2 Jumpꞌej qꞌuin cheꞌ ñac mucꞌob ti chꞌajb chaꞌan machꞌan ti poj uchꞌiyob chʌncol i chꞌujutisañob Dios. Jini Chꞌujul bʌ i Chꞌujlel Dios tiꞌ pejcʌyob. Ti yʌlʌ: Laꞌ majlic Bernabé yicꞌot Saulo chaꞌan i chaꞌlibeñon c toñel mu bʌ c pʌsꞌeñob. Cheꞌ ti yʌlʌ Chꞌujul bʌ i Chꞌujlel Dios.

3 Cheꞌ tsaꞌix ujtiyob ti chꞌajb yicꞌot oración ti yʌcꞌʌyob i cꞌʌb tiꞌ jol Bernabé yicꞌot Saulo. Ti yʌqꞌueyob ti majlel.

4 Cheꞌ jini Bernabé yicꞌot Saulo ti majliyob cꞌʌlʌl ti lum Seleucia bʌ i cꞌabaꞌ cheꞌ bajcheꞌ tiꞌ xiqꞌui Chꞌujul bʌ i Chꞌujlel Dios. Cheꞌ jini ti ochiyob ti barco chaꞌan mi majlelob ti jumpꞌej lum joyol bʌ ti jaꞌ Chipre bʌ i cꞌabaꞌ.

5 Cheꞌ ñac ti cꞌotiyob yaꞌ ti jini lum yaꞌ ti lʌcꞌʌl tiꞌ jaꞌ Salamina bʌ i cꞌabaꞌ ti queji i subeñob i tꞌan Dios yaꞌ ti i templo tyac israelob. Yaꞌan Juan yicꞌotyob jeꞌel chaꞌan miꞌ cotyañob ti toñel.

6 Ti ñumiyob tiꞌ pettyʌlel ili lum joyol bʌ ti jaꞌ. Cꞌʌlʌl ti cꞌotiyob yaꞌ ti junxejlel lum Pafos bʌ i cꞌabaꞌ. Yaꞌ tiꞌ tyajayob juntiquil israel bʌ winic Barjesús bʌ i cꞌabaꞌ. Yujil wujt jini Barjesús. Cabʌl tiꞌ loti quixtyañujob como tiꞌ lolon subu i bʌ ti juntiquil tsaꞌ bʌ i xiqꞌui yʌleꞌ Dios.

7 Jini Barjesús ajtroñel i chaꞌan Sergio Paulo jini ñuc bʌ yumʌl yaꞌ ti ili lum. Wen an i ñaꞌtyʌbal jini Sergio Paulo. Cheꞌ jini tiꞌ xiqꞌui ti pʌyol Bernabé yicꞌot Saulo chaꞌan yom i yubin i tꞌan Dios.

8 Pero jini yujil bʌ wujt chaꞌchajp bʌ i cꞌabaꞌ Elimas tiꞌ tsꞌaꞌqꞌuele Bernabé yicꞌot Saulo como mach yom i yʌqꞌuen i chꞌujbin i tꞌan Dios jini ñuc bʌ yumʌl.

9 Butꞌul i pusicꞌal Pablo ti Chꞌujul bʌ i Chꞌujlel Dios. Cheꞌ jini Saulo, chaꞌchajplel bʌ i cꞌabaꞌ Pablo, tiꞌ chꞌuj qꞌuele jini yujil bʌ wujt.

10 Ti yʌlʌ: Xlotyet. Simaroñet. I yalobilet xiba. Maꞌ chʌc contrajin pejtyel chʌ bʌ wen. ¿Chucoch maꞌ lolon jopꞌ a chʌc mʌctyan jini yomoꞌ bʌ i chꞌujbin lac Yum?

11 Wale, cheꞌ jini, lac Yum mi quej i yʌqꞌueñet a xotꞌ a mul. Mi quej a wochel ti xpojtsꞌ. Maꞌan mi quej a poj ilan i sʌclel pañimil. Cheꞌ ti subenti Barjesús. Ora jach ti waꞌ sujti ti xpojtsꞌ. An ti icꞌtꞌojñal. Ti queji i xucꞌul sʌclan juntiquil muꞌ bʌ i chucben i cꞌʌb i cotyan ti xʌmbal como mach chꞌujbi i yilan pañimil.

12 Cheꞌ ñac ti yilʌ jini ñuc bʌ yumʌl bajcheꞌ ti ujti, tiꞌ chꞌujbi Jesús tiꞌ pusicꞌal. Como tyoj bʌcꞌñʌjel chaꞌan i tꞌan Dios cheꞌ bajcheꞌ tiꞌ cʌntisʌyob jini Bernabé yicꞌot Saulo.

13 Pablo yicꞌot tsaꞌ bʌ piꞌleyob majlel ti xʌmbal ti ochiyob ti barco yaꞌ ti Pafos. Ti ñumiyob majlel ti jaꞌ jintyo ti cꞌotiyob ti yambʌ lum Perge bʌ i cꞌabaꞌ yaꞌ ti lʌcꞌʌlel i tiꞌ jini pañimil Panfilia bʌ i cꞌabaꞌ. Juan tiꞌ cʌyʌyob yaꞌi. Ti bajñel sujti ti Jerusalén.

14 Cheꞌ jini Saulo yicꞌot Bernabé ti loqꞌuiyob majlel ti Perge. Ti cꞌotiyob yaꞌ ti lum Antioquía bʌ i cꞌabaꞌ yaꞌ ti pañimil Pisidia bʌ i cꞌabaꞌ. Ti i qꞌuinilel cꞌaj oj ti ochiyob ti jumpꞌej i templo israelob. Ti buchleyob.

15 Cheꞌ ñac ti ujti i qꞌuelbeñob tsꞌijbubil bʌ i mandar tsaꞌ bʌ i cʌybeyob Moisés yicꞌot tsꞌijbubil bʌ i tꞌan jini tsaꞌ bʌ i xiqꞌui i yʌleꞌ Dios ti ñoj oniyix, jini añoꞌ bʌ yeꞌtyel yaꞌ ti jini templo tiꞌ chocoyob majlel tꞌan yaꞌ baꞌ buchul Saulo yicꞌot Bernabé. Ti yʌlʌ: Piꞌʌlob, mi an chʌ bʌ a wom a subeñob quixtyañujob chaꞌan miꞌ ñuc isʌbeñob i pusicꞌal, chꞌujbiyʌch a subeñob wale iliyi, cheꞌ ti yʌlʌyob.

16 Cheꞌ jini Pablo ti waꞌle. Tiꞌ pʌsꞌeyob i cꞌʌb chaꞌan ñʌchꞌtyʌlob. Cheꞌ jini ti queji ti tꞌan. Ti yʌlʌ: Ñʌchꞌtyanla israelet bʌ la yicꞌot mach bʌ israeletla muꞌ bʌ laꞌ qꞌuel ti ñuc Dios.

17 Jini Dios muꞌ bʌ lac chꞌujbin israelon bʌ la tiꞌ yajcʌ lac yumob ti ñoj oniyix chaꞌan yoque i chaꞌañʌch. Ti ocꞌʌyob. Ti qꞌuejliyob ti wen como Dios tiꞌ wen cotyʌyob. Cheꞌ ñac yaꞌ tyo añob ti Egipto, Dios tiꞌ pʌsꞌeyob loqꞌuel ti i pꞌʌtyʌlel.

18 Cꞌʌlʌl cuarenta jab Dios tiꞌ cuchu pejtyel i melbalob yaꞌ ti tyʌquin bʌ joch lum.

19 Dios tiꞌ jisʌ siete yumʌlob yaꞌ ti jini pañimil Canaán bʌ i cꞌabaꞌ chaꞌan mi yʌqꞌuen i lumalob jini lac yumob ti ñoj oniyix.

20 Cheꞌ jini cꞌʌlʌl cuatrocientos cincuenta jabil Dios tiꞌ waꞌchoco jueces tsaꞌ bʌ ochiyob ti yumʌl. Chʌꞌʌch ti ujti cꞌʌlʌl jintyo ti ochi ti yeꞌtyel juntiquil tsaꞌ bʌ i xiqꞌui yʌleꞌ Dios Samuel bʌ i cꞌabaꞌ.

21 Cheꞌ jini lac yumob ti ñoj oniyix tiꞌ cꞌajtibeyob Dios chaꞌan mi yʌqꞌueñob juntiquil rey muꞌ bʌ i yochel ti yumʌl. Cheꞌ jini Dios ti yotsʌ ti yeꞌtyel juntiquil i yalobil Cis, Saúl bʌ i cꞌabaꞌ. Jini Saúl jiñʌch i jiñʌjlel juntiquil lac yumob ti ñoj oniyix Benjamín bʌ i cꞌabaꞌ. Cꞌʌlʌl cuarenta jab an yeꞌtyel jini Saúl.

22 Cheꞌ jini Dios tiꞌ qꞌuextyʌ ti yeꞌtyel Saúl. Ti yotsʌ juntiquil David bʌ i cꞌabaꞌ tiꞌ qꞌuexol. Dios tiꞌ tyaja ti tꞌan jini David. Ti yʌlʌ: Cujil isujm jini David i yalobil Isaí, jiñʌch juntiquil muꞌ bʌ c wen mulan bajcheꞌ miꞌ chʌc mel. Mi quej i chʌc chꞌujbibeñon pejtyel c xicꞌojel. Cheꞌ ti yʌlʌ Dios, cheꞌ Pablo.

23 Pablo ti bej alʌ: Jesús, jiñʌch juntiquil i jiñʌjlel David. Cheꞌ jini, cheꞌ bajcheꞌ ti wʌ alʌ Dios ti ñoj oniyix ti yotsʌ ti yeꞌtyel Jesús chaꞌan ajcotyayaj i chaꞌan bʌ israelob.

24 Cheꞌ ñac max tyo ti queji ti cʌntisa Jesús, Juan tiꞌ subeyob pejtyelel israelob chaꞌan yom i chꞌʌm jaꞌ chaꞌan tsiquil tiꞌ cʌyʌyob i mul.

25 Cheꞌ ñac maꞌix jal mach sajt, Juan ti yʌlʌ: Jatyetla chʌncol laꞌ lolon pensalin joñoñʌch jini chʌncol bʌ laꞌ pijtyan. Mach joñonic. Pero tyal tyo jini yambʌ. Joñon maꞌ sajlic c ñuclel chaꞌan mic ticꞌben i zapatos como wen ñuc jini yambʌ. Joñon machꞌan ñucon. Cheꞌ ti yʌlʌ Juan, cheꞌ Pablo.

26 Pablo tiꞌ bej chaꞌle tꞌan. Ti yʌlʌ: Piꞌʌlob, i jiñʌjlelet bʌ la Abraham yicꞌot pejtyel mach bʌ israeletla muꞌ bʌ laꞌ qꞌuel ti ñuc Dios. Jiñʌch lac chaꞌan pejtyelonla jini tꞌan chaꞌan bajcheꞌ mi lac tyaj laj cotyʌntyel.

27 Jini añoꞌ bʌ ti Jerusalén yicꞌot jini yumʌlob i chaꞌan, maꞌan tiꞌ ñaꞌtyʌyob majchqui jini Jesús. Maꞌan tiꞌ chꞌʌmbeyob isujm i tsꞌijbujel jini tsaꞌ bʌ i xiqꞌue yʌleꞌ Dios ti ñoj oniyix tsaꞌ bʌ subentiyob yaꞌ tiꞌ templo israelob ti jujumpꞌej i qꞌuinilel cꞌaj oj. Jiñob tsaꞌ bʌ wen yubiyob jini tꞌan ti yʌcꞌʌyob ti tsictiyel bajcheꞌ tsꞌijbubil cheꞌ ñac ti yʌcꞌʌ ti sajtyel Jesús.

28 Aunque mach sajlic an i mul Jesús pero jiñob tiꞌ cꞌajtibeyob Pilato chaꞌan mi yʌcꞌ ti sajtyel Jesús.

29 Cheꞌ jini ti ujti pejtyel jini wʌ tsꞌijbubil tiꞌ tꞌan Dios chaꞌan bajcheꞌ mi quej i sajtyel Jesús. Cheꞌ jini, tiꞌ juꞌsʌyob ti cruz Jesús cheꞌ ñac sajtyemix. Tiꞌ chꞌujñʌyob ti muconibʌl piquil bʌ ti mal tyun.

30 Pero Dios tiꞌ tyeche loqꞌuel baꞌan sajtyemoꞌ bʌ.

31 Cꞌʌlʌl ti ñumi cabʌl qꞌuin Jesús tiꞌ pʌsʌ i bʌ baꞌan tsaꞌ bʌ piꞌleyob ti xʌmbal cꞌʌlʌl ti Galilea cꞌʌlʌl ti Jerusalén. Wale jiñobʌch jini chʌncol bʌ i subeñob quixtyañujob pejtyel chʌ bʌ ti yilʌyob yicꞌot pejtyel tsaꞌ bʌ i yʌlʌ Jesús.

32-33 Wale Bernabé quicꞌot wʌꞌ ti tyʌliyon lojon chaꞌan mi lojon c subeñetla jini wen bʌ tꞌan. Pejtyel tsaꞌ bʌ i wʌ alʌ Dios cheꞌ ñac tiꞌ pejcʌ lac yumob ti ñoj oniyix tsaꞌix i tsꞌʌctisʌ wale iliyi chaꞌañonla i jiñʌjlelonla. Chʌꞌʌch ti tsꞌʌctisʌ cheꞌ ñac ti chaꞌ tyejchi loqꞌuel Jesús baꞌan sajtyemoꞌ bʌ. Ti tsꞌijbubil bʌ i tꞌan Dios yaꞌ ti chaꞌpꞌejlel bʌ salmo miꞌ tyaj ti tꞌan Jesús baꞌ mi yʌleꞌ: Jatyet, calobiletyʌch. Ti jim bʌ qꞌuin tsaꞌix cʌqꞌueyet a cuxtyʌlel. Cheꞌ ti yʌlʌ Dios, cheꞌ Pablo.

34 Pablo ti bej alʌ: Dios ti wʌ alʌ chaꞌan mi quej i chaꞌ tyejchel loqꞌuel Jesús baꞌan sajtyemoꞌ bʌ chaꞌan maꞌan mi pʌcꞌmʌl i bʌcꞌtyal. Chʌꞌʌch ti yʌlʌ Dios ti jini tsꞌijbubil bʌ i tꞌan baꞌ mi yʌleꞌ: Mi quej cʌqꞌueñet i yutslel c pusicꞌal cheꞌ bajcheꞌ tic wʌ sube jini David, cheꞌen.

35 Yaꞌ ti yambʌ salmos bʌ jun mi yʌl: Maꞌan mi quej a wʌcꞌ ti pʌcꞌmʌl i bʌcꞌtyal jini pꞌuntyʌbil bʌ ajtroñel a chaꞌan. Cheꞌ mi yʌl ti salmos bʌ jun, cheꞌen Pablo.

36 Tiꞌ bej chaꞌle tꞌan Pablo. Ti yʌlʌ: Ñoj melelʌch David tiꞌ wen chaꞌle i toñel bajcheꞌ tiꞌ xiqꞌui Dios yaꞌ tiꞌ tyojlel i piꞌʌlob. Pero ti wiꞌil ti sajti. Ti chꞌujñʌnti yaꞌ tiꞌ tꞌejl i yumob ti ñoj oniyix. Ti pʌcꞌmi i bʌcꞌtyal.

37 Pero maꞌan ti pʌcꞌmi i bʌcꞌtyal jini tsaꞌ bʌ i tyechi loqꞌuel Dios baꞌan sajtyemoꞌ bʌ.

38 Ubinla, piꞌʌlob. Yom mi laꞌ wen chꞌʌmꞌen isujm chaꞌan ti Jesús mi lac tyaj i ñusʌntyel lac mul. Jiñʌch jini chʌncol bʌ lac tsictisʌbentyel.

39 Mach chꞌujbi lac tyaj i ñusʌntyel lac mul chaꞌan ti lac chꞌujbi mandar tyac tsaꞌ bʌ aqꞌuenti Moisés ti Dios. Pero pejtyelel muꞌ bʌ i chꞌujbiñob Jesús mi ñusʌbentyelob i mul.

40 Yom mi laꞌ wen qꞌuel laꞌ bʌ chaꞌan mach ujtiquetla bajcheꞌ mi yʌleꞌ ti i tsꞌijbujel jini tsaꞌ bʌ i xiqꞌui yʌleꞌ Dios ti ñoj oniyix.

41 Como jiñobʌch tiꞌ tsꞌijbu:

42 Ti loqꞌuiyob majlel ti i templo israelob Pablo yicꞌot jini tsaꞌ bʌ tsʌcle ti xʌmbal. Jini mach bʌ israelob tiꞌ cꞌajtibeyob chaꞌan chaꞌ tyʌlicob ti tyal tyo bʌ i qꞌuinilel cꞌaj oj chaꞌan miꞌ más subeñob ili tꞌan.

43 Cheꞌ ñac pejtyel quixtyañujob ti loqꞌui majlel tiꞌ templo israelob cabʌl israelob yicꞌot mach bʌ israelob tsaꞌ bʌ i qꞌuextyʌyob i pusicꞌal chaꞌan i chꞌujbiñob ti jumpꞌej jach i pusicꞌal bajcheꞌ miꞌ chꞌujbin israelob tiꞌ tsʌcleyob majlel Pablo yicꞌot Bernabé. Pablo tiꞌ wen subeyob chaꞌan miꞌ chʌc xucꞌchocoñob i pusicꞌal ti i pꞌuntyaya Dios.

44 Cheꞌ ñac ti chaꞌ cꞌoti i qꞌuinilel cꞌaj oj yomox i tyaj pejtyelel quixtyañujob yaꞌ ti ili lum tiꞌ muchꞌquiyob i bʌ chaꞌan mi yubiñob i tꞌan Dios.

45 Jini yambʌ israelob ti yilʌ bajcheꞌ tiꞌ wen muchꞌquiyob i bʌ yonlel quixtyañujob. Cheꞌ jini ti queji i tsꞌaꞌqꞌuelob Pablo como maꞌan tiꞌ mulʌyob bajcheꞌ chʌncol i ñʌchꞌtyʌbeñob i tꞌan quixtyañujob. Tiꞌ contrajiyob i tꞌan. Tiꞌ wen wajleyob.

46 Más chꞌejl tiꞌ jacꞌʌyob Pablo yicꞌot Bernabé. Ti yʌlʌyob: Chʌꞌʌch yom bajcheꞌ ti ujti chaꞌan mi laꞌ ñaxan subentyel i tꞌan Dios jatyetla israelet bʌ la. Pero mach laꞌ wom laꞌ chꞌujbin. Mi chʌꞌʌch, cheꞌ jini, laꞌ bʌjʌch maꞌan mi quej laꞌ wʌqꞌuentyel laꞌ cuxtyʌlel machꞌʌ yujil jilel. Cheꞌ jini mux lojon c loqꞌuel majlel baꞌ añetla. Mux lojon c majlel baꞌan jini mach bʌ israelob.

47 Como chʌꞌʌch tiꞌ xiqꞌuiyon lojon lac Yum ti i tꞌan baꞌ mi yʌleꞌ:

48 Wen cꞌajacñayob i yoj jini mach bʌ israelob cheꞌ ñac ti yubiyob i tꞌan Pablo. Ti yʌlʌyob: Wen cꞌotyajax i tꞌan lac Yum, cheꞌob. Pejtyelob jini tsaꞌ bʌ yajcʌnti chaꞌan miꞌ tyajob i cuxtyʌlel machꞌʌ yujil jilel tiꞌ chꞌujbibeyob i tꞌan.

49 Chʌꞌʌch tiꞌ subuyob ñumel i tꞌan lac Yum ti pejtyelel pañimil.

50 Jini israelob ti queji i xicꞌob i contrajiñob Pablo yicꞌot Bernabé jini winicob añoꞌ bʌ yeꞌtyel yaꞌ ti ili lum. Chʌꞌʌch jeꞌel tiꞌ xiqꞌuiyob i contrajiñob Pablo yicꞌot Bernabé xꞌixicob chʌc cꞌajalob i chaꞌan Dios muꞌ bʌ qꞌuejlelob ti wen. Cheꞌ jini, jiñob añoꞌ bʌ yeꞌtyel yicꞌot jini xꞌixicob tiꞌ xiqꞌuiyob chaꞌan miꞌ tsꞌaꞌqꞌuel Pablo yicꞌot Bernabé pejtyel quixtyañujob jintyo tiꞌ chocoyob loqꞌuel yaꞌ ti jini lum.

51 Cheꞌ jini Pablo yicꞌot Bernabé tiꞌ chijcuyob loqꞌuel i tsꞌujbejñal i zapatos. Ti ñoj oniyix chʌꞌʌch tiꞌ chaꞌleyob chaꞌan i señʌjlel mach saj wen bajcheꞌ tiꞌ chaꞌleyob ili quixtyañujob. Cheꞌ jini Bernabé yicꞌot Pablo ti majliyob ti yambʌ lum Iconio bʌ i cꞌabaꞌ.

52 Wen cꞌajacñayob i yoj pejtyel ochemoꞌ bʌ tiꞌ tꞌan Dios yaꞌ ti Antioquía. Butꞌulob i pusicꞌal ti Chꞌujul bʌ i Chꞌujlel Dios.