel. Cheꞌ bajcheꞌ Dios tiꞌ lolon mele i bʌ. Motsoꞌ tiꞌ cꞌuxbe i bʌcꞌtyal Herodes. Ti sajti.

24 Pero i tꞌan Dios tiꞌ bej pujqui majlel. Jini ochemoꞌ bʌ tiꞌ tꞌan Dios tiꞌ chʌc subu majlel baꞌical.

25 Cheꞌ ñac jini Bernabé yicꞌot Saulo ti ujti i yʌqꞌuen añoꞌ bʌ ti Jerusalén jini tyaqꞌuin tsaꞌ bʌ i muchꞌquiyob jini añoꞌ bʌ ti Antioquía ti chaꞌ sujtiyob majlel ti Antioquía. Tiꞌ pʌyʌyob sujtyel Juan chaꞌchajplel bʌ i cꞌaba Marcos.