2 Pero jini israelob machꞌʌ baꞌan tiꞌ chꞌujbiyob i tꞌan Dios tiꞌ ñijcʌyob jini mach bʌ israelob chaꞌan miꞌ tsꞌaꞌqꞌuel jini ochemoꞌ bʌ tiꞌ tꞌan Dios.

3 Tsꞌityaꞌ jal ti cʌyleyob Pablo yicꞌot Bernabé. Ti jumpꞌejlob i pusicꞌal chʌc cꞌajalob i chaꞌan Dios. Wen chꞌejl tiꞌ chaꞌleyob subtꞌan. Tiꞌ wen subeyob quixtyañujob chaꞌan i pꞌuntyaya Dios. Dios ti yʌqꞌueyob i pʌs ñuc bʌ i pꞌʌtyʌlel chaꞌan tsiquilʌch tyʌlem ti Dios jini i tꞌañob.

4 Mach junlajal i pensal ili quixtyañujob yaꞌ ti ili lum. Lamital tiꞌ lajayob i tꞌan yicꞌot israelob. Jini yambʌ lamital yicꞌot jini yajcʌbiloꞌ bʌ ajsubtꞌañob ñumel.

5 Jini mach bʌ israelob tiꞌ lajayob i tꞌañob yicꞌot israelob yicꞌot añoꞌ bʌ yeꞌtyel chaꞌan miꞌ tsꞌaꞌqꞌuelob yicꞌot chaꞌan miꞌ julob ti tyun jini yajcʌbiloꞌ bʌ ajsubtꞌañob ñumel.

6 Pero Pablo yicꞌot Bernabé ti yubiyob bajcheꞌ chʌncol i lajob i tꞌan ili quixtyañujob. Jin chaꞌan ti putsꞌiyob ti jini pañimil Licaonia bʌ i cꞌabaꞌ. Yaꞌ ti ochiyob ti lum tyac Listra yicꞌot Derbe bʌ i cꞌabaꞌ yicꞌot yambʌ lʌcꞌʌl tyac bʌ lum.

7 Yaꞌi tiꞌ wen subeyob jeꞌel bajcheꞌ mi lac tyaj laj cotyʌntyel ti Jesús.

8 Yaꞌ ti Listra an juntiquil winic mach bʌ chꞌujbi i chaꞌlen xʌmbal. Beleꞌ buchul jach. Cꞌʌlʌl cheꞌ ñac ti chꞌocʌ maꞌan i cꞌʌjñibal yoc. Machꞌan baꞌ bʌ ora tiꞌ chaꞌle xʌmbal.

9 Chʌncol i wen ñʌchꞌtyʌben i tꞌan Pablo jini winic. Pablo tiꞌ chꞌuj qꞌuele. Tiꞌ ñaꞌtyʌ tiꞌ pusicꞌal chaꞌan ili cꞌam bʌ yi tiꞌ chꞌujbi tiꞌ pusicꞌal chaꞌan chꞌujbiyʌch i lajmel.

10 Cheꞌ jini tiꞌ pejcʌ Pablo jini winic. Waꞌi, cheꞌen. Jini winic ti tijpꞌi waꞌtyʌl. Ti queji ti xʌmbal.

11 Cheꞌ ti yilʌyob chʌ bʌ tiꞌ chaꞌle Pablo, jini quixtyañujob ti quejiyob ti cꞌam bʌ tꞌan ti tꞌan Licaonia. Ti yʌlʌyob: Tsaꞌix jubi tyʌlel diosob cheꞌ yilal bajcheꞌ quixtyañu. Cheꞌ ti yʌlʌyob.

12 I cꞌabaꞌ i diosob jiñʌch Júpiter yicꞌot Mercurio. Jin chaꞌan ti yotsʌbeyob i cꞌabaꞌ Bernabé ti Júpiter yicꞌot i cꞌabaꞌ Pablo ti Mercurio. Chʌꞌʌch ti yotsʌbeyob i cꞌabaꞌ Pablo como jini tiꞌ más chaꞌle tꞌan.

13 Yaꞌ ti tiꞌ jini lum an i templo i dios Júpiter bʌ i cꞌabaꞌ. Juntiquil cura i chaꞌan bʌ ili templo tiꞌ pʌyʌ tyʌlel chaꞌcojt uxcojt tyat wacax. Tiꞌ chꞌʌmʌ tyʌlel jeꞌel cabʌl nich pimel. Jini quixtyañujob yicꞌot jini cura yomob i tsʌnsan jini wacax chaꞌan tsʌnsʌbil bʌ i majtyan Pablo yicꞌot Bernabé. Chʌꞌʌch bajcheꞌ jini yom i chꞌujutisañob.

14 Cheꞌ ñac jini yajcʌbiloꞌ bʌ ajsubtꞌañob ñumel Pablo yicꞌot Bernabé tiꞌ chꞌʌmꞌe isujm chʌ bʌ chʌncol i melob ili quixtyañujob, ti queji i bajñel tsil i pislel. Ti ñoj oniyix chʌꞌʌch tiꞌ chaꞌleyob chaꞌan i señʌjlel mach saj wen mi yilan bajcheꞌ chʌncol i mel quixtyañujob. Ajñel ti ochiyob yaꞌ baꞌañob. Ti cꞌam bʌ tꞌan ti yʌlʌyob.

15 Piꞌʌlob. Mach yom laꞌ chaꞌlen cheꞌ bajcheꞌ jini. Winicon lojon jeꞌel lajal cheꞌ bajcheꞌetla. Ti tyʌliyon lojon chaꞌan mi lojon c subeñetla yom laꞌ cʌy jini lolom jach bʌ. Yom laꞌ chꞌujbin cuxul bʌ Dios. Jiñʌch jini tsaꞌ bʌ i mele pejtyel lum yicꞌot chan yicꞌot colem jaꞌ tyac yicꞌot pejtyel chʌ bʌ tyac an.

16 Ti ñoj oniyix Dios ti yʌqꞌueyob i mel bajcheꞌ jach yom quixtyañujob.

17 Pero Dios tiꞌ chʌc chaꞌle wen tyac bʌ chaꞌan miꞌ tsictisan Diosʌch. Mi yʌqꞌueñonla jaꞌal. Mi yʌqꞌueñonla i wen colel lac pʌcꞌʌb. Mi yʌqꞌueñonla chʌ bʌ yom chaꞌan la cuchꞌel yicꞌot mi yʌqꞌueñonla cꞌajacña bʌ la coj.

18 Aunque cheꞌ ti yʌlʌ Bernabé yicꞌot Pablo wocol tiꞌ mʌctyʌbe quixtyañujob chaꞌan machꞌan miꞌ tsʌnsañob tyat wacax chaꞌan tsʌnsʌbil bʌ i majtyan chaꞌan miꞌ chꞌujutisañob.

19 Cheꞌ jini ti cꞌoti israelob chꞌoyoloꞌ bʌ ti Antioquía yicꞌot yaꞌ ti Iconio. Jiñob ti queji i wen pejcañob quixtyañujob jintyo jini quixtyañujob ti quejiyob i tsꞌaꞌqꞌuelob Bernabé yicꞌot Pablo. Cheꞌ jini tiꞌ juluyob ti tyun Pablo. Tiꞌ tsʌnsʌ tiꞌ lolon ñaꞌtyʌyob. Tiꞌ tyujcꞌʌyob loqꞌuel yaꞌ ti tiꞌ lum baꞌ tiꞌ cʌyʌyob.

20 Jini ochemoꞌ bʌ tiꞌ tꞌan Dios tiꞌ muchꞌquiyob i bʌ yaꞌ tiꞌ tꞌejl Pablo yaꞌ baꞌ tyotsꞌol. Cheꞌ jini ti tyejchi. Ti chaꞌ ochi yaꞌ ti lum. Ti yijcꞌʌlel Pablo yicꞌot Bernabé ti loqꞌuiyob majlel chaꞌan mi majlelob yaꞌ ti Derbe.

21 Yaꞌi tiꞌ wen sube quixtyañujob bajcheꞌ miꞌ tyajob i cotyʌntyel ti Jesús. Cabʌl tiꞌ chꞌujbiyob chaꞌan ti caj i tꞌan. Cheꞌ jini Pablo yicꞌot Bernabé ti chaꞌ sujtiyob yaꞌ ti Listra yicꞌot yaꞌ ti Iconio yicꞌot yaꞌ ti Antioquía.

22 Yaꞌ baꞌ ti ñumiyob tiꞌ wen tsictisʌbeyob i tꞌan Dios jini ochemoꞌ bʌ tiꞌ tꞌan Dios. Tiꞌ subeyob chaꞌan miꞌ wen xucꞌchocoñob i pusicꞌal tiꞌ tꞌan Dios. Tiꞌ subeyob chaꞌan ochicob ti i yumintyel Dios añʌch chaꞌan i wersa ñusañob wocol. Chʌꞌʌch ti yʌlʌyob Bernabé yicꞌot Pablo.

23 Yaꞌ ti jujumpꞌej templo tiꞌ waꞌchocoyob ancianojob chaꞌan i chꞌʌm i yeꞌtyel ti templo. Cheꞌ jini tiꞌ chaꞌleyob oración yicꞌot tiꞌ poj cʌyʌyob uchꞌel. Cheꞌ jini ti yʌlʌyob: Laꞌ i chʌc cotyañetla lac Yum jini tsaꞌ bʌ laꞌ chꞌujbi ti pejtyel laꞌ pusicꞌal. Cheꞌ ti yʌlʌyob.

24 Ti ñumi ti pejtyelel pañimil Pisidia bʌ i cꞌabaꞌ. Ti cꞌotiyob yaꞌ ti jini yambʌ pañimil Panfilia bʌ i cꞌabaꞌ.

25 Tiꞌ chaꞌleyob subtꞌan yaꞌ ti jini lum Perge bʌ i cꞌabaꞌ. Cheꞌ jini ti loqꞌuiyob majlel chaꞌan mi cꞌotyel yaꞌ ti yambʌ lum Atalia bʌ i cꞌabaꞌ.

26 Yaꞌi ti ochiyob ti barco. Ti sujtiyob ti Antioquía. Jiñʌch baꞌ ti ñaxan loqꞌuiyob majlel ti subtꞌan ñumel. Ti jim bʌ qꞌuin cheꞌ ñac ti ñaxan loqꞌuiyob majlel pejtyel jini ochemoꞌ bʌ tiꞌ tꞌan Dios tiꞌ wen chaꞌleyob oración chaꞌan miꞌ cꞌajtiben Dios i cotyañob ti subtꞌan ñumel. Wale, cheꞌ jini, ujtyem ili i toñel. Ti chaꞌ juliyob.

27 Cheꞌ ñac ti cꞌotiyob yaꞌ ti Antioquía tiꞌ wen muchꞌquiyob i bʌ ti pejtyel ochemoꞌ bʌ tiꞌ tꞌan Dios. Pablo yicꞌot Bernabé tiꞌ subeyob pejtyel bajcheꞌ tiꞌ mele Dios yicꞌotyob, bajcheꞌ Dios tiꞌ nijcʌbeyob i pusicꞌal jini mach bʌ israelob chaꞌan i yochel tiꞌ tꞌan Dios jeꞌel.

28 Mero jal ti cʌyle Pablo yicꞌot Bernabé yaꞌ yicꞌot jini ochemoꞌ bʌ tiꞌ tꞌan Dios.