2 Pejtyel ochemoꞌ bʌ tiꞌ tꞌan Dios yaꞌ ti Listra yicꞌot yaꞌ ti Iconio tiꞌ qꞌueleyob ti ñuc Timoteo.

3 Pablo yom i pʌy majlel Timoteo ti toñel yicꞌot, pero ñaxan ti yʌqꞌue ti tsepol i pʌchʌlel chaꞌan maꞌ miꞌ lolon chaꞌleñob cabʌl lolon tꞌan israelob yaꞌ baꞌ mi quej i majlelob. Como pejtyelel israelob yaꞌi yujilob isujm chaꞌan griego bʌ winic i tyat Timoteo. Jini griegojoꞌ bʌ winicob machꞌan mi yʌqꞌuen i chꞌʌm tsep pʌchʌlel i yalobilob.

4 Yaꞌ ti pejtyel jini lum tyac baꞌ ti ñumi Pablo yicꞌot Silas yicꞌot Timoteo tiꞌ wen subeyob ochemoꞌ bʌ tiꞌ tꞌan Dios pejtyel tsaꞌ bʌ i yʌlʌ jini yajcʌbiloꞌ bʌ ajsubtꞌañob ñumel yicꞌot ancianojob yaꞌ ti Jerusalén.

5 Chʌꞌʌch bajcheꞌ jini ti wen xucꞌchocobentiyob i pusicꞌal jini ochemoꞌ bʌ tiꞌ tꞌan Dios. Ti jujumpꞌej qꞌuin ti ocꞌʌyob.

6 Jini Chꞌujul bʌ i Chꞌujlel Dios maꞌan ti yʌqꞌueyob i chaꞌleñob subtꞌan yaꞌ ti pañimil Asia bʌ i cꞌabaꞌ. Jin chaꞌan ti tꞌuñuyob ñumel ti yambʌ pañimil tyac Frigia yicꞌot Galacia bʌ i cꞌabaꞌ.

7 Cheꞌ ñac ti cꞌotiyob yaꞌ tiꞌ tiꞌ pañimil Misia bʌ i cꞌabaꞌ tiꞌ lolon ñaꞌtyʌyob mi quej i yochelob ti yambʌ pañimil Bitinia bʌ i cꞌabaꞌ. Pero jini Chꞌujul bʌ i Chꞌujlel Jesús maꞌan ti yʌcꞌʌ ochel.

8 Cheꞌ jach ti ñumiyob cꞌʌlʌl yaꞌ tiꞌ tiꞌ Misia. Ti cꞌotiyob ti lum Troas bʌ i cꞌabaꞌ yaꞌ tiꞌ tiꞌ colem jaꞌ.

9 Cheꞌ ñac yaꞌ tyo añob yaꞌi, ti jumpꞌej acꞌbʌlel Pablo ti yilʌ cheꞌ bajcheꞌ ti ñajal juntiquil winic am bʌ ti pañimil Macedonia bʌ i cꞌabaꞌ. Waꞌal jini winic. Chʌncol i pejcan ti wocol tꞌan. Ti yʌlʌ: Wʌꞌ maꞌ tyʌlel ti Macedonia chaꞌan maꞌ cotyañon lojon. Cheꞌ ti yʌlʌ jini winic.

10 Cheꞌ ñac ti yilʌ Pablo cheꞌ bajcheꞌ ti ñajal jini winic am bʌ ti Macedonia, ora jach tic chajpʌ lojon c bʌ chaꞌan mi lojon c majlel yaꞌi. Joñon Lucason tsaꞌ bʌ c tsꞌijbu ili jun ti majliyon quicꞌotyob como ti lojon c ñaꞌtyʌ Dios chʌncol i chocon lojon majlel yaꞌi chaꞌan mi lojon c subeñob bajcheꞌ miꞌ tyajob i cotyʌntyel.

11 Yaꞌ ti Troas ti ochiyon lojon ti barco. Tyoj ti majliyon lojon yaꞌ ti lum joyol bʌ ti jaꞌ Samotracia bʌ i cꞌabaꞌ. Ti yijcꞌʌlel ti cꞌotiyon lojon yaꞌ ti lum Neápolis bʌ i cꞌabaꞌ.

12 Yaꞌi ti loqꞌuiyon lojon ti barco. Ti majliyon lojon ti lum Filipos bʌ i cꞌabaꞌ. Jiñʌch más ñuc bʌ lum ti Macedonia tiꞌ tyojel pasoꞌ qꞌuin. An tiꞌ wenta romanojob. Yaꞌ ti cʌyleyon lojon chaꞌpej uxpꞌej qꞌuin.

13 Ti jumpꞌej qꞌuin cheꞌ i qꞌuinilel cꞌaj oj ti loqꞌuiyon lojon majlel tiꞌ tiꞌ jini lum. Ti buchleyon lojon yaꞌ tiꞌ tiꞌ jaꞌ baꞌ miꞌ beleꞌ muchꞌquiñob i bʌ quixtyañujob ti oración. Ti lojon c sube i tꞌan Dios jini xꞌixicob tsaꞌ bʌ cꞌotiyob.

14 Lidia i cꞌabaꞌ jini juntiquil tsaꞌ bʌ cꞌoti. Chꞌoyol bʌ ti lum Tiatira bʌ i cꞌabaꞌ. Xchon pisil jini Lidia. Miꞌ chon cꞌotyajax bʌ chʌccojam bʌ pisil. Jini Lidia muꞌ bʌ i chꞌujutisan Dios chʌncol i wen ñʌchꞌtyan i tꞌan Dios bajcheꞌ tiꞌ subu Pablo. Cheꞌ jini lac Yum tiꞌ nijcʌbe i pusicꞌal chaꞌan i ñaꞌtyan chʌ bʌ ti yʌlʌ Pablo.

15 Tiꞌ chꞌʌmʌ jaꞌ jini Lidia yicꞌot pejtyelel añoꞌ bʌ ti yotyot. Ti wiꞌil ti wocol tꞌan tiꞌ subeyon lojon: Mi jatyetla mi laꞌ ñaꞌtyan yoque melelʌch ochemon tiꞌ tꞌan Dios a wocolic mi laꞌ tyʌlel ti poj jijlel ti cotyot. Wersa tiꞌ subon lojon c majlel. Cheꞌ jini ti lojon c jacꞌbe i tꞌan.

16 Jumpꞌej qꞌuin cheꞌ ñac chʌncol lojon c majlel yaꞌ baꞌ i tyʌlel ti lojon c chaꞌle oración ti lojon c tyaja juntiquil xcꞌalʌl an yicꞌot xiba tiꞌ pusicꞌal. Jini xiba am bʌ tiꞌ pusicꞌal ti yʌqꞌue i luꞌ niqꞌui ñaꞌtyan chʌ bʌ yes mi quej i yujtyel. Moso jini xcꞌalʌl. Jini i yumob tiꞌ ganariyob cabʌl tyaqꞌuin como miꞌ cꞌajtibeñob i tyojol chaꞌan i subeñob quixtyañujob chʌ bʌ yes mi quej i yujtyel.

17 Jini xcꞌalʌl ti queji i tsʌcleñon lojon majlel yicꞌot Pablo. Ti cꞌam bʌ tꞌan ti yʌlʌ: Iliyi winicob jiñʌch muꞌ bʌ i chaꞌliben i troñel Dios machꞌʌ baꞌan i pꞌisol i ñuclel. Chʌncol i subeñetla bajcheꞌ mi laꞌ tyaj laꞌ cotyʌntyel. Cheꞌ ti yʌlʌ jini xcꞌalʌl.

18 Chʌꞌʌch tiꞌ bej chaꞌle chaꞌpꞌej uxpꞌej qꞌuin. Pablo mach yomox i chʌc ubin. Ti queji i tsꞌityaꞌ michꞌqꞌuel. Jin chaꞌan tiꞌ sutqui i wut i qꞌuel jini xcꞌalʌl. Tiꞌ pejcʌ jini xiba. Ti yʌlʌ: Chaꞌan tiꞌ pꞌʌtyʌlel Jesucristo mic xiqꞌuet loqꞌuel ti ili xcꞌalʌli cheꞌen. Ora jach ti loqꞌui jini xiba.

19 Pero cheꞌ ñac tiꞌ ñaꞌtyʌ i yum xꞌcalʌl cheꞌ mach chꞌujbix i chʌc ganariñob tyaqꞌuin chaꞌan ti jini xcꞌalʌl tiꞌ chucuyob Pablo yicꞌot Silas. Tiꞌ pʌyʌyob majlel baꞌan añoꞌ bʌ yeꞌtyel yaꞌ baꞌ miꞌ chaꞌlen melojel.

20 Jini tsaꞌ bʌ i pʌyʌyob majlel tiꞌ pejcʌ añoꞌ bʌ yeꞌtyel. Ti yʌlʌ: Jini israeloꞌ bʌ winicob chʌncol i wen nijcañob quixtyañujob wʌꞌ baꞌ añonla.

21 Chʌncol i cʌntisan quixtyañujob bajcheꞌ ñʌmʌl i beleꞌ chaꞌleñob israelob. Pero mach yom mi la cubin. Mach yom lac chaꞌlen bajcheꞌ miꞌ cʌntisañob como romanojonla. Cheꞌ ti yʌlʌyob.

22 Cheꞌ jini pejtyel quixtyañujob ti queji i contrajiñob Pablo yicꞌot Silas. Jini añoꞌ bʌ yeꞌtyel tiꞌ xiqꞌui i jochbeñob i pislel chaꞌan mi yʌcꞌbeñob ti tyeꞌ.

23 Cheꞌ ñac ti ujti i wen acꞌbeñob ti yotsʌyob ti cʌchol. Jini am bʌ yeꞌtyel tiꞌ xiqꞌui ajcʌñʌtya cʌchonibʌl chaꞌan miꞌ wen cʌñʌtyañob.

24 Cheꞌ ñac ti yubi ili tꞌan, jini ajcʌñʌtya cʌchonibʌl ti yotsʌyob ti más tyam bʌ cʌchonibʌl. Tiꞌ ñetꞌbeyob yoc ti tabla melel yicꞌot chaꞌpꞌej baꞌ tyocol baꞌ mi yotsan yoc.

25 Cheꞌ bajcheꞌ ti xiñil acꞌbʌlel chʌncolob ti oración yicꞌot chʌncol i cꞌʌyob Dios Pablo yicꞌot Silas. Jini yambʌ xcʌcholob chʌncol i ñʌchꞌtyañob.

26 Ti saj ora jach ti ñumi yoque pꞌʌtyʌl bʌ i yujquel lum. Tiꞌ wen nijcʌ pejtyel cʌchonibʌl cꞌʌlʌl tiꞌ chujquil. Ti bajñel jajmi pejtyel i tiꞌ tyac cʌchonibʌl. Ti luꞌ tijqui i cadeñajlel tyac pejtyel cʌchʌloꞌ bʌ.

27 Ti pꞌixi jini ajcʌñʌtya cʌchoñibʌl. Cheꞌ ñac ti yilʌ cheꞌ luꞌ jamʌlix pejtyel i tiꞌ tyac cʌchonibʌl tiꞌ chꞌʌmʌ i machit chaꞌan i bajñel tsʌnsan i bʌ como tiꞌ lolon ñaꞌtyʌ chaꞌan ti putsꞌiyob pejtyel xcʌcholob.

28 Pero Pablo tiꞌ chaꞌle cꞌam bʌ tꞌan. Ti yʌlʌ: Mach a tyʌcꞌlan a bʌ. Wʌꞌʌch luꞌ añon lojon, cheꞌen.

29 Jini ajcʌñʌtya cʌchonibʌl tiꞌ cꞌajti cꞌajc. Ti ochi ti ajñel yaꞌ baꞌan Pablo yicꞌot Silas. Tsitsiña ti bʌqꞌuen ti ñocle yaꞌ ti yeba yoc Pablo yicꞌot Silas.

30 Cheꞌ jini tiꞌ pʌyʌyob loqꞌuel ti cʌchonibʌl. Tiꞌ cꞌajtibeyob: Winicob, ¿chuquiyes yom c chaꞌlen chaꞌan mic tyaj j cotyʌntyel? cheꞌ ti yʌlʌ.

31 Pablo yicꞌot Silas tiꞌ jacꞌʌyob: Chꞌujbin lac Yum Jesucristo. Cheꞌ jini mi quej a tyaj a cotyʌntyel, jatyet yicꞌot jini añoꞌ bʌ ti a wotyot. Cheꞌ tiꞌ jacꞌʌ Pablo yicꞌot Silas.

32 Cheꞌ jini tiꞌ subeyob i tꞌan lac Yum pejtyelel jini añoꞌ bʌ ti yotyot ajcʌñʌtya cʌchonibʌl.

33 Aunque acꞌbʌlelix, ti jini jach bʌ ora jini ajcʌñʌtya cʌchonibʌl tiꞌ pocbeyob i lojwel tyac. Cheꞌ jini tiꞌ waꞌ chꞌʌmʌyob jaꞌ jini ajcʌñʌtya cʌchonibʌl yicꞌot pejtyelel añoꞌ bʌ ti yotyot.

34 Cheꞌ jini tiꞌ pʌyʌyob ochel ti yotyot Pablo yicꞌot Silas. Ti yʌqꞌueyob i yuchꞌel. Wen cꞌajacñayob i yoj jini ajcʌñʌtya cʌchonibʌl yicꞌot añoꞌ bʌ ti yotyot como tiꞌ chꞌujbiyob Dios.

35 Cheꞌ yomox sʌcꞌan jini añoꞌ bʌ yeꞌtyel tiꞌ xiqꞌui majlel policíajob ti cʌchonibʌl chaꞌan miꞌ subeñob ajcʌñʌtya cʌchonibʌl chaꞌan i colob Pablo yicꞌot Silas.

36 Jini ajcʌñʌtya cʌchonibʌl tiꞌ sube Pablo: Jini añoꞌ bʌ yeꞌtyel tiꞌ xiqꞌuiyon chaꞌan mij coletla. Wale chꞌujbiyix loqꞌuiquetla ti libre. Cheꞌ ti yʌlʌ jini ajcʌñʌtya cʌchonibʌl.

37 Pero Pablo tiꞌ subeyob jini policíajob: Joñon lojon romanojon lojon. Tiꞌ tyojlelob quixtyañujob ti yʌcꞌbeyon lojon ti tyeꞌ cheꞌ ñac maꞌan ti saj yʌcꞌon lojon c mel lojon c bʌ. Ti yotsʌyon lojon ti cʌchonibʌl. Wale yomob i mucul locꞌsañon lojon. Mach chʌꞌic yom. Laꞌ tyʌlicob i bajñel locꞌsañon lojon. Cheꞌ ti yʌlʌ Pablo.

38 Jini policíajob ti sujtiyob. Tiꞌ wen subeyob jini añoꞌ bʌ yeꞌtyel pejtyel chʌ bʌ ti yʌlʌ Pablo. Jini añoꞌ bʌ yeꞌtyel ti quejiyob ti bʌqꞌuen cheꞌ ñac ti yubiyob chaꞌan romanojob Pablo yicꞌot Silas.

39 Jini añoꞌ bʌ yeꞌtyel ti majliyob yaꞌ ti cʌchonibʌl. Tiꞌ cꞌajtibeyob Pablo yicꞌot Silas chaꞌan miꞌ ñusʌbeñob pejtyelel jini tsaꞌ bʌ ujti. Cheꞌ jini tiꞌ pʌyʌyob loqꞌuel ti cʌchonibʌl. Tiꞌ cꞌajtibeyob chaꞌan loqꞌuicob ti jini lum.

40 Cheꞌ ñac ti loqꞌui ti cʌchonibʌl Pablo yicꞌot Silas ti majliyob ti yotyot Lidia. Ti chaꞌ pejcʌyob ochemoꞌ bʌ tiꞌ tꞌan Dios. Ti ñuc isʌbeyob i pusicꞌal. Cheꞌ jini ti loqꞌuiyob majlel.