2 Pablo yicꞌot Bernabé cʌlʌx tiꞌ chaꞌleyob tꞌan yicꞌot jini tsijib julemoꞌ bʌ tsaꞌ bʌ i lolon xiqꞌuiyob i chꞌʌm tsep pʌchʌlel. Jin chaꞌan jini ochemoꞌ bʌ tiꞌ tꞌan Dios tiꞌ lajayob i tꞌan chaꞌan Pablo yicꞌot Bernabé yicꞌot yambʌ juntiquil chaꞌtiquilob mi majlel yaꞌ ti Jerusalén chaꞌan miꞌ wen pejcañob jini yajcʌbiloꞌ bʌ ajsubtꞌañob ñumel yicꞌot añoꞌ bʌ yeꞌtyel ti templo chaꞌan yaꞌ miꞌ lajob i tꞌan chaꞌan bajcheꞌ yom lajmic jini tꞌan chaꞌan tsep pʌchʌlel.

3 Jini ochemoꞌ bʌ tiꞌ tꞌan Dios yaꞌ ti Antioquía tiꞌ xiqꞌuiyob majlel. Yaꞌ ti bij ti ñumiyob yaꞌ ti pañimil tyac Fenicia bʌ i cꞌabaꞌ yicꞌot Samaria bʌ i cꞌabaꞌ. Baꞌical jach ti ñumiyob tiꞌ wen subuyob bajcheꞌ jini mach bʌ israelob tiꞌ cʌyʌyob oñiyix bʌ tꞌan chaꞌan miꞌ chꞌujbiñob Dios. Wen cꞌajacñayob i yoj pejtyel ochemoꞌ bʌ tiꞌ tꞌan Dios cheꞌ ñac ti yubiyob jini tꞌan.

4 Jini yajcʌbiloꞌ bʌ ajsubtꞌañob ñumel yicꞌot ancianojob yicꞌot ochemoꞌ bʌ tiꞌ tꞌan Dios yaꞌ ti Jerusalén, luꞌ cꞌajacñayob i yoj ti yubiyob cheꞌ ñac ti cꞌoti Bernabé yicꞌot Pablo. Cheꞌ jini Bernabé yicꞌot Pablo tiꞌ subeyob pejtyel bajcheꞌ Dios tiꞌ cꞌʌñʌyob ti toñel.

5 Yaꞌan juntiquil chaꞌtiquil fariseojoꞌ bʌ winicob ochemoꞌ bʌ tiꞌ tꞌan Dios jeꞌel. Jini fariseojob jiñʌch jini tsaꞌ bʌ i wersa chꞌujbibeyob pejtyel i mandar tyac Moisés. Cheꞌ jini, jiñob tiꞌ waꞌleyob. Ti yʌlʌyob: Jini mach bʌ israelob tsaꞌ bʌ ochiyob tiꞌ tꞌan Dios wersa yom mi tsepbentyelob i pʌchʌlel. Yom mi laꞌ xicꞌbeñob jeꞌel chaꞌan miꞌ chꞌujbiñob jini i mandar Moisés. Cheꞌ ti yʌlʌyob.

6 Jini yajcʌbiloꞌ bʌ ajsubtꞌañob ñumel yicꞌot ancianojob tiꞌ bajñel muchꞌquiyob i bʌ chaꞌan miꞌ wen pensaliñob bajcheꞌ yom i jacꞌob.

7 Cheꞌ ñac ti ujtiyob ti cabʌl tꞌan, Pedro ti waꞌle. Ti yʌlʌ: Hermañujob, wen laꞌ wujil chaꞌan wajali Dios ti yajcʌyon loqꞌuel ti laꞌ tyojlel chaꞌan mic subeñob mach bʌ israelob bajcheꞌ miꞌ tyajob i cotyʌntyel ti Jesús chaꞌan mi yochelob tiꞌ tꞌan Dios jeꞌel.

8 Dios miꞌ ñaꞌtyan chʌ bʌ an tiꞌ pusicꞌal pejtyel quixtyañujob. Dios tiꞌ pʌsʌ chaꞌan melelʌch ochem tiꞌ tꞌan Dios jini mach bʌ israelob como ti yʌqꞌueyob jini Chꞌujul bʌ i Chꞌujlel Dios lajal cheꞌ bajcheꞌ ti yʌcꞌonla.

9 Mach saj partejic bajcheꞌ tiꞌ qꞌueleyonla Dios yicꞌot bajcheꞌ tiꞌ qꞌueleyob jeꞌel. Junlajal miꞌ qꞌuelonla Dios. Tiꞌ sʌc isʌbeyob i pusicꞌal jeꞌel cheꞌ ñac tiꞌ chꞌujbiyob Jesús.

10 Cheꞌ bajcheꞌ chʌncox a wʌleꞌ mach wen bajcheꞌ tiꞌ chaꞌle Dios yubil. Chʌncol a lolon chʌc xiqꞌueꞌ jini mach bʌ israelob ochemoꞌ bʌ tiꞌ tꞌan Dios chaꞌan miꞌ wersa chaꞌlen yan tyac bʌ. Jini lac yumob ti ñoj oniyix mach chꞌujbi i luꞌ meleꞌ bajcheꞌ jini. Mi joñonicla jeꞌel. Mach chꞌujbi lac luꞌ tsꞌʌctisan jini oniyix bʌ ticꞌojel.

11 Pero mach cheꞌic yom. Joñonla la cujil isujm chaꞌan lac Yum Jesucristo miꞌ cotyañonla chaꞌan jach ti yutslel i pusicꞌal. Chʌꞌʌch lajal ti cotyʌntiyob jeꞌel. Ti lac majtyan jach tiꞌ cotyʌyonla. Cheꞌ ti yʌlʌ Pedro.

12 Cheꞌ jini ti lajmiyob ti tꞌan. Tiꞌ luꞌ ñʌchꞌtyʌbeyob i tꞌan Bernabé yicꞌot Pablo cheꞌ ñac tiꞌ wen tsictisʌbeyob bajcheꞌ tiꞌ pʌsʌ Dios ñuc tyac bʌ i pꞌʌtyʌlel tiꞌ cꞌʌbob yaꞌ tiꞌ tyojlel mach bʌ israelob.

13 Cheꞌ ñac ti ujti ti tꞌan Bernabé yicꞌot Pablo jini Jacobo ti yʌlʌ: Hermañujob, ñʌchꞌtyʌbeñon c tꞌan, cheꞌen.

14 Simón Pedro tsaꞌix i subonla chaꞌan cojach tyo tiꞌ qꞌueleyob Dios ti wen jini mach bʌ israelob. Dios ti yajcʌ loqꞌuel tiꞌ tyojlel muꞌ bʌ yochelob ti yalobilob Dios.

15 Lajalob jach i tꞌan jini tsaꞌ bʌ i xiqꞌui yʌleꞌ Dios ti ñoj oniyix. Chʌncox i yujtyel wale iliyi bajcheꞌ tiꞌ wʌ tsꞌijbuyob. Mi yʌleꞌ ti jini Tsꞌijbubil bʌ i Tꞌan Dios:

19 Cheꞌ jini, Jacobo tiꞌ bej chaꞌle tꞌan. Ti yʌlʌ: Joñon mic ñaꞌtyan mach yom lac xicꞌob ti tsepbentyel i pʌchʌlel jini mach bʌ israelob chʌncol bʌ i cʌy oniyix bʌ tꞌan chaꞌan mi yochelob tiꞌ tꞌan Dios.

20 Pero jasʌl mi ti lac melbeyob jun chaꞌan lac subeñob chaꞌan machꞌan miꞌ cꞌuxob chʌ bʌ jach tsaꞌ bʌ ajqꞌui ti melel jach bʌ dios tyac. Yicꞌot miꞌ wen cʌñʌtyañob i bʌ chaꞌan maꞌan tꞌan yicꞌot yambʌ ꞌixic, yicꞌot maꞌan miꞌ cꞌuxob yʌtsꞌʌl bʌ animal, yicꞌot maꞌan miꞌ cꞌuxob chꞌichꞌ.

21 Como cꞌʌlʌl ti ñoj oniyix yaꞌ ti jujumpꞌej lum ti jujumpꞌej qꞌuinilel cꞌaj oj an jini muꞌ bʌ i qꞌuelbeñob ti cꞌam bʌ tꞌan i mandar tyac Moisés. Miꞌ subeꞌ i sujmlel.

22 Jini yajcʌbiloꞌ bʌ ajsubtꞌañob ñumel yicꞌot ancianojob yicꞌot pejtyel ochemoꞌ bʌ tiꞌ tꞌan Dios tiꞌ lajayob i tꞌan chaꞌan mi yajcañob chaꞌtiquil winic muꞌ bʌ i chocob majlel yaꞌ ti Antioquía yicꞌot Pablo yicꞌot Bernabé. Ti yajcʌyob juntiquil Judas bʌ i cꞌabaꞌ chaꞌchajp bʌ i cꞌabaꞌ Barsabás. Ti yajcʌyob Silas jeꞌel. Pejtyel jini ochemoꞌ bʌ tiꞌ tꞌan Dios miꞌ wen qꞌuelob ti ñuc ti chaꞌticlel.

23 Tiꞌ chꞌʌmʌyob majlel jun muꞌ bʌ i yʌl: Yajcʌbilon lojon bʌ ajsubtꞌan ñumel yicꞌot ancianojob yicꞌot ochemoꞌ bʌ tiꞌ tꞌan Dios mi lojon c choc majlel saludos chaꞌan pejtyel mach bʌ israeleticla hermañujob yaꞌ ti Antioquía yicꞌot yaꞌ ti Siria yicꞌot yaꞌ ti Cilicia.

24 Tsaꞌix lojon cubi chaꞌtiquil uxtiquil winicob wʌ bʌ chꞌoyol wʌꞌi ti cꞌotiyob yaꞌyaꞌi. Chʌncol i lolon tyʌcꞌlañetla ti cabʌl tꞌan. Wale maꞌan mi laꞌ ñaꞌtyan bajcheꞌ yoque yom laꞌ chꞌujbin. Como chʌncol i lolon subeñetla chaꞌan yom mi laꞌ chꞌʌm tsep pʌchʌlel yicꞌot yom laꞌ jacꞌben pejtyel i mandar Moisés. Pero com lojon c subeñetla chaꞌan maꞌan ti lojon c chocoyob majlel. Maꞌan ti lojon c xiqꞌuiyob i cʌntisañetla cheꞌ bajcheꞌ jini.

25 Jin chaꞌan ti lojon c laja lojon c tꞌan chaꞌan mi lojon c yajcan winicob muꞌ bʌ i majlel i julaꞌ añetla. Mux i motin majlelob yicꞌot jini pꞌuntyʌbiloꞌ bʌ hermañujob Bernabé yicꞌot Pablo.

26 Cabʌl tsajniyob Bernabé yicꞌot Pablo yaꞌ baꞌ bʌbʌqꞌuen tsʌnsʌnticob chaꞌan tiꞌ chaꞌlibeyob i toñel lac Yum Jesucristo.

27 Chʌncol lojon c choc majlel Judas yicꞌot Silas chaꞌan miꞌ wen pejcañetla chaꞌan miꞌ más tsictisʌbeñetla i sujmlel jini tsaꞌ bʌ lojon c subetla ti jun.

28 Jini Chꞌujul bʌ i Chꞌujlel Dios tiꞌ wen cotyʌyon lojon c pensalin. Cheꞌ jini ti lojon c ñaꞌtyʌ chaꞌan mach yom mi lojon c lolon subeñetla cabʌl chʌ bʌ yom mi laꞌ mel. Jini jach mi lojon c subeñetla jini mandar wersa yom chꞌujbintic.

29 Jin jach jini mandar muꞌ bʌ i yʌleꞌ: Maꞌ mi laꞌ cꞌuxeꞌ weꞌel tsaꞌ bʌ ajqꞌui melel bʌ dios tyac. Maꞌ mi laꞌ cꞌuxeꞌ chꞌichꞌ. Maꞌ mi laꞌ cꞌuxeꞌ yʌtsꞌʌl bʌ animal. Cʌñʌtyan laꞌ bʌ chaꞌan maꞌan tꞌan yicꞌot yambʌ mach bʌ laꞌ wijñamic mach bʌ laꞌ ñoxiꞌalic. Mi ti laꞌ chꞌujbi pejtyel jini, weñʌch mi quej laꞌ wajñel. Jini jach mi lojon c subeñetla ti jun jini.

30 Cheꞌ jini ili chʌntiquil winic ti loqꞌuiyob majlel. Cheꞌ ñac ti cꞌotiyob yaꞌ ti Antioquía tiꞌ xiqꞌui i muchꞌquiñob i bʌ pejtyel ochemoꞌ bʌ tiꞌ tꞌan Dios. Ti yʌqꞌueyob jini carta.

31 Cheꞌ ñac ochemoꞌ bʌ tiꞌ tꞌan Dios tiꞌ qꞌueleyob jini carta cꞌajañayob i yoj ti yubiyob. Ti ñuc isʌbentiyob i pusicꞌal chaꞌan ti jini tsaꞌ bʌ i qꞌueleyob ti jun.

32 Dios ti yʌqꞌueyob Judas yicꞌot Silas i ñaꞌtyan bajcheꞌ miꞌ wen chaꞌleñob subtꞌan. Jin chaꞌan jiñob tiꞌ wen ñuc isʌbeyob i pusicꞌal ochemoꞌ bʌ tiꞌ tꞌan Dios jeꞌel. Tiꞌ xiqꞌuiyob i xucꞌchocoñob i pusicꞌal tiꞌ tꞌan Dios.

33 Cheꞌ ñac yaꞌ ti cʌyleyob chaꞌpꞌej uxpꞌej qꞌuin jini hermañujob ti yʌqꞌueyob i chaꞌ sujtyel cꞌʌlʌl yaꞌ baꞌan jini tsaꞌ bʌ i xiqꞌuiyob tyʌlel. Tiꞌ subeyob sujtyel tiꞌ ñʌchꞌtyʌlel i pusicꞌal.

34 Silas tiꞌ qꞌuextyʌ i pusicꞌal chaꞌan cʌylec yaꞌi.

35 Pablo yicꞌot Bernabé yaꞌ ti cʌyle ti Antioquía jeꞌel. Jiñob yicꞌot yañoꞌ bʌ yi tiꞌ bej chaꞌleyob cʌntisʌ yicꞌot subtꞌan chaꞌan i tꞌan lac Yum.

36 Cheꞌ ñac ti ñumi chaꞌpꞌej uxpꞌej qꞌuin Pablo tiꞌ sube Bernabé: Conla. Laꞌ lac chaꞌ julaꞌan ti pejtyel lum tyac baꞌ ti lac subu i tꞌan lac Yum chaꞌan lac julaꞌan ochemoꞌ bʌ tiꞌ tꞌan Dios chaꞌan mi laj qꞌuel bajcheꞌ añob. Cheꞌ ti yʌlʌ Pablo.

37 Bernabé yom i pʌy majlel yicꞌot Juan chaꞌchajp bʌ i cꞌabaꞌ Marcos.

38 Pero mach chʌꞌiqui tiꞌ ñaꞌtyʌ Pablo como tiꞌ yambʌ ora jini Juan tiꞌ cʌyʌyob yaꞌ ti Panfilia.

39 Cabʌl tiꞌ chaꞌleyob tsʌts bʌ tꞌan. Pero mach junlajal tiꞌ ñaꞌtyʌyob. Jin chaꞌan tiꞌ cʌyob i bʌ. Bernabé tiꞌ pʌyʌ majlel Marcos. Ti ochiyob ti barco chaꞌan majlicob ti Chipre.

40 Pero Pablo ti yajcʌ Silas chaꞌan mi majlel yicꞌot. Jini ochemoꞌ bʌ tiꞌ tꞌan Dios tiꞌ tyajayob ti oración chaꞌan Dios miꞌ chʌc cotyañob. Cheꞌ jini ti loqꞌuiyob majlel.

41 Ti ñumiyob majlel yaꞌ ti Siria yicꞌot yaꞌ ti Cilicia chaꞌan miꞌ xucꞌchocobeñob i pusicꞌalob jini ochemoꞌ bʌ tiꞌ tꞌan Dios.